Kopano Yeo e Okeditšego go Bota ga Rena Jehofa

TATE wa rena wa legodimong, e lego Jehofa Modimo, o tseba seo re tlogago re se nyaka. Le gona o tsenya seo menaganong ya bahlanka ba gagwe ba ineetšego bao ba etelelago pele modiro wa gagwe mo lefaseng gore ba kgotsofatše seo se nyakegago. Ruri se se ka bolelwa ka Dikopano tša Selete tša “Bota Jehofa,” tšeo di swerwego go dikologa lefase go tloga ka June 1987, go ya pele. Ka kgonthe di dirile e le tšeo di matlafatšago Bakriste malebana le boemo bja go se kgodišege, bja pelaelo le go se holofele bjo bo apareditšego gakaakaa lefaseng.

Sehlogo se rego, “Bota Jehofa,” se ile sa logelelwa ka bothakga lenaneong. Se ile sa gatelelwa ke dipolelo tšeo di bego di le matla le tše lebanyago, tšeo di swailwego ke go kwala le go opa kgomo lenaka. Tše ka moka di matlafaditše go bota Jehofa ga batheetši. Ba be ba ka ya gae sehlogo se gatišitšwe dipelong le menaganong ya bona ka mo go sa phumolegego gomme ba ikemišeditše gore ka ditiro le mantšu a bona ba tla goeletša go bohle gore ba bota Jehofa ka mo go feletšego.

“Botang Jehofa, Lena Batho”

Mantšu ao a hwetšwago go Jesaya 26:4, NW, a be a emela sehlogo sa letšatši la mathomo. Ka mo go swanelago kudu lenaneo le thomile ka polelo e rego, “Sekegela Dipolelo tša Modimo Tsebe.” Seboledi se bontšhitše gore polelwana ye, yeo e tšwelelago ka makga a mantši ka Lentšung la Modimo, e bolela go hlokomedišiša seo se boletšwego ka mo go feletšego ka monagano gaešita le pelo ka maikemišetšo a go diriša seo se kwelwego. Seo se bolela go ba le boitshwaro le go hlokomedišiša seo se boletšwego gomme re sa dumelele monagano o ralala. Ke feela ka go sekega tsebe ya rena bjalo, moo go bota ga rena Jehofa go tlago go matlafatšwa ke seo re se kwago gomme ka morago re tla tutuetšwa go dira go ya ka seo se boletšwego. Le gona na ye ga se ya swanela go ba kgopolo ya rena nako le nako ge re e-kwa Lentšu la Modimo le hlaloswa, go etša dibokeng tša rena tša phuthego?

Modula-setulo wa kopano o ile a nea polelo e latelago, e rego, “Bao ba Botago Jehofa ba Thabišwa ke go ba mo.” O bontšhitše gore ge e ba go bota ga rena Jehofa e le mo gogolo, gona lethabo la rena le lona e tla ba le legolo. Go bota Jehofa go bolela go ithekga ka yena ka mo go feletšego le ka go kgodišega. Ge e ba go tseba ga rena Jehofa le lerato la rena go yena e le tše kgolo, gona go mmota ga rena le gona go tla tia. Sehlogo sa kopano e be e se feela mokgwa wa polelo. Re bontšha go bota ga rena Jehofa ka ditsela tše dintši, gomme go sa balwe tše nyenyane tšeo e lego go bontšha go naganela ba bangwe. Ka go kgahliša bohle, mafelelong a ditlhaloso tša gagwe, modula-setulo o ile a bontšha tokollo e mpsha ya mathomo, e lego sedirišwa sa mebala se holago sa go nea bohlatse. E be e le pampišana e rego, Lebaka Leo ka Lona o ka Botago Beibele.

