Ke Bomang Bao ba Tlago go Phologa “Lebaka la Ditlaišêxô”?
“Ba tl’o xo phološwa ké ba rapêlaxo ’ina la Morêna.”—JOELE 2:32.
1. Go ya ka Daniele le Maleaki, ke’ng seo se hlaolago bao ba lego lelokelelong la go hwetša phologo ‘lebakeng la ditlaišego’?
ALEBELETŠE pele mehleng ya rena, moporofeta Daniele o ile a ngwala gore: “E tlo ba e le lebaka la ditlaišêxô ye xo sešoxo xwa ka xo e-ba e byalo xo tloxa mola batho ba baxo xôna, xo fihla mehleng yeno. Mehleng yeo sethšabeng sa xeno xo tlo phološwa bao ba hwetšwaxo ba ngwadilwe pukung.” (Daniele 12:1) Ke mantšu a kgothatšago e le ka kgonthe! Batho ba amogelegago ba Jehofa ba tla gopolwa ke yena, go fo etša ge Maleaki 3:16 gape e bolela: “Ba-šia-Modimo, xe bôná ba boledišana, Morêna ó a theetša, ó a di kwa; ’me ba ba mmoifaxo ba ngwaletšwe puku ya kxopotšô pel’a xaxwe, ya ba sa lebalexo ’ina l’axwe.”
2. Ke’ng seo se bakwago ke go nagana ka leina la Jehofa?
2 Go nagana ka leina la Jehofa go lebiša tsebong e nepagetšego ka yena, Kriste wa gagwe le merero ya gagwe ka moka e megolo ya Mmušo. Ka baka leo, batho ba gagwe ba ithuta go mo lebelela ka tlhompho, go ba tswalanong ya boineelo ya kgaufsi kudu le yena, le go mo rata ‘ka pelo ya bona ka moka, le ka tlhaloganyo ya bona ka moka, le ka matla a bona ka moka.’ (Mareka 12:33; Kutollo 4:11) Jehofa o dirile tokišetšo e botho ka sehlabelo sa Jesu Kriste, bakeng sa gore baikokobetši ba lefase ba hwetše bophelo bjo bo sa felego. Ka gona, ba ba ka boeletša ka kgodišego mantšu a madira a legodimong ao a ilego a reta Modimo nakong ya go belegwa ga Jesu, a re: “Tumišô a e yê xo Modimo maxodimo-dimong; lefaseng xo bê le khutšô, kxahlišô bathong.”—Luka 2:14.
3. Pele khutšo e ka tla lefaseng le, ke tiro efe ya Jehofa yeo e swanetšego go direga?
3 Khutšo yeo e batametše kudu go feta kamoo batho ba bantši ba naganago ka gona. Eupja pele go swanetše go phethwe kahlolo ya Jehofa lefaseng le le gobogilego. Moporofeta wa gagwe Tsefanya o re: “Le kxaufsi, ’tšatši le lexolo la Morêna! Le kxaufsi! Le tla ka lebelô le lexolo!” Letšatši leo ke la mohuta mang? Boporofeta bo tšwela pele: “Kwang! Ké letšatši la Morêna, leo le moxale a tl’o xo lla o bohloko ka lôna. ’Tšatši leo e tlo ba letšatši la kxalefô, ’tšatši la tlalêlô le la pitlaxanô, ’tšatši la xo senyêxêlwa le la xo šwalalanywa, ’tšatši la maru, la maru a maso, ’tšatši la mollô wa diphalafala le mekxoši, le xo hulwa metse ya merakô, le dibô dithabeng. Batho ke tlo ba tlaletša, ba tlo apa-apa wa difofu, e le ka xore ba sentše ba lahla Morêna.”—Tsefanya 1:14-17; bona gape le Habakuku 2:3; 3:1-6, 16-19.
