Go Dula re Rulagantšwe Bakeng sa go Phologela Nywageng e Sekete

“Ya tlo ba mohlape o tee le modiši o tee.”—JOHANE 10:16.

1. Nywaga e sekete e bjalo ka eng go Modimo yo a dulago a phela?

JEHOFA ke mmopi wa nako bakeng sa batho. Go yena, Modimo yo a sa hwego yo a tšwago bosafelego a e-ya bosafelego, nywaga e sekete e fo swana le letšatši leo le fetago ka pela goba gaešita le nako ya sešupanako go bjo bongwe bja mašego a rena.—Psalme 90:4; 2 Petro 3:8.

2. Ke nako efe yeo Jehofa a e beetšego go šegofatša batho ka moka?

² Modimo o beile letšatši la seswantšhetšo la nywaga e sekete leo ka lona a tlago go šegofatša malapa ka moka a lefase. (Genesi 12:3; 22:17, 18; Ditiro 17:31) Se se akaretša bao gona bjale ba hwilego le bao ba sa dutšego ba phela. Modimo o tla dira se bjang? Ee, ka Mmušo wa Gagwe ka Jesu Kriste, “peu” ya mosadi wa Gagwe wa seswantšhetšo!—Genesi 3:15.

3. (a) Serethe sa Peu ya mosadi wa Modimo se ile sa gobatšwa bjang, eupja ntho yeo e ile ya fodišwa bjang? (b) Bofelong bja Pušong ya Nywaga e Sekete ya Jesu Kriste, ke’ng seo a tlago go se dira go noga ya seswantšhetšo?

³ Serethe sa seswantšhetšo sa Peu ya mosadi wa Modimo (goba phuthego ya legodimong) se ile sa gobatšwa nakong ya ge Jesu a be a e-hwa lehu la mohwela-tumelo gomme a ba yo a hwilego ka dikarolo tša matšatši a mararo ngwageng wa 33 ya Mehla e Tlwaetšwego ya rena. Eupja letšatšing la boraro, Modimo Ra-matla-ohle, Monei o Mogolo wa Bophelo, o ile a fodiša ntho yeo ka go tsošetša Morwa wa gagwe yo a botegago bophelong bja go se hwe lefelong la moya. (1 Petro 3:18) Ka ge Jesu a ka se ke a hlwa a e-hwa gape, o boemong bja go buša e le Kgoši godimo ga batho ka nywaga e sekete le go “phšatla” hlogo ya noga ya seswantšhetšo, a e pšhatlaganye gore e se sa hlwa e e-ba gona ka morago ga bofelo bja Pušo ya Nywaga e Sekete. Yeo e tla ba tšhegofatšo e kgolo gakaakang bakeng sa batho ba tsošološitšwego ba botegago!

4. Ke mohuta ofe wa lenaneo wo Modimo a bego a dutše a o phetha ka batho ba gagwe?

⁴ Thulaganyo e kgolo e ile ya tšwela pele gare ga batho ba Jehofa lefaseng ka bophara nakong ya ‘bofelo bja tshepedišo ye ya dilo’ ga e sa le go tloga ge Mabaka a Ba-ntle a fela ka 1914. (Mateo 24:3, NW; Luka 21:24, King James Version) Lenaneo le la thulaganyo la pele ga Nywaga e Sekete le phethagatšwa ka go dumelelana le thato le ka tlase ga tlhahlo ya morulaganyi o Mogolo, Jehofa Modimo. Go tswalwa ga Mmušo wa gagwe ka Jesu Kriste go diragetše ka 1914, ka mosadi wa gagwe, e lego phuthego ya gagwe e swanago le mosadi ya legodimong ka ge go kgonthišetšwa ke phethagalo ya boporofeta bja Beibele.

5. Ke go tswalwa ga eng mo go boletšwego e sa le pele go Kutollo 12:5, gomme ke neng moo se se ilego sa hlaloswa ka lekga la mathomo ka go The Watch Tower?