Ka morago ga go bolela ka mohlala o lemogegago kudu wa Dafida ge a be a lebeletšane le Goliata wa senatla, seboledi se latelago se ile sa bontšha “Kamoo ba Bangwe ba Ilego ba Bota Jehofa ka Gona” mehleng ya rena. Ka mohlala, go be go e-na le kgaetšedi yoo monna wa gagwe yo a sa dumelego, a swere sethunya ka seatleng, a ilego a tšhošetša gore o tla mmolaya ge e ba a tšwela pele a e-ya dibokeng. Ba bangwe ba bontšhitše go bota ga bona Jehofa ge ba be ba botšwa gore bophelo bja bona bo be bo ithekgile ka go amogela tšhelo ya madi. Bafsa ba bontšhitše go bota ga bona Jehofa ka go gana dikgateletšo tša go tsenela dipapadi goba go kgetha thuto e phagamego ka morago ga go fetša sekolong se phagamego.

Lenaneo la mesong ya Labohlano le phethile ka polelo e rego, “Batho ba Arogilego Lefaseng.” Re bontšha gore re bota Jehofa ka go boloka boitshwaro bja rena le ba bong bjo fapanego e se bjo nyatšegago, ka go dumelela gore melao ya motheo ya Bokriste e laole boitapološo bja rena le ka go phema moaparo le go itokiša gohle moo go tlago go bonala go fsifatša phapano magareng ga banna le basadi. Ka go ba ga rena ba arogilego lefaseng ka tsela yeo, bohlatse bjo matla bo a newa nako le nako, e bile bo feleletša ka gore ba bangwe ba tle therešong.

Mathapameng a Labohlano, lenaneo le thomile ka polelo e rego, “Bobulamadibogo bo Akgofiša Kgolo ya Moya.” Seo ke sa therešo gakaakang! Ka Lentšu la Jehofa, moya wa gagwe o mokgethwa le phuthego ya gagwe, Modimo o nea seo re se nyakago gore re tšwele pele go ba “monna yo a gotšego ka botlalo,” eupja bobulamadibogo bo re bea boemong bja go diriša ditokišetšo tše tša moya ka moka gakaone le ka mo go oketšegilego. (Ba-Efeso 4:13, NW) Ka go dirišwa ga dipoledišano, babulamadibogo ba boletše kamoo bodiredi bja nako e tletšego bo dirilego gore ba kgone go hlagolela ka botlalo dienywa tša moya wa Modimo, go bontšha lerato go batho, go ba yo a atlegago kudu bodireding le go bota Jehofa ka tekanyo e oketšegilego, gomme ka tsela yeo wa ba le kwano ya kgaufsi le yena. Tše ka moka di akgofišitše kgolo ya bona ya moya.

Ka morago go ile gwa latela polelo ya thwadi e rego, “Batho Bao ba Botago Jehofa ka Mehla.” Polelo ye e tutuetšago maikwelo e bontšhitše gore re arogile lefaseng ka gobane re bota Jehofa ka mo go feletšego. Ka ge e be e theilwe ditemaneng tše fapa-fapanego tše tšwago pukung ya Jesaya, seboledi se bontšhitše kamoo re bonego diporofeto tše tše kgothatšago kudu di phethagala go Dihlatse tša Jehofa ka gobane re bota Modimo. Ka kholofelo re lebeletše pele go nako bokamosong bjo lego kgaufsi ge Jehofa a tla ba a bontšha kgalefo ya gagwe go ditšhaba tšohle gomme ka morago a tšweletša Paradeise.

Batho ba bego ba le gona kopanong ba kgothaleditšwe go “Gaša Ditaba tše di Lokilego ka Sebaka se Sengwe le se Sengwe.” Ka morago ga ge bohlokwa bja go dira seo bo gateletšwe, dipontšho tše mmalwa di ile tša bontšha kamoo pampišana e mpsha ya Lebaka Leo ka Lona o ka Botago Beibele e ka dirišwago ka katlego ka gona ka go nea bohlatse bja go ikemišetša gotee le bja go se ikemišetše. Ka kgonthe, ka mehla re nyaka go ba le dipampišana tše go rena ka gobane go gaša ditaba tše di lokilego ka sebaka se sengwe le se sengwe e swanetše go ba leswao la hlatse e nngwe le e nngwe ya Jehofa gomme ke tsela ya go bontšha gore re a Mmota.

