Go Rarollela Kgang ya Legohle sa Ruri

“Yena Jehofa ka noši a lego letsogong la gago le letona ruri o tla thubakanya dikgoši letšatšing la bogale bja gagwe.”​—PSALME 110:5, “NW.”

1, 2. Ka ngwaga wa 70 C.E., ke tiragalo efe yeo mo gongwe e ka bago e ile ya tsoša pelaelo ka taba ya ge e ba bogoši bja Jehofa Modimo e le bja legohle, eupja ka nako yeo ke go bomang moo Jehofa a ilego a lebiša tlhokomelo ya gagwe?

BOGOŠI bja legohle bja Mmopi wa legodimo le lefase ke kgang e kgolo pele ga batho le barongwa. Kgaufsinyana kgang ye e tla rarollelwa ruri, eupja ka nywaga-kgolo e mentši manaba a Jehofa a ile a hlohla bogoši bja gagwe. Ka kgonthe, go senywa ga motse wa Jerusalema gotee le tempele ya ona yeo e neetšwego go Jehofa ka 70 C.E. go ka ba go ile gwa tsoša pelaelo ya ge e ba bogoši bja Mmopi e le bja legohle. Lega go le bjalo, go be go e-na le lebaka le le kwalago leo ka lona Jehofa ka nako yeo a sa kago a kgetha go ba Modimo wa mohlabani bakeng sa go lwela Isiraele ya nama.

² Lebaka e be e le lefe? Ka nako yeo Jehofa Modimo o ile a lebiša tlhokomelo ya gagwe setšhabeng se sefsa, Isiraele ya moya, e lego “Ba-Isiraele ba Modimo,” bjalo ka ge moapostola Paulo a bitša phuthego ya Jesu Kriste. (Ba-Galatia 6:​16) Lega go le bjalo, nakong ka moka yeo e bitšwago Mehla ya Bokriste, Jehofa ga se a lwela Isiraele ya moya e le Modimo wa mohlabani ka tsela yeo ka yona a ilego a lwela Isiraele ya tlhago ka tlase ga kgwerano ya Molao wa Moše. Le gona o ile a dumelela gore bahlabani ba Roma, ka go hlohleletšwa ke ba-Juda, ba bolaye Jesu Kriste koteng ya tlhokofatšo kua Gologotha. E bile nywaga e 37 pele ga go senywa ga Jerusalema la bobedi ke ba-Roma, ka 70 C.E.

3, 4. Go tloga mehleng ya Moše go theoga go fihla go Kgoši Hiskia, Modimo o ile a ipontšha bjang gore ke mohlabani, eupja tabeng ya ba-Isiraele ba moya, ke’ng seo e lego therešo ge e le mabapi le go lwa ga gagwe le go lwa ga bona?

³ Go tloga mehleng ya moporofeta Moše go theoga go fihla pušong ya Kgoši Hiskia wa Jerusalema, Jehofa Modimo o lwetše setšhaba sa Isiraele ka mohlolo, gomme ba-Isiraele ba ile ba lwa ka tlase ga gagwe ka dibetša tše šoro. (Doiteronomio 1:​30; 3:​22; 20:​3, 4; Jošua 10:​42) Eupja ga go bjalo tabeng ya Isiraele wa moya! Go tloga lehung la Jesu Kriste ka ntle ga Jerusalema go theoga le Mehla e Tlwaetšwego ya rena, Modimo yo wa mohlabani ga se a kgetha go lwela Isiraele wa Modimo ntweng e bonagalago. Ka mo go swanago, ga se a nea ba-Isiraele ba moya bao ba dirago phuthego ya Bokriste matla a go lwa ka dibetša tša kgonthe tša ntwa. Bakriste ba na le ntwa ya mohuta o mongwe yeo ba e lwago.

