Aborahama—Ke Mohlala go Bohle ba Tsomago Bogwera bja Modimo

“Xa a ka a fôkôla tumelong, . . . À kxodilwe ruri xore Modimo ó na le matla a xo dira se a mo holofedišitšexo sôna.”—BA-ROMA 4:19-21.

1. Ke ka baka la’ng Sathane a ile a leka go hlompholla pego ye e lego mabapi le Aborahama?

LENTŠU la Modimo le le hlalositšwego gabotse Mangwalong ke “le le phelaxo, ké le matla.” (Ba-Hebere 4:12) Ka gona, pego ya ditirišano tša Jehofa le Aborahama, gaešita lege e ngwadilwe nywageng e 3 500 e fetilego, ke mothopo wa kgothatšo go bohle bao ba tsomago bogwera bja Modimo. (Ba-Roma 15:4) Lenaba le legolo, Sathane le tseba se, gomme le dirišitše baetapele ba bodumedi go leka go hlompholla pego yeo bjalo ka nonwane.—2 Ba-Korinthe 11:14, 15.

2. Barutiwa ba Jesu ba ile ba ba le pono efe ka Aborahama?

² Ka ge e le karolo ya “Mangwalô ka moka . . . ma-hebetšwa-ke-Modimo,” ruri histori ya Aborahama ke ya therešo gomme ‘e hola Bakriste ka go ba ruta.’ (2 Timotheo 3:16; Johane 17:17) Barutiwa ba pele ba Jesu ruri ba ile ba lemoga se, ka ge Aborahama a boletšwe ka makga a 74 Mangwalong a Bakriste a Segerika. Kgaolong ya bo-11 ya Ba-Hebere yeo e tutueletšago tumelo, sekgoba se se oketšegilego se dirišeditšwe yena go feta mohlanka lege e le ofe wa Modimo wa pele ga Bokriste.

3. Ke bjang Aborahama a ilego a godišwa kudu?

³ Aborahama e be e se “moporofeta” yo a tlwaelegilego, ka gobane Jehofa o mo dirišeditše go hloma “seswanthšetšo” se segolo seo go sona mopatriareka a ilego a godišwa kudu ka go dira e le moporofeta wa mohuta wa Modimo ka noši. (Genesi 20:7; Ba-Galatia 4:21-26) Ka gona Jesu o boletše ka ‘difaro tša Aborahama’ ge a be a hlalosa boemo bja go amogelwa ke Modimo.—Luka 16:22.

Tiro ya Gagwe ya Mathomo ya Tumelo

4. Go ya ka Beibele, ditirišano tša Modimo le Aborahama di thomile bjang?

⁴ Aborama, ka ge a be a bitšwa bjalo pele, o godišeditšwe “Uri wa Kaladea.” Ge a be a dula moo, Jehofa Modimo o ile a iponagatša go yena gomme a re: “Tloxêla lefase lé la xeno, le metswalo ya xaxo, le ngwako wa tat’axô; O yê naxeng ye ke tl’o xo Xo laetša yôna. Xobane ke tl’o Xo dira sethšaba se sexolo; ke tlo Xo šexofatša ka xodiša leina la xaxo; ’me wêna O tlo ba thšexofatšô. Ke tlo šexofatša ba ba Xo šexofatšaxo, ka roxa ba ba Xo roxaxo; ’me meloko ka moka ya lefase e tlo šexofatšwa ka wêna.”—Genesi 12:1-3; 15:7; Ditiro 7:2, 3.

5. (a) Kholofetšo ya Modimo e swanetše go ba e ile ya kgoma pelo ya Aborama bjang? (b) Aborama o ile a arabela bjang kholofetšong?

