Bophelo le Bodiredi bja Jesu

O Amogelwa ka Botho ke Mofarisei yo a Tumilego

JESU ke moeti legaeng la Mofarisei yo a tumilego moo a sa tšwago go fodiša monna yo a bolawago ke bolwetši bja mokebe. Bjale, ge Jesu a bona baeti-gotee le yena ba kgetha ditulo tša maemo a phagamego dijong, o ruta thuto mabapi le boikokobetšo.

Jesu o eletša ka gore, “Xe O laleditšwe wa tla monyanyeng wa tšeô, O se kê wa dula sedulong sa ka pele; xore e se bê mohlomongwê xò laleditšwe e mongwê e a Xo fetaxo. Xomme e a laleditšexo wene le yêna, a tla a bolêla naxô’ a re: Šuthêla yó sebaka! Ya ba xôna Ò tl’o xo tšea sebaka sa ka moraxo ka dihlong.”

Ka gona Jesu o eletša ka gore: “Xe O laleditšwe, O yê O dulê sebakeng sa ka moraxo, xore e a Xo laleditšexo xe a tla, a bolêlê naxô’ a re: Moxwêr’a-ka! Fetêla kwa pele! Ké mo O tl’o xo xodišwa ke ba ba dutšexo dijong le wene.” A gatelela thuto, Jesu o phetha ka gore: “Xobane bohle ba ba ikxodišaxo ba tlo kokobetšwa; e a ikokobetšaxo ó tlo xodišwa.”

Ka morago, Jesu o bolela le Mofarisei yo a mo laleditšego gomme o mo hlalosetša kamoo a ka neago batho dijo ka tsela yeo e kgahlišago Modimo e le ka kgonthe. “Xe O lokišitše sefihlulô le xe e le selalêlô, O se bitšê baxwêra ba xaxo, le xe e le bana beno, le xe e le metswalô ya xaxo, le xe e le ba xeno ba bahumi, e se bê xore le bôná ba Xo bitšê, ya ba xo boêlwa ke tše O ba neilexo tšôna. Xe O dira monyanya O bitšê bahumanexi, le dixôlê, le bahlotši, le difofu. Ké mo O tl’o xo ba wa lehlôxônôlô ka xobane bôna xa ba na se ba kaxo Xo bušetša sôna.”

Go nea bahumanegi dijo tše bjalo go tla thabiša monei wa tšona ka goba ne go etša ge Jesu a hlalosetša motho yo a mo amogetšego: ‘O tla bušetšwa tsogong ya ba ba lokilego.’ Tlhaloso ya Jesu ya dijo tše tše swanelwago ke tlhompho e gopotša moeti-gotee le yena ka mohuta o mongwe wa dijo. Moeti yo o bolela gore, “Wa lehlôxônôlô ké eo a tl’o xo ja boxôbê mmušong wa Modimo.” Lega go le bjalo, ga se bohle bao ba lebogago ka mo go swanetšego kholofelo yeo e thabišago, go etša ge Jesu a tšwela pele go bontšha se ka seswantšho.

“Motho e mongwê ó be a dirile selalêlô se sexolo, à laleditše [ba] bantši. . . . a roma mohlanka wa xaxwe, a re a y’o bitša balalediwa, a re: Tlang, xobane tsohle di lokišitšwe. Ba latola ka moka ka o tee ka o tee; wa pele a re: Ke rekile thšemo; ’me ke swanetše xo y’o e bona. Ke a Xo rapela, O k’O mpolêlêlê O re xa ke tle. E mongwê a re: Ke rekile pholo tša yoko tše thlano; ’me ke ya xo di leka. Ke a Xo rapêla, O k’O mpolêlêlê O re xa ke tle. E mongwê a re: Ke nyetše mosadi; ke sôna se se nthšitišaxo xo tla.”

A mabaka a fokolago gakaakang! Ka tlwaelo tšhemo goba diruiwa di hlahlobišišwa pele ga ge di rekwa, ka gona go tloga go se na lebaka le le akgofilego la gore di hlahlobišišwe ka morago. Ka mo go swanago, lenyalo la motho ga la swane la go mo thibela go amogela taletšo e bohlokwa gakaalo. Ka gona mong wa bona ge a e-kwa ka mabaka ao, o a befelwa gomme o laela mohlanka wa gagwe ka gore:

“Akxofa O tšwêlê mekxotheng, le mapatlelong a motse, O boê fá Ò na le badiidi le dixôlê le dihlotša le difofu. Mohlanka a tla a re: Morêna, xo dirilwe ka mo O laetšexo ka xôna; fêla, xo sa na le sebaka. Morêna a re: Tšwêla kwa ditseleng le dikxorong, O ba phêxêlêlê xore ba tsênê, ngwakô wa-ka o tlê o tlalê. . . . le o tee wa banna bala ba ba bexo ba laleditšwe a ka se kê a leka selalêlô sa-ka.”

Ke boemo bofe bjo bo hlaloswago ke seswantšho? Ee, “mong” yo a neago batho dijo o emela Jehofa Modimo; “mohlanka” yo a išago taletšo ke Jesu Kriste; gomme “selalêlô se sexolo” ke dibaka tša go tsena Mmušong wa magodimo.

Bao ba ilego ba hwetša taletšo ya go tsena Mmušong la mathomo go feta ba bangwe ka moka e be e le baetapele ba bodumedi ba ba-Juda ba mehleng ya Jesu. Lega go le bjalo, ba ile ba gana taletšo. Ka gona, go thoma kudu-kudu ka Pentekoste ya 33 C.E., taletšo ya bobedi e ile ya lebišwa go batho ba nyatšegago le ba tlasana ba setšhaba sa Juda. Eupja ga se ba lekanego bao ba ilego ba arabela go ka tlatša ditulo tše 144 000 Mmušong wa legodimo wa Modimo. Ka gona ka 36 C.E., e lego nywaga e meraro le seripa ka morago, taletšo ya boraro yeo e bilego e le ya mafelelo e ile ya lebišwa go batho bao e sego ba-Juda bao ba sa bollago gomme go kgoboketšwa ga ba bjalo go ile gwa tšwela pele go fihla lekgolong la bo-20 la nywaga. Luka 14:1-24.

◆ Ke thuto efe mabapi le boikokobetšo yeo Jesu a e rutago?

◆ Ke bjang motho yo a amogetšego baeti a ka lokišago dijo tšeo di kgahlišago Modimo gomme ke ka baka la’ng se se tla mo thabisa?

◆ Ke ka baka la’ng mabaka a baeti bao ba laleditšwego e le a fokolago?

◆ Ke’ng seo se emelwago ke seswantšho sa Jesu sa “selalêlô se sexolo”?