Ke Bjang Jesu Kriste e Bego e le Moporofeta wa go Swana le Moše?

JEHOFA MODIMO ga a aketše. (Tito 1:2; Ba-Hebere 6:18) Ka baka leo, diporofeto tša Lentšu la Gagwe, Beibele, di a botega e bile ke tša therešo. Di tla phethagala e le ka kgonthe.

Bjo bongwe bja diporofeto tše tšeo di buduletšwego ke Modimo ke bjoo moporofeta wa mo-Hebere Moše a bo ngwadilego mabapi le Mesia. Moše ge a tsopola Jehofa, o itše: “Ke tlo ba tsošetša [ba-Isiraele] Moporofeta e a tšwaxo mo xo bana babô e a swanaxo le wêna [Moše], ka bea mantšu a- ka molomong wa xaxwe, xore a ba botšê tše ke tl’o xo mo laêla tšôna.”​— Doiteronomio 18:​17, 18.

Moapostola Petro o dirišitše boporofeta bjo go Jesu Kriste ge a be a bolela gore: “Mošê ó boletše le bô-tata-wešo, a re: Morêna Modimo wa lena ó tlo Le tsošetša Moporofeta e a swanaxo le nna e a tšwaxo mo xare xa lena le xo bana beno; Yêna-eo Le mo theetšeng ditabeng ka mo-ka tše a tl’o xo Le botša tšôna.” (Ditiro 3:22) Ge e le gabotse, Jesu ka noši o ile a bolela gore: “Xe Le ka be Le dumêla Mošê, le Nna Le ka be Le ntumêla, xobane Mošê ó mpoletše ka mangwalô a xaxwe.” (Johane 5:46) Moše le Jesu ba be ba swana ka ditsela dife?

Ba a Swana Mathomong a Mediro ya Bona

Bobedi Moše le Jesu ba ile ba phonyokga polao ya bana ba banyenyane kudu ba batona. Moše o ile a fihlwa gare ga mahlaka-noka maribeng a Noka ya Nile e sa le lesea gomme ka go rialo a phonyokga polao ya masea a ba batona a ba-Isiraele yeo e bego e laetšwe ke Farao wa Egipita. Jesu ge e be e sa le lesea le yena o ile a phonyokga polao ya ba batona ba nywaga ya go fihla go e mebedi kua Betlehema le dileteng tša yona. Polao ye e be e laetšwe ke Kgoši Herode o Mogolo, yoo ka go swana le Farao e bego e le lenaba la Modimo le batho ba Gagwe.​— Ekisodo 1:22–2:10; Mateo 2:​13-18.

Moya wa boleta o ile wa bontšhwa ke bobedi Moše le Jesu. Gaešita lege a be a godišitšwe e le morwa lapeng la kgoši e matla ya Egipita, Moše o ile a fetoga “monna yo bolêta ruri xo fetiša batho ka moka ba lefase.” (Numeri 12: 3) Ka mo go swanago, Jesu e be e le kgošana e matla Mikaele kua legodimong eupja ka boikokobetšo o ile a tla lefaseng. (Daniele 10:13; Ba-Filipi 2:​5-8) Go feta moo, Jesu o be a kwela batho bohloko gomme o be a ka re: “Le ithwešê yoko ya-ka, Le rutwê ke Nna; xobane ke yo boló le wa pelo e kokobetšexo; ’me Le tlo hwetša khutšô ya meôya ya lena.”​— Mateo 11:29; 14: 14.

Ka baka la tirelo ya Jehofa, bobedi Moše le Jesu ba ile ba tlogela maemo a phagamego le mahumo a magolo. Moše o ile a tlogela lehumo le maemo a hlomphegago kua Egipita e le gore a direle Jehofa le batho ba Gagwe. (Ba-Hebere 11:​24-26) Ka mo go swanago, Jesu o ile a tlogela maemo a rategago kudu le mahumo kua legodimong e le gore a tle a direle Modimo le batho ba Gagwe mo lefaseng.​— 2 Ba-Korinthe 8: 9.

Moše gotee le Jesu ba ile ba fetoga batlotšwa ba Modimo. Moporofeta Moše o ile a hlankela e le motlotšwa wa Jehofa setšhabeng sa Isiraele. Go bjalo ka ge moapostola Paulo a boletše gore Moše ‘o ile a bona go nyatšwa ka baka la [go ba motlotšwa] wa Kriste e le lehumo le le phalago matsaka a Egipita.’ (Ba-Hebere 11:26; Ekisodo 3:1–4:17) Jesu o bile neng Kriste goba Motlotšwa? Se se diregile nakong ya ge a be a tlotšwa ka moya o mokgethwa wa Modimo goba matla a šomago, ka morago ga go kolobetšwa. Jesu o ile a hlatsela gore e be e le yena Mesia goba Kriste go mosadi wa Mosamaria sedibeng sa Jakobo kua Sikara le pele ga moperisita o mogolo ge a be a sekišwa.​— Mareka 14:​61, 62; Johane 4:​25, 26.

