Lehu La Jesu le Bolela’ng go Wena?

^“MADIRA ka moka ao a kilego matšha, dihlopha ka moka tša bahlabani ba lewatleng tšeo di kilego tša bopša, dipalamente ka moka tšeo di kilego tša dulelwa gotee le dikgoši ka moka tšeo di kilego tša buša, tše ka moka di kopantšwe gotee, ga se tša ka tša kgoma bophelo bja batho godimo ga lefase le ka matla go swana le kamoo motho yo a nnoši a ilego a dira ka gona.” Ke kamoo mongwadi James A. Francis a ilego a ngwala ka gona mabapi le Jesu Kriste.

Batho ba lebelela Jesu ka ditsela tše fapanego, eupja Beibele e mo hlalosa e le Morwa wa Modimo le monna yo a nago le lerato la boikgafo. Jesu o ile a bolela tsela e kgolo yeo ka yona a ilego a bontšha lerato leo ge a be a re: “A etšê Morwa-motho e a sa kaxo a tlêla xo dirêlwa, à tlile xo dirêla, le xo neêla bophelô bya xaxwe xore e bê topollô ya ba bantši.”​—Mateo 20:28.

Topollo ye ke eng? Ke ka baka la’ng e be e nyakega? Kebomang bao ba lopollwago? Ruri, lehu la Jesu le bolela’ng go wena?

Ke Eng?

Topollo ke selo se itšego seo se lokollago. Go lopolla motho o mongwe go bolela go mo lokolla bokgobeng goba kotlong ka go lefa. Ka kgopolo ya moya, “go lopolla” go bolela go phološa sebeng le kotlong ya sona. Ke ka baka leo Jesu a ilego a hwa. Bjalo ka ge moapostola wa Mokriste Paulo a ile a ngwala gore: “Moputsô wa sebe ké lehu; ’me neô ya kxauxêlô ya Modimo ké bophelô byo bo sa felexo ka Jesu Kriste Mong ’a rena.”​—Ba-Roma 6:23.

Ka Mangwalong tefo yeo e ntšhwago bakeng sa go rekolla e tswalanywa le topollo. Psalme 49:​6-9 e re: “Ké ba-bôta-mahumô, ba xo ikxanthšha ka menônô e mexolo. Motho a ka se kê a bá a lopolla ngwana wabô, a nthša sa xo mmoêlanya le Modimo. Sa xo rêkolla moy’a-motho se a hlôkwa; a bá a di lesa moká, xo phela xo ya xo ile, le xo se bone lebitla.” Topollo ke khunologo yeo e phethwago ke Modimo e sego motho yo a sa phethagalago.

Ke ka Baka La’ng e Nyakega?

Topollo e a nyakega ka gobane tatago rena wa mathomo wa motho e lego Adama, o dirile sebe. Ka gona o ile a lahlegelwa ke bophelo bjo bo sa felego bjo bo phethagetšego, a ahlolelwa lehu ka mo go swanetšego, gomme mafelelong a hwa. (Genesi 2:​15-17; 3:​1-7, 17-19; 5:5) Ka ge re le ditlogolwana tša gagwe, re abetšwe lehu le sebe. Moapostola Paulo o ngwadile gore, “Ké xôna, byalo ka xe sebe sè tsene lefaseng ka motho o tee, ’me lehu la tsêna ka sebe, lehu le aparetše batho bohle ka xe ba dirile dibe bohle.” (Ba-Roma 5:​12) Ee, ‘bohle ba hwa ka baka la Adama.’ (1 Ba-Korinthe 15:​22) Ka gona mopsalme o boletše gabotse ge a be a re: “Ke belexwe kè le wa molato; xomme mmê ó nkamoxetše kè le wa dibe.”​—Psalme 51:5.