⁵ A pitšo e lekago gakaakang! Go Aborama, go e kwa go be go bolela go tlogela boemo bjo bobotse le metswalo ya gagwe go ya go phela kgole nageng e šele. Eupja pelo ya Aborama e ile ya kgongwa e le ka kgonthe ke kholofetšo e lerato ya Modimo. Ka ge e be e le mokgalabje yo a se nago ngwana a bile a e-na le mosadi wa moopa, leina la gagwe go bonala le be le tla lebalwa go se go ye kae. Kholofetšo ya Modimo e kgonthišeditše se se fapanego: “Sethšaba se sexolo” se be se tla tšwa go yena. Go feta moo, kholofetšo ya Modimo e be e akaretša go goeletšwa mo go makatšago ga ditaba tše di lokilego go batho ka moka di šupa pele nakong yeo ka yona ditšhaba ka moka di bego di tla šegofatšwa. (Ba-Galatia 3:8) Aborama o ile a bontšha tumelo kholofetšong ya Jehofa gomme a tlogela lefelo la tlhabologo e kgolo. Beibele e re botša gore, “a tsoxa a sepela à sa tsebe mo a yaxo.”—Ba-Hebere 11:8.

6. (a) Ke ka baka la’ng Genesi 11:31 e hlompha Thara ka go khuduga? (Ditiro 7:2-4) (b) Ke ka ditsela dife Sara e bego e le mohlala go basadi ba Bakriste lehono?

⁶ Tumelo ya Aborama e tutueditše ba bangwe. Lapa la gagwe, gotee le Thara tatagwe, Loto motlogolo’agwe ba ile ba tloga le yena. Lega go le bjalo, ka gobane Thara e be e le mopatriareka yo e bego e le hlogo ya lapa, o thabišwa ke go tloga. (Genesi 11:31) Se se swanetšego go elwa hloko ke thekgo yeo Aborama a e hweditšego go mosadi wa gagwe Sarai, yoo ka morago a ilego a bitšwa Sara. O ile a kgotlelela boemo bja tlase bja go phela lebakeng ka moka la bophelo bja gagwe. (Genesi 13:18; 24:67) Ka mo go kwagalago nakong ya ge mosadi a e-hwa, “Aborahama a tla a mo hlokofalêla a mo llêla.” (Genesi 23:1, 2) Ka baka la tumelo ya gagwe e matla le boikokobetšo bja pelo ka moka bja mosadi, o hlalositšwe gabotse e le mohlala wa botse bja kgonthe bja moya bja basadi ba Bakriste.—Ba-Hebere 11:11, 13-15; 1 Petro 3:1-6.

7. Ke ka ditsela dife Bakriste lehono ba bontšhitšego tumelo e swanago le ya Aborahama le Sara?

⁷ Bakriste ba bantši lehono ba bontšhitše tumelo e swanago ka go ithapela go gaša molaetša wa Modimo mafelong ao go nyakegago thušo e kgolo ya baboledi ba Mmušo go wona le go aga le go diriša meago e mefsa bakeng sa go gatiša le go romela dipuku tša Beibele. (Mateo 24:14) Bakriste ba ba bile le karolo tabeng ya go kwa taelo e rego, “yang Le dirê dithšaba ka moka barutiwa.” Ge ba khudugela nageng e šele, gantši ba ile ba swanelwa ke go fetogela boemong bjo fapanego bja go phela. Ba bangwe ba ile ba dira boikgafo bjo bo lemogegago bja dilo tše di bonagalago e le gore ba dire barutiwa lefelong la gabo bona.—Mateo 28:19, 20.

Ditiro tše Dingwe tša Tumelo

8. Ke’ng seo se ilego sa lebiša go iponagatšeng la bobedi ga Jehofa go Aborama?

⁸ Aborama o ile a dula motseng wa Harane go fihlela lehung la tatagwe, Thara. (Genesi 11:31, 32) Ka morago lapa la gagwe la tshela Noka ya Eforate gomme la leba borwa. Mafelelong le ile la fihla “motseng wa Sikeme” bogareng bja naga ya Kanana. Le e swanetše go ba e be e le lefelo le le kgahlišago gakaakang! Sikeme e meeding e nonnego magareng ga melokeloke ya dithaba tše pedi tšeo di felelago Thabeng ya Ebale le Thabeng ya Keratsime. E ile ya hlaloswa e le “paradeise ya Naga e Kgethwa.” Ka mo go swanetšego, Jehofa mo o ile a iponagatša gape go Aborama gomme a re: “Naxa yé ke tlo e nea bana ba xaxo.”—Genesi 12:5-7.

