Tsebatšang Mmušo wa Jehofa ka Sebete!

“[O be] a amoxêla bohle ba ba tlaxo xo yêna. A Kwatša tša Mmušô wa Modimo.”​—DITIRO 28:​30, 31.

1, 2. Ke bohlatse bofe bja go thekgwa ke Modimo bjo moapostola Paulo a bilego le bjona, gomme ke mohlala ofe wo a ilego a o bea?

JEHOFA ka mehla o thekga bagoeledi ba Mmušo. Se e bile therešo gakaakang ka moapostola Paulo! Ka thekgo e tšwago go Modimo, o ile a tšwelela pele ga babuši, a kgotlelela tlhaselo ya bahlola-mpherefere le go tsebatša Mmušo wa Jehofa ka sebete.

² Gaešita le ge Paulo e be e le mogolegwa kua Roma “[o be] a amoxêla bohle ba ba tlaxo xo yêna. A kwatša tša mmušô wa Modimo.” (Ditiro 28:​30, 31) A mohlala o mobotse gakaakang bakeng sa Dihlatse tša Jehofa lehono! Re ka ithuta go gontši go tšwa boboleding bja Paulo go etša ge go begilwe ke Luka dikgaolong tša mafelelo tša puku ya Beibele ya Ditiro.​—20:1–28:31.

Badumedi-gotee le Yena ba a Agišwa

3. Go ile gwa direga’ng kua Teroa, gomme ke go swana gofe mo go ka hwetšwago mehleng ya rena?

³ Ka morago ga gore mpherefere o okobale kua Efeso, Paulo o ile a tšwela pele ka leeto la gagwe la boraro la boromiwa. (20:​1-12) Lega go le bjalo, ge a be a le kgaufsi le go ya Siria ka sekepe, o ile a kwa gore ba-Juda ba mo laletše. Ka ge mo gongwe ba ka ba ile ba loga maano a go namela sekepe seo Paulo a bego a tla se namela gore ba mmolaye, o ile a sepela go phatša Matsedonia. Kua Teroa, o ile a fetša beke a aga badumedi-gotee le yena go etša ge balebedi ba basepedi ba dira gare ga Dihlatse tša Jehofa mo nakong ye. Bošegong bja pele ga ge a tloga, Paulo o ile a lelefatša polelo ya gagwe go ba go fihla bošego-gare. Oitiko, o be a dutše lefasetereng, go bonala a be a lapišitšwe ke mediro ya letšatši. Ge a swarwa ke boroko, o ile a wela fase go tloga lebatong la boraro gomme a hwa, eupja Paulo o ile a mmušetša bophelong. Se se swanetše go ba se ile sa tliša lethabo le lekaakang! Ka gona, anke o nagane ka lethabo leo le tlago go ba gona ge dimilione tše ntši di tsošwa lefaseng le lefsa le le tlago.​—Johane 5:​28, 29.

4. Ge e le mabapi le bodiredi, Paulo o ile a ruta bagolo ba Efeso eng?

⁴ Ge Paulo a le tseleng ya go ya Jerusalema, kua Mileto, o ile a ahlana le bagolo ba Efeso. (20:​13-21) O ile a ba gopotša gore o ba rutile “malapeng” le gore o ile a “hlatsêla Ba-Juda le Ba-Gerika xore ba boêlê xo Modimo, ba dumêlê Morêna wa rena Jesu Kriste.” Bao mafelelong ba ilego ba ba bagolo ba be ba šetše ba sokologile gomme ba e-na le tumelo. Moapostola le gona o be a ba tlwaetša go tsebatša Mmušo ka sebete go bao ba sa dumelego bodireding bja ntlo le ntlo go swana le bjo bo dirwago ke Dihlatse tša Jehofa lehono.

5. (a) Paulo e bile mohlala bjang ge e le mabapi le tlhahlo ya moya o mokgethwa? (b) Ke ka baka la’ng bagolo ba be ba nyaka keletšo ya go ‘lotola mohlape ka moka’?