⁵ Ka gona mantšu a a Kutollo 12:5 a phethagaditšwe ka letago: “A bêlêxa ngwana wa mošemanyana, wa xo tlo buša dithšaba tšohle ka molamó wa thsipi; xomme ngwana wa xaxwe a tšewa a rotošetšwa xo Modimo sedulong sa xaxwe sa boxoši.” Go tswala ga Mmušo wa Jehofa ka Kriste, ka ge go swantšhetšwa ke ngwana yo a sa tšwago go belegwa wa mosadi wa Modimo, go ile gwa hlaloswa ka lekga la mathomo ka go The Watch Tower ya March 1, 1925. Go tswalwa ga Mmušo wo wa Mesia legodimong ka 1914 go fapana le go tswalwa ga “sethšaba” sa ‘bana’ ba Sione lefaseng ka 1919.—Jesaya 66:7, 8.

6. (a) Go tswalwa ga Mmušo go ile gwa nyaka modiro ofe wo o boletšwego ke Jesu e sa le pele? (b) Go dira modiro wo go ile gwa nyaka eng ka lehlakoreng la batho ba Jehofa, gomme gona bjale ba itšweletša ka ponagalo efe?

⁶ Go tswalwa ga Mmušo wa Jehofa woo ka wona a tlago go phagamiša bogoši bja gagwe bjo bo swanetšego godimo ga legohle ka moka—ee, se e be e le selo seo se swanetšwego ke go tsebišwa lefaseng ka moka! Le gona ye e be e le nako ya go phethagatšwa ga mantšu a Jesu mabapi le bohlatse bja go “ba gona” ga gagwe mo go sa bonagalego: “Ditaba tše tše di lokilego tša mmušo di tla bolelwa lefaseng ka moka leo go agilwego go lona gore e be bohlatse go ditšhaba ka moka; gomme e tla ba gona bofelo bo fihlago.” (Mateo 24:3, 14, NW) Boboledi bjo bo nago le botee le bjo bo dumelelanago ditšhabeng ka moka tekanyong ya lefase ka bophara ka kgonthe bo be bo tla nyaka go rulaganywa ga karolo e bonagalago ya phuthego ya legohle ya Jehofa. The Watch Tower Bible and Tract Society ka ge e emelwa ke yo e bego e le mookamedi wa yona ka nako yeo J. F. Rutherford, e be e dumelelana le se. Ka gona, go tloga ngwageng wa ka morago ga ntwa wa 1919, go rulaganywa ga bathekgi ba botegago ba Mokgatlo e le setšhaba se se tsošološitšwego go ile gwa tšwela pele ka boikemišetšo, ka thapelo bakeng sa tlhahlo le tšhegofatšo ya Morulaganyi yo a Phagamego, Jehofa Modimo. Dihlatse tša Jehofa lefaseng ka bophara di ile tša bontšha moya wa botee lefaseng leo e lego lenaba di lebane le Ntwa ya II ya Lefase go sa šetšwe kganetšo e šoro ya Mafasi, mokgatlo wa Nazi wa Hitler le Lesolo la Makatholika.

7. (a) Batho ba Jehofa ba ka letela go phologa masetla-pelo a magolo feela ka go dula ba e-na le tswalano efe magareng ga bona? (b) Baphologi ba Meetse-fula ba ile ba phonyokga bjang Lefula la lefase ka moka, gomme ba ile ba swantšhetša bomang e sa le pele?