Go lopollwa molatong wa sebe le lehu go a nyakega ge e ba setlogolo lege e ka ba sefe sa Adama se tla amogela bophelo bjo bo sa felego. Ka ge batho ba sa phethegago ba sa kgone go nea topollo ye, Jehofa ka lerato o ile a dira bjalo ka Jesu Kriste. Fela, ke’ng seo se rekwago ka topollo? Ge Adama a be a dira sebe, o ile a lahlegelwa ke bophelo bjo bo phethagetšego bjo bo sa felego bja motho, ditokelo tša bjona ka moka gotee le dikholofelo tša bjona. Ka gona, selo sona seo se ile sa lopollwa ka sehlabelo sa Jesu sa topollo.

Seo e Dirago Gore se Kgonege

Toka e ile ya phethwa ge batho ba be ba welwa ke lehu, e lego kotlo ya sebe. Ka gona topollo ke mogato wa kgaugelo le lerato le botho la Modimo. Bophelo bjo bo phethagetšego bja Jesu e le motho gotee le ditokelo tša bjona ka moka le dikholofelo, bo ile bja neelwa lehung gomme bja se ke ba bušetšwa gape, ka gobane ga se a ka a tsošwa gape e le motho wa nama le madi eupja o ile a tsošwa e le sebopiwa sa moya se sa hwego. (1 Ba-Korinthe 15:​50; 1 Petro 3:​18) Ka gona bophelo bjo bo dirilwego sehlabelo bja Jesu Kriste bo ile bja tšwela pele bo e-na le matla a go phološa goba a go lopolla.

Jesu bjalo ka motho yo a bego a se na sebe, o ile a ba boemong bjo bo swanago le bjo Adama yo a bego a phethagetše a bego a le go bjona. Jesu ka baka la go kwa Modimo go iša lehung, o ile a dirwa gore e be Moperisita o Mogolo yo a phagamego, gomme o ile a neela ka mohola wa sehlabelo sa gagwe se se phethagetšego e le motho kua legodimong. (Ba-Hebere 9:​24-26) Ka ge Modimo a ile a amogela tefo ye ya topollo, Jesu o ile a kgona go lopolla ditlogolo tšeo di dumelago tša Adama sebeng le lehung ka go diriša mohola wa sehlabelo sa gagwe bakeng sa bona. (1 Ba-Korinthe 6:​20; 7:​23; 1 Johane 2:​1, 2) Ka gona Jesu “a ba thwadi ya xo iša bohle ba ba mo kwago phološong ye e sa felexo.” (Ba-Hebere 5:​8, 9) Se se dira gore go kgonege gore ba hwetše boemo bjo bo lokilego pele ga Modimo ka Morwa wa gagwe.

Ke Bomang bao ba Lopollwago?

Ka gona, ke bomang bao ba holwago ke topollo? Ke batho bao ba bontšhago tumelo tokišetšong ye gomme ba e-ba le kwano le Modimo. Ka go mo direla ka go botega, ba ka lokollwa sebeng le kotlong ya sona ya lehu gomme ba hwetša bophelo bjo bo sa felego.​—Johane 17:3.

Motho wa pele o be a ka kgetha go kwa Modimo goba go se dire bjalo. O ile a kgetha go se kwe. ‘Adama ga a ka a forwa,’ eupja o hwile e le modira-dibe wa ka boomo. (1 Timotheo 2:​14) Lega go le bjalo, go thwe’ng ka ditlogolo tša Adama? Ba be ba ka kgetha go direla Modimo ka matla a bona ka moka a sa phethegago goba ba kgetha go se kwe Mmopi wa bona.​—Jošua 24:15.

Jesu o tletše “xo neêla bophelô bya xaxwe xore e bê topollô ya ba bantši.” (Mareka 10:​45) Eupja “ba bantši” ke bomang? Go molaleng gore Adama ga a balwe ka gobane e be e le monna yo a phethagetšego yo ka boomo a ilego a kgetha go se kwe Modimo gomme a hwa e le modira-dibe yo a sa itsholego le wa ka boomo. Eupja go thwe’ng ka lapa la gagwe le legolo, la batho ba dikete tše dimilione? Jesu ka seloba seo se lekanego, o lefelela kahlolo ya leabela yeo e lego godimo ga lapa la Adama. (Bapiša le 1 Timotheo 2:​5, 6.) Jesu o diriša mohola wa tefo ya gagwe ya topollo go badumedi “ba bantši.”

