Kgothatšanang ge Letšatši le Dutše le Batamela
“[Le] kgothatšane, kudu-kudu ka ge le bona letšatši le dutše le batamela.”—BA-HEBERE 10:25, “NW.”
1, 2. Ke letšatši lefe leo le batamelago, gomme ke kgopolo efe yeo batho ba Jehofa ba swanetšego go ba le yona?
BAO lehono ba tšeago karolo go boleleng gore, ‘Etlang le nwe meetse a bophelo,’ ga ba ipee lekatana. Ge letšatši le legolo la phenyo ya Jehofa le dutše le batamela, ba diriša keletšo ya Beibele, e rego: “A re hlokomelaneng gore re tutueletšane leratong le medirong e botse, re se tlogele go bokana ga rena gotee, bjalo ka ge e le mokgwa wa ba bangwe, eupja re kgothatšane, kudu-kudu ka ge le bona letšatši le batamela.”—Ba-Hebere 10:24, 25, NW.
2 Mangwalo a porofeta ka “letšatši” leo e le ‘letšatši la Jehofa.’ (2 Petro 3:10) Ka ge Jehofa e le Modimo yo Godimo-dimo le yo matla ka moka, ga go letšatši leo le ka fetago letšatši la gagwe. (Ditiro 2:20) Le bolela go godišwa ga bogoši bja gagwe e le Modimo yo a phagametšego legohle ka moka. Letšatši leo le bohlokwa ka go fetišiša le a batamela.
3. Ke bjang letšatši la Jehofa le bego le le kgaufsi go Bakriste lekgolong la pele la nywaga, gomme go thwe’ng ka rena lehono?
3 Moapostola Paulo o ile a botša Bakriste lekgolong la pele la nywaga la Mehla e Tlwaetšwego ya rena gore letšatši la Jehofa le a batamela. Ba ile ba fagahlela go tla ga letšatši leo, eupja morago kua, letšatši leo le be le sa šaletšwe ke nywaga e fetago 1 900. (2 Ba-Thesalonika 2:1-3) Lega go le bjalo, ba be ba swanetše go kgothatšega ka gore letšatši leo ruri le be le tla tla, gomme ge e ba Bakriste ba be ba ka tšwela pele ba tiile tumelong, ba be ba tla fihla letšatšing leo le le šegofetšego. (2 Timotheo 4:8) Morago kua, letšatši leo le be le lebelelwa e le leo le batamelago. Ge e le go rena lehono, letšatši la Jehofa ruri le kgaufsi. Diphethagalo ka moka tše di kgahlišago tša boporofeta bja Beibele di kgonthišetša therešo ye ye e thabišago. Kapejana, leina la Jehofa, Modimo wa rena, le tla kgethagatšwa ka mo go sa felego.—Luka 11:2.
Go ba ba Kgothatšwago ke Leina la Modimo
4. Go ya ka Kutollo 19:6, ke mang yo a tlago go ba Kgoši, gomme leina la gagwe le lemogwa bjang?
4 Leina la Modimo le swanetše go ba selo seo se kgahlišago lapeng ka moka la batho. Today’s English Version e re: “Tumišang Modimo! Ka gobane Morena, Modimo wa rena Ra-matla ka moka, ke Kgoši.” (Kutollo 19:6) Go ya ka phetolelo yeo ya Beibele ya lekgolong la nywaga la bo-20, ke Morena, Modimo ra-matla ohle. Phetolelo yeo, gotee le diphetolelo tše dintši tša mehleng yeno, ga di nee leina la Mo-ba-gona wa legodimong yo a thomago go buša e le Kgoši. Lega go le bjalo, leina la Modimo le akaretšwa ka go “Haleluya” (“Tumišang Jah” goba, “Tumišang Jehofa”) yeo e hwetšwago ka go Revised Standard Version, New International Version, le phetolelo ya Moffatt ya Kutollo 19:6. Karolong e kgolo ya Mehla e Tlwaelegilego ya rena, leina la Modimo le ile la utwa diphetolelong tša Beibele. Lega go le bjalo, bjalo ka ge re tla bona, leina leo le ile la kgothatša batho ba Modimo kudu mehleng ya bogologolo gaešita le mehleng yeno.