⁵ Paulo o be a bea mohlala go amogeleng tlhahlo ya moya o mokgethwa wa Modimo. (20:​22-30) Moapostola ‘a tlemilwe ke moya,’ goba a ikwa a gapeletšega go latela tlhahlo ya ona, o be a tla ya Jerusalema, lege ditlemo le ditlaišego di be di mo letetše gona moo. Paulo o be a tšea bophelo e le bja bohlokwa, eupja go kgomarela go botegela Modimo e be e le selo sa bohlokwa kudu go yena, go etša ge go swanetše go ba bjalo go rena. Paulo o ile a kgothaletša bagolo go ‘lotola mohlape ka moka wo moya o mokgethwa o o gafetšego balebeledi.’ Ka morago ga ge a “sepetše” (mohlomongwe ge a hwile), “diphiri tše di jaxo batho” di be di ‘ka se šetše mohlape.’ Banna ba ba bjalo ba be ba tla tsoga go bagolo ka bobona, gomme barutiwa bao ba bego ba e-na le temogo e nyenyane ba be ba tla amogela dithuto tša bona tšeo di fapošago.​—2 Ba-Thesalonika 2:6.

6. (a) Ke ka baka la’ng Paulo a be a ka gafela bagolo go Modimo ka kholofelo? (b) Paulo o ile a latela bjang molao wa motheo wa Ditiro 20:35?

⁶ Bagolo ba be ba swanetše go dula ba phafogile moyeng gore ba itiše malebana le bohlanogi. (20:​31-38) Moapostola o be a ba rutile Mangwalo a Sehebere le dithuto tša Jesu, tšeo di nago le matla a go kgethagatša ao a bego a tla ba thuša gore ba amogele Mmušo wa legodimong, e lego “bohwa gare ga bakgethwa ka moka.” (NW) Ka go šoma gore a iphediše yena ka noši gotee le bagwera ba gagwe, Paulo le gona o ile a kgothaletša bagolo gore e be bao ba šomago ka thata. (Ditiro 18:​1-3; 1 Ba-Thesalonika 2:9) Ge e ba re phegelela tsela e swanago gomme re thuša ba bangwe gore ba hwetše bophelo bjo bo sa felego, re tla leboga mantšu a Jesu a a rego: “Lešexo la monei le phala la monewa.” Kgopolo ya taba ye e hwetšwa Diebangeding eupja e tsopolwa ke Paulo feela, yoo mohlomongwe a ilego a e hwetša ka molomo goba ka pudulelo. Re ka ba le lethabo le legolo ge e ba re le bao ba ikgafago go etša kamoo Paulo a bego a le ka gona. Ee, o ile a ikgafa kudu mo e lego gore go tloga ga gagwe go ile gwa nyamiša bagolo ba Efeso kudu!

Anke Thato ya Jehofa e Direge

7. Paulo o ile a bea mohlala bjang ka go ikokobeletša thato ya Modimo?

⁷ Ge leeto la Paulo la boromiwa le dutše le batamela bofelong (mo e ka bago ka 56 C.E.), o ile a bea mohlala o mobotse wa go ikokobeletša thato ya Modimo. (21:​1-14) Kua Kesarea, yena le bagwera ba gagwe ba ile ba dula le Filipi, yoo barwedi ba gagwe ba bane ba dikgarebe “ba bexo ba porofeta,” ba bolelela pele ditiragalo ka moya o mokgethwa. Gona moo Agabo, moporofeta wa Mokriste, o ile a itlema matsogo le maoto ka moketwana wa Paulo gomme a tutuetšwa ke moya gore a bolele gore ba-Juda ba be ba tla tlema mong wa wona kua Jerusalema gomme ba mo gafele matsogong a Ba-ntle. Paulo o ile a re: “Xe e le nna xa k’a itokišetša xo fo tlêngwa; ke itokišeditše le xo bolaêlwa ’ina la Morêna Jesu xôna-kwa Jerusalema.” Barutiwa ba ile ba dumela, ba re: “A xo dirêxê thatô ya Morêna.”

