Jehofa na ke Motho yo o mo Tsebago Feela Goba ke Mogwera wa Gago?

“JOHN, na nka go tsebiša mogwera wa-ka? Yo ke​—tshwarelo, fale o itše leina o mang?”

Na o kile wa kwa mohuta woo wa poledišano ya bošaedi? E nea mohlala wa kamoo batho ba bangwe ba dirišago lentšu “mogwera” ka phošo. Ge e le gabotse ba fo ba ba e-ra “yo ba mo tsebago feela” goba mabakeng a mangwe e bile ba sa šupe seo. Go tseba feela Mna. Mogale wa ka mošola wa setarata ke taba e nngwe; go ba mogwera wa gagwe e tloga e le taba e nngwe.

Pukuntšu e nngwe e hlalosa “motho yo o mo tsebago feela” e le “motho yo o ilego wa kopana le yena eupja e se yo o nago le tlemagano e tiilego le yena.” E šupa “go tlwaelana ganyenyane, go ba kgaufsi le kgaufsi ganyenyane, go kopana ganyenyane, go kganyogela dilo tše botse ganyenyane go e na le MOGWERA.”

Go se be gona mo ga tlemagano e tiilego magareng ga batho go thuša go hlalosa lebaka leo ka lona re sa šetšego kudu seo se diragalelago batho bao re ba tsebago feela, mola ka lerato re tsenelela maphelong a bagwera ba rena. Re abelana lethabo la bona le manyami a bona ka go dumelela gore a re kgwathe go fihla pelong. Ke therešo gore re swanetše go hlokomela gore ga re dumele go kgomega maikwelo go re dira gore ka phošo re tsenelele ditabeng tša bona tše e lego diphiri.​—1 Petro 4:15.

Go ba le tlemagano e tiilego le bagwera ba rena gape go hlalosa lebaka leo ka lona ka tlhago re lekago go ba kgahliša. Ge e ba motho yo re mo tsebago feela a hwetša boitshwaro bja rena bo sa kgahliše goba e se bjo bo swanetšego, go se kgahlege ga gagwe go bonala go ka se re dire gore re fetoge. Eupja mogwera ruri a ka ba le tutuetšo e matla, go sa šetšwe gore ke ditabeng tša moaparo, boitshwarong go ba tshekamelong ya go nagana.

Ge e le ka go holofela, maikwelo a borutho, tlhompho le potego, segwera se nyaka boemo bjo bo phagamego bja boikarabelo go feta seo se dirwago ke go fo tseba motho. Yo a kgopelago go gwerana go se na boikarabelo bjo a nyakago go bo rwala, ge e le gabotse o fo nyaka go fo tseba motho, e sego go ba mogwera. Bagwera ba thabela go phetha boikarabelo bjo bo akaretšwago tlemaganong e tiilego ya batho ka go lemoga gore se se ba nea sebaka sa go hlatsela segwera sa bona.

Go Gwerana le Modimo

Bjalo ka Mmopi, Jehofa ke Tate wa legodimong wa batho gomme o swanetšwe ke go ratwa le go hlompšha. Eupja o nyaka gore batho ba dire se ka baka la tswalano e tiilego ya bona ka noši le yena, e sego feela ka baka la go ikwa ba swanetše go dira bjalo. (Mateo 22:​37) Le gona, o nyaka gore ba mo rate bjalo ka Mogwera. (Psalme 18:1) Ka ge ‘a re ratile pele,’ yena ka noši o beile motheo o phethagetšego wa segwera se se bjalo.​—1 Johane 4:19.

Batswadi ba rena ba pele, Adama le Efa, ba be ba fo tseba Jehofa. Potšišo e bile gore: Na ba be ba tla amogela mpho ya segwera? Se se nyamišago ke gore ga se ba e amogela. Go phegelela ga bona ka boithati go ipuša ka ntle le Modimo go be go bolela gore go be go se na tswalano e tiilego magareng ga bona le yena. Ka go ikemišetša ga bona go amogela ditšhegofatšo tše a bego a di nea, ba be ba se ba ikemišetša go phetha boikarabelo bja bona. Go be go le bjalo ka ge eka ba rata go thabela boiketlo le tšhireletšego ya legae la bona le le thabišago la Paradeise ka ntle le go ikemišetša go lefelela rente.

