‘Go Phela ka go Letela Letšatši la Jehofa’

KA GE GO ANEGA LYLE REUSCH

GO YA ka tšeo ke di gopolago tša go tloga bjaneng, bophelo bja lapa lešo bo be bo ithekgile ka tumelo e matla ya go dumela go tla ga lefase le lefsa la go loka. Tate le mma ba be ba balela rena bana go tšwa Beibeleng mabapi le ‘magodimo a mafsa le lefase le lefsa’ le mabapi le ‘kgomo le bera di fula gotee, tau e e-ja bjang bjalo ka poo, gomme di gapja ke mošemanyana.’ Ba ile ba dira gore se e be sa therešo kudu, moo ke ilego ka nagana ka nna ke le mošemanyana yoo o monyenyane.​—2 Petro 3:​11-13; Jesaya 11:​6-9.

Ka bo-1890 rakgolo, August Reusch, o ile a ithuta ditherešo tša motheo tša Beibele ka go ngwalelana le Charles T. Russell. O ile a bolela ditaba tše di lokilego ka gohle ga gabo le tikologong ya gabo Seleteng sa ka Leboa-bodikela sa Canada, yeo mo nakong ye e lego Yorkton, Saskatchewan. O ile a eletša barwa ba gagwe leboelela ka gore: “Bašemane, phakgamelang 1914!” Kgodišego ya gore letšatši la Jehofa le be le batametše e ile ya dira gore tate a be le kgopolo ya gore go akgofile yeo e ilego ya tšwela pele bophelong bja gagwe ka moka le yeo e bilego tsela ya gagwe ya bophelo.

Tate le mma e be e le batho ba go amogela baeng kudu. Sehlopha sa Thuto ya Beibele sa Saskatoon, Saskatchewan, e lego Ecclesia of Bible Students, se be se bokana legaeng la rena ka mehla. Badiredi ba basepedi (bao ba bitšwago baeng) ba be ba dula legaeng la rena gantši. Nna, ngwanešo, Verne le kgaetšedi’aka, Vera, re ile ra holega moyeng. Ka mehla go be go e-na le maikwelo a kgonthe mabapi le molaetša wa Mmušo le go nyakega mo go akgofilego ga go botša ba bangwe ka wona. (Mateo 24:​14) Ke be ke sa lemoge gore nywageng e tlago ke be ke tla fetša karolo e kgolo ya bophelo bja-ka ke tšwela pele ka modiro wo wa bosepedi ka go dira ke le molebeledi wa mosepedi wa Dihlatse tša Jehofa.

Ka 1927, Tate o ile a khudušetša lapa Berkeley, California. Ka morago, nakong ya ge tšhaparego ya tša ditšhelete e be e iphile matla ka 1933, ke ile ka fetša sekolong se se phagamego. Nna, le ngwanešo Verne, re ile ra ipona re e-na le mahlatse ka go hwetša modiro feketoring ya Khamphani ya Dikoloi tša Ford kua Richmond California. Lega go le bjalo, letšatšing le lengwe seruthwaneng sa 1935, ke ile ka nagana gore: ‘Ge e ba ke swanetše go šoma ka thata, nka šoma ka matla bakeng sa seo se swanetšego.’ Letšatšing leo ke ile ka rola modiro, gomme letšatšing le le latelago ka ngwala ke kgopela fomo ya kgopelo ya go šoma Bethele, ntlong-kgolo ya Dihlatse tša Jehofa kua Brooklyn, New York. Ka morago ga go ba gona kopanong e kgahlišago kudu kua Washington, D.C., ka June 1935, ke ile ka amogelwa bakeng sa tirelo ya Bethele.

Tirelo ya Bethele

Nathan Knorr, molaodi wa feketori, o ile a ntsentšha modirong wa go lokiša moago. Ke be ke laola sehlopha ka moka. Bjalo ka mošemane wa nywaga e 20, ke be ke ikwa ke le bohlokwa. Ke be ke kgona go ya kae le kae mo ke ratago go ya gona karolong lege e le efe ya feketori ka bolokogi, gomme go be go se motho yo a mpotšišago gore ke dira’ng. Ngwanabo rena Knorr o be a kgahlwa ke tsela yeo ke bego ke dira modiro wa-ka ka yona, eupja o ile a lemoga bothata bja kgopolo yeo ke bego ke e-na le yona. O ile a tšwela pele a katanela go ntutuetša gore ke hlagolele boikokobetšo.