Polelo e rego, “Batswadi, Fihlelelang Dipelo tša Bana ba Lena go Tloga Bjaneng,” e lebogilwe kudu. Gore ngwana a gole a bota Jehofa, tlwaetšo ya gagwe e swanetše go thoma bjaneng gomme e swanetše go ba ya pele go tšohle. Ke fela nakong yeo moo go tlago go kgonega go ganetša ditutuetšo tše mpe ka moka tša thelebišene, sekolo le tša seterata. Batswadi ba boditšwe gore, ‘Anke ngwana wa gago a bone seo o nyakago a e-ba sona go wena.’ Ee, go bea mohlala o mobotse ke tsela e kaone kudu ya go fihlelela pelo ya ngwana. Dibopego ka moka tša tirelo e kgethwa di swanetše go tla ka tlhago gomme di thabiše ge e ba boemo bja legae e tla ba bja boemo bja moya e le ka kgonthe. Le ka mohla ga re nyake go tenwa ke nako le boiteko tšeo di akaretšwago. Le gona dula o fihlelela pelo ya ngwana ka poledišano e botse. Bontšha go tia go nago le lerato le kgahlego ya go nea mabaka ge o nea tayo. Tumiša le go putsa ngwana wa gago ge go swanelega, eupja le ka mohla o se ke wa mo rapeletša.

Polelo e rego, “Bafsa, Itišeng Malebana le go Phela Maphelo a Mabedi” e hlalositše ka mo go tseneletšego bothata bjo bogolo bjo lego gare ga bafsa ba bangwe ba Dihlatse. Ke ka baka la’ng ba bangwe ba leka go phela maphelo a mabedi? Ka gobane ba nyaka go amogelwa ke batswadi ba bona le phuthego gomme lega go le bjalo ba boifa go kwerwa ke dithaka tša bona tša lefase. Goba ba ikwa gore ba lahlegelwa ke boipshino bjo itšego ge e ba ba sa kgoge, ba sa diriše dihlare-tagi goba go ba le karolo kopanong ya botona le botshadi e gobogilego. Eupja ga go na go phonyokga therešo ya gore go phela maphelo a mabedi mo go bjalo go tliša kgobošo go Jehofa, manyami go batswadi ba motho le manyami go motho ka noši. O mongwe le o mongwe yo a bjalago nameng o buna tshenyego, mola e le gore go kgomarela kwano e botse le Jehofa, o mmota ka mo go feletšego, go šireletša motho gore a se phele maphelo a mabedi.—Ba-Galatia 6:8.

Seo se gateletšego melao ye ya motheo ka matla e bile papadi e latetšego kapejana. E bile le sehlogo se rego, Go Ikokobeletša Jehofa le Phuthego ya Gagwe, gomme e be e e-na le go gontši mo go ka naganišwago ka ge e bontšhitše kamoo mogolo a ikwelego a gapeletšega gore a tlogele go ba mogolo ka gobane morwedi wa gagwe a ile a utollwa e le yoo a phelago maphelo a mabedi. Papadi e tšweleditše dipolelo tše dintši tša borutho tše bontšhago tebogo.

“Bota Jehofa, Gomme o Dire tše di Botse”

Se e bile sehlogo sa letšatši la bobedi la kopano gomme se be se theilwe go Psalme 37:3, Phetolelo ya Kgale. Ka morago ga go hlahlobja ga temana ya letšatši, yeo e akareditšego kgothatšo ya gore seo se dirwe letšatši le letšatši, lenaneo le ile la ba le dipolelo tše tharo tša go šiedišana tša sehlogo se rego, “Go Bontšha go Bota ga Rena Jehofa.” Seboledi sa pele se bontšhitše go nyakega ga go dira se “Ka go Ithuta Lentšu la Modimo ka Mafolofolo.” Se re swanetše go se dira go phema molaba wa go se be le taba ka se diregago le mereo ya go rata dilo tše di bonagalago, boitshwaro bjo bobe bja botona le botshadi le bohlanogi. Mokgatlo o neile dithušo tše dintši tša go ithuta Beibele, tše swanago le Watch Tower Publications Index 1930-1985 e mpsha. Ke feela ka go diriša ditokišetšo tše ka mo go holago moo re ka bago le kwano e botse le Tate wa rena wa legodimong gomme ra ba dihlatse tša gagwe tše atlegago.