4. Ke bomang lehono bao ba arabelago taletšong ya go tseba le go hlankela Modimo?
4 Ka mo go thabišago, ba dimilione lehono ba arabela taletšong ya go tlo tseba le go direla Modimo. Go porofetilwe mabapi le Bakriste ba tloditšwego bao ba tsenego kgweranong e mpsha gore: “Ka moka xa bôná ba tlo ntseba, ba ba nyenyane le ba baxolo. Ó r’yalo Morêna.” (Jeremia 31:34) Ba ba eteletše pele modiro wa mehleng yeno wa go nea bohlatse. Le gona, mo nakong ye ge ba bantši ba mašaledi a tloditšwego ba fetša tsela ya bona ya lefaseng, “lešaba le lexolo” la “dinku tše dingwê” le tšweletše bakeng sa go ‘hlankela Modimo mosegare le bošego’ thulaganyong ya gagwe e swanago le tempele. (Kutollo 7:9, 15; Johane 10:16) Na o yo mongwe yo a nago le tokelo ye e sa lekanywego?
Kamoo “Matsaka” a Tlago ka Gona
5, 6. Pele ditšhaba ka moka di šišinywa gore di fedišwe, ke modiro ofe wa go phološa wo o dirwago?
5 Bjale anke re yeng go Hagai 2:7, moo Jehofa a porofetago mabapi le ngwako wa gagwe wa moya wa borapedi. O re: “Dithšaba ka moka ke tlo di šišinya, xwa tseb’o tla matsaka a dithšaba ka moka; ’me Ntlo yé ke tlo e tlatša letaxô.” Diporofeto tša Beibele di bontšha gore ‘go šišinywa moo ga ditšhaba’ go šupa go go phetha ga Jehofa kahlolo godimo ga ditšhaba. (Nahume 1:5, 6; Kutollo 6:12-17) Ka baka leo mogato wa Jehofa wo o porofetilwego go Hagai 2:7 o tla fihla seremong ka go šišinywa ga ditšhaba gore di se sa hlwa di e-ba gona—tša fedišwa. Eupja go thwe’ng ka “matsaka a dithšaba ka moka”? Na ba swanetše go letela tšhišinyo yeo ya mafelelo e senyago gore e be yona e ba tlišago ka gare? Le gatee.
6 Joele 2:32 e bolela gore “ba tl’o xo phološwa ké ba rapêlaxo ’ina la Morêna; ’me bopholoxêlô e tlo ba thaba ya Tsione le motse wa Jerusalêma ka mokxwa wo Morêna a o boletšexo. Mo xo ba ba phološwaxo xo tlo ba ba tl’o xo bitšwa ke Morêna.” Jehofa o a ba ntšha, gomme ba bitša leina la gagwe ka tumelo sehlabelong sa Jesu pele ga tšhišinyego ya makgaola-kgang ya masetla-pelo a magolo. (Bapiša le Johane 6:44; Ditiro 2:38, 39.) Ka mo go thabišago, lešaba le legolo leo le lego bohlokwa, leo mo nakong ye le fihlago ka godimo ga dimilione tše nne ka palo, ‘le tla’ ngwakong wa Jehofa wa borapedi le letetše go ‘šišinya ga gagwe ditšhaba ka moka’ ka Haramagedone.—Kutollo 7:9, 10, 14.
7. Ke’ng seo se akaretšwago tabeng ‘ya go bitša leina la Jehofa’?
7 Baphologi ba ba bitša bjang leina la Jehofa? Jakobo 4:8 e re bontšha kamoo ba dirago se ka gona, e re: “Batamêlang Modimo, le Yêna a Le batamêlê. Hlapang diatla, lena Ba-dira-dibe! Hlapišang dipelo, lena ba pelo-pedi.” Go fo swana le mašaledi a tloditšwego ao a eteletšego pele, bao ba holofelago go ba ba lešaba le legolo la baphologi ba Haramagedone ba swanetše go gata mogato ka go tia. Ge e ba o holofela go tlo phologa, gona o swanetše go nwa wa go kgodiša Lentšung le le sekišago la Jehofa gomme o diriše ditekanyetšo tša gagwe tša go loka bophelong bja gago. O swanetše go ba yo a ikemišeditšego ka mo go feletšego go neeleng bophelo bja gago go Jehofa le go bontšha se ka kolobetšo ya meetse. Go bitša ga gago Jehofa ka tumelo gape go akaretša go nea bohlatse ka yena. Ka baka leo, Paulo go Ba-Roma kgaolo 10, ditemana 9 le 10, o ngwala gore: “Xe O ipolêla [phatlalatša, NW] ka molomo wa re: Jesu ké Yêna Morêna! wa r’yalo Ò dumêla ka pelo xore Modimo ó mo tsošitše bahung, xôna O tlo phološwa, xobane motho ó dumêla ka pelo a tseb’o lokafala; ó ipolêla [phatlalatša, NW] ka molomo a tseb’o phološwa.” Ke moka go temana 13, moapostola o tsopola boporofeta bja Joele, a gatelela gore “ba xo tlo phološwa ké ba ba bitšaxo ’ina la Morêna.”
