THUTO 18

Batheetši ba Rutegile

1 Bakorinthe 9:19-23

KA BORIPANA: Dira gore batheetši ba je marapo a hlogo ka seo o ba rutago sona gomme o dire gore ba ikwe ba ithutile selo se itšego se bohlokwa.

Ipotšiše gore batheetši ba šetše ba tseba eng ka taba ya gago. Go e na le go no botša batheetši seo ba šetšego ba se tseba, dira gore ba kwe eka seo o ba rutago sona ke se sefsa ditsebeng tša bona.

Ge o bolela dintlha tšeo batheetši ba šetšego ba di tseba, di bolele kapejana, eupša o fokotše lebelo ge o bolela selo seo ba sa se tsebego.
Dira nyakišišo ka taba ya gago o be o naganišiše ka yona. Ge o nyaka go ruta batheetši dintlha tše dikgolo, o ka bolela ka dilo tšeo di sa tšwago go direga goba tšeo ba sa kago ba nagana ka tšona. Eupša ka mehla ge o dira bjalo, kgonthišetša gore dilo tšeo di dira gore polelo ya gago e rute. Nagana ka mo go tseneletšego ka taba ya gago le kamoo e sepedišanago ka gona le nyakišišo yeo o e dirilego.

Ge o dutše o lokišetša polelo ya gago, ipotšiše dipotšišo tša go swana le tše o be o ikarabele tšona: ‘eng, ka baka la eng, neng, kae, mang le bjang.’ Ge o ruta, phediša polelo ya gago ka go tšama o botšiša tše dingwe tša dipotšišo tše le go di araba.
Bontšha batheetši gore ke ka baka la eng taba ya gago e le bohlokwa. Hlalosetša batheetši kamoo seo o ba rutago sona go tšwa Mangwalong se ka ba thušago ka gona letšatši le letšatši. Bolela ka maemo ao batheetši ba a tlwaetšego, mekgwa le ditiro tšeo di ba kgomago.