Seboledi se latelago se gateletše therešo ya gore go bota Jehofa go bontšhwa “Ka go Diriša Tšeo re Ithutilego Tšona.” Ee, re nyaka go ba badiri ba Lentšu gomme ka mehla re kgongwa ke go dira tšwelopele. Mafelong afe? Ee, ditswalanong tša rena le ba bangwe, moaparong le go itokišeng ga rena, ge re tsoma Mmušo wa Modimo pele le ge re godiša khutšo le botee gare ga banababo rena! Go phema sebe sa boikgogomošo, re swanetše go hlokomela go kgomarela boemo bjo bo re swanetšego ka lapeng le ka phuthegong. Ge e ba re diriša dilo tšeo re ithutago tšona ka tsela yeo, gona go tla bonala go bohle gore re bota Jehofa.

Dipolelo tša go šiedišana di feleleditše ka poledišano ya sehlogo se rego, “Go Bontšha go Bota ga Rena Jehofa ka go Katana ga Rena Tšhemong.” Ka go dira se re bontšha lerato la rena la go rata Modimo le baagišani ba rena gomme re a itšhireletša. Mo gongwe re ka kgotsofatšwa ke tirelo e sa bontšhego phišego le ya go ithola kgwara, eupja na Jehofa o kgotsofatšwa ke yona? Na Morwa wa gagwe ga a re opeletše gore re katane ka matla? (Luka 13:24) Dikoketšego tšeo re dulago re di bona tša bagoeledi, babulamadibogo le tša palo-gare ya diiri tšeo di dirišitšwego bodireding bja tšhemo, di swanetše go re tutuetša gore re leke go dira mo go oketšegilego rena ka noši. Na ga go bjalo? Ka modiro o bjalo o mafolofolo, re tla bea mohlala o mobotse, ra bontšha go bota ga rena Jehofa le go mo kgahliša gore a re amogele.

Ka morago go ile gwa latela boipiletšo matswalong a rena polelong e rego, “Neang ka Tekanyo e Tletšego.” Jehofa o re nea ka bontši gakaakang moyeng le nameng! Re bontšha go leboga ka go mo ekiša bobedi ka go nea bohlatse le ka go neela ka tša ditšhelete modirong wa boboledi. Na re ka fokotša maipshinong a bitšago tšhelete ya godimo e le gore re nee ka tekanyo e tletšego?

Polelo ya kolobetšo e rego, “Boineelo le Kolobetšo di Bontšha go Bota ga Gago Jehofa,” e bontšhitše lebaka leo re botago Jehofa ka lona, e sego batho. Kolobetšo ya meetse e bontšha go hwa ge e le mabapi le tsela ya rena ya pele ya boitshwaro le go tsošetšwa tseleng ya bophelo yeo e dumelelanago le thato ya Modimo. Ka morago ga moo, re swanetše go tšwela pele ‘re dira toko, re rata botho le go sepela le Modimo wa rena re e-na le boipoetšo.’ (Mika 6:8) Gare ga bao ba bego ba kolobetšwa e bile ngwanenyana wa nywaga e 8 yoo a swarago dithuto tše pedi tša Beibele le bana bao a tsenago sekolo le bona, monna wa nywaga e 79 le motho wa nywaga e 44 yo a golofetšego maoto le matsogo.

Lenaneo la mathapameng a Mokibelo le thomile ka polelo e rego, “Go Dira ‘tše di Swanetšego’ Gore re Kgahliše Modimo.” E be e theilwe go Ditiro 15:28, 29 gomme e bontšhitše go nyakega ga gore re tsebiše dingaka tša rena ka boemo bja rena ka madi pele mathata a tša kalafo a tšwelela le gona e neile dikeletšo tše botse tša kamoo se se ka dirwago ka gona.

