Diphetolelo tša Beibele tša Se-Afrika

Diphetolelo tša pele-pele tša Beibele ka botlalo tše di fetoletšwego malemeng a se-Afrika di ile tša dirwa kua Egipita. Tšeo di tsebjago e le diphetolelo tša se-Copt, go dumelwa gore ke tša lekgolong la boraro goba la bone la nywaga C.E. Mo e ka bago nywaga-kgolo e meraro ka morago, Beibele e ile ya fetolelwa ka se-Ethiopia.

Maleme a makgolo ao a bego a sa ngwalege ao a bego a bolelwa ka borwa bja Ethiopia le Sahara a ile a swanelwa ke go ema go fihla ge go e-tla baromiwa lekgolong la bo-19 la nywaga. Ka 1857 go ile gwa fihlelelwa kgatelo pele e kgolo ge Robert Moffat a be a phetha phetolelo ya Beibele ka Setswana, e lego leleme la ka borwa bja Afrika. O ile a ba a gatiša dikarolo tša yona ka motšhene wa kgatišo wa go dirišwa ka diatla. Yona e be e le Beibele ya pele e feletšego Afrika gomme gape e le phetolelo e feletšego e fetoletšwego ka leleme la se-Afrika leo pele le bego le sa ngwalwe. Se se kgahlišago ke gore Moffat o dirišitše leina la Modimo Yehova ka phetolelong ya gagwe. Ka phetolelong ya 1872 yeo e gatišitšwego ke British and Foreign Bible Society, leina Yehova le dirišwa dipolelong tša motheo tšeo di boletšwego ke Jesu tšeo di ngwadilwego go Mateo 4:​10 le Mareka 12:​29, 30.

Ka 1990 Beibele ka moka ga yona e be e fetoletšwe malemeng a 119 a se-Afrika, le ka dikarolo tša yona ka maleme a mangwe a 434.