Kamoo o ka Kgethollago Badiredi ba Therešo ba Modimo

SE SE diragetše ka 1948. Badiredi ba babedi ba Dihlatse tša Jehofa bao ba bego ba sepela ka pese ya lehlekge tseleng ya dikoti-koti, ba lebile toropong ya ka leboa la Sepania go leba Dithabeng tša Pyrenees. Ba be ba e-ya go etela modiredi yo a dulago lefelong le lego ka thoko. Ka morago ga gore pese e eme lefelong leo le lego kgaufsi le motsana woo modiredi a bego a dula go wona, ba ile ba mmona a ba emetše le tonki ya gagwe. Eupja ba ile ba bona gape le sehlopha se se sa tlwaelegago, e lego Baleti ba Motse ba bane bao ba itlhamilego gotee le moruti! Ge badiredi ba dutše ba hlatloga tseleng yeo e yago motsaneng, o mongwe wa Baleti o ile a ntšha sethunya sa gagwe gomme a goeletša ka gore, “Manos arriba!” (Matsogo godimo!) Baeng ba ile ba swarwa. Ka baka la’ng? Moruti o be a ile a botša Baleti gore baeng ke batšhošetši—maaka a matala! Ka baka la seo, badiredi ba bararo ka moka ba ile ba lahlelwa kgolegong.

Se se bontšha’ng? Se bontšha gore ga se bohle bao ba ipolelago gore ke baruti goba badiredi bao e lego badiredi ba therešo ba Modimo. Ge e le gabotse, gantši go na le phapano e kgolo magareng ga badiredi ba therešo le ba maaka. Ke dilo dife tša motheo tšeo di nyakegago go badiredi ba therešo?

Dilo tšeo di Nyakegago go Badiredi ba Therešo

Tlhaloso ya motheo ya “go direla” ke “go thuša goba go hlankela.” Badiredi ba therešo ba Bakriste ba swanetše go ba le tumelo e tiilego ya gore Beibele ke Lentšu le le buduletšwego la Modimo. (Johane 17:17) Eupja, selo seo sa motheo se se nyakegago ga se a lekana. Ba swanetše gore gape ba be le tsebo e botse le kwešišo ya Beibele. Eupja ga se ba swanela go diriša tsebo yeo ka tsela ya boithati ya go ikhola ba nnoši. Ba swanetše gore gape e be baboledi ba mafolofolo ba Ebangedi, e lego ditaba tše di lokilego tša Mmušo wa Modimo le kholofelo ya bophelo bjo bo sa felego lefaseng la paradeise.—Johane 17:3; Psalme 37:11, 29.

Se sengwe gape ke gore therešo ya gore Dihlatse tša Jehofa di bolela ditaba tše di lokilego tša Mmušo e sego feela kua Sepania eupja le lefaseng ka moka ke go phethagatšwa ga seo Jesu a ilego a se porofeta bakeng sa mehla ya bofelo ya tshepedišo ye e mpe ya kgale ya dilo. O boletše gore: “Xomme Ebangedi ye ya mmušo wa maxodimong e tlo xoelelwa lefaseng ka moka xore e be bohlatse mo xo dithšaba tsohle; ya tlo ba xona bofelo bo fihlaxo.”—Mateo 24:14, 33, 34.

Selo se sengwe gape sa motheo seo se nyakegago go badiredi ba therešo ke gore bjalo ka ge Jesu a ile a bolela, ba swanetše gore ‘e se be ba lefase’; ka go rialo, ba swanetše go tšwa dipolitiking. (Johane 15:19) Le gona ba swanetše go ba ba ikokobeditšego kudu, ba nago le lerato, ba botho le bao ka dinako tsohle ba ikemišeditšego go thuša bahloki bao ba swanetšwego ke go thušwa.—1 Ba-Korinthe 13:1, 4; 1 Petro 5:6.

Taba ye ke e bohlokwa kudu. Go kgethologanya magareng ga badiredi ba therešo le ba maaka ke taba ya bophelo le lehu. Ke kamoo e lego bohlokwa ka gona! Thutong ya gagwe e tumilego ya Thabeng Jesu o ile a lemoša ka gore: “Phafoxelang baporofeta ba maaka, ba ba tlaxo xo lena ba apere ‘kobo tša nku, mola ka teng ba le diphiri tše di jaxo batho.”—Mateo 7:15.

Lega go le bjalo, badiredi ba therešo ba Modimo ga ba na mediro le melao feela eupja gape ba na le ditokelo tše dintši. Ge a le gabotse, ke sehlopha sa batho ba gaugetšwego ka go fetišiša, ba atlegilego ka go fetišiša le ba thabilego ka go fetišiša lefaseng bjalo ka ge o tla bona sehlogong se se latelago.