Dišang Mohlape wa Modimo ka go Rata

‘Dišang mohlape wa Modimo wo le nago nawo, le se dire ka go gapeletšwa, eupja e be ka go rata.’—1 PETRO 5:2.

1. Ke ka baka la’ng re swanetše go letela gore bagolo ba Bakriste ba ‘diše mohlape wa Modimo ka go rata’?

JEHOFA o diša batho ba gagwe ka go rata. (Psalme 23:1-4) “Modiši yo boló,” Jesu Kriste o ile a gafa ka go rata bophelo bja gagwe bjo bo phethagetšego bja motho bakeng sa batho ba swanago le dinku. (Johane 10:11-15) Ka gona, moapostola Petro o kgothaleditše bagolo ba Bakriste go ‘diša mohlape wa Modimo ka go rata.’—1 Petro 5:2.

2. Ke dipotšišo dife tše di swanetšego go elwa hloko mabapi le mediro ya bodiši ya bagolo ba Bakriste?

² Go rata ke seka sa bahlanka ba Modimo. (Psalme 110:3) Eupja go nyakega se se fetago go rata ga monna wa Mokriste gore a kgethwe e le mogolo goba modiši wa ka tlase. Ke bomang ba swanelegelago go ba badiši ba bjalo? Bodiši bja bona bo akaretša’ng? Bo dirwa bjang ka tsela e kaone?

Go Okamela Lapa

3. Ke ka baka la’ng go ka bolelwa gore tsela ye monna wa Mokriste a hlokomelago lapa la gagwe ka yona e kgoma taba ya ge e ba a swanelega go ba modiši ka phuthegong?

³ Pele ga ge monna a ka kgethelwa ‘modiro wa bolebeledi,’ o swanetše go fihlelela dinyakwa tša Mangwalo. (1 Timotheo 3:1-7; Tito 1:5-9) Ka mohlala, moapostola Paulo o boletše gore molebeledi e swanetše go ba “e a bušaxo [okamelago, NW] ba lapeng la xabô [gagwe, NW] xabotse, e bê mo-laola-bana-ka-bokwala.” Go na le lebaka le lebotse bakeng sa se, ka gobane Paulo o itše: “Xe motho a sa tsebe xo laola [okamela, NW] ba lapeng la xabô, ó tlo kxôna bya’ng xo babalêla phuthêxô ya Modimo?” (1 Timotheo 3:4, 5) Tito ge a be a kgetha bagolo diphuthegong tša sehlakahlakeng sa Kereta, o ile a botšwa gore a tsome “batho ba ba se naxo bosodi, monna e bê wa mosadi o tee, e a naxo le bana ba ba dumetšexo, e sexo ba xo tsebya [ka] bohlôla le xo se kwe.” (Tito 1:6) Ee, tsela ye monna wa Mokriste a hlokomelago lapa la gagwe ka yona e swanetše go elwa hloko ge go dirwa phetho ya ge e ba a swanelega go rwala boikarabelo bjo boima bja go diša phuthego.

4. Batswadi ba Bakriste ba bontšha bjang gore ba rata malapa a bona, go oketša go go ba le thuto ya ka mehla ya Beibele?

⁴ Banna bao ba okamelago malapa a bona ka mokgwa o mobotse ba dira se se fetago go rapela le go ithuta Beibele le malapa a bona ka mehla. Ka mehla ba dula ba loketše go thuša baratiwa ba bona. Go bao e bago batswadi, se se thoma letšatšing leo ngwana a belegwago ka lona. Batswadi ba Bakriste ba tseba gore ge feela ba kgomarela e le ka kgonthe tsela ya Modimo, e-ba mo ngwana wa bona a tlago go swanelega thulaganyong ya mediro ya Bokriste ka bjako bophelong bja letšatši le letšatši. Mokgwa o mobotse wo tate wa Mokriste a okamelago ka wona maemong a o bonagala ditshwanelegong tša gagwe bjalo ka mogolo.—Ba-Efeso 5:15, 16; Ba-Filipi 3:16.

5. Tate wa Mokriste a ka godiša bjang bana ba gagwe “ka xo ba ruta le xo ba eletša tša Morêna”?

⁵ Tate wa Mokriste yo a elago hloko ge a okamela lapa la gagwe, o kwa keletšo ya Paulo ya gore: “Le se kê la befediša bana ba lena; sa lena a e bê xo ba etetša ka xo ba ruta le xo ba eletša [tlhahlo ya monagano, NW] tša Morêna.” (Ba-Efeso 6:4) Go ithuta Beibele ka mehla le lapa, e lego mosadi gotee le bana go bula dibaka tša thuto e lerato. Ka gona bana ba amogela ‘tayo’ goba thuto yeo e ba phošollago. “Tlhahlo ya monagano” yeo e newago ka nako yeo e thuša ngwana o mongwe le o mongwe gore a tsebe kamoo Jehofa a bonago ditaba ka gona. (Doiteronomio 4:9; 6:6, 7; Diema 3:11; 22:6) Boemong bjo bo hunologilego bja pokano ye ya moya, tate yo a lego šedi o theetša ka kelohloko ge bana ba gagwe ba bolela. Go dirišwa dipotšišo tše botho tše di hlahlago bakeng sa go fata dipolelo tše di botegago tše tšwago go bona tše di lego mabapi le dikgopolo le maikwelo a bona. Tate ga a tšee gore o tseba dilo tšohle tše di lego menaganong ya bona bjalo ka bana. Ka kgonthe, Diema 18:13 e bolela gore “mo-fetola-lentšu à sešo a kwišiša, ó tlo dira tša bošilo tša mo iša dihlonyeng.” Lehono, batswadi ba bantši ba hwetša gore maemo ao bana ba bona ba lebanago le ona a fapane kudu le ao bona ka noši ba ilego ba lebana le ona ge e be e le ba banyenyane. Ka gona, tate o tla katanela go tseba setlogo le ditaba ka botlalo tša bothata pele ga ge a ka bolela kamoo bo swanetšego go swarwa ka gona.—Bapiša le Jakobo 1:19.

