Hlwekang Monaganong le Mmeleng

“Tlišang mebele ya lena, e bê [sehlabelo] se se phelaxo, se sekxêthwa, sa xo kxahla Modimo.”—BA-ROMA 12:1.

1. Go ya ka moapostola Paulo, ke ka baka la’ng go hlweka monaganong le mmeleng go le bohlokwa?

MOTHO yo a kganyogago go direla Modimo o mokgethwa Jehofa o swanetše go seka moyeng le boitshwarong. Ka mo go kwagalago, se se bile se bolela go ba yo a hlwekilego monaganong le mmeleng. Tshepedišo ya gona bjale ya dilo ka ge e le ka tsela yeo e lego ka yona, batho ba tšwago go yona e le gore ba tle ba direle Jehofa ga se ba swanela go dira diphetogo feela mekgweng ya bona ya go nagana eupja gantši ba swanetše go di dira le mekgweng ya bona ya motho ka noši. Moapostola Paulo o ngwaletše Bakriste ba Roma gore: “Byale lena bana bešo, ke a Le rapêla ka xo bôna mabobo a Modimo, ke re: Tlišang mebele ya lena, e bê [sehlabelo] se se phelaxo, se sekxêthwa, sa xo kxahla Modimo; e bê xôna xo dirêla Modimo ka mo xo swanetšexo. Le se kê la ipapetša le ba mehla yeno; šatoxang ka xo mphsafala kxopolô, xore Le tlê Le hlaoloxanyê se e lexo thatô ya Modimo, e lexo se botse le se kxahlišaxo, se e lexo sa botlalô.” (Ba-Roma 12:1, 2) Bohlweki bja monagano le bja mmele bo akaretša’ng?

Bohlweki bja Monagano

2. Ke bjang mahlo a rena le dipelo tša rena di ka dirago gore re dire boitshwaro bjo bo gobogilego, gomme ke’ng se se nyakegago gore re pheme se?

² Gaešita le pele ga ge Molao o ka newa, Jobo e a botegago o ile a bontšha gore mahlo a rena le pelo di ka dira gore re dire boitshwaro bjo bo gobogilego ge e ba re sa di laole. O itše: “Ke dirile kgwerano le mahlo a-ka. Ka gona ke bjang ke bego nka lebiša tlhokomelo go kgarebe? Ge nkabe pelo ya-ka e gokeditšwe ke mosadi, . . . seo e be e tla ba boitshwaro bjo bo gobogilego, gomme yeo e be e tla ba phošo yeo e bego e tla elwa hloko ke baahlodi.” (Jobo 31:1, 9-11, NW) Ge e ba re e-na le mahlo ao a lealeago le pelo yeo e sego ya tsepama, gona re nyaka tayo ya monagano, “tayo yeo e neago temogo.”—Diema 1:3, NW.

3, 4. (a) Ke’ng seo mohlala wa Dafida le Batseba o se bontšhago, gomme ke’ng se se nyakegago bakeng sa go fetola mekgwa e mebe ya go nagana? (b) Ke ka baka la’ng bagolo ba Bakriste ba swanetše go ba ba elago hloko kudu-kudu?

³ Mahlo a kgoši Dafida a ile a mo diriša bootswa le Batseba. (2 Samuele 11:2, 4) Mohlala wo o bontšha gore gaešita le banna bao ba dirišwago ke Jehofa ka tsela e kgethegilego ba ka wela sebeng ge e ba ba sa laye menagano ya bona. Mo gongwe go ka nyakega boiteko bjo matla go fetola mekgwa ya rena ya go nagana. Boiteko bjo bjalo bo swanetše go sepedišana le thapelo e tšwago pelong bakeng sa thušo ya Jehofa. Dafida ka morago ga ge a šetše a sokologile sebeng sa gagwe le Batseba o ile a rapela: “Modimo, mpopêlê pelo e sekilexo. Buša O nneêlê môya wa xo tia ka teng xa-ka.”—Psalme 51:10.