‘Tsomang, Tsomang, Tsomang’
8. (a) Go ya ka moporofeta Tsefanya, ke’ng seo Jehofa a se nyakago bakeng sa phološo? (b) Ke temošo efe yeo lentšu “mohlomongwê” go Tsefanya 2:3 e e tšweletšago go rena?
8 Ge re phetla puku ya Beibele ya Tsefanya kgaolo 2, ditemana 2 le 3, re bala seo Jehofa a se nyakago bakeng sa phologo: “Le dirê byalo . . . Lè sešo la fihlêlwa ke boxale bo tukaxo bya Morêna, Lè sešo la fihlêlwa ke letšatši la kxalefô ya Morêna. Nyakang Morêna, lena babôtla bohle ba lefase, lena Le yaxo ka molaô w’axwe. Tsomang tokô, Le tsomê boikokobetšô; mohlomongwê Le ka efošwa mohla woo wa boxale bya Morêna.” Ela hloko lentšu “mohlomongwê.” Ga se taba ya gore ge feela o phološitšwe, ke moka o phološitšwe ka mehla. Go šireletšega ga rena letšatšing leo go ithekgile ka go tšwela pele ga rena re dira dilo tšeo tše tharo. Re swanetše go tsoma Jehofa, re tsome go loka gomme re tsome boikokobetšo.
9. Bao ba tsomago boikokobetšo ba putswa bjang?
9 Ka kgonthe, moputso wa go tsoma boikokobetšo ke o kgahlišago kudu! Go Psalme 37, ditemana 9 go ya go 11 (PK), re a bala: “Ba ba holofetšego Jehofa ba tlo tšea naga ya ba kabelo ya bona. Go šetše go se go kae gomme e mobe a ka se ke a hlwa a e ba gona . . . Eupja [baikokobetši, NW] ba tlo tšea naga ya ba kabelo ya bona, ba tlo ithabela khutšong e kgolo.” Go thwe’ng ka go tsoma go loka? Temana 29 e re: “Baloki e ba beng ba naxa, ba dula mo xo yôna ka mehla le ka mehla.” Ge e le ka go tsoma Jehofa, ditemana 39 le 40 di a re botša: “Thlakodišô ya baloki e tšwa xo Morêna, Yêna sebô sa bôná mohla wa tlalêlô. Morêna ó a ba thuša, ó a ba namolêla; ó ba namolêla diatleng tša babe; ó ba phološa xobane ba khuta ka Yêna.”
10. Ke bomang bao e bilego ba lemogegago go ganeng ga bona go tsoma Jehofa le go tsoma boikokobetšo?
10 Dihlotswana tša bodumedi tša Bojakane di paletšwe ke go tsoma Jehofa. Baruti ba bona ba bile ba nyatša leina la gagwe le bohlokwa, ka boikgogomošo ba le tloša diphetolelong tša bona tša Beibele. Ba kgetha go rapela Morena goba Modimo yo a se nago leina le go hlompha ka tsela ya borapedi Boraro botee bja boheitene. Go feta moo, Bojakane ga bo tsome go loka. Bontši bja bakgomaredi ba bjona ba amogela goba go thekga mekgwa ya go phela ya go itlogelela. Go e na le go tsoma boikokobetšo go etša ge Jesu a dirile, ba itira bo-mponeng, ka mohlala thelebišeneng, ba bontšha tsela ya go phela ya matsaka gomme gantši e le ya boitshwaro bjo bo gobogilego. Baruti ba inontšha ka go hula mehlape ya bona. Go ya ka mantšu a Jakobo 5:5, “[ba] ipheletše lefaseng ka mabose le ka maiphsinô.” Ge letšatši la Jehofa le dutše le batamela, ba tla hwetša e le ka kgonthe gore mantšu a a buduletšwego a šoma go bona: “Mahumô xa’ phediše mohla wa boxale.”—Diema 11:4.