Polelo yeo e dirilego gore go be le ditlhaloso tše dintši tše botse e bile e rego, “Go ba le Bana mo e Lego ga Tlhaologanyo Mehleng ye ya Bofelo.” E neile pono e leka-lekanego, ya bontšha gore lege go ba le bana go ka tliša lethabo le legolo, le gona go tliša boikarabelo bjo bogolo gomme gantši go feleletša ka mahlaba a pelo, go etša ge bana ba dira diphošo. Kudu-kudu bo-mma ke bona bao go bonalago ba fokola moyeng ka baka la morwalo wa go ba le bana.

Ka morago go ile gwa latela polelo e rego, “Bagolo, Elang Hloko Boikarabelo bja Lena.” Boikarabelo bjo ke go diša mohlape wa Modimo, e lego go o etelela pele, go o fepa le go o šireletša ka go dumelelana le Jesaya 32:1, 2. Go phetha boikarabelo bja lapa ka mo go swanetšego ge o dutše o hlokomela mediro ya phuthego ke teko e le ka kgonthe. Le gona gore bagolo ba ele hloko boikarabelo bja bona go bolela go phema mereo ya go rata dilo tše di bonagalago, boitapološo bjo bo feteletšego le boiphsino bjo bo gobogilego. Gare ga bao go boledišanwego le bona kopanong ya selete ya Dortmund kua Federal Republic of Germany e be e le mogolo yo a bego a dutše a ela hloko boikarabelo bja gagwe ka nywaga e 60.

Ka mo go swanetšego, polelo e rego, “Kwang Bao ba Etelelago Pele” e ile ya latela ka morago. Lerato le tla re thuša gore re ikokobeletše le go kwa balebeledi ba phuthego gomme le tla re thibela go fela pelo ka gobane ga se ba phethagala, go swana le rena ge re sa phethagala. (Ba-Hebere 13:17) Ka go bontšha tlhompho go bagolo ditabeng tše dikgolo le tše dinyenyane, re ba thuša go šikara morwalo wa bona go e na le go ba okeletša wona.

Lenaneo la Mokibelo le phethile ka karolo ya dipolelo tše tharo tša go šiedišana tše rego, “Lentšu la Modimo le a Phela,” gomme di theilwe go Ba-Hebere 4:12. Seboledi sa mathomo se bontšhitše gore le a phela ka gobane “Le na le Matla a go Fetola.” Lehono, go fo etša le dinakong tša Beibele, re na le mehlala e mentši e bontšhago kamoo go bota Lentšu la Modimo go dirilego gore batho ba dire diphetogo tše dikgolo maphelong a bona ka gona gomme le ba neile matla a go bolela ka go se boife.

Karolo ya bobedi ya dipolelo tše tša go šiedišana go Lentšu la Modimo e bontšhitše gore “Le Bogale go Feta Tšhoša Lege e le Efe ya Magale a Mabedi.” Le dira gore re kgone go ripaganya dithuto tša maaka tša Babele. Le gona le re thuša go ‘aroganya pelo le moya’ ka kgopolo ya gore le dira gore re kgone go bona phapano magareng ga ditiro tša rena le ditutuetšo tša rena tša kgonthe. Ka go diriša “tšhoša” ka tsela ye, re tla ba ba kgahlišago ka mo go oketšegilego go Jehofa Modimo gomme ra ba le khutšo ka mo go oketšegilego le ba bangwe le go rena ka noši.

Karolo e phethago e bontšhitše gore Lentšu la Modimo le a phela ka gobane “Le Matlafatša le go Tutuetša Pelo ya Rena.” Ka Beibeleng, lentšu “pelo” ka kakaretšo le dirišwa ka seswantšhetšo gomme le bolela motho wa ka gare yoo a bontšhwago ke dika tša rena tša monagano le maikwelo. Lentšu la Modimo le matlafatša pelo ya rena ka go utolla dika tša gagwe tše makatšago ka ditirišano tša gagwe le batho. Lerato la Modimo leo e sego la boithati le re tutueletša gore re mo ekiše. Mantšung a gagwe a go phetha, seboledi se ile sa hlahloba pego ya Mokgatlo wa Watch Tower ya go tšweletša Dibeibele gomme sa kgahliša batheetši ka go tsebiša go lokollwa ga kgatišo e botse ya New World Translation ya deluxe yeo e lekanago potla.