Lega go le bjalo, go tšere nako e teletšana pele ke lemoga gore Ngwanabo rena Knorr o be a tloga a leka go nthuša. Ka gona ke ile ka kgopela tshwarelo bakeng sa kgopolo yeo ke bego ke e bontšha gomme ka bontšha boikemišetšo bja go kaonefatša. Seo e be e le mathomo a tswalano e borutho ya nako e telele le Ngwanabo rena Knorr, yoo ka January 1942 a ilego a ba mookamedi wa boraro wa Mokgatlo wa Watch Tower.

Ka ntle le go šoma modiro wa go lokiša, ke ile ka ithuta go diriša bontši bja metšhene ya go tlama dipuku goba go thuša go yona. Ge nako e dutše e e-ya ke ile ka dira modiro wa ka ofising, ke ngwala le go romela diotara tša modiro ka feketori. Seruthwane le selemo tša 1943 e bile dinako tša modiro o montši le tše di kgahlišago. Lefase le be le le gare ga Ntwa ya II ya Lefase, gomme Dihlatse tša Jehofa di ile tša kgotlelela tlaišo, go swarwa, le go ahlolelwa kgolego ka mehuta ka moka ya melato yeo e sa swanelago. Ka 1940 Kgoro e Phagamego ya Tsheko ya U.S. e ile ya laela gore dikolo di ka laela barutwana gore ba dumediše folaga. Se se ile sa baka bošoro bjo bogolo dileteng tše 44 go tšeo di bego di le 48 nakong yeo. Bana ba Dihlatse ba be ba lelekwa dikolong, batswadi ba swarwa, gomme dihlopha tša bahlola-mpherefere di lelekišetša Dihlatse ka ntle ga toropo. Batho ba be ba thuntšhwa, ba bangwe ba be ba tlotšwa sekontiri gomme ba hlomelwa mafofa.

Ge Dihlatse tša Jehofa di be di itwela dikgorong tša tsheko, dipampiri tše dintši tšeo di lego ka sebopego sa taelo e ngwadilwego yeo e ntšhiwago ke kgoro ya tsheko, mangwalo ao a ntšhiwago ke ramolao pele ga ge a seka molato kgorong ya tsheko, le mangwalo ao a bego a tšweletšwa ke sehlopha sa tša molao sa Mokgatlo a be a e-tla ofising ya-ka gore a gatišwe. Ka moka ga rena re be re šoma diiri tše dintši tša nako e oketšegilego bakeng sa go fihlelela nako yeo e beilwego. Dikahlolo tša Kgoro e Phagamego ya Tsheko ka May le June tša 1943​—nakong ya ge melato e 12 go e 13 e be e ahlolwa ka go thekga Dihlatse tša Jehofa​—di ile tša fetoga karolo ya dipego tša ngwaga le ngwaga tša histori ya tša molao. Ke thabela ge ke ile ka kgona go bona di sa tloga fase kamoo Jehofa a bulago tsela bakeng sa go šireletša le go thea ditaba tše di lokilego ka molao.​—Ba-Filipi 1:7.

Sekolo sa Bodiredi sa Pušo ya Legodimo

Ka ditsela tše dingwe re be re se ra hlangwa gabotse mehleng yeo bakeng sa go phetha modiro o mogolo woo o boletšwego e sa le pele go Mateo 24:​14, e lego go ‘bolela ditaba tše di lokilego tša Mmušo lefaseng ka moka pele bofelo bo e-tla.’ Ngwanabo rena Knorr, bjalo ka mookamedi wa Mokgatlo o ile a bona go nyakega ga lenaneo la go ruta. Nna gotee le ditho tše dingwe tša banna tša lapa la Bethele, re ile ra amogela taletšo ya go ngwadiša “Thutong e Tšwetšego Pele Bodireding bja Pušo ya Legodimo.” Ye mafelelong e ile ya ba Sekolo sa Bodiredi sa Pušo ya Legodimo, seo se thomilego go šoma ka diphuthegong tša Dihlatse tša Jehofa go tloga ka 1943.

Re ile ra kopanela ka phapošing ya lapa la Bethele mantšiboeng a Mošupologo, February 16, 1942, gomme Ngwanabo rena Knorr o ile a nea polelo ya pele ya tayo. Sehlogo sa gagwe se be se re “Mangwalo a Beibele.” Ngwanabo rena T. J. Sullivan e be e le molebeledi wa sekolo gomme o be a re nea keletšo bakeng sa go re thuša gore re kaonefatše. Ge nako e dutše e e-ya ke ile ka newa kabelo ye ya go ba molebeledi wa sekolo wa Bethele, yeo ke bego ke e lebelela e le tokelo e kgolo. Eupja e be e bile e le nako ya tayo.