Badumedi bao ba lopolotšwego ba akaretša ba-Juda gotee le Bantle, goba batho ba ditšhaba. Paulo o re: “Xe batho ka moka ba išitšwe tahlexong ka karoxô ya motho o tee, byale batho ka moka ba tletšwe ke tokafalô e išaxo bophelong ka Yêna o tee.” (Ba-Roma 5:​18) Ka go hwa koteng, “Kriste ó re [ba-Juda] rekolotše thoxong ye ya Molaô ka xo ba moroxwa ’bakeng sa rena, ka xobane xo ngwadilwe xwa thwe: E a fexilwexo kwateng ó roxilwe.” (Ba-Galatia 3:​13; Deuteronomio 21:​23) Ba-Roma 4:​11 e lebišitše go Bantle ge e bolela gore Aborahama, rakgolo-khukhu wa Ba-Juda, ge a be a sešo a bolla, o ile a “ba tata xo bohle ba ba dumêlaxo bà sa bolle.” Ka gona, sehlabelo sa Jesu sa topollo se hola Ba-Juda ba dumelago gotee le Bantle.

Tsela yeo motho o mongwe le o mongwe a e tšeago e bontšha ge e ba a tla holwa ke sehlabelo sa Jesu goba aowa. Go swana le Adama, bao ba dirago bobe ka boomo ba ka se ke ba gapeletšwa go amogela mohola wa topollo le bophelo bjo bo sa felego. Bjalo ka ge Kriste a ile a re: “E a dumêlaxo Morwa, ó na le bophelô byo bo sa felexo. E a sa mo dumelexo, a ka se kê a bá a bo bôna; se se tl’o xo dula sè mo okametše ke boxale bya Modimo.” (Johane 3:​36) Topollo le gona e dira gore tsogo ya bahu bao ba lego kgopolong ya Modimo e kgonege. (Johane 5:​28, 29) Ge ba ka ipontšha e le ba kwago le ba lebogago, go dirišwa ga mehola ya topollo go bona go bolela gore ba tla phela ka mo go sa felego. Eupja bao ba phelago ‘mehleng ye ya bofelo,’ mohlomongwe ba tla hwetša bophelo bjo bo sa felego ka ntle ga gore ba hwe.​—2 Timotheo 3:​1-5; Mateo 24:​3-14, 21, 34; Johane 11:​25, 26.

Mabaka a go Leboga

Mang le mang yo a kganyogago gore a holwe ke topollo o swanetše go ba le tebogo e kgolo ya yona. Le gona tebogo yeo ke e swanetšego gakaakang! Ka ntle ga fao, topollo e ile ya bontšha lerato le legolo la Modimo le Kriste.

Jehofa Modimo o bontšhitše lerato le legolo ka go neela ka topollo ka lehu la Morwa wa gagwe. Jesu o itše: “Xobane Modimo ó ratile lefase [la batho] xakaakaa, a bá a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo. Xobane Modimo Morwa wa xaxwe xa a ka a mo romêla lefaseng xore a le ahlolê; ó mo romile xore lefase le phološwê ke Yêna.” (Johane 3:​16, 17) Na ga se wa swanela go leboga pontšho ye ya lerato la Modimo?