⁷ Ke feela Dihlatse tša Jehofa, e lego mašaledi a tloditšwego le “lešaba le lexolo,” e le phuthego e kopanego ka tlase ga tšhireletšo ya Morulaganyi yo a Phagamego, tšeo di nago le kholofelo ya Mangwalo ya go phologa bofelo bjo bo batamelago bja tshepedišo e ahlotšwego yeo e bušwago ke Sathane Diabolo. (Kutollo 7:9-17; 2 Ba-Korinthe 4:4) Di tla bopa “nama” yeo Jesu Kriste a boletšego gore e tla phološwa masetla-pelong a šoro historing ka moka ya motho. Jesu o itše, bjalo ka ge go be go le bjalo mehleng ya Noage, go tla ba bjalo le mehleng yeo A bego a tla utologa ka yona. Ke feela batho ba seswai bao ba ilego ba phologa Meetse-fula a lefase ka moka, ba le ka gare ga areka yeo go tšerego nywaga e mentši ya boiteko bjo bo rulagantšwego go ka e fetša. Ba ile ba phologa e le sehlopha se kopanego sa lapa. (Mateo 24:22, 37-39; Luka 17:26-30) Mosadi wa Noage o swana le monyadiwa wa Kriste, gomme barwa ba gagwe le dingwetši tša gagwe ba swana le “dinku tše dingwe” tša Jesu tša mehleng yeno tšeo di atilego ya ba lešaba le legolo leo le oketšegago, leo palomoka ya lona ya mafelelo re sa e tsebego ga bjale. (Johane 10:16) Gore ba phologele Nywageng e Sekete ka tlase ga Noage o Mogolwanyane Jesu Kriste, ba swanetše go dula ba rulagantšwe le mašaledi a tloditšwego, “bakxêthwa” bao ka baka la bona matšatši a ‘masetla-pelo a magolo’ a tlago go fokotšwa.—Mateo 24:21, 22.

Go Phologela Nywageng e Sekete

8. Ke seswantšho sefe seo Jesu a ilego a se nea ge a phetha boporofeta bjo bo lego mabapi le go ba gona ga gagwe, gomme ke bjang letšatši la June 1, 1935 e bego e le la bohlokwa ge e le ka go kwešišwa ga bjona?

⁸ Go ya ka Ebangedi ya Mateo, Jesu o phethile boporofeta bja gagwe mabapi le pontšho ya go ba gona ga gagwe ka seswantšho. Seswantšho se se rulagantšwego ka mo go tlwaelegilego sa dinku le dipudi se dira gona bjale, nakong ya bofelo bja tshepedišo ye ya dilo bjo bo thomilego bofelong bja Mabaka a Ba-ntle ka 1914. (Mateo 25:31-46) Letšatši la Mokibelo, June 1, 1935, le be le le bohlokwa ge e le ka go kwešiša go hlaolwa ga dinku tša seswantšho se e le ditho tša lešaba le legolo. Letšatšing leo, kopanong ya Dihlatse tša Jehofa kua Washington D.C., batho ba 840 ba ile ba kolobetšwa go bontšha boineelo bja bona go Jehofa Modimo ka Jesu Kriste. Ba bantši ba ba ba gata mogato wo ka go arabela tutuetšong ya polelo ya Kutollo 7:9-17 yeo e neilwego ke J. F. Rutherford. Kganyogo ya bona e be e le go ba karolo ya lešaba le legolo la dinku tše dingwe tša Modiši yo Botse, ba e-na le sebaka sa go phologa masetla-pelo a magolo a tlago le go phela go feta bofelong bja tshepedišo ye gomme ba tsene Pušong ya Nywaga e Sekete ya Kgoši yeo e lego Modiši, Jesu Kriste. Mafelelong ba hwetša bophelo bjo sa felego lefaseng la paradeise.—Mateo 25:46; Luka 23:43.

9. Ke ka baka la’ng dinku di laleletšwa go amogela mmušo ‘wo di o lokišeditšwego,’ gomme ke bjang di lego boemong bjo bobotse kudu bja go dira botse go banababo Kgoši?