11. Motho wa go hloka molao ke mang, gomme o ikgobelela bjang molato o mogolo kudu wa madi?
11 Lekgolong la pele la nywaga C.E., ge moapostola Paulo a be a laodiša lengwalong la gagwe la bobedi leo le yago go ba-Thesalonika, Bakriste ba bangwe ba ile ba tšhoga, ba nagana gore letšatši la Jehofa le be le ba fihletše ka yona nako yeo. Eupja Paulo o ile a lemoša gore go be go swanetše gore go tšwelele bohlanogi bjo bogolo pele, gomme “motho wa go hloka molao” (NW) o be a swanetše go utollwa. (2 Ba-Thesalonika 2:1-3) Bjale, lekgolong le la bo-20 la nywaga, re ka kgona go lemoga tekanyo e kgolo ya bohlanogi bjoo le kamoo baruti ba Bojakane e lego ba hlokago molao ka gona mahlong a Modimo. Mehleng ye ya bofelo ga e sa le go tloga ka 1914, baruti ba ikgobeletše molato o mogolo wa madi ka go thekga go ‘fetolwa ga megoma ditšhoša.’ (Joele 3:10) Le gona ba ile ba tšwela pele ba ruta dithuto tša maaka, go swana le go se hwe ga moya wa motho mo e lego leabela, pakatori, tlhokofatšo ya mollong wa dihele, kolobetšo ya masea, Boraro botee, le dilo tše swanago le tšeo. Ba tla ema kae ge Jehofa a phetha kahlolo ya gagwe? Diema 19:5 (PK) e re: “E a batago maaka a ka se ke a phonyokga.”
12. (a) “Maxodimo” le “lefase” tša batho tšeo kgaufsinyane di tlago go fedišwa ke’ng? (b) Re ithuta’ng go tšwa go tshenyo e tlago ya lefase le le kgopo?
12 Go 2 Petro 3:10, re a bala: “ ’Tšatši leo la Morêna le tlo tla bo-ka lehodu le-tla-bošexo; xomme ka lôna maxodimo a tlo široxa ka lešata la modumô o moxolo; xomme tše lefase le bopilwexo ka tšôna di tlo fedišwa ke mollô, xwa tlo fsa xwa fêlêla lefase le medirô ka moka e lexo mo xo lôna.” Dipušo tše di gobogilego tšeo di khupeditšego batho ka mo go feletšego bjalo ka magodimo, gotee le dilo tšeo di bopago lekoko la batho la lehono leo le senyegilego, di tla fedišwa lefaseng la Modimo. Batšweletši le barekiši ba dibetša tša letšatši la phedišo, bahlalefetši, batho ba bodumedi ba boikaketši le baruti ba bona, bakgothaletši ba kgobogo, bošoro le bosenyi—ba ka moka ba tlo nyamelela. Ba tlo tološwa ke bogale bja Jehofa. Eupja go ditemana 11 le 12, Petro o oketša ka temošo ye go Bakriste: “Byalo xe dilô tše e le tša xo tlo xašanywa, xo swanetše ruri-ruri xe Le le ba xo swara ka tsela e kxêthwa ya borapedi, Lè le ba xo letêla le xo phafoxêla xo tla xa letšatši leo la Modimo.”
Mikaele o Gata Mogato!
13, 14. Molwedi o mogolo wa bogoši bja Jehofa ke mang, gomme o šomile bjang ga e sa le go tloga ka 1914?
13 Ke bjang motho lege e le mang a tlago go phologa “lebaka la ditlaišêxô” la Jehofa? Moemedi wa Modimo wa go nea phologo ke Mikaele morongwa o mogolo, yoo leina la gagwe le bolelago gore “Ke Mang yo a Swanago le Modimo?” Ka gona, ka mo go swanetšego ke Yena yo a godišago pušo ya Jehofa, yo a phagamišago Jehofa e le yena Modimo a nnoši wa therešo le Morena yo a swanetšego yo e lego Mmuši wa legohle ka moka.