⁴ Bagolo ba Bakriste ba swanetše go ela hloko kudu-kudu gore ba se bipe dikganyogo tše mpe tšeo di ka ba išago sebeng se segolo. (Jakobo 1:14, 15) Paulo o ngwaletše mogolo wa Mokriste Timotheo gore: “Se thutô e išaxo xo sôna ké leratô le le tšwaxo pelong-tshekexi, le letswalong le le sa imelwexo ke molato, le tumelong e se naxo boikaketši.” (1 Timotheo 1:5) Ruri e ka ba boikaketši ge mogolo a tšwetša pele dikabelo tša gagwe tša moya mola a dumelela mahlo a lealeago a tutuetša dikgopolo tša go dira boitshwaro bjo bo gobogilego pelong ya gagwe.

5. Ke’ng se se swanetšego go phengwa gore go bolokwe bohlweki bja monagano?

⁵ Ka moka ga rena ka ge re le Bakriste re swanetše go dira sohle seo re ka se kgonago gore re be ba hlwekilego monaganong. Se se bolela go široga dipaesekopo lege e le dife, mananeo a thelebišene goba go bala taba e ka bago le tutuetšo e senyago menaganong ya rena. Go hlweka monaganong go akaretša boiteko bjo matla bja gore o kgomarele dilo tše e lego tša “therešô . . . bokwala, . . . [le] tokô.” Moapostola Paulo o oketša ka gore “tša tumô e botse, tše e lexo boló, tše di kaxo ratiwa, e bê tšôna Le di naxanaxo.”—Ba-Filipi 4:8.

Mekgwa ya tša Maphelo ya Motho ka Noši

6. (a) Nea mehlala e tšwago pukung ya Lefitiko e bontšhago gore bohlweki bja motho ka noši gotee le bja sehlopha bo be bo nyakega Isiraeleng. (b) Morero wa melao e bjalo e be e le ofe?

⁶ Go ile gwa bolelwa gore “bohlweki bo kgaufsi le Modimo.” Ke therešo gore motho yo a hlwekilego boitshwarong le mmeleng mo gongwe e ka ba e le yo a sa boifego Modimo. Eupja motho yo a boifago Modimo o tloga a swanetše go hlweka boitshwarong le mmeleng. Molao wa Moše o ile wa nea ditaelo tše lebanyago ka go hlwekišwa ga magae ao a hlasetšwego ke ditwatši le go hlapa mmele maemong a fapa-fapanego a ditšhila. (Bona Lefitiko, dikgaolo 14 le 15.) Ba-Isiraele ka moka ba be ba swanetše go ipontšha e le ba bakgethwa. (Lefitiko 19:2) Puku Insight on the Scriptures e bolela gore: “Melao ya dijo, ya tša maphelo le boitshwaro yeo Modimo a e neilego [ba-Isiraele] e be e le dikgopotšo tša ka mehla go bona tša go aroga ga bona le bokgethwa go Modimo.”—Volume 1, letlakala 1128.

7. Ke’ng seo e lego sa therešo ka Dihlatse tša Jehofa e le sehlopha sa batho, eupja ke’ng seo balebeledi ba bangwe ba basepedi ba ilego ba se bega?

⁷ Gaešita lege Dihlatse tša Jehofa e le sehlopha sa batho, ba hlwekile ditšhileng lege e le dife tša bodumedi bja maaka bja Babele gomme ba sa tlogelele go se hlweke boitshwarong gare ga bona, ruri dipego tše di tšwago go balebeledi ba basepedi di bontšha gore ba bangwe ba hlokomologa mekgwa ya tša maphelo ya motho ka noši le bohlweki. Re ka kgonthiša bjang gore re hlwekile le tabeng ye? Mohlala o mobotse bakeng sa magae ka moka a Bakriste ke Bethele, e lego leina leo le bolelago “Ngwako wa Modimo.”

8, 9. (a) Ke keletšo efe e newago ditho ka moka tše mpsha tša lapa la Bethele? (b) Ke melao efe ya motheo yeo e latelwago Magaeng a Bethele yeo e swanetšego go laola lapa le lengwe le le lengwe la Mokriste?