‘Bota Jehofa ka Pelo ya Gago Kamoka’

Sehlogo se sa Sontaga seo se tšerwego go Diema 3:5, se ile sa swarwa ke mogolo yo a butšego lenaneo gomme a bolela ka temana ya letšatši. Ka morago go ile gwa latela polelo e fatololago kgopolo e rego, “Na o Nyenyefatša Dilo tše Kgethwa?” Lefase le nagana gore ga le kolote Modimo selo, eupja re le Dihlatse tša Jehofa, re tseba gore gore re amogelwe ke yena, re swanetše go ekiša banna ba botegago ba mehleng ya kgale ka go bontšha tebogo bakeng sa dilo tše kgethwa. Seboledi se boletše ka tše 13 tša tše, tšeo gare ga tšona e lego leina la Jehofa, Lentšu la gagwe, moya wa gagwe o mokgethwa, melao ya gagwe, phuthego ya gagwe e bonagalago, kwano ya rena le Modimo, diboka tša rena le ditokelo tša rena tša tirelo. Ge e ba re leboga e le ka kgonthe dilo tše tša moya, gona re tla di bea pele maphelong a rena, ra bota Jehofa ka mo go feletšego, gomme ra putswa ke yena.

Ka morago go ile gwa latela polelo e matla e rego, “Hloya ka mo go Feletšego Tsela e Nyatšegago ya Lefase.” Ka baka la go lebanya ga yona, e tšweleditše ditlhaloso tše etšago tše rego, “E tloga e le seo re bego re se nyaka!” Ka ge bobe bo apareditše, Bakriste ba swanetše go itiša malebana le go sediša boitshwaro bjo bobe le bošoro mahlo. (2 Timotheo 3:1-5) Ka gona, ga se ra swanela go boga goba go theetša dikgašo tše bjalo thelebišeneng goba radiong, goba ra bala ka tšona ka dimakasineng. Ge e le gabotse, ebile ga re nyake go ba re nagana ka tšona. ‘Bakriste ba therešo bao ba fišegelwago go kgomarela kwano e botse le Jehofa go molaleng gore ba ka se be le tirišano lege e le efe le dilo tša bootswa,’ aowa, e sego le ganyenyane!

Lenaneo la mesong ya Sontaga le phethile ka papadi ya Beibele e kgahlišago kudu yeo e rego, Jehofa o Phološa Bao ba Bitšago Leina la Gagwe. E boletše ka ditiragalo tše dintšinyana bophelong bja Jošua. Ka mo go swanelago, e bontšhitše kamoo badudi ba Jeriko ba swanetšego go ba ba ile ba lebelela go sepela ga bahlabani ba Isiraele ka gona ge ba dikologa motse letšatši le letšatši. Se sengwe se se gateletšwego e bile tumelo e kgolo ya Rahaba, yeo e feleleditšego ka phološo bakeng sa gagwe le ba ntlo ya gagwe. Mafelelong, bohle ba ile ba botšišwa gore: ‘Na o na le tumelo le kholofelo tše tiilego tša Jošua le bagwera ba gagwe ba bego ba na le sebete? Ge e ba go le bjalo, re ka holofela go ba le karolo phenyong ya mafelelo ya Jehofa godimo ga manaba a gagwe.’

Karolo e bohlokwa ka mo go fetišišago ya Kopano ya Selete ya “Bota Jehofa” e bile polelo yeo e bego e e-na le sehlogo se rego, “Mehleng ya Rena e Boifišago, ke Mang ge e le Gabotse yo o ka Mmotago?” E bontšhitše gabotse gakaakang therešo ya gore batho ba nyaka e le ka kgonthe mothopo wa kholofelo! Ka mo go kwagalago, e bontšhitše bošilo bja go bota batho. Ka gona, Lentšu la Modimo le re eletša gore re bote Jehofa gomme le re nea mabaka a tiilego a gore re dire bjalo. Re swanetše go mmota ka baka la dika tša gagwe le pego ya gagwe ya go phološa bao ba bego ba mmota, mo Kgoši Hesekia e lego mohlala o kgahlišago kudu. Kapejana go phološwa mo go swanago go tla thabelwa ke bao tsela ya bona ya go itshwara e bontšhago go bota Jehofa.