9. (a) Ke ka tsela efe e kgethegilego yeo ka yona Aborama a ilego a tšwela pele a bontšha tumelo? (b) Ke thuto efe yeo re ithutago yona go se?

⁹ Aborama o ile a arabela ka tiro e nngwe ya tumelo. Ka ge pego e re: “Ó axile aletare ya Morêna e a iponaditšexo xo yêna.” (Genesi 12:7) Mohlomongwe se se be se akaretša go neela sehlabelo sa phoofolo, ka gobane lentšu la Sehebere bakeng sa “aletare” le bolela “lefelo la sehlabelo.” Ka morago Aborama o ile a boeletša ditiro tše tša tumelo dikarolong tše dingwe tša naga. Go oketša go se, o ‘ile a bitša leina la Jehofa.’ (Genesi 12:8; 13:18; 21:33) Lefoko la Sehebere ‘go bitša leina’ le bile le hlalosa “go bolela leina.” Lapa la Aborama gotee le ba-Kanana ba swanetše go ba ba ile ba mo kwa a bolela leina la Jehofa Modimo wa gagwe ka sebete. (Genesi 14:22-24) Ka mo go swanago, bohle bao ba nyakago bogwera bja Modimo lehono ba swanetše go bitša leina la gagwe ka tumelo. Se se tla akaretša go ba le karolo go boleleng phatlalatša ‘ka mehla re nea Modimo sehlabelo sa theto, e lego seenywa sa melomo yeo e bolelago phatlalatša ka leina la gagwe.’—Ba-Hebere 13:15; Ba-Roma 10:10.

10. (a) Ke ka ditsela dife tše dingwe tšeo Aborama a ilego a tšwela pele a bontšha tumelo? (b) Ke mohlala ofe wo a o beetšego dihlogo tša malapa tša Bakriste? (1 Timotheo 3:12)

¹⁰ Tumelo ya Aborama go Jehofa e ile ya bontšhwa ka ditsela tše dingwe tše dintši. O ile a dira dihlabelo bakeng sa khutšo fela a swaragana le mathata ka sebete. (Genesi 13:7-11; 14:1-16) Gaešita lege a be a humile, feela o be a sa phegelele dilo tše di bonagalago. (Genesi 14:21-24) Go e na le moo, o be a amogela baeng, gomme a thekga borapedi bja Jehofa ka go fa kudu. (Genesi 14:18-20; 18:1-8) Sa bohlokwa kudu, e be e le hlogo ya lapa yeo e beago mohlala gomme a latela taelo ya Jehofa ka go laela barwa ba gagwe le ba lapa la gagwe bao ba tlilego ka morago, mo e lego gore ba ile ba tšwela pele ‘ba swere ka tsela ya Jehofa ba dira toko.’ (Genesi 18:19) Tabeng ye, lapa la Aborama le ile la tšea tsela e fapanego e le ka kgonthe le ya ba-Kanana bao ba itahletšego bootsweng Sodoma le Gomora tše di agišanego le bona. Ka kgonthe Aborama o be a ka se kgotlelele dibe tše bjalo tše kgolo lapeng la gagwe. Taba ya gore o ile a okamela lapa la gagwe ka tshwanelo e bontšhwa ke tsela yeo ditho tša lapa la gagwe di ilego tša mo ekiša ka go bitša leina la Jehofa ka tumelo.—Genesi 16:5, 13; 24:26, 27; 25:21.

