Gabariele o Etela Maria

Elisabetha o be a na le motswala yo a bitšwago Maria, yoo a bego a dula motseng wa Natsaretha kgauswi le Galilea. Maria e be e le kgarebe, e bile o be a tlo nyalana le Josefa, yoo a bego a šoma go betla dilo. Ge Elisabetha a be a na le dikgwedi tše tshelelago a imile, morongwa Gabariele o ile a tla go Maria gomme a re: ‘Dumela Maria. Jehofa o go ratile kudu.’ Maria o ile a se kwešiše mantšu ao, ka gona Gabariele a re go yena: ‘Tseba gore o tlo ima gomme wa belega ngwana wa mošemanyana. Leina la gagwe o mmitše Jesu. O tlo buša e le Kgoši. Mmušo wa gagwe o ka se fele.’

Maria a re: ‘Ga sa nka ka robala le monna, ke tla ba le ngwana bjang?’ Gabariele a re: ‘Jehofa ga a palelwe ke selo. Moya o mokgethwa o tla theogela go wena, gomme o tla ba le ngwana wa mošemanyana. Motswala wa gago e lego Elisabetha le yena o imile.’ Ke moka Maria a re: ‘Ke nna lekgoba la Jehofa. A go ntiragalele go ya ka moo o boletšego ka gona.’

Maria o ile a etela Elisabetha motseng woo o lego dithabeng. Ge Maria a mo dumediša, Elisabetha o ile a kwa lesea le tshela ka mpeng ya gagwe. Jehofa o ile a nea Elisabetha moya o mokgethwa gomme a re: ‘Maria, Jehofa o go šegofaditše. Ruri le nna ke šegofaditšwe ka go etelwa ke mmago Morena wa ka.’ Maria a re: ‘Ke tumiša Jehofa ka pelo ya ka ka moka.’ Maria o ile a dula le Elisabetha dikgwedi tše tharo, ke moka ka morago a boela gae Natsaretha.

Ge Josefa a ekwa gore Maria o imile, o ile a nyaka go se sa mo nyala. Eupša morongwa o ile a tšwelela go yena torong gomme a re: ‘O se ke wa tšhaba go nyala Maria. Ga se a senya selo.’ Ka gona Josefa a nyala Maria gore e be mosadi wa gagwe gomme ba dula gotee.