Jesu o Fodiša Batho ka Letšatši la Sabatha

Bafarisei ba be ba hloile Jesu e bile ba nyaka lebaka la go mo swara. Ba be ba re a se ke a fodiša balwetši ka letšatši la Sabatha. Ka Sabatha e nngwe, Jesu o ile a bona monna yo mongwe wa sefofu a kgopela batho dilo. Jesu o ile a re go barutiwa ba gagwe: ‘Bonang ge Modimo a fodiša monna yo.’ Ka gona Jesu a duba leraga ka mare a gagwe gomme a le tlotša mahlong a monna yoo. Ke moka Jesu a re go monna yoo: ‘Sepela o yo hlapa mahlo letamong la Siloama.’ Monna yoo a ya a hlapa gomme a thoma go bona. E be e le la mathomothomo monna yoo a bona.

Batho ba ile ba makala, ke moka ba re: ‘ Na monna yo ga se yena yo a bego a kgopela batho dilo, goba ba no swana?’ Monna yoo a ba araba a re: ‘Ke nna yena!’ Batho bao ba mmotšiša ba re : ‘Bjale go tlile bjang gore mahlo a gago a bone?’ Ka morago ga ge a ba boditše seo se diragetšego, ba mo iša go Bafarisei.

Ge a fihla go Bafarisei, a re go bona: ‘Jesu o dubile leraga a le tlotša mahlong a ka, ke moka a re ke yo le hlapa. Ka ya ka hlapa gomme ka bona.’ Ke moka Bafarisei ba re: ‘Ge e ba Jesu a fodiša balwetši ka Sabatha, gona matla ao a ba fodišago ka ona ga a tšwe go Modimo.’ Eupša batho ba bangwe ba re: ‘Ge nkabe matla a gagwe a sa tšwe go Modimo, o be a ka se kgone go fodiša batho.’

Bafarisei ba ile ba bitša batswadi ba monna yoo, gomme ba re go bona: ‘Go tlile bjang gore ngwana wa lena a kgone go bona?’ Batswadi ba gagwe ba be ba tšhaba Bafarisei, ka gobane Bafarisei ba be ba re ge e ba motho le ge e le ofe a dumela go Jesu, a rakwe sinagogeng. Ke moka batswadi ba gagwe ba re: ‘Rena ga re tsebe gore go tlile bjang gore a bone. Botšišang yena.’ Bafarisei ba botšiša monna yoo dipotšišo tše dintši go fihlela a re go bona: ‘Ke šetše ke le boditše, kgane ga se la nkwa?’ Ka gona Bafarisei ba kwata gomme ba mo lahlela ka ntle.

Jesu a ya go nyaka monna yoo, gomme ge a mo hweditše a re go yena: ‘Na o dumela go Mesia?’ Ke moka monna yoo a re: ‘Ke be ke tla dumela go yena ge nkabe ke mo tseba.’ Jesu a re go yena: ‘Ke nna Mesia.’ Ge Jesu a be a botša monna yoo gore ke yena Mesia, na seo se be se sa bontšhe gore Jesu o na le lerato? Jesu ga se a fo fodiša monna yoo, eupša gape o ile a mo thuša go dumela go yena.