5, 6. (a) Ke ka baka la’ng Moše a be a swanetše go tseba leina la Modimo yo a bego a mo emela? (b) Ke mafelelo afe ao a swanetšego go ba a bile gona go Ba-Isiraele ge Moše a be a gatelela leina la Modimo?
5 Re a gopola gore ge Moše a be a romilwe ke Modimo yo Godimo-dimo go setšhaba sa Isiraele seo se bego se le bothopjeng Egipita, potšišo ya gore o romilwe ke mang e ile ya rotoga dikgopolong tša batho bao Moše a bego a romilwe go bona. Moše o tsebile gore setšhaba seo se tlaišegago sa ba-Juda se be se tla nyaka go tseba leina la Modimo yo a bego a mo emela. Mabapi le se re bala go Ekisodo 3:15 (Phetolelo ya Kgale) gore: “Modimo a boela a re go Moše: O botše bana ba Isiraele o re: Jehofa, Modimo wa bo-tata weno, Modimo wa Aborahama, Modimo wa Isaka, Modimo wa Jakobo o nthometše go lena. Ke lona leina la-ka ka go sa felego, gomme ke tla bitšwa ka lona ditlogolong tša ditlogolwana.”
6 Ge tsebišo ye e be e gatelelwa go bona, ba-Isiraele ba swanetše go ba ba ile ba ikwa ba wele dipelo kudu. Phologo ya bona e be e tiišitšwe ke Modimo a nnoši wa go rereša, e lego Jehofa. Le gona, go ba le kholofelo ya go tseba Modimo nakong ya ge a tla ba a bontšha seo se bolelwago ke leina la gagwe—e sego go ipea lekatana ka go ikgogomoša—go swanetše go ba go ile gwa ba kgothatša gakaakang!—Ekisodo 3:13; 4:29-31.
7. (a) Re tseba bjang gore barutiwa ba Jesu ba be ba tlwaelane le leina la Modimo? (b) Leina la Modimo le ile la lahlelwa bjang ka morago?
7 Barutiwa ba Morena Jesu Kriste le bona ba ile ba kgothatšwa kudu ke leina la Modimo la Jehofa, le seo le se emelago. (Johane 17:6, 26) Nakong ya bodiredi bja Jesu bja lefaseng, ruri ga se a ka a lahlela leina la Modimo ka morago, le gona e be e se morero wa gagwe gore a dire gore leina la gagwe ka noši la Jesu le tle pele. E bile feela ka morago ga gore go thome bohlanogi bjo bo boletšwego e sa le pele malebana le tumelo ya kgonthe ya Bokriste, moo leina la Modimo le ilego la lahlelwa ka morago, ee, la tlošwa ka mo go feletšego dipoledišanong tša Bokriste. (Ditiro 20:29, 30) Ge feela leina la Morwa wa Modimo le thoma go phagamišwa kudu, le e-ba ka godimo ga la Tate, bao ba ipolelago go ba Bakriste ba tla hwetša gore go rapela ga bona Tate go tšwela pele go e-ba mo go sa ba kgomego, mo go se nago go kgomarelana ga lapa, ka gona e le mo go sa kgothatšego.
8. Go amogelwa ga leina la Dihlatse tša Jehofa go bile le mafelelo afe a mangwe godimo ga batho ba Modimo?
8 Ka gona, go bile le lethabo le legolo kudu ge Barutwana ba Beibele ba Ditšhaba ka Moka bao ba bego ba sepedišana le Mokgatlo wa Watch Tower ba be ba amogela leina la Dihlatse tša Jehofa ka 1931. Se e be e se feela se se thabišago, eupja e be e le se se kgothatšago kudu. barutwana ba Beibele bao ba bego ba sa tšwa go amogela leina le lefsa ba ile ba kgothatšana ka se.—Bapiša le Jesaya 43:12.