⁹ Ke ka baka la’ng batho ba ba swanago le dinku ba laleletšwa gore ba “tšee kabêlô ya [bona] ya mmušô wo [ba] o lokišeditšwexo xo tloxa xo theweng xa lexohle?” Kgoši e ba botša gore ke ka gobane ba dirile botse go “banababo,” gomme ka go rialo ba bo dirile go yena. Ka lentšu “banababo,” Kgoši e šupa mašaledi a banababo yona ba moya ao a sa dutšego a le lefaseng bofelong bjo bja tshepedišo ya dilo. Ka ge ba fetogile mohlape o tee le banababo Kgoši ye e lego Modiši, Jesu Kriste, ba tla dula ba le kgaufsi-ufsi ka mo go kgonegago le mašaledi a bjalo gomme ka go rialo ba ba boemong bjo bobotse kudu bja go dira botse go bona. Gaešita le ka ditsela tše di bonagalago, ba be ba tla thuša banababo Jesu go bolela molaetša wa Mmušo o hlomilwego lefaseng ka bophara pele bofelo bo ka fihla. Ka baka leo, dinku di be di tla tšeela godimo tokelo ya tšona ya go tšwela pele e le tšeo di rulagantšwego le mašaledi e le mohlape o tee wa Modiši o tee.

10. Go bolela’ng go dinku go ‘tšea mmušo wo di o lokišeditšwego go tloga go theweng ga legohle’?

¹⁰ Go tsena ‘mmušong wo di o lokišeditšwego’ ga go bolele gore dinku tše di tla buša le Jesu Kriste le banababo legodimong ka nywaga e sekete. Go e na le moo, go tloga mathomong a Nywaga e Sekete, dinku di tla tsena boemong bja lefaseng bja Mmušo. Ka ge e le ditlogolo tša Adama le Efa, tikologo ye ya lefase yeo Mmušo wa Modimo ka Kriste o tlago go e buša e be e lokišeditšwe bona “xo tloxa xo theweng xa lexohle” la batho ba lopollegago. Go feta moo, ka ge dinku e e-ba bana ba lefaseng ba Kgoši yeo e bago ‘Tatago bona wa ka mo go sa Felego,’ di tsena tikologong goba boemong bja lefase, ka tlase ga Mmušo wa Modimo.—Jesaya 9:5, 6.

11. Dinku di bontšha bjang gore di emela Mmušo, gomme ka baka la se di na le tšhegofatšo efe?

¹¹ Ka go fapana le dipudi tša seswantšhetšo, batho ba swanago le dinku ba bontšha ka mo go sa belaetšego gore ba emela Mmušo. Bjang? Ka ditiro, e sego mantšu feela. Ka baka la go se bonagale ga Kgoši magodimong, ba ka se dire botse ka go lebanya go yena bakeng sa go thekga Mmušo wa gagwe. Ka gona ba dira botse go banababo ba moya bao ba sa dutšego ba le lefaseng. Gaešita lege se se baka lehloyo, kganetšo le tlaišo ka lehlakoreng la dipudi, ka baka la go dira botse mo go bjalo ruri dinku di botšwa ke Kgoši gore ‘di šegofatšwa ke Tatagwe.’

12. Ke bomang bao dinku tšeo di phologago di tlago go ba le tokelo ya go ba amogela, gomme tabeng ye ke kgopolo efe yeo ditho tša mašaledi di ilego tša ba le yona?

¹² Lešaba le legolo la bathuši ba swanago le dinku ba banababo Kgoši ba moya le tla šegofatšwa ka tokelo e thabišago ya go phologela Nywageng e Sekete. Ka nako e swanetšego, le tla ba le karolo go amogeleng batho ba hwilego bao ba lego mabitleng a kgopotšo. (Johane 5:28, 29; 11:23-25) Ba ba tla akaretša bapatriareka ba botegago le baporofeta bao ba ilego ba tlaišega le go kgotlelela ka kudu bakeng sa go phagamiša bogoši bja Jehofa e le gore ba “fihlele tsoxo e lexo kaone,” yeo e swanetšego go ba e le ya mathomo-thomo. (Ba-Hebere 11:35) Banna le basadi ba bjalo ba tumelo ba tsošitšwego, bao ba boletšwego ka boripana kgaolong 11 ya Ba-Hebere, ba tla akaretša Johane Mokolobetši. (Mateo 11:11) Ba bangwe ba mašaledi a tloditšwego ba ile ba nagana ka go phologa le go tšwela pele ba phela e le gore ba amogele batho ba bjalo ba botegago ba tsošitšwego bao ba hwilego pele ga Pentekoste ya 33 C.E. Na batlotšwa ba tla ba le tokelo e bjalo?

