Mafelo a Nageng ya Kholofetšo go Tloga Thabora go ya Phenyong!

AKANYA o le toreng o lebeletše tlase moo ditsela tša histori di putlaganago gona! Ge e le gabotse o be o tla bona histori e direga.

Lefelo la Beibele la Megido mo gongwe le ka swanela gabotse tlhaloso yeo, ka gobane e be e le lefelo le bohlokwa leo, ditsela tša tša kgwebo le tša tša bohlabani di bego di putlagana go lona. Eupja, ka mošola wa Moedi wa Jeseriele go na le Thaba ya Thabora, yeo le yona e okametšego Via Maris, tsela e tumilego ya go ya metseng ya Fertile Crescent.a

Ge o lebelela Thabora o le mo e ka bago lefelong le lengwe le le lengwe tikologong yeo, ka ntle le pelaelo o tla kgahlega. (Bapiša le Jeremia 46:​18) Thabora e tšwelela e le yeo e arogilego ka bobotse go mafelo ao a e dikologilego, go ba ga yona ka sebopego sa khoune go lemogega go tšwa ka mahlakoreng ka moka. E namelela melaleng yeo e lego ka pele ga yona ka borwa, e lego Moedi o nonnego wa Jeseriele, wo o kopanyago lebopo le Moedi wa Jorodane.

Ge o le tlhoreng ya kgokolo ya Thabora, o ka lebelela borwa thokong ya motse wa Jeseriele, wo mo gongwe o ka go gopotšago go kata ka bogale ga Jehu go ya bodulong bja bogošing bja Ahaba le go fedišwa mo go lešang dihlong ga Isebele. (1 Dikxoši 21:1; 2 Dikxoši 9:​16-33) Kgaufsinyana ke Megido. Ka thoko ya bodikela o ka bona Thaba ya Karamela, moo Eliya a ilego a dira teko ya mollo gona. (1 Dikxoši, kgaolo 18) Ge o le Thabora o ka bona gape le moo noka ya Kisone e elelago lewatleng, gomme dikhilomithara tše seswai go ya ka leboa-bodikela mebotong ya Galilea ya ka tlase ke Natsaretha.

Eupja ke pego efe ya Beibele yeo go bolelwa ga Thabora go go gopotšago yona? Go swanetše go ba go go gopotša pego ya Debora le Baraka. Mehleng ya bona, ba-Kanana ka tlase ga Kgoši Jabine wa Hatsora ba ile ba gatelela Isiraele ka nywaga e 20. Ka gona, moporofeta wa mosadi Debora o ile a tutueletša Baraka gore a gate mogato. Baraka le yena o ile a hlohleletša ba-Isiraele ba dikete tše lesome, kudu-kudu ba leloko la Nafuthali le Sebulone kua Galilea, gomme a ba bokantšha kua Thabora. Ba be ba se ba itlhama gabotse, ka gobane go be go se na kotse goba lerumo le bohwefo kua Isiraele.​—Baahlodi 5:​7-17.

Sehlopha se segolo se boifišago sa madira se ile sa tla go lwa le ona. Molaodi wa dira tša Jabini Sisera o ile a tla le bahlabani ba ba-Kanana bao ba itlhamilego o šoro Moeding wa Jeseriele. Ba swanetše go ba ba be ba bonagala bjalo ka banna bao ba itlhamilego bao ba bontšhwago lebotong la diswantšho tša go betlwa la Egipita, leo le swantšhitšwego letlakaleng le le latelago, ka godimo ka go le letona. Didirišwa tša ntwa tša Egipita di ile tša huetša ka tsela e itšego tšeo di dirišwago kua Kanana, go akaretša le karolo e boifišago kudu ya dibetša tša Sisera​—dikoloi tša ntwa tše 900!

Dikoloi tšeo tša ntwa tša Kanana e swanetše go ba e be e le dithala tše sepelago tša go lwa. Mootledi o swanetše go ba a be a itatetša ka megala dinokeng tša gagwe e le gore diatla tša gagwe di lokologe bakeng sa go swara dibetša. Goba o swanetše go ba a be a swaregile ka go laola dipere mola modirišani wa gagwe a diriša dibetša. Dikoloi tša ntwa di be di e-na le disekela tšeo di hlometšwego bogareng bja maotwana a koloi. Go banna ba Baraka ba lebeletšego tlase ba le Thabora, dikoloi tša ntwa tše dintši di swanetše go ba di ile tša bonagala di sa thibelege e bile di sa fenyege ka mo go boifišago.

Lega go le bjalo, Jehofa o be a ile a holofetša Baraka gore: “Kwa nokeng ya Kisoni ke tlo tliša Sisera . . . ó tlo tla xo wene à na le dikoloi tša xaxwe le madirá a xaxwe.” Ka nako e swanetšego, ba-Isiraele ba nago le sebete ba ile ba tla Thabora.​—Baahlodi 4:​1-14.

Sa bohlokwa kudu go feta thušo feela ya semaka e bile thušo yeo Isiraele e e hweditšego go Modimo wa bona yo matla wa legodimong. Debora ka morago o ile a opela: “Dinaledi tša xodimo tša tšwa dirá, tša lwa le Sisera di le mo ’tseleng tša tšôna. Ba tšewa ke nokana ya Kisoni . . . Hee pelo ya-ka, xata ka matla.” (Baahlodi 5:​20, 21) Ee, gaešita lege ba-Isiraele bao ba sego ba itlhama gakaalo eupja e le ba sebete ba ile ba rakediša ba-Kanana, Modimo ke yena yo a bego a laola mafelelo a kgonthe. O ile a baka lefula le sa laolegego nokeng e omilego, la šitiša dikoloi tše boifišago go sepela.

Ka mo tlase o bona karolo ya noka ya Kisoni. Nakong ya pula, e ka tlala go fihla ka maribana gomme ya dira gore tikologo yeo e be le leraga. Akanya ka dikoloi tša madira a ba-Kanana di leka go tšhaba go phatša leraga le le bjalo. Meetse a galefilego a ile a gogola madira ao a tšhabago goba dikoloi tša ntwa, goba ka bobedi. Phenyo ya Isiraele e ile ya ba ya fenya Molaodi wa dira Sisera, yo a ilego a tlogela koloi ya gagwe ya ntwa, a tšhaba ka maoto go tloga lebaleng la ntwa. Ka morago ga ge a iphihlile ka tenteng ya mosadi yo a bitšwago Jaele, mosadi o ile a kgetha sebaka se sebotse gomme a bolaya lenaba le.​—Baahlodi 4:​17-22.

Ka gona, tiragalo e bohlokwa ya phenyo historing ya Isiraele e ile ya utologa pele ga Debora le ba bangwe bao ba ka bago ba be ba bogetše ba le lefelong le phagamego la Thaba ya Thabora.

[Mongwalo wa tlase]

Pictorial Archive (Near Eastern History) Est.

Pictorial Archive (Near Eastern History) Est.

Pictorial Archive (Near Eastern History) Est.

Pictorial Archive (Near Eastern History) Est.