9. Bakriste ba therešo ba ikwa bjang ka Yo ba lego Dihlatse tša gagwe?
9 Ka gona, Bakriste ba therešo lehono ba hwetša e le mo go nepagetšego go hlaola Yo bona e lego Dihlatse tša gagwe tšeo di boletšwego e sa le pele, go etša ge Jesu Kriste Moetapele wa bona a ile a dira ge a be a le mono lefaseng. (Kutollo 1:1, 2) Ee, ba mo hlaola e le yena a nnoši yo leina la gagwe e lego Jehofa.—Psalme 83:18.
Go Tlala ka Lethabo le Moya o Mokgethwa
10-12. (a) Mafelelo a matla a dirago godimo ga balatedi ba Jesu e be e tla ba afe? (b) Dihlatse tša Jehofa tšeo di tutuetšwago ke lethabo di nyaka go swarana bjang?
10 Mantšung a gagwe a go laela baapostola ba gagwe, Jesu Kriste o itše: “Ké xôna yang Le dirê dithšaba ka moka barutiwa ka xo ba kolobetša Leineng la Tate le la Morwa le la Môya o Mokxêthwa, le ka xo ba ruta xo boloka tšohle tše ke le laetšexo tšôna. Xomme tsebang, ke na le lena ka mehla xo fihla bofelong bya lefase.”—Mateo 28:19, 20.
11 Ela hloko gore Bakriste bao ba sa tšwago go rutwa ba be ba swanetše go kolobetšwa leineng la moya o mokgethwa. Moya wo o mokgethwa ga se motho eupja ke matla a dirago a Jehofa Modimo, ao A a dirišago ka Jesu. Ka Pentekoste, Jehofa Modimo ka Jesu Kriste o ile a tšhollela matla a a dirago godimo ga balatedi bao ba ineetšego ba Jesu Kriste. (Ditiro 2:33) Ba ile ba tlala ka moya wo o mokgethwa, gomme e nngwe ya dipontšho goba dienywa tša moya o mokgethwa ke lethabo. (Ba-Galatia 5:22, 23; Ba-Efeso 5:18-20) Lethabo ke seka se se fago mafolofolo. Barutiwa ba swanetše go tlatšwa ka lethabo la moya o mokgethwa. Thapelo yeo e ilego ya bolelwa ke moapostola Paulo ke ya maleba kudu: “Eka Modimo yo a neago kholofelo a ka le tlatša ka lethabo ka moka le khutšo ka go dumela ga lena, e le gore le tlale ka kholofelo le matla a moya o mokgethwa.”—Ba-Roma 15:13, NW.
12 Dihlatse tša Jehofa lehono, go akaretša le “lešaba le lexolo,” di tletše ka moya wo wo o neago lethabo, di tla nyaka, ee, di tla tutueletšega go kgothatšana ka gare ga tshepedišo ye ya dilo ye e se nago bogwera. Ka gona, moapostola Paulo o boletše ka “go kgothatšana.”—Kutollo 7:9, 10; Ba-Roma 1:12, NW; 14:17.
Go na le Mabaka a Mantši a go Kgothatšega
13. Re na le mabaka afe a go kgothatšega le a go kgothatšana?
13 Ka ge ba le ka gare ga tshepedišo ye ya dilo yeo mmuši le modimo wa yona e lego moganetši wa selo se sengwe le se sengwe se se lokilego, Bakriste ba tla nyaka go kgothatšana ka gare ga phuthego ya Bokriste ya lefase ka bophara, yeo e apareditšwego ke moya o mokgethwa wa Jehofa Modimo. (Ba-Hebere 10:24, 25; Ditiro 20:28) Re na le mabaka a mantši a go kgothatšega. Ee, re leboga gakaakang ka go ba le tsebo e nepagetšego ka Jehofa le ka Morwa wa Gagwe le ka matla ao a dirago ao ba a šomišago, e lego moya o mokgethwa! Re leboga kholofelo yeo ba re neago yona gakaakang! Ke ka fao borapedi bja rena bo tletšego ka lethabo. Moapostola Paulo o ile a botša Bakriste bao a bego a ba ngwaletše lengwalo gore ba swanetše go kgothatšana gomme ba agane tumelong ya bona e kgethwa kudu. Ba be ba swanetše go dira se ‘kudu-kudu ka ge ba be ba bona ka mokgwa wa seswantšhetšo, go batamela ga letšatši leo.’ Go feta moo, ge mebušo ya bopolitiki ya lefase le e fediša Bokriste bja leina gotee le madumedi a mangwe ka moka a maaka, boemo bo tla nyaka gore re kgothatšane ka mo go oketšegilego.
