Bogolo bjo bo Makatšago bja go Loka ga Modimo

MODIMO o lokile! Ke ka makga a makae o ilego wa kwa mantšu a goba gaešita le go a diriša wena ka noši? Eupja na o kile wa nagana ka bogolo ka moka bja go loka ga Modimo go wena? Go naganišiša mo go bjalo go godiša tebogo ya rena ya go leboga mohuta wa Modimo yo re mo rapelago.

Lega go le bjalo, sa pele, re swanetše go kwešiša seo go loka e lego sona. Ee, go loka ke boemo bja go ba yo a lokilego ge bo bapetšwa ka go fapana le go ba yo kgopo. Eupja go loka go bolela se se fetago seo. Ke seka se dirago. Motho yo a lokilego o dira go loka. Le gona, Modimo go lokeng ga gagwe, o re direla dilo tše ntši tše botse moo dipelo tša rena di thomago go mo rata.

Tekanyo ya bogolo bja go loka ga Modimo e bonwa mantšung a gagwe go Moše lešokeng la Sinai. Moo, o ile a holofetša mohlanka wa gagwe yo a botegago gore: “Botse [“go loka,” NW] bja-ka ka moka ke tlo bo fetiša pele xa xaxo.” Ge a phethagatša kholofetšo yeo gomme a diriša leina la gagwe ka noši, Modimo o tšwela pele ka gore: “Jehofa, Jehofa Modimo wa kgaugelo le lešoko, yo a sa felego pelo le yo a tletšego ka botho bjo lerato le therešo, yo a bolokelago ba dikete botho bjo lerato, yo a lebalelago phošo le molato le sebe, eupja e le yo le gatee a ka se kego a lesa go otla.”—Ekisodo 33:19; 34:6, 7, NW.

Ka gona, go loka ga Modimo go akaretša kgaugelo ya gagwe gotee le lešoko la gagwe, botho bja gagwe bjo lerato le therešo. Ka mo go oketšegilego, go loka ga gagwe go bonwa tabeng ya gore ke yo “a sa felego pelo,” yo a nago le kgotlelelo. Lega go le bjalo, seo ga se bolele gore o swana le motswadi yo a tlogelelago dilo ka go fetišiša, a dumelelago sebe se tšwela pele se sa šetšwe ka mo go sa felego. ‘Le gatee a ka se ke a lesa go otla’ badiradibe bao ba sa sokologego. Modimo wa go loka a ka se ke a dumelela bokgopo bo e-ba gona ka ntle le go šetšwa.

Boati bja go Loka ga Modimo

Bjale, ela hloko ditsela tše dingwe tšeo Modimo a bontšhitšego go loka ga gagwe ka tšona. Sa pele, o bile yo a lokilego go batho nakong ya ge a be a bopa lefase mathomong. Ga se a lokišetša feela dinyakwa tša motheo bakeng sa bophelo bja motho. Go e na le moo o hlamile polanete ya rena ka mo go humilego e le gore go phela go yona e be mo go thabišago e le ka kgonthe. O neile dijo le dino ka mehuta e mentši. O dirile mehuta e fapa-fapanego e kgahlišago le dinonyane, gomme a bopa matšoba ao a tlaleletšago mmala le botse tikologong ya rena. Ka mo go oketšegilego, o dirile mehuta e mentši ya diponagalo tšeo go thabišago go di boga. Ee, nako e nngwe le e nngwe ge re bona go sobela mo go tagilego ga letšatši le go bopega mo go kgahlišago ga maru, re bona bohlatse bja go loka ga Modimo.

Go loka ga Modimo go ile gwa bonwa gape ge a be a bopa monna le mosadi. O neile Adama le Efa mebele e phethagetšego, e phetšego gabotse gomme a ba bea tšhemong ya Edene. Bjale o ile a ba nea taelo e thabišago le ye e sego bonolo: “Tlalang lefase, le le fenyê.” Ka gona, o beile pele ga bona tebelelo ya go thabela bophelo ka mo go sa felego lefaseng la paradeise gare ga bana ba bona ba bantši. (Genesi 1:26-28; 2:7-9) A mpho e kgahlišago gakaakang ya lenyalo bakeng sa banyalani ba pele ba batho!