⁴ Ka go dumelelana le se, o mongwe wa ba etelelago pele go lweleng tumelo ya Bokriste o ile a ngwalela Bakriste-gotee le yena kua Korinthe, Gerika gore: “Re šwalalanya maanô le xo iphaxamiša xohle xo šiteletšaxo tsebô ya Modimo; re ithswara ra tlêma menaxanô xore e kwê Kriste. Xomme re itokišitše xo sôla xo se kwe ka moka, xe mo xo lena xo kwa è le xo kwa-moka.” (2 Ba-Korinthe 10:​4-6) Pelenyana lengwalong lona leo, Paulo o boletše ka ‘marumo a toko ao a lego letsogong le letona le le letshadi.’​—2 Ba-Korinthe 6:7; bona gape le Ba-Efeso 6:​11-18.

Jehofa o tlo Lwa Haramagedone

5. Jesu kua tšhemong ya Getsemane o ile a tšea boemo bofe mabapi le go dirišwa ga dibetša tše di bonagalago bakeng sa go itšhireletša, gomme ke mogato ofe woo barutiwa ba gagwe ba o tšeago?

⁵ Jesu Kriste, ge a be a le lefaseng, le ka mohla ga se a retologela dibetšeng tše šoro gore a itšhireletše. Bošegong bja go ekwa ga gagwe tšhemong ya Getsemane, morutiwa yo a ineetšego wa gagwe Simone Petro o ile a khwamola tšhoša gomme a rema tsebe ya mohlanka wa moperisita o mogolo wa mo-Juda. Eupja Jesu ka mohlolo o ile a bušetša tsebe madulong a yona gomme a re: “E a swaraxo thšoša, ó tlo bolawa ka yôna. A O re nka se kxône xo kxopêla Tate, a nthomêla Barongwa ba ba fetišaxo madirá a lesome le metšô e mebedi? Fêla, xe nka r’yalo, mangwalô a a rexo xo swanetše go dirêxa tšôna-tše a ka phêthêxa bya’ng?” (Mateo 26:​52-54) Ge ba lebeletšane le dilo tše ka moka, baetši ba go rereša ba Morwa wa Modimo ba boloka boema-gare bja bona. Bobedi ka go lebanya le ka go se lebanye, ge go tliwa dintweng tša lefase.​—Johane 17:​16; 18:36.

6. Nakong ya ntwa ya mohla-mogolo wa Modimo Ra-matla-ohle Haramagedone, Dihlatse tša Jehofa di tla ema kae?

⁶ Ka gona, gona mo, anke ditšhaba di newe temošo ya gore nakong ya ‘ntwa ya mohla-mogolo wa Modimo ra-matla-ohle,’ ‘lefelong le le bitšwago Haramagedone,’ Dihlatse tša Jehofa di ka se ke tša tšea karolo ntweng. Seo ba tla se tlogelela Modimo wa mohlabani, e lego “Jehofa wa mašaba,” gotee le madira a gagwe a barongwa ka tlase ga boetapele bja Jesu Kriste.​—Kutollo 16:​14-16; 19:​11-21; Psalme 84:12, NW.

Jehofa o Kgaufsi le go Tšwetša Pele Mediro ya Gagwe ya Ntwa

7. Bjalo ka Modimo wa mohlabani, Jehofa o ile a tsebja ka sereto sefe, gomme na o sa dutše a le boemong bjo bjalo?

⁷ Modimo wa Isiraele ya bogologolo o ile a tsebja le go bolelwa e le Jehofa tseva·’ohthʹ, goba Jehofa wa mašaba. (1 Samuele 1:​3, 11, NW) Go Ba-Roma 9:​29 (Phetolelo ya Kgale) moapostola wa Mokriste Paulo o šupa go Jesaya 1:9 gomme o ngwala gore: “Ga Morena Tsebaoth a ka be a sa re šadišetša peu, re ka be re le bjalo ka Sodoma gomme re ka be re swantšhitšwe le Gomora.” Le gona Jakobo, morutiwa wa Mokriste o a ngwala: “Dillo tša babuni di fihlile ditsebeng tša Morena Tsebaoth.” (Jakobo 5:4, Phetolelo ya Kgale) Ka gona Paulo le Jakobo ba ile ba bea Modimo boemong bja godimo e le Jehofa wa mašaba lekgolong la pele la nywaga la Mehla e Tlwaetšwego ya rena. Mo nywaga-kgolong e 18 e latelago, Modimo ga se a tsenela ntweng ya nama ya go lwela Isiraele ya moya, e lego Isiraele ya Modimo, ka tsela yeo a ilego a lwela Isiraele ya bogologolo, eupja o sa dutše e le Jehofa wa mašaba.

