Aborahama le Sara ba Ile ba kwa Modimo

Kgauswi le motse wa Babele go be go na le motse wo o bitšwago Uri. Batho ba motseng woo ba be ba sa rapele Jehofa, eupša ba be ba rapela medimo e mentši ya maaka. Eupša motseng woo go be go na le monna yo mongwe yo a bego a rapela Jehofa feela. Leina la gagwe e be e le Aborahama.

Jehofa o ile a re go Aborahama: ‘Tloga nageng ye ya Uri, o tlogele le ba geno gomme o ye nageng yeo ke tlago go go bontšha yona.’ Jehofa o ile a mo tshepiša a re: ‘O tlo ba setšhaba se segolo, gomme ke tlo direla batho ba bantši lefaseng ka moka dilo tše dibotse ka baka la gago.’

Aborahama o be a sa tsebe gore Jehofa o mo iša kae, eupša o ile a no tshepa Jehofa. Ka gona Aborahama, mosadi wa gagwe e lego Sara, tatagwe e lego Thera le motlogolo wa gagwe e lego Lota, ba ile ba paka merwalo ya bona gomme ba thoma leeto le letelele.

Aborahama o be a na le mengwaga e 75 ge yena le lapa la gagwe ba fihla nageng yeo Jehofa a bego a nyaka ba e bona. Naga yeo e be e bitšwa Kanana. Gona moo, Jehofa o ile a bolela le Aborahama gomme a mo tshepiša a re: ‘Naga ye ka moka ke tlo e nea bana ba gago.’ Eupša Aborahama le Sara ba be ba tšofetše gomme ba se na bana. Bjale Modimo o be a tla dira bjang seo a ba tshepišitšego sona?