Gaešita le ge Adama le Efa ba ile ba rabela, Modimo ga se a ba lahla ka mo go feletšego. Ka yona nako yeo, ge nkabe a ile a ba otla ka lehu le semeetseng, o be a tla ba a dira feela se se swanetšego. Lega go le bjalo, o bile wa go loka go batho ba babedi bao bjale ba bego ba na le sebe. O ile a ba dumelela gore ba phele ka lebakanyana gomme ba be le bana.—Genesi 5:1-5.

Go feta moo, go loka ga Modimo go tšwetše pele go le bathong ba sebe ga e sa le go tloga nakong yeo. Go bjalo ka ge Kgoši Dafida a itše: “Morêna ké mo-setša-bohle, kxauxêlô ya xaxwe e ukametše tšohle tše a di dirilexo.” (Psalme 145:9) O nea ka bontši e le gore bophelo bja motho bo ka tšwela pele mo lefelong la gagwe, e lego lefase. Jesu o ile a botša ba-Juda ba mehleng ya gagwe gore: “Tata-weno wa maxodimong, . . . letšatši la xaxwe o le hlabišetša ba babe le ba boló; le pula ya xaxwe ó e nešetša baloki le bakxôpô.” (Mateo 5:45) Tlala goba go hloka lege e ka ba gofe mo go lego gona ga se ka baka la gore Modimo a paletšwe ke go fepa batho. Ke ka baka la kgobogo, bošoro le go palelwa ga batho.

Modimo le gona o dumelela gore batho ba diriše lehumo la diepja gomme ga se a ba fihlela tekanyo ya kwešišo ya magodimo a tletšego dinaledi le kagego e bonagalago ya dilo. Ka kgonthe, Jehofa ke yo a lokilego go batho gaešita lege ba bantši ka boikgantšho ba bolela gore Modimo ga a gona, gomme ba bangwe ba diriša go loka ga gagwe gampe bakeng sa dipakane tša boithati, gaešita le go iša bokgoleng bja go gatelela magagabo bona.—Psalme 14:1.

Go Loka ga Modimo go Badumedi

Lega go le bjalo, ge e ba Modimo a bile wa go loka go batho ka kakaretšo, gona ditirišano tša gagwe le badumedi ruri di ruthetša pelo. Sa pele, nakong ya ge Adama le Efa ba rabela la mathomo, Modimo o ile a porofeta gore go tla tšwelela “peu” yeo mafelelong e bego e tla fenya mafelelo a mabe a sebe sa bona. (Genesi 3:15) Ge nako e be e dutše e feta, bontši bja ditlogolo tša Adama bo ile bja rapela Modimo go sa šetšwe go se phethagale ga bona, gomme boporofeta bjo bja pele bo ba neile kholofelo ya bokamoso bjo kaone. Yo mongwe wa barapedi ba ba botegago, e lego Aborahama, o be a bile a bitšwa “mogwera wa Modimo.”—Jakobo 2:23, Phetolelo ya Kgale.

Modimo o holofeditše Aborahama gore ditlogolo tša gagwe di be di tla ata e be ditšhaba tše ntši le gore lešika le legolo la bana ba gagwe le be le tla tšea naga ya Kanana e le bohwa. Go phethagatša se, ba-Isiraele e lego ditlogolo tša Aborahama, ka morago ba ile ba rulaganywa go ba setšhaba. (Genesi 17:3-8; Ekisodo 19:6) Gape, Modimo o bile wa go loka setšhabeng se se sefsa, a ba ntšha bohlankeng kua Egipita, a ba šireletša lešokeng, a ba nea sehlopha sa melao le boperisita, gomme mafelelong a ba nea naga e nonnego ya Kanana gore e be bohwa bja bona.