8. Ge e ba re hwetša ka nako e nngwe go le thata go amogela keletšo e botse, re swanetše go gopola’ng?

⁸ Paulo o ile a botša bagolo kua Jerusalema seo Modimo a ilego a se dira gare ga Ba-ntle ka bodiredi bja gagwe. (21:​15-26) Ge e ba re hwetša go le thata go amogela keletšo e botse, re ka gopola kamoo Paulo a ilego a e amogela ka gona. Go hlatsela gore o be a sa rute ba-Juda ba dinageng tša Ba-ntle “xo hlanoxêla Moše,” o ile a ela hloko keletšo ya bagolo ya go itlhwekiša ka mokgwa wa dikiletšo le go akaretša ditshenyagalelo bakeng sa yena ka noši le banna ba bangwe ba bane. Gaešita lege lehu la Jesu le ile la tloša Molao tseleng, Paulo ga se a ka a foša ka go latela dibopego tša wona ge e le mabapi le dikeno.​—Ba-Roma 7:​12-14.

Ba ile ba Hlaselwa ke Lešaba la Bahlola-mpherefere Eupja ba se Kgaotše

9. Ge e le mabapi le tlhaselo ya lešaba la bahlola-mpherefere, go na le go swana gofe magareng ga diphihlelo tša Paulo le tša Dihlatse tša Jehofa lehono?

⁹ Dihlatse tša Jehofa gantši di ile tša kgomarela potego ya tšona go Modimo ge di lebeletšane le bošoro bja lešaba la bahlola-mpherefere. (Ka mohlala, bona 1975 Yearbook of Jehovah’s Witnesses, matl. 180-​90.) Ba-Juda ba ba tšwago Asia Minor ka mo go swanago ba ile ba tšwetša pele tlhaselo ya bahlola-mpherefere malebana le Paulo. (21:​27-40) Ge ba bona Terofimo wa mo-Efeso a e-na le yena, ka phošo ba ile ba bea moapostola molato wa go goboša tempele ka go tsenya ba-Gerika ka gare ga yona. Paulo o be a le kgaufsi le go bolawa ge Kelaudeo Lisia, molaodi wa madira le banna ba gagwe ba fediša kgaruru! Go etša ge go boletšwe e sa le pele (eupja go bakilwe ke ba-Juda) Lisia o ile a tlema Paulo ka diketane. (Ditiro 21:​11) Moapostola o be a le kgaufsi le go išwa sebong sa bahlabani seo se bataganego le lapa la tempele ge Lisia a e-kwa gore Paulo e be e se motho yo a bakago mpherefere eupja ke mo-Juda yo a dumeletšwego go tsena lefelong la tempele. Ge Paulo a hweditše tumelelo ya go bolela, o ile a bolela le batho ka Sehebere.

10. Polelo ya Paulo e ile ya amogelwa bjang ke ba-Juda kua Jerusalema, gomme ke ka baka la’ng a ile a se otlwe?

¹⁰ Paulo o ile a nea bohlatse ka sebete. (22:​1-30) O ile a itšhupa e le mo-Juda yo a rutilwego ke Gamaliele yo a bego a hlomphega kudu. Moapostola o ile a hlalosa gore ge a le tseleng ya go ya Damaseko go ya go tlaiša balatedi ba Tsela, o ile a foufala ge a bona Jesu Kriste yo a tagafaditšwego, eupja Anania o ile a mo foufolla. Ka morago Morena o ile a botša Paulo gore: “Sepela! Xobane ké Nna ke tl’o xo xo romêla kxole xo ba-ntle.” Mantšu ao a ile a wa bjalo ka tlhase e wela sethokgweng. Ge lešaba le goeletša ka lešata gore Paulo o be a sa swanela go phela, le ile la lahla diaparo tša lona le go tupiša lerole moyeng le befetšwe. Ka gona Lisia o ile a iša Paulo sebong sa bahlabani bakeng sa go mo hlahloba ka go mo otla gore ba hwetše lebaka leo ka lona ba-Juda ba bego ba mo lwantšha. Go otlwa (ka sedirišwa se se nago le dithapo tša mokgopha tše di nago le mahuto goba dikarolwana tše di bofeletšwego tša tšhipi goba marapo) go ile gwa thibelwa ge Paulo a botšiša gore: ‘Na ke ka molao go otla mo-Roma yo a sego a ahlolwa?’ Ge Lisia a e-kwa gore Paulo ke modudi wa Roma, o ile a boifa gomme a mo tšea a mo iša pele ga Lekgotla gore a tsebišiše lebaka leo ka lona a bego a bewa molato ke ba-Juda.