Ke be ke sola go feta tekano ebile ke hloka tlhompho e swanetšego ge ke eletša ngwanešo o mogolo, ka gona Ngwanabo rena Knorr o ile a mpotša mahlong gore: “Ga go na motho yo a kgahlwago ke go diriša ga gago matla ka mokgwa wo o sa rategego.” Ka morago ga ge a hlalositše ka mo go kwagalago gomme ke kwele tayo, mahlo a magolo a matsotho a Ngwanabo rena Knorr a ile a letefala. Ka lentšu le botho, o ile a mpalela Psalme 141:5: “Anke moloki a nkotle; e tla ba botho; anke a nkgaleme; e tla ba makhura a mabotse kudu, ao a ka se kego a pšhatla hlogo ya-ka.” (King James Version) Ke ile ka diriša temana yeo ka dinako tše dintši ge e be e le boikarabelo bja-ka gore ke nee ba bangwe keletšo ya phošollo.

Pele ga ge Sekolo sa Bodiredi sa Pušo ya Legodimo se thoma, ba sego kae gare ga rena ba ile ba ba le sebaka sa go nea dipolelo tša phatlalatša. Nakong ya ge Ngwanabo rena Rutherford a be a e-hwa, Ngwanabo rena Knorr o ile a šoma ka matla gore a kaonefatše bokgoni bja gagwe bja go bolela. Phapoši ya-ka ya Bethele e be e le ka tlase ga ya gagwe, gomme ke be ke kgona go mo kwa ge a itlwaetša tsela yeo a tlago go neela ka yona polelo. O ile a boa-boetša ka makga a mantši kudu, polelo ya phatlalatša yeo e rego “Khutšo​—Na e ka ba Gona ka mo go sa Felego?” pele a e neela kopanong ya Cleveland ka 1942.

Go Tsena Tseleng

Ka morago ga ge ke hlanketše ka nywaga e 13 Bethele, Ngwanabo rena Knorr o ile a nkabela go hlankela tšhemong ke le molebeledi wa selete. Ge a nnyetlela ka kabelo ya-ka e mpsha o itše: “Lyle, bjale o na le sebaka sa go lemoga di sa tloga fase kamoo Jehofa a dirišanago le batho ba gagwe ka gona.” Ke ile ka thoma modiro wa-ka ke le molebeledi wa mosepedi ka May 15, 1948 ke dutše ke nagana ka se ebile ke swere disutukheise tša-ka tše pedi. Pele ga ge ke thoma modiro wa selete, ke ile ka hlankela ke le molebeledi wa tikologo ka dikgwedi tše sego kae.

Phuthego ya pele yeo ke ilego ka e hlankela e be e le e nyenyane ya magaeng kua Waseca, Minnesota. Ke be ke ngwaletše pele go Dick Cain, mohlanka wa phuthego (ka ge molebeledi yo a okamelago a be a bitšwa bjalo ka nako yeo) gore a tle a nkgahlanetše setimeleng. E be e le mmulamadibogo yo a kgethegilego, gomme o be a sa tšwa go khuduga phapošing ya gagwe yeo e hirilwego bakeng sa go fokotša ditshenyagalelo, e lego moo a bego a dula gona marega, gomme a ya ntlong ya gagwe ya selemo e lego tente. Lega go le bjalo, Minnesota ka May ge e le gabotse ga se nako ya selemo! Bošegong bjoo, ge ke thothomela ka tenteng, ke ile ka ipotšiša ge e ba ke swanelwa gabotse ke tsela e bjalo ya go phela. Ke ile ka swarwa ke mpshikela o šoro woo o ilego wa tšea dibeke tše dintšinyana, eupja ke ile ka fola.

