Jesu o a Swarwa

Ka letšatši le lengwe, Jesu le baapostola ba gagwe ba ile ba feta Moeding wa Kidirone ba eya Thabeng ya Mehlware. E be e le bošego, gomme ngwedi o bonala gabotse. Ge ba fihla serapeng sa Getsemane, Jesu o ile a re go bona: ‘Dulang mo gomme le se ke la robala.’ Ke moka Jesu a fetela pejana ka serapeng seo, a fihla a khunama. Ka ge a be a nyamile kudu, o ile a rapela Jehofa a re: ‘Tate, anke go direge thato ya gago.’ Ka gona Jehofa a romela morongwa gore a yo matlafatša Jesu. Ge Jesu a boela go baapostola ba gagwe ba bararo, o ile a hwetša ba robetše. O ile a re go bona: ‘Tsogang! Ye ga se nako ya go robala! Nako ya gore ke newe manaba a ka e fihlile.’

Gateetee Judase a fihla, a eteletše pele lešaba leo le swerego dithipa le melamo. Judase o be a tseba gore o tlo hwetša Jesu serapeng seo sa Getsemane, ka gore ba be ba rata go ya serapeng seo. O be a boditše mašole ao a bego a sepela le wona gore o tla a šupetša Jesu. O ile a ya go Jesu gomme a re: ‘Dumela Morutiši,’ ke moka a mo khisa. Jesu a re: ‘Judase, o nthekiša ka khisi?’

Jesu o ile a batamela batho bao gomme a re go bona: ‘Le nyaka mang?’ Ba re: ‘Re nyaka Jesu wa Monatsaretha.’ Ke moka a re: “Ke nna yena.” Ke moka ba katakatela morago gomme ba wela fase. A ba botšiša gape a re: “Le nyaka mang?” Ba re: ‘Re nyaka Jesu wa Monatsaretha.’ Jesu a re: ‘Ke le boditše gore ke nna yena. Lesang baapostola ba ka ba sepele.’

Ge Petro a bona seo se diregago, a ntšha thipa gomme a ripa tsebe ya Malekose, yoo e bego e le mohlanka wa moperisita yo a phagamego. Eupša Jesu o ile a kgwatha tsebe ya Malekose gomme a mo fodiša. Ke moka Jesu a re go Petro: ‘Bušetša thipa ya gago lefelong la yona. Ge e ba o elwa le batho ka thipa, le wena o tla bolawa ka thipa.’ Mašole ao a ile a swara Jesu gomme a mo tlema diatla. Baapostola ba gagwe ba ile ba tšhaba. Ke moka batho bao ba iša Jesu go moperisita yo mogolo e lego Annase. Annase o ile a sekiša Jesu gomme ka morago a mo romela go Moperisita yo a Phagamego e lego Kayafa. Eupša go ile gwa direga eng ka baapostola ba Jesu?