11. Ke ka tsela efe Paulo e bego e le Mofarisei?

¹¹ Ge Paulo a thoma go itšhireletša pele ga Lekgotla ka go bolela gore ‘o itshepeletše pele ga Modimo letswalo la gagwe le sa tsebe molato,’ Moperisita o Mogolo Anania o ile a laelwa gore a bethwe. (23:​1-10) Paulo o itše, “Modimo ó tlo itia wenê, O etšaxo lebôtô le le takilwexo.” Ba bangwe ba ile ba botšiša gore, “A O omanya moperisita e moxolo?” Ka baka la pono e fokolago Paulo mo gongwe ga se a ka a lemoga Anania. Eupja ge a lemoga gore lekgotla le be le dirilwe ke Bafarisei le Basadutsei Paulo o itše ‘ke Mofarisei yo a ahlolwago ka baka la kholofelo ya tsogo.’ Se se ile sa aroganya Lekgotla, ka gobane Bafarisei ba be ba dumela tsogong gomme Basadutsei ba sa e dumele. Ka gona go ile gwa tsoga phapano e kgolo moo Lisia a ilego a swanelwa ke go phološa moapostola.

12. Paulo o ile a efoga bjang go tsongwa ga bophelo bja gagwe kua Jerusalema?

¹² Ka morago Paulo o ile a phonyokga maano a go tsoma bophelo bja gagwe. (23:​11-35) Ba-Juda ba masome a mane ba ile ba dira dikeno ka gore ba ka se je goba go nwa go ba go fihla ge ba mmolaile. Motlogolo wa Paulo o ile a mmegela gotee le Lisia. Ka tlase ga tlhapetšo ya bahlabani, moapostola o ile a išwa go Mmušiši Antonio Felikisi kua Kesarea, e lego mošate wa taolo ya ba-Roma wa Judea. Ka morago ga go holofetša gore o tla theetša Paulo, Felikisi o ile a mmea ka tlase ga tlhapetšo Ngwakong wa Boahlodi wa mošate wa Heroda yo Mogolo, e lego ntlo-kgolong ya mmušiši.

Go Tšwelela ka Sebete Pele ga Babuši

13. Paulo o ile a nea bohlatse go Felikisi mabapi le eng, gomme ka mafelelo afe?

¹³ Moapostola kapejana o ile a itšhireletša malebana le melato ya maaka gomme a bea bohlatse ka sebete go Felikisi. (24:​1-27) Pele ga babegi ba gagwe ba ba-Juda, Paulo o hlatsetše gore o be a se a hlohleletša lešaba la bahlola-mpherefere. O boletše gore o dumela dilo tšeo di ngwadilwego Molaong le Baporofeteng gomme o be a holofela ‘tsogong ya bobedi baloki le bao ba sa lokago.’ Paulo o be a ile Jerusalema ka “dihlallelo tša kgaugelo” (Phetolo ya Kgale) (meneelo bakeng sa balatedi ba Jesu bao bodiidi bja bona bo bakilwego ke tlaišo) le gore o be a hlwekišitšwe ka mokgwa wa dikiletšo. Gaešita lege Felikisi a ile a fega kahlolo, Paulo ka morago o ile a botša yena le mosadi wa gagwe Dirusila (morwedi wa Heroda Agaripa I) ka Kriste, ka go loka, boitshwaro le kahlolo yeo e tlago. Ka go tšhošwa ke polelo e bjalo, Felikisi o ile a laela Paulo gore a tloge. Lega go le bjalo, ka morago o ile a romela batho gantši, ka kholofelo ya lefeela bakeng sa pipa-molomo. Felikisi o be a tseba gore Paulo o be a se na molato eupja o ile a mo tlogela a tlemilwe ka kholofelo ya gore o tla ratwa ke ba-Juda. Nywaga e mebedi ka morago, Felikisi o ile a hlatlangwa ke Porotio Fesito.