⁸ Ge motho e e-ba setho sa lapa la Bethele ntlong-kgolo ya Mokgatlo wa Watch Tower goba lekaleng lege e le lefe la yona lefaseng ka moka, o newa pukwana yeo e lokišeditšwego ke Sehlopha se Bušago. Pukwana ye e hlalosa seo se letetšwego go yena mekgweng ya go šoma le mekgweng ya motho ka noši. Ka tlase ga sehlogo “Tlhokomelo ya Phapoši le Bohlweki,” e bolela gore: “Bophelo bja Bethele bo nyaka gore go kgomarelwe ditekanyetšo tše phagamego tša boitshwaro le tša moya. O mongwe le o mongwe Bethele o swanetše go tshwenyega ka go ipoloka a hlwekile gotee le phapoši ya gagwe. Se se tlaleletša bophelong bjo botse. Ga go lebaka la gore motho lege e le ofe a be ditšhila. Ke mokgwa o mobotse go hlapa mmele ka mehla. . . . Go hlapa pele ga nako ya dijo ke ga bohlokwa gomme go letetšwe go bohle. Ka go naganela yo o dulago le yena ka phapošing le mohlwekiši wa diphapoši, gona bohlapelo bo swanetšwe go hlatswiwa ka morago ga go dirišwa.”

⁹ Magaeng a Bethele, dintlwana tša boithomelo di bolokwa di hlwekile e le ka kgonthe, gomme go dirilwe ditokišetšo tša gore bao ba di dirišago ba hlape diatla tša bona gatee-tee ka morago ga go di diriša. Go letetšwe gore ditho tša lapa di tlogele dintlwana tša boithomelo di hlwekile ka morago ga go di diriša, e lego seo se bolelago go hlahloba dintlwana tša boithomelo go bona ge e ba meetse a gogilwe ka tshwanelo. Ye ke tsela e nngwe ya go bontšha go naganela motho o mongwe yo a tlago go e diriša ka morago goba mohlwekiši wa diphapoši. Na melao ya motheo e bjalo e lerato ga se ya swanela go laola lapa le lengwe le le lengwe la Mokriste?

10. (a) Ke ka baka la’ng go sa nyakege bohlapelo bja maemo a godimo bakeng sa go ipoloka o hlwekile gotee le bana ba gago? (b) Ke melao efe kua Isiraele yeo e bego e le ye e holago bakeng sa bophelo bjo botse, gomme ke thuto efe yeo batho ba Jehofa ba ka ithutago yona go se lehono?

¹⁰ Ka tlhago maemo a fapana go ya ka dinaga. Mafelong a mangwe magae ga a na bohlapelo goba shawara. Lega go le bjalo, ge re bolela ka kakaretšo banna le basadi ba Bakriste ba ka hwetša sesepe se se lekanego le meetse go boloka mebele ya bona e hlwekile le go bona gore bana ba bona ba hlwekile.a Magae a mantši lefaseng ka moka ga a kgokaganywa le tshepedišo ya ditšhila. Eupja mantle a ka fihlwa ka go epelwa, bjalo ka ge go be go nyakega gare ga ba-Isiraele gaešita le mešašeng ya madira. (Doiteronomio 23:12, 13) Ka ntle le se, melao ya Jehofa yeo e bego e laola bophelo bja mešašeng e be e nyaka gore diaparo di hlatswiwe ka mehla le gore go hlapje mmele ka mehla, go hlahlobje bolwetši ka pela le go bo alafa, ditopo di swarwe ka tshwanelo gomme meetse le dijo di bolokwe di hlwekile. Melao ye ka moka e ile ya tlaleletša bophelong bjo bobotse bja setšhaba. Na batho ba Jehofa e swanetše go ba bao ba sa šetšego kudu mabapi le tša maphelo mekgweng ya bona ya motho ka noši?—Ba-Roma 15:4.

Magae a Hlwekilego le Dikoloi

11. (a) Ke’ng se e swanetšego go ba sa therešo ka magae a bobotlana kudu a Bakriste? (b) Ke tirišano efe e nyakegago go ditho ka moka tša lapa la Bethele?