14 Ke ditiragalo tše di kgahlišago gakaakang tšeo Kutollo kgaolo 12, ditemana 7 go ya go 17 e di hlalosago mabapi le ‘letšatši la Morena’ ga e sa le go tloga ka 1914! (Kutollo 1:10) Mikaele morongwa o mogolo o lahlela Sathane wa mohlanogi fase lefaseng go tšwa legodimong. Ka morago, bjalo ka ge go hlalositšwe go Kutollo kgaolo 19, ditemana 11 go ya go 16, yo a bitšwago “Mmotexi, Morereši,” “[o] fôtla bofôtlelong bya morara wa boxale bya Modimo le wa kxalefô ya Modimo Ra-matla-ohle.” Mohlabani yo yo matla wa legodimong o bitšwa “Kxoši ya maxoši, Morêna wa marêna.” Mafelelong, Kutollo kgaolo 20, ditemana 1 le 2, e re botša ka morongwa yo a lahlelago Sathane sekoting gomme a mo tswalelela moo nywaga e sekete. Go molaleng gore mangwalo a ka moka a bolela ka Molwedi o tee wa bogoši bja Jehofa, e lego Morena Jesu Kriste, yoo Jehofa a mmeilego sedulong sa gagwe se se tagilego sa bogoši sa legodimong ka 1914.
15. Mikaele o tla tloga a “ema” ka tsela efe e kgethegilego?
15 Mikaele o be a dutše ‘a eme,’ go etša ge go bolelwa go Daniele 12:1 (NW), bakeng sa batho ba Jehofa ga e sa le go tloga ge a beilwe bjalo ka Kgoši ka 1914. Eupja kapejana Mikaele o tla “ema” ka tsela e kgethegilego kudu—e le Moemedi wa Jehofa go tlošeng bokgopo ka moka lefaseng le go ema bjalo ka Mophološi wa lekoko la lefase ka moka la batho ba Modimo. Kamoo ‘lebaka leo la ditlaišego’ e tlago go ba le lešoro ka gona go bontšhwa ke mantšu a Jesu go Mateo 24:21, 22: “Ma-setla-pelo a mohla woo e tlo ba a maxolo, a a sešoxo a bônwa xo tloxa mola lefase lè thôma xo ba xôna, a a ka se kexo a ba xôna le ka mohla o mongwê. Xomme xe mehla yeo e ka be e sa fokotšwe, xo ka be xo sa pholoxe motho. Fêla, a tlo fokotšwa ka ’baka la bakxêthwa.”
16. Ke batho bafe bao ba tlago go phološwa nakong ya masetla-pelo a magolo?
16 Re ka ba ba thabago gakaakang go tseba gore batho ba bangwe ba tla phološwa ka nako yeo! Aowa, e sego go swana le ba-Juda ba marabele bao ba ilego ba rakelelwa Jerusalema ka 70 C.E., bao ba bangwe ba bona ba ilego ba tšewa ba išwa Roma e le makgoba. Go e na le moo, bao ba phologago “lebaka la bofêlô” ba tla ba bjalo ka phuthego ya Bokriste yeo e bego e šetše e tšhabile Jerusalema ge thakelelo ya mafelelo e thoma. E tla ba batho ba Modimo ka noši, dimilione tša lešaba le legolo gotee le batlotšwa lege e le bafe bao mo gongwe ba tla bago ba sa dutše ba le mo lefaseng. (Daniele 12:4) Lešaba le legolo le tšwa “tlaišexong e kxolo.” Ka baka la’ng? Ka gobane “ba hlatswitše mašela a bôná ba a taxafatša mading a Kwana.” Ba bontšha tumelo matleng a lopollago a madi a tšholotšwego a Jesu gomme ba bontšha tumelo yeo ka go direla Modimo ka potego. Gaešita le mo nakong ye, Jehofa, “Yêna a dutšexo sedulong sa boxoši,” o phurolla tente ya gagwe e šireletšago godimo ga bona, mola Kwana, Kriste Jesu a ba diša le go ba iša didibeng tša meetse a bophelo.—Kutollo 7:14, 15.
17. Lešaba le legolo ka mo go kgethegilego le kgothaletšwa bjang go gata mogato e le gore le tle le šireletšwe nakong ya letšatši le le tlago la tlalelo?
