THUTO 4

Mangwalo a Rotšwe Gabotse

Mateo 22:41-45

KA BORIPANA: Pele o bala lengwalo, dira gore batheetši ba bone gore ke ka baka la eng o le bala.

Ipotšiše gore ke ka baka la eng o bala lengwalo leo. Pele o bala lengwalo, thuša batheetši gore ba tle ba kgone go ikhweletša ntlha yeo o nyakago ba e bona lengwalong leo.

Tseba ditemana tše di lego kgauswi le temana yeo o nyakago go e bala. Ge o botša batheetši gore ke mang a bolelago temaneng e itšego goba gore puku e itšego ya Beibele e ngwadilwe ke mang, kgonthišetša gore ditaba tšeo ke nnete.
Diriša Beibele ge o ruta. Ge o bolela le batho bao ba dumelago go Modimo, dira gore ba bone gore seo o se rutago se tšwa Lentšung la Modimo. Ge o dira bjalo, o tla ba o ba bontšha gore o ba ruta dikgopolo tša Modimo, e sego tša gago.
Pele o bala temana, dira gore batheetši ba nyake go kwa gore e tlo ba hola bjang. Botšiša potšišo yeo lengwalo leo o nyakago go le bala le tlago go e araba, goba bolela bothata bjo itšego bjoo lengwalo leo le tlago go bo rarolla, goba o bolele molao wa motheo ke moka o bale pego e itšego ya ka Beibeleng go thuša batheetši go kwešiša molao woo wa motheo.

Nagana seo batheetši ba gago ba šetšego ba se tseba ka taba yeo o ba rutago yona le lengwalo leo o nyakago go le bala. Pele o bala lengwalo leo batheetši ba le tsebago, le role ka tsela yeo ba sa kago ba e nagana, ke moka o ba thuše gore ba ithute selo se sefsa go lona goba go bona dintlha tšeo ba bego ba sa di lemoge.