“Xa a ka a Fôkôla Tumelong”

11. Ke bjang Aborama a ilego a kgona go kgotlelela e le “modiiledi . . . naxeng e šele” ka nywaga e lekgolo?

¹¹ Tumelo e matla ya Aborama e ile ya mo thuša go kgotlelela mathata ge a be a phela ka nywaga e lekgolo gare ga batho bao ba bolelago gore naga ke ya bona. (Genesi 12:4; 23:4; 25:7) Beibele e re: “Ké ka tumêlô xe a diilêla naxeng yeo a e holofeditšwexo, xwa ba byalo ka e ke xa se naxa ya xaxwe, a dula merakeng; le Isaka, le Jakobo ba dira ka mokxwa woo, è le bôná ba xo tlo ja bohwa byoo ba holofeditšwexo byôna. Xobane ó be a letetše motse [mmušo wa Modimo] wo o tl’o xo thêwa wa tia, woo mothei le moaxi wa wôna e lexo Modimo. [O] be [a] sa bolele naxa yela [a] tšwilexo xo yôna; xobane sebaka sa xo boêla xo yôna, [a] be [a] na nasô.”—Ba-Hebere 11:9, 10, 15; bapiša le Ba-Hebere 12:22, 28.

12. Ke sebaka sefe sa pele seo Aborama a ilego a ba le sona sa go boela Uri, gomme o ile a rarolla bothata bjang?

¹² E be e se kgale Aborama a dula Kanana ge tlala e šoro e be e mo nea ‘sebaka sa go boela morago.’ Uri ka ge e be e e-na le meetse a mantši a Noka ya Eforate, e be e sa ithekga ka pula e le ka kgonthe. Lega go le bjalo, Aborama go e na le go boela moo o ile a bea tumelo go Jehofa gomme a leba lefelong le fapanego—Egipita. Seo e be e le go ipea kotsing. Ka ge a be a e-na le mosadi yo botse, Aborama wa modiiledi o be a le kotsing ya bophelo bja gagwe nageng yeo e šele. Lega go le bjalo, o ile a tšea ditemošo e sa le pele ka go kgopela Sarai go bipa tswalano ya bona ya lenyalo. Jehofa o ile a šegofatša Aborama bakeng sa tumelo ya gagwe, gomme go se go ye kae a kgona go boela Nageng ya Kholofetšo a e-na le lehumo le legolo go feta pele.—Genesi 12:10–13:2; 20:12.

13. Ke’ng seo se swantšhetšwago ke boopa bja Sarai le go uta ga Aborama tswalano ya gagwe ya lenyalo go yena?

¹³ Se le sona se ile sa bopa karolo ya tiragatšo ya boporofeta yeo Aborama a ilego a e diragatša a sa tsebe bakeng sa go re ruta. Sarai yo e bego e sa dutše e le moopa, o swantšheditše phuthego ya Jehofa ya legodimo e swanago le mosadi ya barongwa ba botegago. Mosadi yo yo botse wa seswantšhetšo o ile a swanelwa ke go leta ka nywaga e fetago 4 000 pele a ka tšweletša peu ya therešo ya Aborahama o Mogolo, Jehofa Modimo. Go tlaišwa ka go lebanya ga bahlanka ba botegago ba Modimo nywageng yeo ka moka ya go letela selo se sengwe go dirile gore go bonale eka Jehofa o be a utetše mosadi tswalano ya gagwe ya go ba monna wa gagwe.—Genesi 3:15; Jesaya 54:1-8; Ba-Galatia 3:16, 27, 29; 4:26.

14. (a) Mafelelong Sarai o ile a itshwara bjang ka go ba ga gagwe moopa? (b) Ke’ng seo se ilego sa diragala ngwageng wa Aborama wa bo-100, gomme ka baka la’ng?

¹⁴ Ka morago ga go kgotlelela e le modiiledi ka nywaga e lesome, Aborama o be a sa dutše a se na morwa e le moja-bohwa. Sarai ka go itlhoboga o ile a mo kgopela gore a belege ngwana ka mohlanka wa gagwe, Hagara. Aborama o ile a dumela gomme Isimaele a belegwa. (Genesi 12:4; 16:1-4, 16) Eupja peu e holofeditšwego ya tšhegofatšo e be e swanetše go tla ka motho o mongwe. Ngwageng wa bo-100 wa Aborama, leina la gagwe le ile la fetolwa ya ba Aborahama, go etša ge Modimo a boletše gore, “ke xo beile xo tlo ba tata xo bontši bya dithšaba.” Leina la Sarai le ile la fetolwa ya ba Sara ka kholofetšo ya gore o be a tla belega morwa.—Genesi 17:1, 5, 15-19.

