Itokišetšeng Letšatši la Jehofa!

Dintlha-kgolo go Tšwa go Ba-Thesalonika ba Pele

LETŠATŠI la Jehofa! Bakriste ba kua Thesalonika ya kgale ba be ba nagana gore le kgaufsi. Na ba be ba nepile? Le be le tla tla neng? Yeo e be e le e nngwe ya ditaba tše bohlokwa tšeo di ahla-ahlilwego lengwalong la mathomo la Paulo go Ba-Thesalonika, leo a le rometšego go tšwa Korinthe mo e ka bago ka ngwaga wa 50 Mehleng e Tlwaetšwego ya rena.

Paulo le Silase ba ile ba thea phuthego kua Thesalonika, yeo e bego e le motse-mošate wa profense ya Roma ya Matsedonia. (Ditiro 17:1-4) Ka morago, lengwalong la gagwe la mathomo go Ba-Thesalonika, Paulo o ile a reta, a nea kgothatšo, gomme a bolela ka letšatši la Jehofa. Le rena re ka holwa ke lengwalo le, kudu-kudu ka ge letšatši la Jehofa le le kgaufsi gakaakaa.

Reta o be o Kgothatše

Paulo sa mathomo o ile a reta Ba-Thesalonika. (1Th 1:1-10) Theto e be e newa ka baka la go šoma ga bona ka go botega le ka go kgotlelela. Le gona, e be e le mo go botse gore ba ile ba “amoxêla Lentšu ka lethabô la Môya-mokxêthwa mola ditlaišexo è le tše ntši.” Na o reta ba bangwe bjalo ka Paulo?

Moapostola o be a beile mohlala o mobotse. (2:1-12) Go sa šetšwe go swarwa gampe kua Filipi, ‘ka baka la Modimo, o bile le mafolofolo a go bolela ditaba tše di lokilego’ go Ba-Thesalonika. O be a ile a phema bofora, megabaru, le go nyaka botumo. Paulo ga se a ka a ba morwalo o boima, eupja o bile yo boleta go bona go etša mmago ngwana ngwaneng wa gagwe. A mohlala o mobotse gakaakang bakeng sa bagolo lehono!

Mantšu a latelago a Paulo a ile a kgothaletša Ba-Thesalonika go dula ba tiile ge ba tlaišwa. (2:13–3:13) Ba be ba ile ba kgotlelela tlaišo go tšwa go batho ba gabo bona, gomme Timotheo o be a tlišeditše Paulo pego e botse mabapi le boemo bja bona bja moya. Moapostola o ile a rapelela gore ba gole leratong le gore dipelo tša bona di matlafale. Ka mo go swanago, Dihlatse tša Jehofa mo nakong ye di rapelela badumedi-gotee le tšona bao ba tlaišwago le go ba kgothatša ge e ba go kgonega, gomme di thabela dipego tšeo di bolelago ka potego ya bona.

Dula o Phafogile Moyeng!

Ka morago Ba-Thesalonika ba ile ba newa keletšo. (4:1-18) Ba be ba swanetše go sepela ka botlalo tseleng ya go kgahliša Modimo, ba bontšhe lerato la borwarre ka tekanyo e oketšegilego gomme ba šome ka diatla tša bona e le gore ba kgone go hwetša dilo tšeo ba di hlokago. Go feta moo, ba be ba swanetše go kgothatšana ka kholofelo ya gore nakong ya go ba gona ga Jesu badumedi bao ba tswetšwego ka moya bao ba hwilego ba tla tsošwa pele gomme ba kopanywa le yena. Ka morago, batlotšwa bao ba šetšego ka go hwa ga bona le go tsošwa ba be ba tla kopanywa le Kriste gotee le bao ba šetšego ba tsošeditšwe bophelong bja legodimong.

Paulo ka morago o ile a bolela ka letšatši la Jehofa gomme a nea keletšo e oketšegilego. (5:1-28) Letšatši la Jehofa le be le tla tla bjalo ka lehodu, ka tshenyo ya ka pela kapejana ka morago ga kgoeletšo ya gore: “Xo khutšô! Xo iketlilwe!” Ka gona Ba-Thesalonika ba be ba swanetše go dula ba phafogile moyeng, ba šireleditšwe ke sephema-sefega sa tumelo le lerato le ke kholofelo ya phološo e swanago le kuane. Ba be ba swanetše go bontšha tlhompho e kgolo bakeng sa bao ba okametšego ka phuthegong le gore ba katoge bokgopong bjalo ka ge le rena re swanetše go dira bjalo.

Lengwalo la pele la Paulo go Ba-Thesalonika le swanetše go re tutueletša go reta le go kgothatša badumedi-gotee le rena. Le swanetše le go re kgothaletša go bea mohlala o mobotse boitshwarong le kgopolong. Le gona, keletšo ya lona ruri e ka re thuša go dula re itokišeditše letšatši la Jehofa.

[Lepokisi/Seswantšho go letlakala 22]

Sephema-sefega le Kuane: Paulo ge a kgothaletša go phafoga moyeng, o ngwadile gore: “A re phafoxeng, re aparê se-phêma-sefêxa sa tumêlô le leratô, kuane e bê xo holofêla phološô.” (1 Ba-Thesalonika 5:8) Sephema-sefega e be e le sešireletša-kgara sa mohlabani, seo se nago le dikgapetla, diketane goba tshipi e tiilego. Ka mo go swanago, sephema-sefega sa tumelo se re šireletša ka tsela ya moya. Go thwe’ng ka kuane ya bogologolo? Gantši e be e dirwa ka tshipi gomme e le sešireletši sa hlogo sa bahlabani seo se diretšwego go šireletša mohlabani nakong ya ntwa. Bjalo ka ge kuane e be e šireletša hlogo ya mohlabani, ka mo go swanago kholofelo ya phologo e šireletša matla a kgopolo, ka tsela yeo ya dira gore Mokriste a dule a botega. Go bohlokwa gakaakang gore batho ba Jehofa ba apare ditlhamo tše bjalo tša moya!—Ba-Efeso 6:11-17.