Ke Bomang Bao ba Botšago Batho Ditaba tše Dibotse?

E se kgale Jehofa o tlo diriša Mmušo wa gagwe go fediša mathata ka moka a batho. Ditaba tše di kgahliša kudu. Ke ka baka leo batho ka moka ba swanetšego go di tseba. Jesu o be a nyaka gore balatedi ba gagwe ba botše batho ka moka ditaba tše. (Mateo 28:​19, 20) Dihlatse tša Jehofa di dira bjang seo Jesu a laetšego barutiwa ba gagwe gore ba se dire?

1. Lengwalo la Mateo 24:​14 le phethagala bjang lehono?

Jesu o boletše e sa le pele gore: “Ditaba tše tše dibotse tša Mmušo di tla bolelwa lefaseng ka moka.” (Mateo 24:​14) Dihlatse tša Jehofa di thabela go dira mošomo wo o bohlokwa. Re botša batho ditaba tše dibotse ka maleme a fetago a 1 000 lefaseng ka moka! Go nyakega gore re rulaganye dilo gabotse gore re kgone go dira mošomo wo o mogolo le go o thabela. Jehofa ke yena a re thušago go dira mošomo wo, re ka se kgone go o dira ka ntle le yena.

2. Re botša batho ditaba tše dibotse bjang?

Re botša batho ditaba tše dibotse kae le kae mo re ba hwetšago gona. Go no swana le Bakriste ba pele, le rena re bolela ditaba tše dibotse “ka ntlo le ntlo.” (Ditiro 5:​42) Ge re eya magaeng a batho, re kgona go bolela le batho ba dimilione ngwaga o mongwe le o mongwe. Ka ge batho ba sa dule ba le ka magaeng a bona, re ya le mafelong ao ba hwetšagalago ka bontši gore re kgone go ba botša ditaba tše tše dibotse. Re nyaka le ditsela tše dingwe tšeo re ka di dirišago go botša batho ka Jehofa, le ka dilo tšeo a tlago go re direla tšona.

3. Ke mang yo a swanetšego go botša batho ditaba tše dibotse?

Bakriste ka moka ba nnete ba swanetše go botša batho ditaba tše dibotse. Re tšea mošomo wo wa rena o le bohlokwa kudu. Re šoma ka thata gore re botše batho ditaba tše dibotse ka gore re a tseba gore mošomo wo o ka phološa maphelo a bona. (Bala 1 Timotheo 4:​16.) Ga go na motho yo a re patelago go dira mošomo wo, ka gobane Beibele e re: “Le amogetše feela, neang feela.” (Mateo 10:​7, 8) Le ge batho ba sa re theetše, re no tšwela pele re ba botša ditaba tše dibotse ka gobane re kwa Jehofa e bile re nyaka go mo thabiša.

ITHUTE KA MO GO TSENELETŠEGO

4. Re šoma ka thata gore re botše batho ka moka ditaba tše dibotse

BIDIO: Go Ruta Batho Beibele ‘Dikarolong tša Kgole tša Lefase’ (7:33)

• Ke’ng seo se go kgahlago ka dilo tšeo Dihlatse tša Jehofa di di dirago gore di kgone go botša batho ditaba tše dibotse?

Balang Mateo 22:​39 le Baroma 10:​13-15, gomme le boledišaneng ka dipotšišo tše di latelago:

• Go botša batho ditaba tše dibotse go bontšha bjang gore re a ba rata?

• Jehofa o re dinao tša batho bao ba bolelago ditaba tše dibotse di bjang, gona seo se ra gore o ikwa bjang ka bona?​—Bona temana 15.

5. Re šoma le Modimo ge re bolela ditaba tše dibotse

Re hlwa re ekwa ditaba tše dintši tšeo di bontšhago gore Jehofa ke yena a hlahlago mošomo wa rena. Ka mohlala, mantšiboeng a mangwe, ngwanabo rena Paul yo a tšwago kua New Zealand, o ile a hwetša mosadi yo mongwe ge a be a le tšhemong ka ntlo le ntlo. Mesong yona yeo, mosadi yoo o be a rapetše Modimo a diriša leina la gagwe e lego Jehofa, a mo kgopela gore go be le motho yo a tlago go mo etela. Paul o re: “Ka morago ga diiri tše tharo mosadi yoo a rapetše, ke ile ka kokota mojakong wa gagwe.”