15. (a) Ke ka baka la’ng Aborahama a ile a sega kgopolo ya gore Sara o tla mmelegela morwa? (b) Ke bohlatse bofe bjo oketšegilego bjoo Aborahama a bo neilego bja tumelo ya gagwe e matla?

¹⁵ Aborahama (gomme ka morago Sara) o ile a sega taba yeo ka gobane matla a gagwe gotee le a Sara a go belega a be a fedile. (Genesi 17:17; 18:9-15) Eupja le e be e se lesego la go hloka tumelo. Go swana lege Beibele e hlalosa gore: “Xa a ka a fôkôla tumelong . . . kholofedišô ya Modimo xa a ka a e belaêla ka xo se dumêle; sa xaxwe ya ba xo tiêla tumêlô le xo xodiša Modimo, a kxodilwe ruri xore Modimo ó na le matla a xo dira se a mo holofeditšexo sôna.” (Ba-Roma 4:18-21) Letšatšing lona leo, Aborahama o ile a nea bohlatse bja tumelo ya gagwe e matla. E le seka sa kgwerano ya Modimo le yena, Jehofa o ile a botša Aborahama gore a bolle gotee le banna bohle lapeng la gagwe le legolo. (Genesi 15:18-21; 17:7-12, 26) O ile a arabela bjang taelong ye e bohloko? “A bolotša nama ya melomo ya mebele ka lona letšatši leo, ka mo Modimo a bego a boletše le yena.”—Genesi 17:22-27, Phetolelo ya Kgale.

16. (a) Ke’ng seo se ilego sa diragala letšatšing la go tshwešwa ga Isaka? (b) Go rakwa ga Hagara le Isimaele go swantšheditše eng?

¹⁶ Isaka, yoo leina la gagwe le bolelago “Lethsêxô,” o ile a belegelwa Sara ngwageng o latelago. (Genesi 21:5, 6) Go se go ye kae go ile gwa fihla nako ya gore a tshwešwe. Nakong ya monyanya, Isimaele yo a nago le mona o ile a tlaiša Isaka. Ka baka leo Sara a opeletša Aborahama gore a rake mosadi wa mohlanka, Hagara, le morwa wa gagwe lapeng. Jehofa Modimo o ile a thekga kgopelo ya Sara. Gaešita lege a be a kwele bohloko, Aborahama o ile a gapeletšega go kwa. (Genesi 21:8-14) Go ya ka Ba-Galatia 4:21-30 se se swantšheditše kamoo Aborahama o Mogolo a bego a tla fediša tswalano ya gagwe le setšhaba sa Isiraele wa tlhago. Ka go swana le batho ka moka, ba be ba belegwe e le bahlanka ba sebe. (Ba-Roma 5:12) Eupja le bona ba ile ba gana Jesu Kriste, Peu ya kgonthe ya Aborahama, yeo e bego e tletše go ba lokolla. (Johane 8:34-36; Ba-Galatia 3:16) Ka gona go swana lege Isimaele a tlaišitše Isaka, ba ile ba tlaiša phuthego e sa tšwago go hlongwa ya Bakriste ya Isiraele wa moya, bao e bego e le karolo ya bobedi ya peu ya Aborahama.—Mateo 21:43; Luka 3:7-9; Ba-Roma 2:28, 29; 8:14-17; 9:6-9; Ba-Galatia 3:29.

Teko ya Gagwe e Kgolo Kudu ya Tumelo

17. Se se latelago ke bjang tumelo ya Aborahama e ilego ya lekwa o šoro?

¹⁷ Ga go pelaelo gore tate lege e le ofe wa motho o bile le lerato le legolo la go rata morwa wa gagwe go swana lege Aborahama yo a tšofetšego a bile le lona go Isaka. E swanetše go ba e bile mo go tšhošago gakaakang ge a be a amogela taelo ye: “Tšea morwa wa xaxo e lexo o tee, yo O mo rataxo, yêna Isaka, o ye Naxeng ya Moriya; xôna moo O mo dirê sehlabêlô thabeng ya xôna, ye ke tl’o xo Xo laetša yôna.”—Genesi 22:1, 2.