14. Ke bomang bao ba swanetšego go kgothatšana, le gona bjang?
14 Lege bagolo ba etelela pele tabeng ya go kgothatša mohlape diphuthegong tša bona tše fapa-fapanego, Bakriste ka moka ba swanetše go kgothatšana, bjalo ka ge Ba-Hebere 10:25 e kgothatša. Ge e le gabotse, se ke molao wa Bokriste. Ge e ba o le setho sa phuthego, na o nea kgothatšo ye? Mohlomongwe o ka ipotšiša gore, ‘Nka nea kgothatšo bjang? Ke dire’ng?’ Sa pele, na go ba gona ga gago dibokeng le go thekga ga gago thulaganyo ya Bokriste ga go dire gore banababo rena ka moka le dikgaetšadi ba kgothatšege, bjalo ka ge le wena mo gongwe o kgothatšwa ke go bona ba bangwe ba e-tla dibokeng tša phuthego ka go botega? Ba ka kgothatšwa le ke mohlala wa gago wa go kgotlelela ka go botega. Ka go tšwela pele ga gago tseleng ya Bokriste go sa šetšwe mathata a bophelo, o sa lahlele teu, o ka bea mohlala wo o tutuetšago.
Fenya Manyami ao a Tlišwago ke Diabolo
15. Ke ka baka la’ng Diabolo “à tuka boxale ka kudu,” le gona o galefetše bomang?
15 Ga se rena fela bao re tsebago gore letšatši la Jehofa le kgaufsi. Sathane Diabolo le yena o a tseba. Kutollo 12:12 e re botša gore mo nakong ye lefase le madimabeng “xobane Diabolo ó theoxetše xo lena à tuka boxale ka kudu; ó tseba xe a sa šaletšwe ke lebakanyana fêla.” Bjalo ka ge Kutollo 12:17 e bontšha, bogale bja gagwe bjo bogolo bo lebišitšwe go “ba ba xomaretšexo melaô ya Modimo, ba ba naxo le bohlatse bya Jesu Kriste.” Ga go pelaelo ka se—Diabolo o nyaka go re nyamiša! Le gona o tloga a tseba kamoo a ka dirago seo. O tseba mafokodi a rena le mathata a rena, gomme o šomiša wona.
16. Ke ka baka la’ng Sathane a diriša sebetša sa go nyamiša?
16 Ke ka baka la’ng Diabolo a diriša sebetša sa go nyamiša? Ka gobane gantši se a šoma. Gaešita le motho yo a kgotleletšego kganetšo ye e lebanyago le tlaišo a ka wela moreong wa go nyama. Sathane o nyaka go kwera Jehofa Modimo gomme o leka go bontšha gore a ka kgona go aroša batho gore ba se ke ba Mo direla. (Diema 27:11; bapiša le Jobo 2:4, 5; Kutollo 12:10.) Ge a ka kgona go go nyamiša, a ka dira gore o fokole tirelong ya gago go Modimo; a ka ba a dira gore o kgaotše, o hloke mafolofolo go boleleng ditaba tše di lokilego tša Mmušo.—2 Ba-Korinthe 2:10, 11; Ba-Efeso 6:11; 1 Petro 5:8.
