Ke Bomang Bao ba Tswetšwego Lefsa?
NA BATHO ka moka ba ba lokilego ba ya legodimong? Batho ba bantši ba nagana bjalo, eupja Jesu Kriste o be a sa dumele seo. Ge a be a bolela le mmuši wa mo-Juda Nikodemo yo a ilego a tla go yena ka sephiring bošego, Jesu o itše: “Xa xo e a kilexo a rotoxêla lexodimong.”—Johane 3:13.
Lega go le bjalo, Jesu o ile a bontšha Nikodemo gore go be go tla tla nako yeo ka yona batho ba bangwe ba bego ba tla ba le sebaka sa go tsena Mmušong wa legodimo. Mabapi le bona Jesu o itše: “Xe motho a sa tswalwe ka meetse le ka Môya, a ka se kê a tsêna mmušong wa Modimo. Sa xo tswalwa ke nama ké nama sa xo tswalwa ke Môya ké môya. O se kxotse xe ke Xo botša ke re: Le swanetše xo tswalwa lefsa.” Eupja Nikodemo o ile a makatšwa ke gore motho a ka tswalwa lefsa bjang.—Johane 3:1-9.
Mohlomongwe le wena gape o ipotšiša gore Jesu o be a e-ra go re’ng. Na mantšu a gagwe a a šoma go batho ba bantši bao ba ipolelago gore ba tletšwe ke tshokologo ya ka pela bao ba dumelago gore ba tladitšwe ka moya o mokgethwa wa Modimo?
Maikwelo le Monagano
Ba bangwe ba bolela gore tabeng ya go hlatha ge e ba motho a tswetšwe lefsa, sa bohlokwa ke go kwa matla a moya. Lega go le bjalo, dipelo tša rena le menagano ya rena di ka re fapoša, kudu-kudu ge e ba di tutuetšwa ke maikwelo a matla.—Jeremia 17:9.
William Sargant yo e lego monyakišiši wa ditla-morago tša maikwelo ao a lego monaganong o bontšha go nyakega “ga gore re itiše malebana le ditumelo tšeo di hwetšwago maemong a ge maikwelo a tsogile ge bjoko bja rena bo tla be bo re lahletša.” Go ya ka Sargant, mohlala o mongwe ke ditla-morago tša thero ya tsošološo le go tšhošetšwa ka kotlo ya mollo wa dihele. Ke mang yo a bego a ka se nyake go tswalwa lefsa gore a ye legodimong ge e le gore go sego bjalo o tla hlokofatšwa ka mo go sa felego? Sargant o bolela gore ka tlase ga kgateletšo ye bjalo ya maikwelo “tlhaloganyo e tlošwa madulong, bjoko bo šarakana ka nakwana, gomme dikgopolo tše mpsha le ditumelo di amogelwa ka ntle le kgonthišo.”—The Mind Possessed.
Ka gona ge, motho a ka tseba bjang ge e ba go dumela taba ya go tswalwa lefsa go ile gwa “amogelwa ka ntle le kgonthišo”? Tsela ya bohlale bja kgonthe ke go hlahlwa ke selo se sengwe le se sengwe seo moya o mokgethwa wa Modimo o dirilego gore bangwadi ba Beibele ba se ngwale. Bakriste ba kgothaletšwa go rapela Modimo ‘ka matla a bona a go nagana’ gomme ba swanetše go kgonthiša gore seo ba se dumelago ke therešo.—Ba-Roma 12:1, 2, NW; 1 Ba-Thesalonika 5:21.
Go tswalwa lefsa go nea motho e nngwe ya ditokelo tše bohlokwa kudu-kudu tšeo batho ba kilego ba di newa. Se se tswalana le mogato o mogolo e le ka kgonthe go phethagatšweng ga morero wa Modimo. Le ge tše ka moka e le therešo, go rotoga dipotšišo tša go swana le tše: Ke bomang bao ba tswetšwego lefsa? Se se direga bjang? Ke ditebelelo dife tšeo di beilwego pele ga batho ba bjalo? Le gona, na ke bona feela bao ba tlago go phološwa?
[Seswantšho go letlakala 3]
Nikodemo o ile a makatšwa ke gore motho a ka tswalwa lefsa bjang