Ngwana Mafelelong!

Aborahama le Sara ba be ba na le mengwaga e mentši ba nyalane. Ba be ba tlogetše ntlo ya bona e botse kua Uri gomme ba dula ka tenteng. Eupša Sara ga se a ka a llela ntlo ya gagwe, ka gobane o be a rata Jehofa.

Sara o be a nyaka ngwana kudu moo a ilego a bolela le Aborahama a re: ‘Ge mohlanka wa ka Hagara a ka ba le ngwana, le nna e tla ba wa ka.’ Ge nako e dutše e eya, Hagara o ile a ba le ngwana wa mošemane. Leina la gagwe e be e le Ishimaele.

Ka morago ga mengwaga e mentši, ge Aborahama a na le mengwaga e 99 gomme Sara a na le e 89, ba ile ba etelwa ke batho ba bararo. Aborahama o ile a dula le bona ka tlase ga sehlare gomme a ja dijo le bona. Na o a tseba gore baeng bao e be e le bomang? E be e le barongwa! Ba ile ba botša Aborahama ba re: ‘Ngwaga o tlago ka yona nako ye, wena le mosadi wa gago le tla ba le na le ngwana wa mošemane.’ Sara o be a ba theeditše a le ka tenteng. O ile a sega a nnoši gomme a re: ‘Na ruriruri nka ba le ngwana ke tšofetše ka tsela ye?’

Ngwageng o latetšego, Sara o ile a ba le ngwana wa mošemane, go etša ge barongwa ba Jehofa ba be ba tshepišitše. Aborahama o ile a mo reela leina a re ke Isaka, e lego leina leo le bolelago gore ‘Ditshego.’

Ge Isaka a na le mengwaga e ka bago e mehlano, Sara o ile a bona gore Ishimaele o dula a kwera Isaka. Sara o be a nyaka go šireletša ngwana wa gagwe e lego Isaka, ka gona a botša Aborahama gore a rake Hagara le Ishimaele. Mathomong, Aborahama o ile a gana. Eupša Jehofa a re go yena: ‘Theetša Sara. Ke tla hlokomela Ishimaele. Eupša ke tlo šomiša Isaka go phetha ditshepišo tša ka.’