18. Aborahama o ile a arabela bjang taelong ya Jehofa ya gore a dire Isaka sehlabelo?

¹⁸ Go swanetše go ba go ile gwa ba thata go Aborahama go kwešiša lebaka la taelo ye e bohloko. Eupja o ile a bontšha go kwa ga gagwe ga ka mehla mo go tiilego. (Genesi 22:3) Go ile gwa mo tšea matšatši a mararo a lapišago go fihla thabeng e kgethilwego. Gona moo a aga aletare gomme a bea dikgong ka godimo. Ka nako yeo o swanetše go ba a ile a hlalosetša Isaka taelo ya Modimo, yoo a ka bego a ile a tšhaba gabonolo. Go e na le moo Isaka o ile a dumelela tatagwe yo a tšofetšego gore a mo tleme maoto gomme a mmee godimo ga aletare. (Genesi 22:4-9) Go kwa mo re ka re go bakilwe ke eng?

19. (a) Go ikokobetša ga Isaka ka sebete re ka re go bakilwe ke eng? (b) Ke bjang tswalano magareng ga Aborahama le Isaka e lego thuto go malapa a Bakriste lehono?

¹⁹ Aborahama ka go botega o ile a tšwetša pele boikarabelo bja gagwe mabapi le Isaka, ka ge go bontšhitšwe go Genesi 18:19. Ga go pelaelo gore o ile a gatelela go Isaka morero wa Jehofa wa go tsoša bahu. (Genesi 12:3; Ba-Hebere 11:17-19) Isaka ka lehlakoreng la gagwe, e be e le seka sa lerato le legolo la Aborahama gomme o swanetše go ba a ile a rata go thabiša tatagwe dilong ka moka, kudu-kudu ge se be se akaretša go dira thato ya Modimo. Wo ke mohlala o mobotse gakaakang go malapa a Bakriste lehono!—Ba-Efeso 6:1, 4.

20. Aborahama o ile a kwa ka tsela efe, gomme gwa mo tlišetša moputso ofe?

²⁰ Bjale go tlile seremo sa teko. Aborahama a swara thipa ya go bolaya. Ge a be a le kgaufsi le go bolaya morwa wa gagwe, Jehofa o ile a mo thibela gomme a re: “Byale ke lemoxile xore O boifa Modimo, xomme xa wa ka wa xana xo nneêla morwa wa xaxo o tee eo.” (Genesi 22:11, 12) Aborahama o ile a putswa ka mo go humišago gakaakang ka go kwa kgoeletšo ya Modimo ka noši ya go bolela go loka ga gagwe! Bjale o be a ka ikwa a kgodišegile gore o dumelelane le seo Modimo a se nyakago go motho yo a sa phethagalago. Sa bohlokwa kudu, go lekanyetša ga pele ga Jehofa tumelo ya gagwe go ile gwa godišwa. (Genesi 15:5, 6) Ka morago ga se, Aborahama a dira nku yeo a e neilwego ka mohlolo sehlabelo legatong la Isaka. Ka gona a kwa Jehofa a kgonthišetša dikholofetšo tša kgwerano ka keno. Ka morago a tsebja e le mogwera wa Modimo.—Genesi 22:13-18; Jakobo 2:21-23.

