Bophelo le Bodiredi bja Jesu

Dikgarebe tše Bohlale le tša Ditlaela

JESU o be a dutše a araba kgopelo ya barutiwa ba gagwe ya gore a ba nee pontšho ya go ba gona ga gagwe matleng a Mmušo. Bjale o nea dibopego tše oketšegilego tša pontšho ka diswantšho tše tharo, goba dipapišo.

Go phethega ga papišo e nngwe le e nngwe go be go tla lemogwa ke bao ba tla bego ba phela nakong ya go ba gona ga gagwe. O rola ya mathomo ka mantšu a: “Mohla woo mmušô wa maxodimo o tlo swana le dikxarebe tše lesome, tše di tšerexo mabônê a tšona, tša tšwêla xo xahlanetša monyadi. Tše thlano tša tšona e be e le tše bohlale, tše thlano è le ditlaêla.”

Ka polelo “mmušô wa maxodimo o tlo swana le dikxarebe tše lesome,” Jesu ga a bolele gore seripa sa bao ba jago bohwa Mmušong wa legodimo ke ditlaela ge seripa se sengwe e le ba bohlale! Aowa, eupja o bolela gore, ge e le mabapi le Mmušo wa magodimong, go na le sebopego se se bjalo ka se goba sela, goba, gore ditaba mabapi le Mmušo di tla swana le selo sa gore le sa gore.

Dikgarebe tše lesome di emela Bakriste ka moka bao ba letetšego goba bao ba ipolelago gore ba letetše go ya Mmušong wa legodimo. E bile ka Pentekoste ya 33 C.E. moo phuthego ya Bokriste e ilego ya beeleletšwa lenyalo go Monyadi yo a tsošitšwego bahung le yo a tagafaditšwego, Jesu Kriste. Eupja lenyalo le be le tla direga legodimong nakong e tlago e sa tsebjego.

Mo seswantšhong, dikgarebe tše lesome di tšwela ntle ka morero wa go gahlanyetša monyadi le go tsena moloke-lokeng wa lenyalo. Ge a fihla, ba tla bonega tsela yeo go tlago go dirwa moloke-loke wa lenyalo go yona ka mabone a bona, e le go mo hlompha ge a tliša monyadiwa wa gagwe ngwakong wo a o lokišeditšwego. Lega go le bjalo, Jesu o a hlalosa: “Tše e lexo tša ditlaêla, xe di tšea mabônê a tšôna, xa tša ka tša tšea le makhura. Tše bohlale tša swara makhura ka dibyana xotee le mabônê. Xomme monyadi xe a diêxa, bohle ba ôtsêla ba rôbala.”

Go diega kudu ga monyadi go laetša gore go ba gona ga Kriste bjalo ka Kgoši e bušago go be go tla direga nakong e tlago e sa lego kgole. O feleletša a dutše setulong sa gagwe sa bogoši ka ngwaga wa 1914. Bošegong bjo botelele bja pele ga moo, dikgarebe ka moka di a robala. Eupja ga di bewe molato ka seo. Go bewa molato ga dikgarebe tša ditlaela go dirwa ka baka la go hloka makhura bakeng sa dibjana tša bona. Jesu o hlalosa kamoo dikgarebe di phafogago ka gona pele monyadi a goroga:

“Mašexoxare xwa hlabya mokxoši wa xo re: Šowee, monyadi ó e-tla, tšwelang xo mo xahlanetša! Dikgarebe tšeo ka moka tša tsoxa, tša lokiša mabônê a tšôna. Tša ditlaêla tša kxopêla tše bohlale tša re: Re topeletšeng makhura a lena, xobane mabônê a rena a a tima. Tše bohlale tša fetola tša re: Aowaa! Re ka tlo hlaêlêlwa bohle, rena le lena. Xo kaone xe Le e-ya xo barekiši la ithêkêla.”

Makhura a emela seo se dirago gore Bakriste bja therešo ba tšwele pele ba bonega bjalo ka dietša, e lego Lentšu la Modimo leo le buduletšwego leo ba le kgomarelago ka go tia, gotee le moya o mokgethwa woo o thušago go kwešiša Lentšu leo. Makhura a moya a dira gore dikgarebe tše bohlale di kgone go tšweletša seetša ge di amogela monyadi nakong ya moloke-loke wa go ya monyanyeng wa lenyalo. Eupja sehlopha sa dikgarebe tša ditlaela ga se na makhura ao a nyakegago a moya ka go sona, ke gore ka dibjaneng tša sona. Ka gona Jesu o hlalosa seo se diregago:

“Ya re bà [dikgarebe tša ditlaela] sa ile, monyadi a fihla. Xomme ba ba itokišitšexo ba ya le yêna monyanyeng ’me mojakô wa tswalêlwa. Ka moraxo xwa fihla le dikxarebe tšela tše dingwê, tša re: Morêna! Morêna! Re bulêlê! Yena a fetola a re: Ruri, ke a Le botša, xa ke Le tsebe.”

Ka morago ga ge Kriste a gorogile Mmušong wa gagwe wa legodimo, sehlopha sa dikgarebe tše bohlale sa Bakriste ba therešo ba tloditšwego se ile sa phafogela tokelo ya sona ya go bonega seetša lefaseng le le lego lefsifsing bakeng sa go tumiša Monyadi yo a boilego. Eupja bao ba swantšhetšwago ke dikgarebe tša ditlaela ba be ba se ba itokišeletša go dira tumišo ye ya go amogela. Ka gona ge nako e fihla, Kriste ga a ba bulele mojako wa go tsena monyanyeng wa lenyalo legodimong. O ba tlogela ka ntle lefsifsing la bošego bjo bogolo bja lefase gore ba fedišwe gotee le bohle ba sa kwego molao. Jesu o phetha ka gore, “Ké xona phakxamang, xobane xa le tsebe letšatši le nakô ya xo tla xa Morwa-motho.” Mateo 25:​1-13.

◆ Ke bomang bao ba swantšhetšwago ke dikgarebe tše lesome?

◆ Ke neng monyadi a beeleletšwago bakeng sa lenyalo, eupja o tla neng bakeng sa go iša monyadiwa wa gagwe monyanyeng wa lenyalo?

◆ Makhura a emela’ng, gomme go ba le ona go dira gore dikgarebe tše bohlale di kgone go dira’ng?

◆ Monyanya wa lenyalo o direga kae?

◆ Dikgarebe tša ditlaela di lahlegelwa ke moputso ofe o mogolo, gomme mafelelo a tšona ke afe?