Nywageng yeo ya mathomo ge ke be ke etela diphuthego tše fapanego le ditikologo, ke be ke dula magaeng a banababo rena, ke rwalwa diaparo ka sutukheise. Ke ile ka amogelwa magaeng a mehuta ka moka, go akaretša go robala lebatong la ka khwitšhing, disofeng tša ka phapošing ya bodulo, diphapošing tša marulelong tšeo di se nago moya. ka dinako tše dingwe ke be ke dula magaeng ao setho se sengwe sa lapa se bego se ganetša ditumelo tša rena. Kua Wisconsin monna yo a sa dumelego o ile a ntebelela beke ka moka ge ke dutše ke e-tla ke tloga. Ge a e-tla a tagilwe bošegong bjo bongwe, gomme ke e-kwa a tšhošetša ka gore o tla “thuntšha semang-mang,” ke ile ka phetha ka gore e be e le nako ya go tloga. Eupja diphihlelo tše mpe di be di e-tla ka sewelo gomme di be di fo tswaka kabelo ya-ka. E be e le dilo tšeo di thabišago motho ge a di gopola ka morago.

Ke Hwetša Molekane

Ke gopola gabotse. Kopanong ya tikologo kua Tiffin, Ohio, ke ile ka kopana le kgarebe e botse ya mahlo a matsotho, Leona Ehrman, go tšwa Fort Wayne, Indiana. Le yena o be a godišitšwe ka tumelo ya Bokriste gomme e bile mmulamadibogo yo a botegago ka nywaga e šupago. Go sepela ka mehla ga se gwa feleletša ka lefereo, eupja re ile ra dula re ikopanya ka go ngwalelana. Ke moka ka 1952, ke ile ka kgopela ka gore “Go ka ba bjang?” gomme yena a re “Ke a mašweu!” gomme ra tlema leo. Re ile ra nyalana. Re ile ra botšišwa gantši gore ke ka baka la’ng re sa dule gae le lapa, eupja re re re na le lapa​—banababo rena, dikgaetšedi, bo-tate le bo-mma dileteng tše 44 moo re bego re hlankela gona.​—Mareka 10:​29, 30.

Ba bangwe ba ile ba botšiša gore, ‘Na ga se la ka la ikwa le lapile gomme la ikwa le nyaka go tlogela?’ Ee, ka makga a fetago le tee. Eupja gare ga rena ka bobedi, ge o mongwe a ikwa a tshwenyegile, o mongwe o a mo thekga. Nakong e nngwe ke ile ka ba ka ngwalela ngwanešo, Verne, ke mmotšiša ge e ba go kgonega gore ke šome le yena modirong wa gagwe wa go penta. O ile a bolela gore ke kgale a letetše seo ka gobane re be re le bagwera ba pelo-bohloko ge re gola. Lega go le bjalo, o ile a nkeletša gore ke hlahlobe phetho ya-ka ka kelohloko. Ke moka ke ile ka gopola mantšu ao Ngwanabo rena Knorr a bego a fela a a botša ditho tša lapa la Bethele: “Ga go nyakege boiteko bjo bogolo gore o kgaotše; eupja go nyakega sebete le potego gore o kgomarele kabelo ya gago.” Yeo le yona e be e sa dutše e le keletšo e botse.

Ga go molebeledi wa mosepedi yo a nyetšego yo a bego a ka kgomarela kabelo ya gagwe ka nako e telele ka ntle le mosadi yo a botegago le yo a mo thekgago, bjalo ka ge Leona a bile bjalo go nna. Semelo sa gagwe sa go ba yo borutho le yo lerato le yo a thabilego ka mehla diphuthegong se ile sa dira gore a ratwe ke ba dikete-kete. Le ka mohla ga ke lape go mmotša gore ke mo rata gakaakaang. Ke holofela gore seo se mo thuša gore le yena a kgomarele modirong.

Go Nea Bohlatse Bakeng sa go Tumiša Jehofa

Modiro o mogolo wa molebeledi wa selete o kopanong ya tikologo, moo a hlankelago beke le beke e le modula-setulo, seboledi sa phatlalatša le molebeledi wa sekolo. Tšhegofatšo ya Jehofa thulaganyong ye e bonala therešong ya gore dikopanong tše makgolo-kgolo tša tikologo tšeo ke ilego ka di okamela, ga go le e tee ya tšona yeo e bego e sa swarwe. Ke therešo gore tše dingwe di ile tša šitišwa, eupja ga go le e tee ya tšona yeo e ilego ya se sa swarwa.