Ka moka ga rena, lege ba bangwe e le ka tekanyo e kgolwanyane, re abetše moya wo wa go hloka tebogo le wa boipušo. (Genesi 8:21) Ka mohlala, bafsa ba bangwe ba dumeletše kganyogo ya bona ya tlhago ya boipušo e ba dira gore ba se leboge batswadi ba bona. Se se bakile go phumega ga segwera sa bohlokwa se se bego se swanetše go ba gona magareng ga bona le batswadi ba bona bophelong ka moka. Lega go le bjalo, lege se e le se se nyamišago, go phumega ga segwera sa rena le Tate wa rena wa legodimong ke mo go lego šoro kudu. Ge e le gabotse go ka iša lehung!

Dinyakwa tša Segwera

Ka ntle le potego ga go na tswalano e dulago nako e telele, go sa šetšwe gore e dirwa le batho goba le Modimo. Mopatriareka Aborahama o ile a kwešiša se, ka gona ke ka baka leo a ilego a bonagatša leboelela go bota Modimo e le ka kgonthe. Bala Genesi 12:​1-5 le 22:​1-18, gomme o bone mehlala e mebedi e mogolo ya go bota ga gagwe Jehofa. Ee, “Aborahama a dumela Modimo, gomme a balelwa fao ya ba go loka.” Ke ka baka leo ‘a ilego a bitšwa mogwera wa Modimo’​—Jakobo 2:23, PK.

Senyakwa se sengwe sa go gwerana le Modimo ke go phetha boikarabelo bjo bo akaretšwago ke segwera se. Ka baka la boemo bja rena bja tlase ge bo bapišwa le bja Jehofa, ke mo go kwalago gore boikarabelo bjo bo swanetše go ba bjo bogolo kudu go feta bjo bo swanetšego go ba gona segwereng sa batho. Bo feta go nyaka ga rena go mo kgahliša dilong tše dingwe tšeo re bego re ka kgahliša mogwera wa motho ka tšona. Bo akaretša go nyaka ga rena go mo kgahliša dilong tšohle. Jesu, Morwa wa Modimo le mogwera wa gagwe wa kgaufsi-ufsi, o bontšhitše se ge a be a bolela ka Jehofa gore: “Ke dira se se mo kxahlaxo.”​—Johane 8:29.

Ka gona, go gwerana le Jehofa goba le Morwa wa gagwe ga go hwetšagale motheong wa go se nyake go rwala boikarabelo; go ithekgile ka go dumelelana le dinyakwa tša segwera tšeo ba di beilego. (Bona Psalme 15:​1-5.) Jesu o bontšhitše se gabotse poledišanong ya gagwe le barutiwa ba gagwe. O ile a ba botša gore: “Lena Le baxwêra ba-ka, xe Le dira tše ke Le laêlaxo tšôna.”​—Johane 15:14.

Senyakwa se sengwe sa segwera ke poledišano e bulegilego le yeo e lebantšhago. Jesu, letšatšing la lehu la gagwe o boditše baapostola ba gagwe ba botegago gore: “Xa ke re Le bahlanka; xobane mohlanka xa a tsebe se mong wa xaxwe a se diraxo. Lena, ke re Le baxwêra, ka xobane ke Le boditše tšohle tše ke di kwilexo xo Tate.” (Johane 15:15) Ka go abelana le bagwera ba gagwe dikgopolo tša gagwe, Jesu o be a latela mohlala wa Tatagwe wa legodimong, yo Amosi 3:​7 e rego ka yena: “Morêna Mong ’a bohle a ka se kê a dira selô, baboni bahlanka ba xaxwe à sešo a ba botša thopa y’axwe.”

Na se ga se selo sa tlhago gare ga bagwera? Mo gongwe re ka ikwa re sa gapeletšege go abelana diphihlelo tša rena le Mna. Mogale wa ka mošola ga setarata. Le gona, ruri re ka se rate go mmotša tša ka pelong le kamoo re ikwago ka gona. Ke ka gobane re fo ba re mo tseba feela. Eupja ge e le ka bagwera gona ga re kgone go dula ka ditaba tše di bjalo re sa ba botše tšona!