13. Ke ka baka la’ng e ka se be mo go nyakegago gore mašaledi a be gona bakeng sa go amogela le go hlokomela bao ba tsošitšwego lefaseng?

¹³ Se e ka se be seo se nyakegago. Lešaba le legolo la baphologi ba masetla-pelo le tla ba le le gona e le le lentši kudu bakeng sa go hlokomela boemo le go tlwaelanya batho bao ba tsošitšwego le “lefase le lefsa” ka tlase ga “maxodimo a mafsa.” (2 Petro 3:13) Gaešita le gona bjale, lešaba le legolo le rulaganyeditšwe go dira se. Lehono, moo banababo Jesu ba moya lefaseng go begwago gore ba ka tlase ga 9 000, ruri baphologi gare ga bona e tla ba ba banyenyane kudu go ka hlokomela modiro ka moka wa go rulaganya wo o išago tsogong ya kakaretšo. (Hesekiele 39:8-16) Ka gona, mo ke moo lešaba le legolo leo palo ya lona e balwago ka dimilione, le tlago go dira gabotse kudu. Ka gona, ga go pelaelo gore tokelo e bjalo e boloketšwe lona.

14. (a) Ba bantši ba lešaba le legolo ba tlwaeletšwa eng, gomme ke ka baka la’ng ba bantši ba bona ba rwala boikarabelo gona bjale? (b) Ke ditiragalo dife tšeo di swanetšego go direga ka pela, gomme ke modiro ofe wo o letetšego dinku tše dingwe?

¹⁴ Ba bantši ba lešaba le legolo ba šetše ba tlwaetšwa ka boikarabelo bja phuthego le ka mananeo a go aga ao phuthego ya Modimo e a swarago lefaseng ka moka. Le gona go a kgothatša go bona banna ba oketšegilego ba godilego moyeng ba lešaba le legolo ba abelwa go rwala boikarabelo bjo bogolwanyane ka phuthegong yeo Jehofa a e dirišago gona bjale lefaseng. Mašaledi a batlotšwa a tšofala gomme ga a sa na matla a lekanego go ka rwala morwalo. Bana ba babo Kgoši ba amogela thušo e lerato ya thulaganyo yeo bagolo ba swanelegago moyeng le bahlanka ba bodiredi ba dinku tše dingwe ba kgonago go e nea. Go se go ye kae, Babele o Mogolo o tla tlošwa tikologong ya lefase. Ka gona bjalo ka ge Kutollo 19:1-8 e bontšha, lenyalo la Kwana le monyadiwa wa ba 144 000 ka moka le tla phethwa magodimong, gomme dinku tše dingwe, tšeo di dirago e le lefase le lefsa ka tlase ga magodimo a mafsa, di tla emela Kgoši tabeng ya go tšwetša pele modiro o mogolo wa go tsošološa go fihlela ge lefase ka moka le e-ba paradeise yeo e dutšwego ke batho bakeng sa go reta Jehofa.—Jesaya 65:17; bapiša le Jesaya 61:4-6.