14. Paulo o ile a itšweletša ka tokišetšo efe ya molao ge a be a tšwelela pele ga Fesito, gomme go na le go swana gofe mo re go hwetšago go se?

¹⁴ Paulo le gona o ile a itšhireletša ka sebete pele ga Fesito. (25:​1-12) Ge e ba moapostola a be a swanetšwe ke lehu, o be a ka se ke a efoga, eupja ga go motho yo a bego a ka mo gafela diatleng tša ba-Juda e le go bontšha kgaugelo. Paulo, ge a itšweletša e le modudi wa Roma yo a nago le tshwanelo ya go sekišwa kua Roma (ka nako yeo pele ga Nero), o itše: “Nna ke wa xo ahlolêlwa ke Kesara.” Ge kgopelo ya gagwe e amogetšwe, Paulo o be a tla ‘nea bohlatse kua Roma,’ go etša ge go boletšwe e sa le pele. (Ditiro 23:​11) Dihlatse tša Jehofa le tšona di a iponagatša bakeng sa ditokišetšo tša go ‘šireletša le go thea ditaba tše di lokilego ka molao.’​—Ba-Filipi 1:7, NW.

15. (a) Go ile gwa phethagala boporofeta bofe ge Paulo a be a tšwelela pele ga Kgoši Agaripa le Kesara? (b) Paulo o ile a “raxa seotledi” bjang?

¹⁵ Kgoši Heroda Agaripa II wa leboa la Judea le kgaetšedi ya gagwe Berenike (yo a ilego a ba le dikopano tša botona le botshadi tša ba leloko la kgaufsi le yena) ba ile ba kwa Paulo nakong ya ge ba be ba etetše Fesito kua Kesarea. (25:​13–26:​23) Ka go nea bohlatse go Agaripa le Kesara, Paulo o phethagaditše boporofeta bja gore o be a tla iša leina la Morena go magoši. (Ditiro 9:​15) Ge a botša Agaripa ka seo se diregilego tseleng ya go ya Damaseko, Paulo o ile a gatelela gore Jesu o itše: “Xo raxa seotledi go tlo Xo thatafalêla.” Go etša ge pholo ya senganga e ikgobatša ka go kgotlelela dintlha tša seotledi, Saulo o ile a ikgobatša ka go lwantšha balatedi ba Jesu, bao ba bego ba thekgwa ke Modimo.

16. Fesito le Agaripa ba ile ba itshwara bjang bohlatseng bja Paulo?

¹⁶ Fesito le Agaripa ba ile ba itshwara bjang? (26:​24-32) Ge a sa kgone go kwešiša tsogo gomme a tlabilwe ke go kgodišega ga Paulo, Fesito o itše “Ke mangwalô a mantši ao a Xo hlakanyaxo hlôxô.” Ka mo go swanago ba bangwe mo nakong ye ba bolela gore Dihlatse tša Jehofa di hlakane hlogo, gaešita lege ge e le gabotse di swana le Paulo go ‘boleleng ditaba tša therešo le tša tlhaloganyo.’ Agaripa, yo a ilego a fediša poledišano eupja a tsebiša Paulo gore a ka be a lokolotšwe ge nkabe a se a dira boipiletšo go Kesara, o ile a re: “O kxaufsi le xo mphenya, ka ba mokriste.”

Dikotsi tša Lewatleng!