Balang 1 Bakorinthe 3:​9, gomme le boledišaneng ka potšišo e latelago:

• Taba ye re sa tšwago go ekwa ya kua New Zealand le tše dingwe tšeo re hlwago re di kwa, di bontšha bjang gore Jehofa ke yena a hlahlago mošomo wa rena wa go bolela ditaba tše dibotse?

Balang Ditiro 1:​8, gomme le boledišaneng ka potšišo e latelago:

• Ke ka baka la’ng re hloka thušo ya Jehofa gore re kgone go dira mošomo wa rena wa go bolela ditaba tše dibotse?

Na o be o tseba?

Bekeng e nngwe le e nngwe, dibokeng tša rena tša gare ga beke re rutwa kamoo re ka dirago mošomo wa rena wa go bolela ditaba tše dibotse. Ge e ba o kile wa ya dibokeng tšeo, o ile wa kgahlwa ke’ng tseleng yeo re rutwago ka yona go dira mošomo wo?

6. Re kwa taelo ya Modimo ya gore re botše batho ditaba tše dibotse

Kgale ge Bakriste ba pele ba be ba botša batho ditaba tše dibotse, go ile gwa ba le batho bao ba lekago go ba ganetša. Bakriste bao ba ile ba lwela tshwanelo ya bona ya go bolela ditaba tše dibotse ka ge molao o be o ba dumelela go dira bjalo. (Bafilipi 1:7) Le lehono, rena Dihlatse tša Jehofa re lwela tshwanelo ya rena ya go bolela ditaba tše dibotse.a

BIDIO: Go Lwela Tshwanelo ya Rena ya go Bolela Ditaba Tše Dibotse (2:28)

Balang Ditiro 5:​27-42, gomme le boledišaneng ka potšišo e latelago:

• Ke ka baka la’ng re ka se tlogele go bolela ditaba tše dibotse?​—Bona ditemana 29, 38, le 39.

O ITHUTILE ENG?

Jesu o ile a botša balatedi ba gagwe gore ba botše batho ba ditšhaba ka moka ditaba tše dibotse. Jehofa ke yena a thušago batho ba gagwe go dira mošomo wo.

Dipotšišo

• Ke bomang bao ba botšago batho ditaba tše dibotse lefaseng ka moka?

• Go botša batho ditaba tše dibotse go bontšha bjang gore re a ba rata?

• Na o nagana gore go botša batho ditaba tše dibotse go ka re thabiša? Go re’ng o re’alo?

ITHUTE KA MO GO OKETŠEGILEGO

Ekwa kamoo Dihlatse tša Jehofa di botšago batho ditaba tše dibotse ditoropong tše dikgolo.

Lesolo le le Kgethegilego la go Nea Bohlatse Phatlalatša Toropong e Kgolo ya Paris (5:​11)

Dihlatse tša Jehofa di ile tša dira’ng go thuša batho bao ba tšhabetšego dinageng tše dingwe (goba bafaladi)?

Go Ruta Bafaladi Bao ba Nyoretšwego Therešo ka Modimo (5:​59)

Ekwa ka motho yo a hlalosago gore go fetša bophelo bja gagwe ka moka a botša batho ka Modimo go mo dira gore a thabe.

Ke Thabela Gore ke Kgethile Mošomo wo (6:​29)

Ekwa ka diphetho tše bohlokwa tšeo di ilego tša dirwa ka dikgorong tša tsheko tšeo di ilego tša dira gore go be bonolo gore re tšwele pele re botša batho ka Modimo.

“Bagoeledi ba Mmušo ba ya Dikgorong tša Tsheko” (Mmušo wa Modimo o a Buša!, kgaolo  13)