17. Mafelelo a sa kgahlišego a go nyama a ile a bonagala bjang mehleng ya Moše?
17 Mafelelo ao a sa lokago a go nyama a ka bonwa tabeng ya Ba-Isiraele ge ba be ba le Egipita ya bogologolo. Ka morago ga gore Moše a bolele le Farao, mmuši yo o mo šoro o ile a ba imetša kudu ka merwalo le ka kgatelelo. Modimo o ile a botša Moše gore a kgonthišetše Ba-Isiraele gore ka kgonthe O be a tla ba lokolla, a ba dire batho ba Gagwe, a ba phološe, gomme a ba tliše nageng ya kholofetšo. Moše o ile a begela bana ba Isiraele se. Eupja Ekisodo 6:9, (Phetolelo ya Kgale) e bega gore: “Ga ba ka ba theetša Moše ka baka la go fela pelo le ka baka la mediro e methata.” Pele ga gore Jehofa a kgodiše Moše le go mo kgothatša, kgopolo ye e ile ya nyamiša gaešita le Moše, ya mo dira gore a se ke a nyaka go bolela le Farao bjalo ka ge a be a laetšwe.—Ekisodo 6:10-13.
18. Ke ka baka la’ng go nyakega kudu bakeng sa batho ba Modimo gore ba fenye manyami ao a tlišwago ke Diabolo?
18 Sathane Diabolo o tseba gabotse gore go nyama go ka ba le mafelelo a sa kgahlišego gakaakang go mohlanka wa Modimo. Bjalo ka ge Diema 24:10 (Phetolelo ya Kgale) e re: “Ga o nolega moko mohlang wa ditlalelo, matla a gago a tlo felela.” Ka ge re phela ka gare-gare ga nako ya bofelo, re swanetše go ba ba matla le go ba ba tiilego moyeng. Go lwa ga rena le go se phethagale ga rena, mafokodi le diphošo tšeo di ka re šitišago, go lekane; eupja ge Sathane a leka go ikhola ka diphošo tše, gona re hloka sa go re hlatlola.
Ithekge ka Botlalo ka Sehlabelo sa Kriste
19. Ke eng seo se tlago go re thuša go lwantšha go nyama, gona ka baka la’ng?
19 Thušo e kgolo tabeng ye ke tokišetšo ya sehlabelo sa topollo yeo Jehofa a dirilego gore e kgonege ka Jesu Kriste. Re ka ba bafenyi ka go ithekga ka botlalo ka topollo. Go kotsi kudu go tšeela tokišetšo ye fase. Ee, re tla fela re dira diphošo, re dira dibe, ge feela re se ra phethega. Eupja ga se ra swanela go nyama gomme ra bea fase ka go nagana gore go padile, gomme ka tsela yeo ra wela moreong wa Sathane. Re a tseba gore re na le sehlabelo se se tletšego sa sebe. Topollo e kgona go tloša dibe. Ge e ba re le ba “lešaba le lexolo,” re swanetše go ba le tumelo le kholofelo e tletšego ya gore re ka kgona go hlatswa diaparo tša rena ra di šweufatša ka madi a Kwana.—Kutollo 7:9, 14.
20. Kutollo 12:11 e bontšha bjang gore monyamiši o mogolo, e lego Diabolo, a ka fenywa?
20 Go Kutollo 12:10 Sathane o hlaloswa e le “mmexi wa bana ba bôrena . . . pele xa Modimo mosexare le bošexo.” Re ka fenya bjang mmegi yo o mo šoro le monyamiši? Temana ya 11 ya kgaolo yeo e nea karabo: “Ba mo fentše ka madi a Kwana, le ka Lentšu la bohlatse bya bôná, ba se rate bophelô bya bôná ba bá ba išwa lehung.” Ka gona batho ba Jehofa ba swanetše go ba le kholofelo e tletšego sehlabelong sa topollo, e lego madi a Kwana. Kgomarelang kgothatšo yeo e tlišwago ke go nea bohlatse, ka mehla le abelane ditaba tše di lokilego tša Mmušo wa Modimo le motho o mongwe le o mongwe yo le ka kgonago go di abelana le yena.