Mafelelong, Isiraele e ile ya ba mmušo, gomme Jehofa o ile a laela Salomo kgoši ya gagwe ya boraro ya motho, go aga tempele kua Jerusalema e le lefelo la lefaseng bakeng sa borapedi bja Gagwe. Ge tempele e feditšwe, go bile le tirelo e kgolo ya kgakolo le monyanya o thabišago. Ka morago ga moo, pego e re ba-Isiraele ‘ba laelana le kgoši ka ditšhegofatšo, ba boela magaeng a bona ba thabile, ba kwele bose ka tše botse ka moka tše Jehofa a di dirilego.’ (1 Dikxoši 8:66) Le gona go bile le dinako tše dingwe tšeo ka tšona dipelo tša ba-Isiraele di ilego tša tlala lethabo ka baka la go loka ga Modimo go bona.

Lega go le bjalo, ka manyami ga se ba ka ba leboga ka mehla tokelo ya bona ya go ba barapedi ba Modimo a nnoši wa therešo. Mafelelong, ba-Isiraele ka moka ba ile ba se botege, gomme ka 607 B.C.E., Jehofa o ile a ba dumelela gore ba tšewe e le mathopja ba išwe Babele. Go etša ge Modimo a boletše go Moše, ka baka la go loka ga Gagwe ‘le gatee a ka se ke a lesa go otla.’—Ekisodo 34:7, bapiša le NW.

Lega go le bjalo, ka morago ga nywaga e 70 Modimo ka botho o ile a bušetša mašaledi a botegago a ba-Isiraele morago nageng ya bona. Ke’ng seo se ilego sa mo tutueletša go dira bjalo? Ke go loka ga gagwe. Jeremia o ile a ngwala ka mokgwa wa boporofeta mabapi le go boa ga ba-Isiraele go tšwa Babele gore: “Ba tlo hlalala thabeng ya Tsione, ba tlo kganyelela ditšhegofatšo tša Jehofa.” Moporofeta o ile a tšwela pele a re: “Setšhaba sa-ka se tlo hora ditšhegofatšo [“go loka,” NW] tša-ka; go bolela Jehofa.”—Jeremia 31:12, 14, Phetolelo ya Kgale.

Mafelelong, Jesu o ile a tla lefaseng gomme a itlhatsela go ba “peu” e boletšwego e sa le pele boporofeteng bjo bo boletšwego morago kua Edene. (Genesi 3:15) Beibele e re: “Modimo ó ratile lefase xakaakaa, a bá a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.” (Johane 3:16) Lehu la Jesu le neile topollo ya go lopolla batho sebeng le go ba tsošološetša phethegong. Ka gona, mafelelo a mabe a sebe sa Adama a be a tla feleletša a fentšwe. Go etša ge Paulo a ngwaletše ba-Roma: “Xe ba bantši ba tlile ba ba ba-dira-dibe ka xo se kwe xa motho o tee, byalo xo kwa xa Yêna o tee xo dira ba bantši baloki.” (Ba-Roma 5:19) Ka baka la go loka ga Modimo, batho ba dipelo tše di lokilego bjale ba be ba na le kholofelo ya go hwetša bophelo bjo bo sa felego. Le gona ba ka ba bagwera ba Modimo bjalo ka Aborahama.

Modimo o tšwela pele a bontšha go loka gaešita le lehono go bao ba mo rapelago. O nea keletšo ka Beibele go ba thuša go rarolla mathata a bona. (Psalme 119:105) O nea mpho ya mphiwa-feela ya moya wa gagwe go ba thuša go bapa le ditekanyetšo tša gagwe tša go loka. O utolla merero ya gagwe, e le gore Bakriste ba therešo ba lebelele pele lefaseng le lefsa la toko leo le tlago tšweletšwa ka morago ga go feta ga lefase le la kgale. (Diema 4:18; 2 Petro 3:13) Bakriste ba na le kholofelo ka dilo tše bjalo ka gobane Modimo, ka baka la go loka ga gagwe, o ba utolletše tšona Lentšung la gagwe le le sa fošego.—2 Timotheo 3:16.

Ee, go ela hloko go loka ga Modimo ruri go tlatša dipelo tša rena ka lerato la go mo rata. Eupja le gona go rotoša potšišo:

O tla Holwa Gakaaka’ng ke go Loka ga Modimo?