¹¹ Magae a rena gaešita lege e ka ba a bobotlana kudu, e ka ba a bothakga le ao a hlwekilego, fela se se nyaka thulaganyo e botse ka lapeng. Mma wa Mokriste o tla rata go diriša nako e ntši ka mo go kgonegago ditabeng tša moya, go akaretša le modiro wa boboledi, ka gona ga se a swanela go diriša nako letšatšing le lengwe le le lengwe a hlwekiša ka morago ga ditho tša lapa tšeo di tlogetšego diaparo, dipuku, dipampiri, dimakasine le tše dingwe di tletše gohle. Bethele gaešita lege go e-na le bahlwekiši ba diphapoši, fela go letetšwe gore setho se sengwe le se sengwe sa lapa se alole bolao bja sona gomme se tlogele phapoši e rulagantšwe gabotse mesong. Ka moka ga rena re thabela Diholo tša rena tša Mmušo le Diholo tša Kopano tše hlwekilego. Eka magae a rena le wona a ka hlatsela gore re karolo ya batho ba Jehofa ba hlwekilego le ba bakgethwa!

12, 13. (a) Go newa keletšo efe mabapi le dikoloi tše dirišwago tirelong ya Jehofa, gomme ke ka baka la’ng se se sa swanela go ba se jago nako kudu? (b) Go na le lebaka lefe la moya bakeng sa go ipoloka re hlwekile le go ba le magae a hlwekilego le dikoloi?

¹² Bontši bja bahlanka ba Jehofa lehono ba diriša dikoloi ge ba e-ya dibokeng le tirelong ya tšhemo. Dinageng tše dingwe koloi mo gongwe e thomile go ba e bohlokwa kudu e le sedirišwa sa go direla Jehofa. Ka baka leo, e swanetše go bolokwa e hlwekile go swana le magae a rena. Ka kgonthe Bakriste ba ka se ke ba diriša nako e ntši ba hlokomela dikoloi tša bona ka mo go feteletšego bjalo ka ge batho ba bangwe ba lefase ba dira. Eupja ka ntle le go feteletša gakaalo, bahlanka ba Jehofa ba swanetše go katanela go boloka dikoloi tša bona di hlwekile ka mo go swanetšego gomme di le boemong bjo botse. Dinageng tše dingwe go hlatswa koloi mafelong a bohlatswetšo ga go bitše tšhelete e ntši e bile ga go je nako. Ge e le ka gare ga koloi go ka hlwekišwa ka metsotso e lesome feela. Bagolo le bahlanka ba bodiredi kudu-kudu ba swanetše go katanela go ba mehlala e mebotse tabeng ye, ka ge gantši ba diriša dikoloi tša bona go nametša sehlopha sa bagoeledi tirelong ya tšhemo. Ge mogoeledi a iša motho yo a thabelago sebokeng ka koloi ruri ga se bohlatse bjo bobotse ge e ba koloi e le ditšhila.

¹³ Ka gona, ka maiteko a rena a go ba ba hlwekilego mmeleng le go ba le magae le dikoloi tše hlwekilego, re godiša Jehofa re le ditho tša phuthego ya gagwe e hlwekilego.

Go Hlweka ge re Neela Dihlabelo tša Moya

14. Ke melao efe yeo e bego e laola go hlweka ka mokgwa wa dikiletšo Isiraeleng, gomme ke’ng seo melao ye e se bontšhago?

¹⁴ Isiraeleng go hlweka ka mokgwa wa dikiletšo mabapi le borapedi e be e le molao wo kotlo ya wona e bego e le lehu. Jehofa o ile a botša Moše le Arone gore: “Ka mokxwa o byalo Le nthšê Ba-Isiraele dithšileng tša bôná, ba se kê ba hwêla dithšileg tša bôná xe ba ka thšilafatša Ngwakô wa-ka o lexo mo xo bôná.” (Lefitiko 15:31) Letšatšing la Poelanyo, moperisita o mogolo o be a swanetše go hlapa mmele meetseng gabedi. (Lefitiko 16:4, 23, 24) Legopo la koporo taberenakeleng, gomme ka morago legopo le legolo la koporo tempeleng le be le nea baperisita meetse gore ba hlapele ka go lona pele ba neela Jehofa dihlabelo. (Ekisodo 30:17-21; 2 Koronika 4:6) Go thwe’ng ka ba-Isiraele ka kakaretšo? Ge e ba e be e ka ba bao ba sa sekago ka mokgwa wa dikiletšo ka lebaka lege e le lefe, gona ba be ba thibelwa go ba le karolo borapeding go fihlela ge ba phethile melao ya go sekišwa. (Numeri 19:11-22) Tše ka moka di gatelela gore bohlweki bja mmele bo a nyakega go bao ba rapelago Modimo o mokgethwa Jehofa.