8-10. (a) Ke mang yo a dumeletšego ntwa legodimong? (b) Go bile le mafelelo afe a yona gomme go šetše nako e kaakang pele ga ntwa ya mohla-mogolo wa Jehofa?

⁸ Go tswalweng ga Mmušo wa Mesia ka 1914 bofelong bja “mehla ya ba-ntle,” ntwa e ile ya tsoga lefelong la legodimong la Jehofa Modimo. (Luka 21:​24, KJ) Ke mang yo a dumeletšego ntwa ye? Yena Jehofa Modimo ka noši. O ile a romela Morwa wa gagwe yo a beilwego go ba kgoši lefelong la ntwa ka tlase ga leina Mikaele ka gobane ke yena yo a swanelegago kudu go araba potšišo yeo e lego leineng leo, e rego, “Ke Mang yo a Swanago le Modimo?” Mikaele o ile a gata mogato ka bjako e le moemedi yo a lwelago Jehofa wa mašaba.

⁹ Ka mo go swanetšego, re bala go Kutollo 12:​7-10 gore: “Kwa lexodimong xwa tsoxa ntwa ya xe Mikaele le Barongwa ba xaxwe bà e-lwa le Nôxa, ’me Nôxa è e-lwa è na le Barongwa ba yôna. Nôxa ya se kê ya fenya; kwa lexodimong xwa se kê xwa hlwa xo e-ba le madulô a yôna. Nôxa e kxolo yeo ya rakwa; yôna ye ba rexo ké Diabolo le Sathane, motimetši wa lefase ka moka la batho. Ya lahlêlwa lefaseng; le Barongwa ba yôna ba lahlwa le yôna. Kwa lexodimong ka kwa lentšu le lexolo lè re: Phološô byale e tšweletše, le matla, le boxoši bya Modimo wa rena, le xo kxôna xa Motlotšwa wa xaxwe, xobane mmexi wa bana ba bôrena e a bexo a ba bexa pele xa Modimo mosexare le bošexo, ó rakilwe.”

¹⁰ Gona bjale, nywageng e fetago e 70 ka morago ga ntwa ya legodimong, go šetše “lebakanyana” feela pele ga ge ntwa ya mohla-mogolo wa Jehofa e ka tsoga gomme Modimo ka letago a ipontšhe e le Jehofa wa mašaba pele ga moloko wa gona bjale wa batho.​—Kutollo 12:​12; Sakaria 14:3, NW.

Mohlabani yo a Lwelago go Phagamiša Jehofa

11. Mašaledi a mohlatswana o monyenyane le lešaba le legolo a letetše nako efe yeo e beilwego, gomme ba tla tumiša eng ka lethabo?