Sehlogo sa polelo e latetšego kapejana e bile se rego, “Tšwelang Pele ‘le Phela ka Khutšo.’” Go phela ka khutšo go bolela go godiša khutšo ka mafolofolo. Le gona go bolela go ba le khutšo ga rena ka noši ka baka la go ba le letswalo le lebotse. Ka go bontšha dienywa tša moya wa Modimo, kudu-kudu lerato le boitshwaro, re tla kgona go phela ka khutšo le malapa a rena ka noši le banababo rena le dikgaetšedi ka phuthegong.

Ga go na pelaelo mabapi le therešo ya gore kopano ye e re hlamile ka moka ga rena bakeng sa “Go Lebeletšana le Bokamoso ka go Bota Jehofa ka mo go Feletšego,” e lego sehlogo sa polelo ya go phetha. E akareditše lenaneo gabotse gakaakang! Seboledi se gateletše gore letšatši le letšatši re swanetše go bota Jehofa ka pelo ya rena ka moka, re mo gopole ditseleng tša rena ka moka le go mo dumelela gore a hlahle ditsela tša rena. (Diema 3:5, 6) Bao ba bego ba le gona kopanong ba lebogile kudu go kwa ka go ba gona ga dipolelo tše mpsha tša phatlalatša tše 16, le go gatišwa gape ga sehlogo se lego mabapi le madi se se kilego sa tšwelela go Awake! gomme e le se tlago go ba gona bakeng sa rena gore re nee dingaka tša rena. Ee, le gona re thabišitšwe ke go tseba ka go lokollwa ga papadi e nngwe ya Beibele e lego khaseteng le go tšweletšwa ga dipampišana tše dingwe gape tše tharo!

Bohle ba bilego gona Kopanong ya Selete ya “Bota Jehofa” ba agilwe kudu moyeng. Mo nakong ye ba ikemišeditše go lebeletšana le bokamoso ka kholofelo e tletšego go Tatago bona wa legodimo. Le gona bohle ba kgothaditšwe ka mo go swanelago ke kgothatšo ya go phetha e itšego: “Ge re dutše re lebeletšana le bokamoso, eka ka moka ga rena re le batee re ka bontšha ka tsela ya rena ya bophelo gore re ‘bota Jehofa.’”

[Chart on page 26]

Dikopano tša Selete tše Fapa-fapanego tša “Bota Jehofa”

Austria 24 686 360

Brazil 422 731 7 626

British Isles 156 417 1 225

Colombia 82 321 1 852

Denmark 23 029 200

Finland 26 144 284

France 138 683 2 705

Hong Kong 2 661 49

Ireland 4 326 61

Italy 221 227 5 496

Jamaica 18 540 184

Japane 232 904 3 416

Korea 82 296 2 013

Malaysia 1 154 15

Norway 12 703 218

Portugal 55 057 1 074

Puerto Rico 49 953 377

Spania 105 591 2 394

Sweden 30 099 312

Switzerland 19 459 261

Trinidad 10 649 132

United States 1 288 313 13 562

Venezuela 100 777 1 664

Zimbabwe 45 544 580

[Pictures on page 25]

Dipapadi tše šišinyago kgopolo di bontšhitše go nyakega ga go bota Jehofa

F. W. Franz, e lego setho sa Sehlopha se Bušago sa Dihlatse tša Jehofa, o bolela le batheetši ba kopanong bao ba theeditšego ka kelohloko

[Seswantšho go letlakala 26]

Ba bantši ba bontšhitše go bota Jehofa ka go kolobetšwa e le go bontšha go ineela ga bona go yena