Kua Wooster, Ohio, seruthwaneng sa 1950, ge ke be ke rola kopelo ya go phetha ya lenaneo la bošegong bja Mokibelo, sehlopha sa bahlola-mpherefere sa baganetši ba fetago ba sekete se ile sa thomega ka ntle ga holo ya paesekopo moo kopano e bego e swaretšwe gona. Sehlopha sa bahlola-mpherefere se be se tlile le mapokisi a mae a go bola gore se re betše ka ona ge re tloga. Ka gona re ile ra hlahloba boemo gomme ra tšwetša lenaneo pele ka dikopelo, diphihlelo le dipolelo tšeo di lokišeditšwego ka bjako tša Beibele. Dihlatse tše makgolo a 800 di ile tša dula di thekgile ditho e bile di sa fele pelo.

Ka 2:00 a.m, boemo bja legodimo bo be bo tonya kudu. Bahlokomedi ba ile ba ntšha diphaepe tša mollo gomme ba thoma go hlatswa mae ao a bego a wetše ka pele ga tsejana ya ka thoko bjalo ka ge eka ba lokišetša go tšwa. Sehlopha sa bahlola-mpherefere se ile sa bokana gape sa tloga boema-peseng bjo borutho bja kgaufsi. Eupja mogato woo o ilego wa gatwa ke bahlokomedi e be e le go fapoša tlhokomelo ya bahlola-mpherefere, gomme re ile ra ntšha batheetši ka setu ka mojako wa ka morago. Ka moka ga bona ba ile ba fihla dikoloing tša bona ba bolokegile. Tšhitišo e nngwe ya sehlopha sa bahlola-mpherefere e ile ya direga go e nngwe ya dikopano tša Ohio, kua Canton, Defiance le Chillicothe. Eupja bošoro bja sehlopha sa bahlola-mpherefere bo be bo thoma go fokotšega ganyenyane-ganyenyane, ka ge dikahlolo tša Kgoro e Phagamego ya Tsheko ya U.S. tšeo di bego di re thekga di ile tša thoma go šoma go bao ba hlokago molao.

Ge nako e dutše e e-ya mathata a tša maphelo a ile a dira gore go nyakege phetogo. Ka gona, magareng ga bo-1970, Mokgatlo ka botho o ile wa nkabela gore ke dire ke le molebeledi wa tikologo lefelong la ka borwa la California moo diphuthego di lego kgaufsi le kgaufsi le moo mafelo a tša kalafo a hwetšagalago gabonolo. Gaešita lege mediro ya molebeledi wa selete e akaretša go sepela kudu le go hlokomela le go okamela ditikologo tše dintši, mediro ya molebeledi wa tikologo e akaretša go rulaganya dikopano tša tikologo le go aba le go lokišeletša dikarolo tša lenaneo. Go oketša moo, Dikolo tša Tirelo tša Babulamadibogo di swanetše go rulaganywa di be di hlankelwe. Ka gona modiro wa balebeledi ba basepedi, e ka ba ba selete goba ba tikologo ke tsela ya bophelo ya nako e tletšego e putsago.

Ke sa Dutše ke Letetše Letšatši la Jehofa ka Tetelo-Kgolo

Go ya ka tšeo ke di gopolago tša go tloga bjaneng nywageng e lego ka godimo ga e 70 e fetilego, ka mehla ke ile ka kwa go nyakega ga go akgofa. Ka mehla ke be ke dutše ke nagana ka Haramagedone e le letšatšing le le hlatlamago la ka moswane. (Kutollo 16:​14, 16) Go swana le tate le rakgolo, ke ile ka phela bophelo bja-ka bjalo ka ge moapostola a kgothaleditše gore ‘letelang le go phafogela go tla ga letšatši la Morena.’ Ka mehla ke ile ka lebelela lefase le lefsa leo le holofeditšwego e le ‘selo sa kgonthe gaešita lege se sa bonwe.’​—2 Petro 3:​11, 12; Ba-Hebere 11:1.

Tebelelo ye yeo e ilego ya nweletšwa ka go nna go tloga bjaneng e tla phethega kgaufsinyane. “Namaxadi le tau-thsadi di tlo fula xotee,” “tau e fula bya’ng bo-ka kxomo,” gomme “di xapye ke mošemanyana.” (Jesaya 11:6-9) Dikholofetšo tše bjalo tše di ruthetšago pelo di kgonthišeditšwe ke mantšu ao Jesu a a boditšego Johane go Kutollo 21:5: “E a dutšexo sedulong sa boxoši a re: “Šidio; dilô tšohle ke di dira tše mphsa​—Nna a ntaêla a re: Ngwala, xobane ’taba tšé ké tša xo rereša le xo bôtêxa.”