17. O ka hlalosa bjang dikotsi tšeo go lebanwego le tšona lewatleng nakong ya leeto la Paulo la go ya Roma?

¹⁷ Leeto la go ya Roma le ile la bea Paulo ‘dikotsing tša lewatleng.’ (2 Ba-Korinthe 11:​24-27) Letona la madira leo le bitšwago Julio le be le hlapeditše bagolegwa bao ba bego ba nametše sekepe sa go tšwa Kesarea go ya Roma. (27:​1-26) Ge sekepe sa bona se fihla Sidone, Paulo o ile a dumelelwa go etela badumedi, bao ba ilego ba mo tsošološa moyeng. (Bapiša le 3 Johane 14.) Kua Mira, Asia Minor, Julio o ile a dira gore bagolegwa ba namele sekepe sa go rwala mabele seo se bego se swanetše go ya Italia. Go sa šetšwe diphefo tše dintši tšeo di bego di lebane le bona, ba ile ba se lebiša boema-kepeng bja Fair Havens kgaufsi le motse wa Lasea wa Kereta. Ka morago go tloga moo go ya Fenikisi, ledimo la leboa-bohlabela le ile la tšea sekepe. Ka go boifa go gogoba fase mo Syrtis, (mohlabeng) kgojana le leboa la Afrika, banamedi ba sekepe ba ile “fokotša lebelo,” (NW) mohlomongwe le maphego le go theoša dikota tša sekepe. Dithapo di be di ile tša tatetšwa mpeng e le gore moo sekepe se kgomagantšwego gona go se ke gwa tla gwa pharoga. Ka ge sekepe se be se sa dutše se akga-akgwa ke ledimo letšatšing le latelago, ba ile ba se imolla ka go lahlela diphahlo lewatleng. Letšatšing la boraro, ba ile ba lahla dilo tšeo di sepetšago sekepe (maphego goba lehuduo leo le bego le beilwe). Ge kholofelo e bonagala e nyamelela, morongwa o ile a tšwelela go Paulo gomme a mmotša gore a se boife, ka gobane o be a tla ema pele ga Kesara. Go bile le kimollo e kaakang ge moapostola a bolela gore basepediši ka moka ba tla išwa lebopong sehlakahlakeng se sengwe!

18. Ke’ng se se diragaletše’ng Paulo le bao ba bego ba nametše le yena sekepeng mafelelong?

¹⁸ Batho bao ba tšerego leeto la sekepe ba ile ba phologa. (27:​27-44) Bošego-gare bja letšatši la bo-14, basepediši ba sekepe ba ile ba lemoga gore naga e kgaufsi. Medumo e ile ya tiišetša se, gomme ditshetledi tša theošwa go efoga dikotsi tša mafsikeng. Ka go kgothatšwa ke Paulo, banna ba 276 ka moka ba ile ba ja dijo. Ka morago sekepe se ile sa imollwa ka go lahlelwa ga korong lewatleng. Ge go e-sa, basepedi ba sekepe ba ile ba kgaola dithapo tša ditshetledi, ba bofolola selo sa go laola sekepe le go phagamišetša lephego la ka pele phefong. Sekepe se ile sa imollelwa lefelong le le sa išego, gomme lešago la sekepe la tšwa diripana. Eupja o mongwe le o mongwe o ile a leba nageng.