21. Ke seswantšhetšo sefe sa boporofeta seo se bego se newa mo, gomme se swanetše go re kgothaletša go tsoma eng?

²¹ Sehlabelo sa Aborahama e be e le “seswanthšetšo.” (Ba-Hebere 11:19) Se be se swantšhetša sehlabelo se bohloko se segolo seo Jehofa Modimo a se dirilego ge a be a romela Morwa wa gagwe yo a ratwago lefaseng gore a tle a hwe e le “Kwana ya Modimo e rwelexo sebe sa lefase.” (Johane 1:29) Go ikemišetša go hwa ga Isaka go swantšhetša tsela yeo ka yona Isaka o Mogolo, Jesu Kriste, a ilego a ineela ka lerato go dira thato ya Tatagwe wa legodimong. (Luka 22:41, 42; Johane 8:28, 29) Mafelelong, ka go fo swana lege Aborahama a amogetše morwa wa gagwe a phela go tšwa aletareng, Jehofa o amogetše Morwa wa gagwe yo a ratwago go tšwa lehung e le sebopiwa sa moya sa letago. (Johane 3:16; 1 Petro 3:18) Tše ka moka ke tše di kgothatšago gakaakang go batsomi ba bogwera bja Modimo lehono!

22. Ke bjang sehlopha se se kgethilwego sa batho se ilego sa holwa ke lerato le sa lekanywego ka selo la Modimo?

²² Ka go bontšha tumelo tirong ye ya lerato le sa lekanywego ka selo ka lehlakoreng la Aborahama o Mogolo, Jehofa Modimo, sehlopha se se kgethilwego sa batho se ile sa balelwa go loka e le barwa ba Modimo. (Ba-Roma 5:1; 8:15-17) Ba tšerwe pele go ba-Juda gomme ka morago ba tšwa go Ba-ntle, ba ba šegofaditšwe e le ka kgonthe ka Peu ya Aborahama, Jesu Kriste. (Ditiro 3:25, 26; Ba-Galatia 3:8, 16) Le bona ba bopa karolo ya bobedi ya peu ya Aborahama. (Ba-Galatia 3:29) Bao mafelelong e ba ba 144 000, gomme ka go swana le Jesu ba tsošetšwa bophelong bja legodimong ka morago ga ge ba itlhatsetše ba botega go fihla lehung.—Ba-Roma 6:5; Kutollo 2:10; 14:1-3.

23. (a) Ke bjang dimilione di šetšego di šegofatšwa ka mašaledi a peu ya Aborahama? (2 Ba-Korinthe 5:20) (b) Ke ditšhegofatšo dife tše oketšegilego tšeo di lego ka pele ga “lešaba le lexolo”?

²³ Go sa le bjalo, dimilione tše tšwago ditšhabeng ka moka di ‘itšhegofatša’ ka go arabela ga tšona bodireding bjo lerato bja mašaledi a manyenyane a peu ya Aborahama. (Genesi 22:18) Ba kgahlišitšwe ke go ithuta kamoo batho bao ba nago le sebe ba ka balelwago go loka e le bagwera ba Modimo. Ka baka leo, “lešaba le lexolo . . . le tšwaxo dithšabeng ka moka” le thabela go amogelwa ke Modimo, ka ge “ba hlatswitše mašela a bôná ba a taxafatša mading a Kwana.” Le bona ‘ba hlankela Modimo mosegare le bošego ba eteletšwe pele ke mašaledi.’ Se se beilwego ka pele ga lešaba le le legolo ke kholofelo e kgahlišago ya bophelo bjo bo sa felego Paradeiseng e le “bana ba Modimo” ba lefaseng. (Kutollo 7:9-17; 21:3-5; Ba-Roma 8:21; Psalme 37:29) Lega go le bjalo, pele ga ge ditšhegofatšo tšeo di phethega, ditiragalo tša bohlokwa kudu di swanetše go direga, ka ge re tla ithuta sehlogong se se latelago.

Dipotšišo tša Tlhahlobo

□ Tumelo ya Aborahama le ba lapa la gagwe e ile ya lekwa bjang?

□ Lehono Bakriste ba bontšhitše bjang tumelo e swanago?

□ Ke ditsela dife tše dingwe tšeo ka tšona Aborahama a bontšhitšego tumelo?

□ Ke bjang Aborahama, Sara le Isaka e lego mehlala go malapa a Bakriste lehono?

□ Ke’ng seo se ilego sa swantšhetšwa ke tiro e kgolo-kgolo ya tumelo ya Aborahama?