15. Ke dikholofetšo dife tšeo lešaba le legolo le di letetšego bakeng sa Nywaga e Sekete?

¹⁵ Lešaba le legolo le tla thabela ditokelo tše dikgolo le tše hlomphegago kudu nakong ya Pušo ya Nywaga e Sekete ya Kriste ge bahu ba rekolotšwego ba batho ba tsošitšwe. Ka gona e tla ba barwa le barwedi ba Kgoši. Go tla kgonega gore gare ga barwa ba bjalo ba bangwe ba tšee maemo a bakgoma, go etša ge barwa ba Kgoši Dafida e be e le bakgoma ba nago le boikarabelo bjo fapa-fapanego.a Se se re gopotša Psalme 45, yeo e rulaganyeditšwego go šupa “kxoši” e tloditšwego ya Jehofa.

16. Psalme 45 ge e le gabotse e šupa go mang, gomme se se ka hlatselwa bjang?

¹⁶ Psalme 45 ge e le gabotse e šupa go kgoši efe? Ee, e šupa go Jesu Kriste! Ba-Hebere 1:9 e bontšha go dirišwa moo ka go tsopola Psalme 45:7 yeo e balegago ka gore: “O rata xôna xo loka; O hloile bokxôpô; ké ka ’baka leo Modimo a Xo beilexo kxoši, a Xo tlodiša makhura a lethabô, xwa hlôkwa mo-ka-wêna.” Ka gona, ruri Psalme 45:16 e šupa go Jesu Kriste yo a tagafaditšwego ge e re: “Barwa ba xaxo ba tlo dula madulong a bô-tat’axo; O tlo ba bea bakxôma lefaseng ka moka.”

17. Kgoši Jesu Kriste, o kgahlegela eng le bomang kudu-kudu?

¹⁷ Jesu ka mo go swanetšego o kgahlišwa kudu ke bokamoso bja gagwe e le Kgoši e bušago go feta bophelo bja gagwe bja nakong e fetilego lefaseng. Ee, ga a lebale gore ba nakong e fetilego kudu-kudu bo-rakgolokhukhu ba gagwe ba batho ba akaretšwa kholofetšong ya Jehofa ya go šegofatša malapa ka moka ka Peu ya Aborahama. Eupja gona bjale kgahlego ya gagwe e kgolo e bokamosong bjo bo lego kgaufsi ka ge bo rerilwe ke Mmei wa Magoši, Jehofa Modimo. Ka gona, bana ba Jesu ba lefaseng, kudu-kudu barwa gare ga bona ba swanelegela go dira ka tlase ga gagwe maemong a bokgoma gomme ba tla tšea maemo a kgahlišago—a kgahlišago go feta a bo-rakgolokhukhu’agwe ba lefaseng.

18. Diphetolelo tše dingwe tša Psalme 45:16 di gatelela bjang kgahlego e kgolwanyane ya Jesu ya go kgahlegela barwa ba gagwe bao e lego bakgoma go feta bo-rakgolokhukhu’agwe?

¹⁸ Kgahlego e kgolwanyane ya Jesu ya go kgahlegela barwa bao e lego bakgoma go feta bo-rakgolokhukhu e gatelelwa ke diphetolelo tše fapa-fapanego tša Beibele. Ye ke tsela yeo ka yona tše dingwe tša tšona di fetolelago Psalme 45:16: “Barwa ba gago ba tla tsena boemong bja bo-tatago, gomme ba tsogela go ba bakgoma godimo ga naga ka moka.” (Moffatt) “Barwa ba gago ba tla tšea boemo bja bo-tatago; o tla ba dira bakgoma nageng ka moka.” (Temana 17. The New American Bible) “O tla belegelwa bana legatong la bo-tatago: o tla ba dira bakgoma lefaseng ka moka.”—The Septuagint Version, yeo e gatišitšwego ke Samuel Bagster le Barwa.

19. Banna ba bangwe ba lešaba le legolo ba na le boikarabelo bofe ka phuthegong gona bjale, gomme Kgoši Jesu Kriste a ka ba kgethela boemo bofe nakong ya Pušo ya gagwe ya Nywaga e Sekete?

