Jehofa o Ile a Bolela le Samuele

Moperisita yo a Phagamego e lego Eli o be a na le barwa ba babedi bao ba bego ba šoma e le baperisita taberenakeleng. Maina a bona e be e le Hofini le Finease. Ba be ba sa kwe Jehofa, gomme ba swara batho gampe. Ge Baisiraele ba be ba tlišetša Jehofa dihlabelo, Hofini le Finease ba be ba itšeela dinama tše dikgolo le tša go nona dihlabelong tšeo. Eli o ile a kwa ka seo barwa ba ba gagwe ba se dirago, eupša a se ba kgale. Na Jehofa o be a tla ba tlogela gore ba tšwele pele ba dira dilo tše?

Le ge Samuele e be e le yo monyenyane kudu go Hofini le Finease, ga se a ka a ba ekiša. Jehofa o ile a thabišwa ke Samuele. Bošegong bjo bongwe ge Samuele a robetše, o ile a kwa lentšu le mmitša. O ile a tsoga, a kitimela go Eli gomme a re: “Ke nna yo.” Eupša Eli a re: “Ga se ka go bitša. Boela o yo robala.” Samuele a tloga a yo robala. Lentšu leo le ile la mmitša ka lekga la bobedi. Ge Samuele a ekwa lentšu leo ka lekga la boraro, Eli o ile a tseba gore ke Jehofa yo a bego a bitša Samuele. Ke moka a botša Samuele gore ge a ka kwa lentšu leo gape, a arabe a re: “Jehofa, bolela, mohlanka wa gago o theeditše.”

Samuele o ile a tloga a yo robala. Ke moka a kwa lentšu le re: “Samuele! Samuele!” Yena a araba a re: “Bolela, mohlanka wa gago o theeditše.” Jehofa a re: ‘Botša Eli gore ke tlo mo otla le lapa la gagwe, ka gobane yena o tseba dilo tše mpe tšeo bana ba gagwe ba di dirago moo taberenakeleng, eupša o no ba tlogela.’ Mesong e latelago, Samuele o ile a bula mejako ya taberenakele, go swana le ka matšatši a mangwe. O be a tšhaba go botša moperisita yo a phagamego e lego Eli seo Jehofa a se boletšego. Eupša Eli o ile a bitša Samuele gomme a re go yena: ‘Samuele, ke eng seo Jehofa a go boditšego sona? O se ke wa tšhaba, mpotše dilo ka moka.’ Ka gona Samuele a botša Eli dilo ka moka tšeo Jehofa a di boletšego.

Ge Samuele a dutše a gola, Jehofa o ile a dula a mo thekga. Baisiraele ka moka ba ile ba tseba gore Jehofa o kgethile Samuele gore e be moporofeta le moahlodi wa bona.