Bobedi Moše le Jesu ba ile ba ikona ka matšatši a 40. Mathomong a modiro wa gagwe e le mmoleledi wa Modimo, Moše o ile a ikona ka matšatši a 40 ge a be a le thabeng ya Sinai. (Ekisodo 34:28) Jesu o ile a ikona ka matšatši a 40 a le lešokeng gomme a široga moleko wa Sathane mathomong a modiro wa gagwe e le Mesia yo a holofeditšwego.​— Mateo 4:​1-11.

Banna ba ka Bobedi ba Ile ba Tumiša Jehofa

Jehofa o ile a diriša bobedi Moše le Jesu bakeng sa go godiša leina la Gagwe le lekgethwa. Modimo o ile a botša Moše gore a ye go ba-Isiraele leineng la ‘Jehofa Modimo wa bo-tatago bona.’ (Ekisodo 3:​13-16) Moše o ile a emela Modimo pele ga Farao, e lego yoo a ilego a dirwa gore a dule a le gona e le gore matla a Jehofa a tle a bonagatšwe gomme leina la Gagwe le tsebatšwe lefaseng ka moka. (Ekisodo 9:16) Jesu ka mo go swanago o ile a tla ka leina la Jehofa. Ka mohlala, Kriste o itše: “Nna ke tlile Leineng la Tate; ’me lena xa Le nkamoxele.” (Johane 5:43) Jesu o ile a tumiša Tatagwe, a tsebatša leina la Jehofa go batho bao Modimo a mo neilego bona, gomme a dira gore le tume mo lefaseng.​— Johane 17:​4, 6, 26.

Ka matla a Modimo, Moše le Jesu ka bobedi ba ile ba dira mehlolo yeo e ilego ya tumiša Modimo. Moše o ile a dira mehlolo bakeng sa go bontšha gore o be a romilwe ke Jehofa Modimo. (Ekisodo 4:​1-31) Modirong wa gagwe ka moka, Moše yoo a ilego a dirišwa ke Modimo go arola Lewatle le Lekhubedu, o ile a tšwela pele a dira mehlolo yeo e ilego ya tumiša Jehofa. (Ekisodo 5:1–12:36; 14:​21-31; 16:​11-18; 17:​5-7; Psalme 78:​12-54) Ka mo go swanago, Jesu o ile a tliša tumišo go Modimo ka go dira mehlolo e mentši. Ke ka lebaka leo Jesu a bego a ka bolela gore: “Ntumeleng xe ke re: Ke mo xo Tate, Tate ó xo Nna. Xe Le sa kxône, xôna Le ntumêlê ka xo bôna yôna medirô.” (Johane 14:11) O mongwe wa mehlolo ya gagwe e bile wa go homotša ledimo le matla gomme Lewatle la Galilea la homola.​— Mareka 4:​35-41; Luka 7:​18-23.

Dilo tše Dingwe tša Bohlokwa Tšeo ba Swanago ka Tšona

Moše gotee le Jesu ka bobedi ba be ba tswalanywa le tokišetšo ya mohlolo ya dijo. Moše e be e le moporofeta wa Modimo nakong ya ge ba-Isiraele ba be ba fepja ka mohlolo. (Ekisodo 16:​11-36) Ka mo go swanago, ka makga a mabedi a pego ya Beibele, Jesu o ile a fepa mašaba ka dijo tša kgonthe.​— Mateo 14:​14-21; 15:​32-38.

Manna a tšwago legodimong a be a tswalanywa le tirelo ya Moše gotee le ya Jesu. Moše o be a etelela ba-Isiraele pele nakong ya ge ba be ba fepja ka manna a tšwago legodimong. (Ekisodo 16:​11-27; Numeri 11:​4-9; Psalme 78:25) Ka tsela e swanago eupja e le ya bohlokwa kudu, Jesu o ile a neela nama ya gagwe ka noši e le manna a tšwago legodimong bakeng sa bophelo bja batho ba kwago.​— Johane 6:​48-51.