¹⁹ Se se re thabišago kudu ke gore bao e tlago go ba bakgoma ba nakong e tlago ba gare ga rena. Ba hwetšwa gare ga dinku tše dingwe tšeo di theetšago lentšu la Modiši yo Botse Jesu Kriste. Kudu-kudu di ile tša le theetša ga e sa le go tloga ka 1935, nakong ya ge Kutollo 7:9-17 e hlaloswa kopanong ya Dihlatse tša Jehofa kua Washington, D.C. Lehono, ba dikete-kete ba lešaba le le legolo la dinku tše dingwe ba dira e le bagolo, goba balebeledi diphuthegong tše fetago 57 670 tša Dihlatse tša Jehofa dinageng tše 212 go dikologa lefase. Ka go dula ba rulagantšwe le mašaledi a banababo Jesu ba moya ao a sa dutšego a le lefaseng, ruri banna ba ba lelokelelong la go amogelwa ka botlalo e le barwa ba lefaseng ba Kgoši Jesu Kriste, nakong ya Pušo ya gagwe ya Nywaga e Sekete godimo ga lefase le lefsa leo le holofeditšwego. (2 Petro 3:13) Ka gona, ba ka kgethwa e le bakgoma bakeng sa go dira lefaseng le lefsa.

20. (a) Kgoši e tla ba le kgopolo efe ka bao e ba kgethilego lefaseng? (b) Lešaba le legolo le tla amogela bomang, gomme ke sebaka sefe seo se beilwego ka pele ga bao ba boago?

²⁰ Kgoši Jesu Kriste e tla thabišwa ke go hlompha bakgoma ba ba sa tšwago go kgethwa, go etša ge gona bjale e hlompha bolebeledi bja dinku tše dingwe tše botegago diphuthegong tša mehleng yeno tša Dihlatse tša Jehofa. Ditho ka moka tša lešaba le legolo la dinku tše dingwe—basadi gotee le banna—di tla ba le tokelo e kgahlišago ya go amogela bohle ba tsogago bahung bao ba tlago go kwa lentšu la Jesu gomme ba phafogela sebaka sa go hwetša bophelo bjo bo sa felego e le batho ba phethagetšego lefaseng le hlwekišitšwego leo le tlago go fetolwa paradeise ya lefase ka moka. (Johane 5:28, 29) Batho ba ratwago kudu ba tsošitšwego ba tla akaretša bo-rakgolokhukhu ba Jesu Kriste ba lopolotšwego e lego banna ba tumelo bao ba bego ba ikemišeditše go hlatsela boineelo bja bona go Jehofa Modimo go ba go fihla lehung ba e-na le kholofelo ya go hwetša “tsoxô e lexo kaone.” (Ba-Hebere 11:35) Eupja ge ba šetše ba išitšwe phethegong ya bophelo bja motho nakong ya Pušo ya Nywaga e Sekete ya Kgoši ya bona ye e lego Molopolodi Jesu Kriste, seo e tla ba mathomo feela. Ka go tšwela pele e le bao ba rulagantšwego ka go se kgaotše ka tlase ga Jehofa Modimo nakong ya teko ya mafelelo godimo ga batho ba tsošološitšwego bofelong bja Nywaga e Sekete, ba tla itlhatsela e le ba swanelwago ke go ba ba loketšwego ke bophelo bjo bo sa felego Paradeiseng e le karolo ya lefaseng ya phuthego ya legohle ya Jehofa.—Mateo 25:31-46; Kutollo 20:1–21:1.

[Mongwalo wa tlase]

O be o tla Araba Bjang?

◻ Jehofa o beile nako efe bakeng sa go šegofatša batho ka moka?

◻ Ke feela ka go dula re e-na le tswalano efe gare ga rena moo re ka phologago masetla-pelo a magolo?

◻ Go bolela’ng go dinku ‘go tsena Mmušong wo di o lokišeditšwego go tloga go theweng ga legohle’?

◻ Nakong ya Nywaga e Sekete, lešaba le legolo le ka ba le karolo ditokelong dife?