¹¹ Ka tlase ga pudulelo, Kgoši e bohlale Salomo wa Isiraele ya bogologolo o ngwadile gore: “Tšohle di na le mohla wa tšôna, le ’tirwa tša ka tlase xa letšatši di na le mabaka a tšôna . . . Xo lwa xo na le mohla wa xôna, le xo boelana xo na le mohla wa xôna.” (Mmoledi 3:​1-8) Mo lefaseng barutiwa ba Kgoši yeo e bušago yeo e lego “e moxolo xo Salomo,” ba letetše nako le tiragalo bakeng sa gore A etelele pele barongwa ba legodimo ka phenyo go ya go hlabana Haramagedone. (Mateo 12:​42; Kutollo 19:​11-16) Gona moo, o ‘tlo roba [ditšhaba] ka molamo wa tšhipi,’ gomme ‘a ba pšhatla bjalo ka pitša ya letsopa.’ (Kutollo 19:​15; Psalme 2:9) Barutiwa ba gagwe bao ba lotago khutšo le ba šireletšegilego ba tla tumiša gakaakang phološo ya gagwe e boifišago ya go phološwa ga bona! Se se tla akaretša bobedi mašaledi a “mohlatswana o monyenyane” a maja-bohwa-gotee le yena a Mmušo wa gagwe le “lešaba le lexolo” la “dinku tše dingwê” tša gagwe tšeo di holofetšego bohwa bja Paradeisi lefaseng ka tlase ga pušo ya gagwe ya khutšo ya nywaga e sekete. (Luka 12:​32; Kutollo 7:​9-17; Johane 10:​16) Ka lethabo, ba le “moriting wa Yo-matla-ohle,” ba tla tumiša phenyo ya letago ya Kgoši ye e bilego e le Modiši, Jesu Kriste, e le go phagamiša bogoši bja legohle bja Jehofa Modimo.​—Psalme 91:1.

12. Ntwa yeo e okametšego ditšhaba e tšwa kae, gomme mafelelo e tla ba afe go ya ka Psalme 68:​1, 2?

¹² Ka ntle le go feteletša, mo nakong ye go ka thwe ntwa yeo e tšwago lefelong le le lego kgole kudu le lefelo la motho le yeo e lwewago ka dibetša tše nepago e le ka kgonthe, tše fetago dipomo tša motho tša nuclear e okometše ditšhaba tša lefase ka moka, go sa šetšwe ge e ba di le ka gare ga mokgatlo wa Ditšhaba tše Kopanego goba ka ntle. Theetša: “Modimo ó a tsoxa! Manaba a xaxwe a a xašana! Ba ba Mo hloilexo ba thšaba xe a fihla. Ba tloxa bo-ka muši x’o tloxa le phefô; ba byalo ka moti x’o toloxa mollong. Ba babe ba lôba xe xo fihla Yêna Modimo.”​—Psalme 68:​1, 2.

13. Ge ditokišetšo tša ntwa di dutše di tšwela pele, mantšu a Psalme 45:​1-6 mo nakong ye ka tsela e tlogago e le nakong a lebišwa go mang?

¹³ Ditokišetšo tša ntwa ya go feta dintwa ka moka mo nakong ye di gare di a dirwa. Bjalo ka Mohlabani yo mogolo wa Modimo, Mohlabanedi yo a lwelago go phagamiša Jehofa go lebišwa go yena mantšu a a latelago ao a hlamilwego ke setho sa setšhaba sa Isiraele: “Wene Senatla xo bana ba batho, molomo w’axo o thšephile ka mabobo, wa tseb’o šexofatšwa ke Modimo neng le neng. Ithlamê lethêka ka thšoša, Moxale; re bônê borêna le letaxô l’axo. Lêtlêxa letaxong la xaxo; tšwaa dirá O lwêlê therešô le bolêta, le xo loka; ’me ’tsôxô la xaxo le matla le xo dirišê mehlôlô. Dibetša tša xaxo ké tše boxale; dithšaba di [a] Xo lôba; xo lôba manaba a kxoši. Sedulo sa xaxo ké sa Modimo, ke sa neng le neng. Lehlotlo la xaxo la boxoši ke lehlôtlô la xo loka.”​—Psalme 45:​1-6.

Ditšhaba di Lakana go Lwa le Jehofa

14, 15. Ka morago ga go lokollwa kgolegong, ke mantšu afe go tšwa go Psalme 2 ao baapostola ba ilego ba a tsopola e le ao a phethagatšwago, gomme ke kgopelo efe yeo ba ilego ba e dira go Modimo?

