Jehofa o Ile a Nea Eliya Matla

Isebele o ile a kwa gore baporofeta ba modimo wa Baali ba bolailwe, gomme a galefa kudu. O ile a romela molaetša go Eliya gomme a re go yena: ‘Gosasa ke tlo go bolaya, go swana le ge o bolaile baporofeta ba Baali.’ Eliya o ile a tšhoga kudu gomme a tšhabela lešokeng. O ile a rapela Jehofa a re: ‘Jehofa, ga ke sa kgona. Ntlogele ke hwe.’ Ka ge a be a lapišitšwe ke leeto leo, o ile a robala ka tlase ga sehlare.

Morongwa wa Jehofa o ile a tla a mo tsoša gomme a re go yena: “Tsoga o je.” Eliya o ile a bona senkgwa godimo ga maswika a go fiša le meetse. O ile a ja senkgwa seo gomme a nwa le meetse ao, ke moka a robala gape. Morongwa o ile a mo tsoša gape a re: ‘Eja, ka gobane o sa tlo sepela leeto le letelele.’ Ka gona Eliya a ja gape, gomme a kgona go sepela matšatši a 40 le mašego a 40, go fihlela a fihla Thabeng ya Horebe. Ge a fihla moo, Eliya o ile a tsena ka leweng gore a robale. Eupša Jehofa o ile a bolela le yena a re: “O nyaka eng mo Eliya?” Eliya a araba a re: ‘Baisiraele ga ba sa nyaka go go rapela. Ba sentše dialetare tša gago e bile ba bolaile baporofeta ba gago. Gona bjale ba nyaka go bolaya nna.’

Jehofa a re go Eliya: ‘Etšwa o eme mo thabeng.’ Ke moka phefo e kgolo ya feta mojakong wa lewa leo Eliya a bego a eme go lona. Ka morago, lefase la šišinyega gomme gwa ba le mollo. Mafelelong, Eliya a kwa lentšu la tlasana. O ile a khupetša sefahlego sa gagwe ka seaparo gomme a ema mojakong wa lewa leo. Ke moka Jehofa a mmotšiša gore ke ka baka la eng a tšhabile. Eliya o ile a re: ‘Go šetše nna feela.’ Eupša Jehofa a re: ‘Ga se gwa šala wena feela. Go sa na le Baisiraele ba bangwe ba 7 000 bao ba rapelago nna. Sepela o yo kgetha Elisha gore e be moporofeta legatong la gago.’ Gateetee Eliya a ya a dira seo Jehofa a mmoditšego sona. Na o nagana gore le wena Jehofa o tla go thuša ge o dira dilo tšeo a rego o di dire? Ee o tla go thuša. Anke ga bjale re kwe ka selo se sengwe seo se diragetšego ge pula e be e sa ne.