Nagana gape ka bogolo bja lerato la Jehofa ka go dira tokišetšo ya topollo. Pele ga ge Morwa wa Modimo a ka romelwa lefaseng bakeng sa go phela le go hwa e le motho yo a phethagetšego, o ile a ba gona pele a ka ba motho. E be e le “tháka-letswálo yá dibopya tšohle,” yoo ‘tšohle tša kua magodimong le tša mono lefaseng di hlodilwego ka yena, tše di bonwago le tše di sa bonwego.’ (Ba-Kolose 1:​13-16) Jehofa o be a rata Morwa wa gagwe gakaakang! Lega go le bjalo, Modimo ga se a ka a fo romela lege e ka ba ofe wa barongwa ba gagwe ba dimilione lefaseng. Lerato la gagwe la go rata batho e be e le le legolo kudu mo a ilego a romela Morwa wa gagwe wa leitšibolo.

Le gona nagana ka lerato le legolo leo Jesu a le bontšhitšego mabapi le topollo. Ge a be a le sebopiwa sa moya kua legodimong, e be e le “mošomedi o mogolo [NW]” wa Modimo. Ka kgonthe, o be a “kxahlwa ke bana ba batho.” (Diema 8:​22-31) Lega go le bjalo, go be go se bonolo go yena go tloga legodimong, leo le bego le e-na le maemo a makaone kgaufsi le Tatagwe gotee le barongwa ba bantši-ntši ba ba lokilego. A le kua godimo legodimong, Morwa wa Modimo o be a kgona go bona maemo a kgopo mono lefaseng le tshenyo yeo e tlišitšwego ke sebe le lehu bathong. Le gona o be a tseba gore go nea topollo go be go tla nyaka gore a hwe. Lega go le bjalo, o ile “a tšea lebopô la mohlanka, a ba e a swanaxo le batho, . . . A ikokobetša a ba e a kwaxo le xo iša lehung.” Ka baka la potego e bjalo, Jesu o ile a rotošetšwa bophelong bja letago bja legodimong. (Ba-Filipi 2:​5-11) O bontšhitše lerato le legolo gakaakang mabapi le topollo! Na o leboga seo Jesu a se dirilego?

O Tla Dira’ng?

Moruti wa Leisemane Richard wa Chichester (c. 1198-1253) o kile a rapelela gore banna le basadi ba “tsebe Jesu Kriste gabotse-botse, ba mo rate kudu-kudu le go mo latela kgaufsi-ufsi.” Sehlabelo sa Jesu sa topollo ka kgonthe se nea lebaka le le kwalago la go mo tseba, go mo rata le go mo latela.

Ge nkabe e se be ka baka la topollo, bjalo ka badira-dibe re be re tla hwa re se na kholofelo, ka gobane “lebôla la lehu ké sebe.” (1 Ba-Korinthe 15:​56) Ka gona, gore o phološwe lehung leo le bego le tla tlišwa ke go longwa ga gago ke sebe, o swanetše go dira’ng? O swanetše go ithuta ka tokišetšo ya Modimo ya phološo ka Jesu Kriste. Ka morago ga fao o swanetše go bontšha gore o dumela topollo. Bjang? Ka go bontšha tebogo e kgolo ka baka la yona, ka go ineela go Modimo, le ka go botša ba bangwe ka tokišetšo ye e makatšago ya phološo.

Mogato wo o ka go akaretša gare ga “lešaba le lexolo” la bao ba “tšwaxo tlaišexong e kxolo; ba hlatswitše mašela a bôná ba a taxafatša mading a Kwana,” Jesu Kriste. (Kutollo 7:​9, 14) Kholofelo ya bona ke bophelo bjo bo sa felego lefaseng la paradeise. (Luka 23:​43) Ee, le wena o ka ba karolo ya lešaba le le le thabilego, ge e ba ka kgonthe lehu la Jesu e le selo sa bohlokwa go wena.

[Seswantšho go letlakala 4]

Jesu yo a bego a se na sebe o be a le boemong bjo bo swanago le bjoo Adama yo a bego a phethagetše a bego a le go bjona

[Seswantšho go letlakala 6]

Na o leboga seo se bolelwago e le ka kgonthe ke lehu la Jesu?