19. Paulo o diragaletše ke eng kua Melite, gomme ke’ng seo a ilego a se direla ba bangwe gona moo?

¹⁹ Ba thapile le go lapa, bao ba robegetšwego ke sekepe ba ile ba ikhwetša ba le Melite, moo badudi ba sehlakahlakeng ba ilego ba ba “dira ka botho byo bo fetišišaxo.” (28:​1-16) Lega go le bjalo, ge Paulo a dutše a bea dikgong mollong phišo e ile ya tsoša noga e robetšego yeo e ilego ya kgomarela letsogo la gagwe. (Mo nakong ye ga go na dinoga tše di nago le mpholo mo Melite, eupja se e be e le “sebopiwa sa go ba le bohloko.” [NW]) Batho ba Melite ba ile ba nagana gore Paulo ke mmolai yo “boxale bya medimo” bo bego bo ka se mo dumelele gore a phele, eupja ge a sa wele fase goba a hwa goba go ruruga ka baka la bohloko, ba ile ba bolela gore ke modimo. Ka morago Paulo o ile a fodiša ba bantši, go akaretša le tatago Pubulio, e lego mokgoma wa sehlakahlaka sa Melite. Dikgwedi tše tharo ka morago, Paulo, Luka le Aristareko ba ile ba tloga ka sepeke se se bego se kgabišitšwe ka pele ka “Barwa ba Jupitere” (Castor le Pollux, mafahla a medimo ao go bego go naganwa gore ke bašireletši ba banamedi ba dikepe). Ge ba fihla Puteoli, Julio o ile a tšwela pele le tlhapetšo ya gagwe. Paulo o ile a leboga Modimo gomme a tia matla ge Bakriste bao ba tšwago mošate wa Roma ba gahlana le bona kua Lepatlelong la Apiforo le Teretabene go bapa le Tsela ya Appius. Mafelelong, kua Roma, Paulo o ile a dumelelwa go dula a nnoši, gaešita lege a ile a hlapetšwa ke mohlabani.

Tšwela Pele o Tsebatša Mmušo wa Jehofa!

20. Paulo o ile a tšwela pele a swaregile ka modiro ofe mo a bego a dula gona kua Roma?

²⁰ Mo a bego a dula gona kua Roma, Paulo o ile a tsebatša ka sebete Mmušo wa Jehofa. (28:​17-31) O ile a botša banna ba bagolo ba ba-Juda gore: “Se se mpofišitšexo ké yôna kholofêlô ya Isiraele.” Kholofelo yeo e be e akaretša go amogela Mesia, e lego selo seo le rena re swanetšego go ikemišetša go tlwaišwa ka baka la sona. (Ba-Filipi 1:​29) Gaešita lege bontši bja ba-Juda bao bo se bja dumela, ba bantši ba Ba-ntle le mašaledi a ba-Juda ba be ba e-na le boemo bjo bo swanetšego bja pelo. (Jesaya 6:​9, 10) Ka nywaga e mebedi (mo e ka bago ka 59-61 C.E.) Paulo o ile a amogela ka moka bao ba bego ba e-tla go yena, “A kwatša tša mmušô wa Modimo, a ruta tša Morêna Jesu Kriste ka mafolofolo a maxolo, à sa iletšwe ke motho.”

21. Paulo o ile a bea mohlala ofe go fihla bofelong bja bophelo bja gagwe bja lefaseng?

²¹ Go molaleng gore Nero o ile a bolela gore Paulo ke yo a se nago molato gomme a mo lokolla. Ka morago moapostola o ile a tsošološa modiro wa gagwe a kopane le Timotheo gotee le Tito. Lega go le bjalo, o ile a golegwa gape kua Roma (mo e ka bago ka 65 C.E.) gomme go bonagala a ile a bolaelwa tumelo matsogong a Nero. (2 Timotheo 4:​6-8) Eupja Paulo o ile a nea bohlatse bjo bobotse e le mogoeledi yo a nago le sebete wa Mmušo. Ka moya o swanago mehleng ye ya bofelo, anke ka moka bao ba ineetšego go Modimo ba tsebatše Mmušo wa Jehofa!

O tla Araba Bjang?

◻ Paulo o ile a nea bagolo ba Efeso tlwaetšo efe ya bodiredi?

◻ Paulo o ile a bea bjang mohlala wa go ikokobeletša thato ya Modimo?

◻ Ge e le mabapi le tlhaselo ya lešaba la bahlola-mpherefere, go na le go swana gofe magareng ga diphihlelo tša Paulo le tša Dihlatse tša Jehofa lehono?

◻ Paulo o ile a itšweletša ka tokišetšo efe ya molao ge a be a tšwelela pele ga Mmušiši Fesito, gomme se se na le go swana gofe mehleng yeno?

◻ Paulo o ile a tšwela pele a swaregile ka modiro ofe mo a bego a dula gona kua Roma, a bea mohlala ofe?