Go a swana le segwereng sa rena le Modimo. Re ka se dika-dike go mmatamela ka thapelo, re utolla dinyakwa tša rena, tšeo re di kganyogago, le ka mo re ikwago ka gona. Ke therešo gore ge e ba poledišano e le ka lehlakoreng le tee, go se go ye kae segwera se a hwa. Ka gona re swanetše go ikemišetša go dumelela Modimo a bolela le rena. Se re se dira ka go theetša ka kelohloko Lentšu la gagwe le le ngwadilwego, re naganišiša ka keletšo ya gagwe, gomme ka morago re e diriša kaone kudu kamoo re ka kgonago ka gona.

Segwera sa Jehofa se Bohlokwa Gakaaka’ng go Wena?

Go go thuša gore o arabe potšišo ye, nagana ka segwera sa mohuta o kgethegilego sa batho. Ge e ba o le mofsa, mohlomongwe o kganyoga go ba le segwera se se ka lebišago lenyalong. Ee, o a lemoga gore go tseba feela motho yo o nyakago gore e be molekane ga se motheo o swanetšego wa lenyalo. Go tsebana feela go swanetše go fetolwe segwera. Bjale segwera ke gona se ka godišwago le go hlangwa gore e be tswalano ya kgaufsi yeo e tlago go feleletša e le motheo o mobotse wa lenyalo le le thabilego.

Bjale, nagana. Ke maiteko a makaaka’ng ao batho ba bantši ba a dirago go godiša mohuta o bjalo wa segwera? Ke nako e kaaka’ng le tšhelete tšeo ba di dirišago ba thea segwera se le go se boloka ka morago? Ba diriša nako e kaaka’ng ba nagana ka sona? Ke go fihla bokgoleng bofe ba dirago dithulaganyo​—goba go bontšha boikemišetšo bja go fetola dithulaganyo—​ka morero wa go kaonefatša le go boloka tswalano ye?

Bjale ipotšiše: ‘Se se fapana bjang le maiteko a-ka a go godiša segwera sa-ka le Mmopi wa-ka goba go se kaonefatša le go se tiiša? Ke diriša nako e kaaka’ng ke dira bjalo? Ke go fihla bokgoleng bofe moo ke dulago ke nagana ka segwera sa-ka le Jehofa? Ke go fihla bokgoleng bofe moo ke dirago dithulaganyo​—go ba ke bontšhago maikemišetšo a go fetola dithulaganyo​—ka morero wa go kaonefatša gomme ka morago ka boloka tswalano ye?’

Bafsa ba Bakriste ba swanetše go ba le temogo e tletšego ya gore segwera ka moka sa batho, go akaretša le seo se feleletšago ka lenyalo, se tla ka morago ga segwera se ba swanetšego go ba le sona le Mmopi wa bona ka bohlokwa. Ke ka baka leo go Mmoledi 12:1 ba opeletšwago ka gore: “Xopola Mmopi wa xaxo Ò sa le yo mofsa.” Ba bantši ba dira se ka go šoma phatlalatša e le badiredi ba Modimo, moo palo yeo e dutšego e oketšega ya bona e lego ya baboledi ba nako e tletšego goba babulamadibogo.

Go sa šetšwe go gola ga lenyatšo le boila-Modimo tšeo di ba dikologilego, ba ba lwela Jehofa ka sebete ge ba e-kwa ka dithogako le melato ya maaka tšeo a pharwago ka tšona. Na se ga se seo Jehofa ka tshwanelo a swanetšego go se lebelela go bagwera ba gagwe? Na se ga se seo le rena re bego re tla se letela ka bagwera ba rena? Le gona, na go be go ka se thabiše dipelo tša rena ge re thoma go tseba gore bagwera ba rena ba dira se ka mafolofolo le ka kgodišego?​—Bapiša le Diema 27:11.

Ee, go gwerana le Modimo​—go fo etša go gwerana le batho—​go tliša boikarabelo bjo bo swanetšego go rwalwa ge e ba segwera se tla dula se le gona. Motho yo a sego a ikemišetša go rwala boikarabelo bjo, goba a sego a itokišetša go dira boineelo go Modimo gomme ka morago a bo phethagatša, mo gongwe ka kgonthe a ka ba a tseba Jehofa feela. Lega go le bjalo, o sa dutše a ka latswa lethabo la gore Modimo e be Mogwera wa gagwe.

[Seswantšho go letlakala 25]

Aborahama o be a bota Modimo, ka baka leo o ile a bitšwa mogwera wa Jehofa