21. Ke bjang re ka kopanelago modirong wa Diabolo wa go nyamiša banababo rena re sa lemoge?
21 Ka dinako tše dingwe re ka ba le karolo modirong wa Diabolo wa go nyamiša banababo rena, re sa lemoge. Bjang? Ka go ba bao ba ntšhago diphošo kudu, go nyaka mo gontši kudu go bona, goba ka go itira ba ba lokilego kudu. (Mmoledi 7:16) Bohle re na le mafokodi. Re se ke ra a diriša bjalo ka Diabolo. Go e na le moo, anke re boleleng ka tsela e kgothatšago ka banababo rena le ka batho ba Jehofa bjalo ka sehlopha se se rulagantšwego. Re nyaka go tšwela pele re kgothatšana gore re se ke ra nyamišana.
Go ba ba Kgothatšago ge Letšatši le Dutše le Batamela
22, 23. (a) Ke ka baka la’ng re se ra swanela go fo tlogelela go bagolo gore e be bona mothopo wa kgothatšo? (b) Balebeledi ka phuthegong ya Bokriste ba ka kgothatšwa bjang?
22 Re swanetše go ikemišetša ka matla go kgothatšana ge letšatši le dutše le batamela. Kgothatša ba bangwe ka mohlala wa gago wa go botega le ka mantšu ao a homotšago. Ekiša Jehofa le Morena Jesu Kriste tabeng ye. O se ke wa tlogelela seo go bagolo ba phuthego feela gore e be mothopo wa kgothatšo. Bagolo ka bobona ba nyaka kgothatšo. Ba na le mafokodi go swana le mohlape ka moka, le gona ba swanetše go lebeletšana le mathata a swanago a go hlokomela malapa a bona lefaseng leo le senyegago. Go oketša fao, ba na le seo Paulo a ilego a se hlalosa e le dipelaelo bakeng sa diphuthego. (2 Ba-Korinthe 11:28, 29) Mošomo wa bona ke o thata—ba nyaka kgothatšo.
23 O ka kgothatša kudu bao ba lego maemong a bolebeledi ka phuthegong ya Bokriste ka go dirišana le bona. Ka go dira bjalo o tla ba o latela keletšo ya Ba-Hebere 13:17: “Kwang baruti ba lena, Le laiwê ke bôná, xobane ba diša meoya ya lena; xobane ba tlo sekišwa se ba Le dirilexo sôna. Ba kweng, xore ba dirê bà thabile, e sexo ka diphexêlô; xobane xo ba diriša ka mokxwa woo xo ka se Le hole selô.”
24. Mehleng ye ya go nyama, re swanetše go ba re dira’ng, gona ka baka la’ng?
24 Re phela mehleng ya go nyama. Dipelo tša batho ka kgonthe di poifong e kgolo ka baka la dilo tšeo di tlelago lefase leo le agilwego, bjalo ka ge Jesu a boletše e sa le pele. (Luka 21:25, 26) Ka ge go e-na le mathata a mantši gakaakaa, ao a nyamišago le go fetša pelo, le “kgothatšane, kudu-kudu ka ge le bona letšatši le dutše le batamela.” Latelang keletšo e botse ya moapostola Paulo go 1 Ba-Thesalonika 5:11: “Eletšanang-xê, e mongwê a axiše e mongwê ka mokxwa wo Le fêlaxo Le dira ka wôna.”
O ka Araba Bjang?
◻ Ke ka baka la’ng Bakriste ba swanetše go kgothatšana le go feta pele?
◻ Ke bjang go tseba leina la Modimo e bilego mo go kgothatšago go batho ba Jehofa?
◻ Ke ka ditsela dife o mongwe le o mongwe wa rena a ka kgothatšago o mongwe?
◻ Ke ka baka la’ng re swanetše go phema go kopanela modirong wa Diabolo wa go nyamiša banababo rena?
[Seswantšho go letlakala 17]
Bagolo ba etelela pele go kgothatšeng mohlape diphuthegong tša gabo bona