Bobedi Moše le Jesu ba ile ba ntšha batho bokgobeng gomme ba ba iša tokologong. Moše o ile a dirišwa ke Modimo go ntšha ba-Isiraele bokgobeng bja ba-Egipita a ba iša tokologong e le batho ba Gagwe. (Ekisodo 12:​37-42) Ka mo go swanago, Jesu Kriste o be a dutše a lebiša balatedi ba gagwe tokologong. Kriste o sa dutše a tlile go lokolla batho bokgobeng bja phuthego ya Sathane Diabolo, gotee le bja sebe le lehu.​— 1 Ba-Korinthe 15:​24-26; Ba-Kolose 1:13; 1 Johane 5:19.

Moše le Jesu ka bobedi ba ile ba ba baboleledi ba dikgwerano. Moše e be e le mmoleledi wa kgwerano ya Molao, magareng ga Jehofa Modimo le ba-Isiraele. (Ekisodo 19:​3-9) Jesu ke Mmoleledi wa kgwerano e mpsha, magareng ga Modimo le Isiraele ya moya.​— Jeremia 31:​31-34; Luka 22:20; Ba-Hebere 8:​6-13.

Kahlolo e ile ya gafelwa go bobedi Moše le Jesu Kriste. Moše o be a dira e le moahlodi le monei wa molao go Isiraele ya nama. (Ekisodo 18:13; Maleaki 4: 4) Jesu o dira e le Moahlodi gomme o neile ‘Isiraele ya Modimo’ ya moya melao le ditaelo tša yona.’ (Ba-Galatia 6:16; Johane 15:10) Kriste ka noši o itše: “Tate xa a sekiše motho, kahlolô ka moka ó e xafetše Morwa, xore bohle ba boifê Morwa, byalo ka xe ba boifa Tate. E a sa boifexo Morwa, xa a boife Tate e a mo romilexo.”​— Johane 5:​22, 23.

Bobedi Moše le Jesu ba ile ba gafelwa bohlogo godimo ga ntlo ya Modimo. Moše e be le yo a botegago bjalo ka hlogo ya ntlo ya Modimo Isiraeleng ya bogologolo. (Numeri 12: 7) Ka mo go swanago, Jesu o ile a dirwa Hlogo ya ntlo ya moya ya barwa ba Jehofa gomme e bile yo a botegago godimo ga yona. Ka kgonthe, Jesu “E a botexetšexo E a mmeilexo, bo-ka Mošê xe a mmôtexetše lapeng la xaxwe ka moka. Xe e le Kriste ó swanetšwe ke borêna byo bo fetaxo bya Mošê, xobane mothei wa lapa ó swanetšwe ke xo retwa xo fetiša ba lapeng. . . . Byale Moše ó botexetše Modimo lapeng leo la xaxwe ka moka è le mohlanka wa xo hlatsêla tše di bexo di tlo bolwa; Kriste Yêna ó botexetše Modimo è le Morwa wa xo buša lapa la xaxwe ’me lapa la xaxwe ké bô-rena xe re tiiša mafolofolo, xe re kxanthša kholofêlô xo fihla bofelong.”​— Ba-Hebere 3:​2-6.

Gaešita le lehung, Moše le Jesu ba be ba swana. Go bjalo bjang? Ee, Jehofa o ile a tloša setopo sa Moše, gomme ka go rialo a dira gore ba se se goboše goba ba se dira modimo wa seswantšho. (Doiteronomio 34:​5, 6; Juda 9) Ka mo go swanago, Modimo o ile a tloša setopo sa Jesu, gomme a se lese gore se bole gomme ka go rialo a thibela gore se se ke sa šitiša tumelo.​— Psalme 16:10; Ditiro 2:​29-31; 1 Ba-Korinthe 15: 50.

Ela Boporofeta Hloko

Tše ke tše dingwe tša ditsela tšeo ka tšona Jesu Kriste a ipontšhitšego e le moporofeta yo a swanago le Moše. Mantšu a Modimo go Moše mabapi le go tla ga moporofeta yoo a ile a phethega gabotse gakaakang!

Ga go pelaelo gore Jehofa o phethagaditše kholofetšo ya gagwe ya boporofeta ya go tsoša moporofeta wa go swana le Moše. Mantšu a Doiteronomio 18:​18 a ile a phethega bophelong le diphihlelong tša Jesu Kriste. Phethagalo e bjalo e re nea lebaka la go ba le kholofelo dikarolong tše dingwe tša boporofeta tša Lentšu la Modimo. Ka baka leo, ka mehla anke re eleng hloko boporofeta bja Beibele.