17 Ge ba tsoma Jehofa, go loka le boikokobetšo, ba dimilione ba lešaba le legolo le ka mohla ga se ba swanela go tlogela lerato la bona la pele la go rata therešo le fola! Ge e ba o le o mongwe wa batho ba bao ba swanago le dinku, ke’ng seo o swanetšego go se dira? Go etša ge go boletšwe go Ba-Kolose kgaolo 3, ditemana 5 go ya go 14, o swanetše ‘go apola ka mo go feletšego motho wa kgale le ditiro tša gagwe.’ Ge o tsoma thušo ya Modimo, katanela go ‘apara motho o mofsa, yo a theilwego tsebong e nepagetšego.’ Ka boikokobetšo, aga gomme o kgomarele phišego ya gago go tumišeng Jehofa le go tsebatšeng merero ya gagwe e megolo go ba bangwe. Ka go rialo, mo gongwe o ka šireletšwa ‘lebakeng la ditlaišego,’ e lego letšatši ‘la bogale bjo bo tukago bja Jehofa.’
18, 19. Ke ka tsela efe kgotlelelo e fetogilego ya bohlokwa bakeng sa phološo?
18 Letšatši leo le kgaufsi! Le tla ka lebelo le legolo. Go kgoboketšwa ga batho ba lešaba le legolo go be go dutše go tšwela pele ga bjale ka nywaga e ka bago e 57. Bontši bja ba ba šetše ba hwile gomme ba letetše tsogo ya bona. Eupja re kgonthišetšwa ke boporofeta bja Kutollo gore lešaba le legolo e le sehlopha le tla phologa masetla-pelong a magolo e le motheo wa lekoko la “lefase le lefsa.” (Kutollo 21:1) Na o tla ba gona moo? Seo se a kgonega, ka gobane Jesu o re go Mateo 24:13: “E a tl’o xo tiišetša xo fihla bofelong, ké yêna a tl’o xo phološwa.”
19 Dikgateletšo tšeo batho ba Jehofa ba kopanago le tšona tshepedišong ye ya kgale ya dilo, mo gongwe di ka tšwela pele di gola. Le gona ge masetla-pelo a magolo a nago le kgateletšo a e-tla, mo gongwe o ka welwa ke mathata. Eupja e-ba kgaufsi le Jehofa le phuthego ya gagwe. Dula o phafogile! “Byalo-xê dulang Lè ntebeletše,—ó r’yalo Morêna,—xo bê xo tlê ’tšatši le ke tl’o xo tsoxa ka lôna kè le hlatše; ka xobane ké wôna moahlolêlô wa-ka: Ke phutha dithšaba, ke botha mebušô, ka e thšêla ka kxalefo ya-ka, ka tuka boxale sa ruri, è le mollô wa sehutla wa xo thšuma ’fase lohle.”—Tsefanya 3:8.
20. Ge “lebaka la ditlaišêxô” ya makgaola-kgang le dutše le batamela, ke’ng seo re swanetšego go se dira?
20 Bakeng sa go šireletšega ga rena le kgothatšo, Jehofa ka botho o neile batho ba gagwe ‘leleme le le sekilego,’ leo le akaretša molaetša o mobotse wa Mmušo wa gagwe o tlago, “e le gore ka moka ga bona ba bitše leina la Jehofa, e le gore ba mo direle ba bapelane ka magetla.” (Tsefanya 3:9, NW) Ge “lebaka la ditlaišêxô” ya makgaola-kgang e batamela kudu ka lebelo le legolo, eka re ka hlankela ka phišego, re thuša batho ba bangwe bao ba ikokobeditšego go ‘bitša leina la Jehofa’ bakeng sa phološo.
Na o a Gopola?
◻ Ke tiro efe ya Jehofa yeo e tlago go tla pele ga ge a tliša khutšo lefaseng?
◻ Go ya ka Joele, ke’ng seo motho a swanetšego go se dira gore a phološwe?
◻ Go ya ka Tsefanya, ke bjang batho ba ikokobeditšego mo gongwe ba ka hwetšago tšhireletšo bogaleng bjo bo tukago bja Jehofa?
◻ “Motho wa go hloka molao” ke mang, gomme o ikgobeletše bjang molato wa madi?
◻ Kgotlelelo e bohlokwa gakaka’ng tabeng ya phološo?