¹⁴ Kapejana ka morago ga go thewa ga phuthego ya Bokriste letšatšing la Pentekoste ka 33 C.E., Bakriste ba ba tloditšwego ba ile ba lemoga go dirišwa ga Psalme 2:​1, 2. Lengwalo le le balega ka gore: “Ba re’ng ba dithšaba bà tsoša marole? Dilete di re’ng di rêra tša lefêla? Maxoši a lefase a a tsoxa, le babuši ba lakana xo lwa le Morêna le Motlotšwa w’axwe.” Ka morago ga ge baapostola ba Motlotšwa wa Jehofa ba swerwe la mathomo le go swarwa gampe ke ba-Juda ba manaba ba ile ba buša ba kopana le Bakriste-gotee le bona gomme ba tsopola mantšu a a lego ka mo godimo a Psalme 2 bjalo ka ge a hlamilwe ke Kgoši Dafida. Ditiro 4:​23-30 e bega taba ka gore:

¹⁵ “Xe ba lesitšwe, ba boêla xo ba xabô, ba ba anêxêla tše baperisita ba baxolo le ba baxolo ba di boletšexo le bôná. Ba di kwa, ba hlatlošetša mantšu xo Modimo ka bo-pelo-tee, ba re: Morêna, Wene O hlodilexo lexodimo le lefase le lewatlê, le tšohle di lexo mo xo ôna, o boletše ka molomo wa Dafida mohlanka wa xaxo wa re: Ba re’ng ba dithšaba bà tsoša marole? Dilete di re’ng di rêra tša lefêla? Maxoši a lefase a a tsoxa, le babuši ba lakana xo lwa le Morêna Motlotšwa wa xaxo. Ka kxonthe ba bokane motseng wó, ba tsoxêla Jesu Mohlanka w’axo e mokxêthwa, e O mmeilexo; ké bô-Herode, le Pontio Pilato, le ba-ntlê bà na le dilete tša Isiraele. Ya na ya ba xo tšweletša tše di beilwexo pele ka ’atla sa xaxo le morêrô wa xaxo, wa re di tlo ba xôna. ’Me byalo, Morêna, bôna kxalemô tša bôná; ’me bahlanka ba xaxo O ba fê mafolofolo ruri, ba bolêlê ’ntšu la xaxo. Emiša letsôxô la xaxo batho ba fôlê; xo bônalê diká tša bohlatse le mehlôlô ka ’ina la Jesu Mohlanka e mokxêthwa w’axo.”

16, 17. (a) Historing ka moka ya motho, na go na selo lege e le sefe seo se kilego sa direga go swana le seo se ilego sa thoma go direga ka 1914? Hlalosa. (b) Ke tsela efe yeo ditšhaba di tšwelago pele di le go yona, gomme re ka re ka yona di gapeletša Jehofa Modimo go ngwala eng?

¹⁶ Lega go le bjalo, ge go tliwa ditšhabeng tše di tsošago marole, dikgoši tše di bokanago gore di itire ngata e tee, baetapele ba bopolitiki bao ba lakanago gore ba lwe le Jehofa le Motlotšwa wa Gagwe, Jesu Kriste, ke’ng seo historing ya motho ka moka se ka bapišwago le seo se thomilego nywaga e 76 e fetilego ka 1914? Ga se feela gore ntwa ya pele ya lefase e ilego ya lwewa historing ka moka ya motho e tsogile ngwageng wo, eupja ka mo go kgethegilego, e bile ngwaga wo ka wona Mehla ya Ba-ntle, e lego “mehla e beilwego ya ditšhaba” e ilego ya fela! (Luka 21:​24, NW) Go molaleng gore Psalme 2 e bile le phethagalo ya yona e kgolo go thoma ka ngwaga woo.