15. Ke ka baka la’ng dihlabelo tša diphoofolo di se sa hlwa di nyakega, eupja ke dipotšišo dife tše rotošwago?

¹⁵ Ke therešo gore batho ba Jehofa lehono ga go nyakege gore ba neele dihlabelo tša diphoofolo tempeleng ya lefaseng. Dihlabelo ka tlase ga Molao di ile tša tšeelwa legato ke “[sebego] sa mmele wa Kriste se se tlišitšwexo xa-tee ya ba moka.” (Ba-Hebere 10:8-10) Re “rapêla Tate ka Môya le ka therešô.” (Johane 4:23, 24) Eupja na se se bolela gore ga go na sehlabelo seo re ka se neago Modimo wa rena o mokgethwa Jehofa? Le gona na bohlweki ke bjo bo sa nyakegego kudu go rena go swana lege go be go le bjalo go ba-Isiraele?

16. Boporofeta bja Maleaki 3:3, 4 bo ile bja phethagatšwa bjang go Bakriste ba tloditšwego ga e sa le go tloga ka 1918, gomme ke dihlabelo dife tše amogelegago tšeo ba ka di neago Jehofa?

¹⁶ Boporofeta bja Maleaki bo bontšha gore Bakriste ba tloditšwego mo lefaseng nakong ya bofelo ba be ba tla sekišetšwa tirelo ya tempele. Histori e bontšha gore go sekišwa mo go thomile ka 1918. Ga e sa le go tloga ka 1919 mašaledi a tloditšwego ‘e bile batho bao ba tlišago dibego go Jehofa ba lokile,’ gomme dibego tša bona di ‘thabelwa ke Jehofa.’ (Maleaki 3:3, 4) Ka gona ba kgona “xo tliša [dihlabelo] tša môya tše di kxahlišaxo Modimo ka Jesu Kriste.” (1 Petro 2:5) Moapostola Paulo o ngwadile gore: “Ké xôna a re ipexeng xo Modimo ka [sehlabelo] sa thêto, e lexo sôna seenywa sa melomo ye e ipolêlaxo ka Leina la xaxwe.”—Ba-Hebere 13:15.

17. Gaešita lege “lešaba le lexolo” e se karolo ya baperisita bao e lego dikgoši, ke ka baka la’ng e swanetše go ba leo le hlwekilego mmeleng, monaganong, boitshwarong le moyeng?

¹⁷ Gaešita lege “dinku tše dingwê” di sa biletšwe tirelong ya tempele ya boperisita go swana le mašaledi a tloditšwego, fela di “hlankela [Jehofa] mosexare le bošexo” dikgorong tša lefaseng tša tempele ya gagwe ya moya. (Kutollo 7:9, 10, 15) Go tla gopolwa gore ba-Isiraele bao e bego e se baperisita ba be ba swanetše go hlweka ka mokgwa wa dikiletšo e le gore ba tle ba be le karolo borapeding taberenakeleng goba ka morago tempeleng. Ka mo go swanago lešaba le legolo la dinku tše dingwe le swanetše go hlweka monaganong, boitshwarong le moyeng ge e ba le rata go dira tempeleng gomme le be le karolo gotee le mašaledi tabeng ya go nea ‘Modimo sebego sa theto’ ka ‘go bolela phatlalatša ka leina la gagwe.’

Go Hlweka Bakeng sa Tirelo ya Tšhemo le Diboka

18. Ge re le modirong wa go nea bohlatse phatlalatša lege re le dibokeng ke’ng seo re swanetšego go tshwenyega ka sona mabapi le bohlweki bja motho ka noši, diaparo le dieta?