Ge e le gabotse, go sa šetšwe gore o mang ruri o šetše o ile wa holwa ke go loka ga Modimo. O a hema, o a ja, o a nwa, o thabela bophelo—dimpho tšohle di tšwa go Modimo. Eupja na o holega ka botlalo ka mo go ka kgonegago? Gopola, go loka ga Modimo go Adama le Efa go bile mo go lekaneditšwego ka morago ga ge ba dirile sebe. Ka mo go swanago, o tla lekanetša boati bja dimpho tša gagwe go rena ge e se feela ge re ka arabela ka tsela e lokilego bothong bja gagwe. Re ka dira bjang se?

Mopesalme o ile a rapela ka gore: “Nthutê temoxô e botse le tsebô, ka xobane ke dumetše ditaêlô tš’axo.” (Psalme 119:66) Le rena re swanetše go rapelela seo. Go etša ge Modimo a lokile, re swanetše go ithuta gore re be ba lokilego go swana le yena. Paulo o ile a kgothatša ka gore: “Bang baetši ba Modimo byalo ka bana ba ba ratêxaxo.”—Ba-Efeso 5:1.

Sa pele, re dira se ka go ithuta Beibele gore re tsebe seo go loka e lego sona. Ka morago, re kgopela thušo ya Modimo bakeng sa go hlagolela seka se. Go loka ke seenywa sa moya gotee le “lerato, lethabo, khutšo, go se fele pelo, botho, . . . tumelo [le] boitshwaro.” (Ba-Galatia 5:22, 23, NW) Re ka hlagolela dika tše ka moka ka go ithekga ka moya wa Modimo, go ithuta Beibele yeo e buduletšwego ke moya wa gagwe, go mo rapela bakeng sa thušo le go kopanela le Bakriste ba nago le kgopolo e swanago.—Psalme 1:1-3; 1 Ba-Thesalonika 5:17; Ba-Hebere 10:24, 25.

Beibele le gona e re: “A ba kwatše ’taba tša boxolo bya botho bya xaxo, ba hlalalêlê xo loka xa xaxo.” (Psalme 145:7) Ee, Modimo o letetše gore re botše ba bangwe ka go loka ga gagwe. Re swanetše go bolela ka bolokologi ka Tatago rena wa legodimong.

Sa mafelelo, ga se ra swanela go tšeela go loka ga Modimo fase. Ka kgonthe, Jehofa o lebalela badiradibe. Kgoši Dafida o be a holofela go arabelwa ka kgaugelo ge a be a rapela ka gore: “Dibe tša-ka tša mola ke sa le e mofsa, le ’karoxô tša-ka, O se di xopolê; sa xaxo e bê xo nkxopola ka botho bya xaxo, ka baka la botse [“go loka,” NW] bya xaxo, Morêna.” (Psalme 25:7) Na se se bolela gore re ka itumelela gore re dire dibe re lebeletše ka kholofelo tebalelo go Modimo? Le gatee. Gopola gore go loka ga Modimo go bolela gore ‘le gatee a ka se ke a lesa go otla’ badiradibe ba sa sokologego.

Go Thabela go Loka ga Modimo

Ge feela re ka ba le phihlelo e tletšego ya go loka ga Modimo, dipelo tša rena e tla ba tše tletšego gakaakang ka go mo rata! Re kgothaletšwa go latela keletšo e botse ya moapostola Paulo ya gore: “Swarang tsela bo-ka bana ba seetša. Xobane seenywa sa seetša se mo bothakxeng ka moka le xo lokeng le therešong.”—Ba-Efeso 5:8, 9.

Letšatši le letšatši, re lemoga tlhokomelo e lerato ya Modimo go rena. Gaešita le ka tlase ga maemo a thata kudu, re a tseba gore ga a lahle bao ba mo ratago. Ee, re ba le khutšo e kgolo ya mogopolo ya mopsalme: “Tše botse [“go loka,” NW] fêla le kxauxêlo di tlo ntatêla mehla yohle kè sa phela; Xomme ke tlo fetša bontši bya matšatši kè dutše Ngwakong wa Morêna.”—Psalme 23:6.