¹⁷ Bofelong bja mehla ya Ba-ntle ka 1914, ga go le se tee sa ditšhaba​—gaešita le ditšhaba tšeo di bitšwago tša Bojakane, tšeo badudi ba tšona ka tsela ya bodumedi ba itebelelago e le ba-Isiraele ba moya​—se bego se sekametše go amogeleng Motlotšwa wa Jehofa, e lego Jesu Kriste e le kgoši godimo ga lefase. Le gona mo nakong ye, ka morago ga nywaga e 71 “Ebangedi yé ya mmušô wa magodimong” e thomile go “xoêlêlwa lefaseng ka moka xore e be bohlatse mo xo dithšaba tšohle,” go tloga ka 1919 go ya pele, ditšhaba tšeo di lego ka gare ga Bojakane le ka ntle ga bjona ruri di ka se ke tša tla tša tumiša Kgoši e tsebaditšwego ka nako e telele ya Jehofa le go dira keno ya boineelo go yena ge ba dutše ba rola pušo ya bona ya go buša godimo ga lefase. (Mateo 24:​14) Go e na le seo, ka morago ga nako e telele ba fihlile nakong le boemong bjo go bjona re ka rego ba gapeletša Jehofa go ngwala karolo ya seremo se segolo sa ‘puku ya dintwa tša Jehofa.’​—Numeri 21:​14, Phetolelo ya Kgale.

Phenyo ya Letago ya Modimo wa Mohlabani

18. Ke ka tiro efe ya Jehofa re lego ba amogelwago, gomme re ka re ke mang yo a lego lehlakoreng la gagwe bakeng sa go phethagatša Psalme 110?

¹⁸ Ka gona, gatela pele ntweng, wena Jehofa wa mašaba, le Morwa wa gago wa kgoši Jesu Kriste a le lehlakoreng la gago! Mantšu a a boporofeta a lebišitšwe go yena: “Buša xare xa manaba ’axo. Mong’a-bohle ó êma le Wene; ’me ka ’tšatši la boxale bya’xwe ó tlo thubaka maxoši. Ó tlo sekiša ba dithšaba, xwa tlala ditoto; ó tlo thubaxanya naxa e kxolo.”​—Psalme 110:​2, 5, 6.

19. Mabapi le ntwa ya mohla-mogolo wa Modimo Ra-matla-ohle yeo e lego kgaufsi kudu, re rapelela lešaba le legolo le dinku tše dingwe ka thapelo efe?

¹⁹ Jehofa wa mašaba, anke bahlanka ba gago ba ba botegago ba lefaseng ba be dihlatse tše di thabilego tšeo di hlatselago phenyo e kgolo kudu ya gago ka Kgoši ya gago ya mohlabani, Jesu Kriste, nakong ya ntwa ya mohla-mogolo wa Modimo Ra-matla-ohle lefelong leo le bitšwago Haramagedone ka Sehebere! (Kutollo 16:​14) Le le gotee le mašaledi a ba-Isiraele ba moya ba therešo, anke lešaba le legolo la batho ba swanago le dinku bao ‘ba hlatswitšego mašela a bona mading a Kwana’ ba ‘tšwe masetla-pelong a magolo’ ka go hlalala gore e be dihlatse tša gago tša lefaseng go iša ka mo go sa felego! (Kutollo 7:​14) Ka tlase ga tlhokomelo ya gago e lerato, anke ka ntle le go hwa ba phologele lefelong le le se nago ntwa la Morwa wa gago yo a fenyago, yo a tlago go buša godimo ga lefase le le hlwekišitšwego le tlago go fetolwa paradeise e botse, ka go dumelelana le morero wa gago wa mathomong. Anke ba be mohlala o bonagalago go bahu ka moka bao ba tsošitšwego go phagamišeng bogoši bjoo ka tshwanelo e lego bja gago godimo ga legohle ka moka! Re a go leboga gore ka nako yeo o tla rarollela kgang ya legohle sa ruri, ee, ka mo go sa felego!

◻ Kgang e kgolo pele ga batho le barongwa ke efe?

◻ Go na le phapano efe magareng ga go lwela ga Jehofa Isiraele ya bogologolo le Isiraele ya moya?

◻ Nakong ya Haramagedone, Dihlatse tša Jehofa di tla ema kae gomme ka baka la’ng?

◻ Psalme 2:​1, 2 e bile le phethagalo e kgethegilego neng?

◻ Kgang ya legohle e tla rarollelwa sa ruri bjang?

[Seswantšho go letlakala 24, 25]

“Lešaba le lexolo” le tla tumiša Kgoši yeo e bilego e le Modiši e fenyago ya Modimo”