¹⁸ Se ge e le gabotse se bolela’ng? Se bolela gore e tla ba mo go sa swanelago le mo go hlomphollago Jehofa e le ka kgonthe go mo emela bodireding bja ntlo le ntlo, diterateng goba legaeng la motho o mongwe, ge e ba re se ra hlweka mmeleng le go apara ka tshwanelo. Ka gona ga se ra swanela go ba bao ba sa elego hloko mabapi le ditaba tše bjalo. Re swanetše go di ela hloko e le ka kgonthe, e le gore re tle re dire ka tsela yeo e swanelago badiredi bao ba rwalago leina la Jehofa. Ga go nyakege gore diaparo tša rena e be tša theko e phagamego eupja di swanetše go ba tše hlwekilego, tše kgahlišago le tša bothakga. Dieta tša rena di swanetše go ba boemong bjo botse le go ba le ponagalo e botse. Ka mo go swanago, ge re le dibokeng ka moka go akaretša le Thuto ya Puku ya Phuthego, mebele ya rena e swanetše go ba e hlwekilego, gomme re apare ka bothakga le ka mo go swanetšego.

19. Ke mehola efe ya moya yeo e tlišwago ke ponagalo ya rena e hlwekilego re le badiredi ba Bakriste?

¹⁹ Ponagalo ya rena ya go hlweka le bothakga ge re le modirong wa go nea bohlatse le ge re le dibokeng tša rena, ke tsela e nngwe ya “xo thakxa thutô ya Modimo Mophološi wa rena.” (Tito 2:10) Ke bohlatse ka boyona. Batho ba bantši ba ile ba kgahlišwa ke bohlweki bja rena, gomme se se ile sa ba tutueletša go theetša molaetša wa rena mabapi le merero e makatšago ya Jehofa ya magodimo a mafsa a lokilego le lefase le lefsa le le hlwekišitšwego.—2 Petro 3:13.

20. Ke dienywa dife tše oketšegilego tše botse tšeo di tlišwago ke go ba ga rena ba hlwekilego monaganong le mmeleng?

²⁰ Ge tshepedišo e mpsha ya Jehofa e dutše e batamela, ka moka ga rena re swanetše go ithlahloba go bona ge e ba go nyakega gore re dire dipeakanyo tše itšego mekgweng ya rena ya go nagana goba ya motho ka noši. Paulo o ngwadile gore: “Ke bolêla ka mokxwa wa batho ka xo bôna phôkôlô ya nama ya lena; ke re: Byalo ka xe Le be Le neetše dithô tša lena xo hlankêla dithšila le bokxôpô la ya nabyô’, byalo neêlang dithô tša lena xo hlankêla tokô le kxêthêxô.” (Ba-Roma 6:19) Bohlweki bja moya le bohlweki bja mmele bo tšweletša seenywa se sebotse gaešita le gona bjale, e lego “dienywa . . . tše išaxo kxethexong; ’me pheletšô ya tšôna [e tla ba] bophelô byo bo sa felexo.” (Ba-Roma 6:22) Ka gona, anke re be bao ba hlwekilego monaganong le mmeleng ge re dutše re ‘tliša mebele ya rena e le sehlabelo se se phelago se sekgethwa, se se amogelegago go Modimo.’—Ba-Roma 12:1.

[Mongwalo wa tlase]

Dintlha tša go Gopolwa

◻ Mahlo a rena le pelo di ka re šušumeletša bjang go dira boitshwaro bjo gobogilego?

◻ Ke mehola efe yeo ba-Isiraele ba bego ba e hwetša ge ba be ba e-kwa melao ya Jehofa ya tša maphelo e le sehlopha lege e le motho ka o tee ka o tee?

◻ Ke melao efe ya motheo yeo e latelwago Magaeng a Bethele yeo e swanetšego go laola legae le lengwe le le lengwe la Mokriste?

◻ Ke neng kudu-kudu mo re swanetšego go ba ba elago hloko ka ponagalo ya rena?

◻ Ke mabaka afe a moya ao bahlanka ba Jehofa ba nago le ona bakeng sa go boloka magae a bona le dikoloi di hlwekile?

[Seswantšho go letlakala 17]

“Bophelo bja Bethele bo nyaka go kgomarela ditekanyetšo tše phagamego tša mmele, boitshwaro le moya”

[Seswantšho go letlakala 18]

Na mma o swanetše go diriša nako e oketšegilego letšatšing le lengwe le le lengwe a hlwekiša ka morago ga ditho tša lapa tše sa naganelego?

[Seswantšho go letlakala 19]

Ka metsotso e lesome feela, koloi e ka hlwekišwa ka gare