6. Ke ka baka la’ng tate wa Mokriste a swanetše go diriša Lentšu la Modimo ge a thuša lapa la gagwe?

⁶ Go direga’ng ka morago ga ge mathata, dipelaelo le maikwelo a bana ba gago a tsebja? Tate yo a okamelago ka mokgwa o mobotse o ya Mangwalong ao a ‘rutago, a kgodišago, a sokollago le go iša tokong.’ O ruta bana ba gagwe kamoo ba ka dirišago melao ya motheo ya Beibele e buduletšwego ka gona. Ka tsela ye, bao e lego ba banyenyane ka nywaga e ba ba ‘bolo ka botlalo, ba kgonišwa go dira mediro e botse ka moka.’—2 Timotheo 3:16, 17; Psalme 78:1-4.

7. Bo-tate ba Bakriste ba swanetše go bea mohlala ofe mabapi le thapelo?

⁷ Bafsa ba ba boifago Modimo ba lebana le maemo a thata mabapi le dithaka tša bona tša lefase tšeo di tsenago sekolo le bona. Ka gona, bo-tate ba Bakriste ba ka okobatša bjang poifo ya bana ba bona? Tsela e nngwe ke ka go rapela ka mehla le bona le go ba rapelela. Ge bafsa ba ba lebana le maemo a thata, ruri ba tla ekiša go ithekga ga batswadi ba bona ka Modimo. Ngwanenyana o mongwe wa nywaga e 13 yo go ilego gwa boledišanwa le yena pele ga ge a ka kolobetšwa e le go bontšha boineelo bja gagwe go Modimo, o boletše gore o ile a kwerwa le go nyatšwa ke bao a bego a tsena sekolo le bona. Ge a be a lwela tumelo ya gagwe e theilwego Beibeleng tabeng ya kgethego ya madi, banenyana ba bangwe ba ile ba mmetha le go mo tshwela ka mare. (Ditiro 15:28, 29) Na o ile a itefeletša? Aowa. O boletše gore: “Ke ile ka dula ke rapela Jehofa gore a nthuše gore ke ikhomolele. Le gona ke ile ka gopola seo batswadi ba-ka ba nthutilego sona thutong ya rena ya lapa mabapi le go nyakega ga gore re dule re itshwera ge re lebana le bobe.”—2 Timotheo 2:24.

8. Mogolo yo a se nago bana a ka okamela bjang lapa la gagwe ka mokgwa o mobotse?

⁸ Mogolo yo a se nago bana le yena a ka dira ditokišetšo tše di swanetšego tša moya le tša nama bakeng sa bao ba lego lapeng la gagwe. Se se akaretša molekane wa gagwe wa lenyalo mohlomongwe le metswalo ya Bakriste ye e ithekgilego ka yena yeo e dulago legaeng la gagwe. (1 Timotheo 5:8) Go okamela ka mokgwa o bjalo o mobotse ke se sengwe sa dinyakwa tšeo di swanetšego go fihlelelwa ke monna yo a kgethetšwego go rwala boikarabelo e le mogolo wa phuthego. Ka gona, bagolo ba ba kgethilwego ba swanetše go lebelela bjang boikarabelo bja bona bjo bo kgethegilego ka phuthegong?

Okamela “ka Phišêxô”

9. Bagolo ba Bakriste ba swanetše go ba le kgopolo efe ka dikabelo tša bona tša tirelo?

⁹ Lekgolong la pele la nywaga la Mehla e Tlwaetšwego ya rena, moapostola Paulo o ile a dira e le molaki ngwakong wa Modimo, e lego phuthego ya Bokriste tlase ga bohlogo bja Kriste. (Ba-Efeso 3:2, 7; 4:15) Paulo ka morago o ile a eletša badumedi-gotee le yena ba Roma gore: “Re ba ba filwexo dineô tše di sa swanexo; di ya ka kxauxêlô ye re e neilwexo. Xe e le boboledi, a bo yê ka xo amana le tumêlô; xe e le bodiredi, e bê xo dirêla ba bangwê; xe e le moruti, a yê ka yôna thutô. Xe e le moeletši, a tiišê xôna xo eletša; wa xo nthša dimphô a dirê à se na bomenetša; e a laolaxo [okamelago, NW] a dirê ka phišêxô; moxauxedi a dirê à thabile.”—Ba-Roma 12:6-8.

10. Paulo o beetše bagolo mohlala ofe lehono, ka go hlokomela mohlape wa Modimo?

¹⁰ Paulo o ile a gopotša ba-Thesalonika gore: “Re be re etša tata xo bana xe a eletša bana ba xaxwe. Ra Le eletša, ra le tsoša, ra Le kxothatša, xore Le tšeê ka tsela ye e loketšexo Modimo e a re biletšaxo mmušong wa xaxwe le letaxong.” (1 Ba-Thesalonika 1:1; 2:11, 12) Keletšo e be e neilwe ka tsela e bonolo le e lerato mo Paulo a bego a ka ngwala gore: “Se re bexo rè na nasô’ rè le makxatheng a lena ké bonôlô bya mmaxo bana xe a amuša ngwana wa xaxwe. Ka thloloxêlô e kaakaa re be re re re Le neê tšohle, e sexo Ebangedi yeo ya Modimo fêla, re bê re re re Le neê le bophelô bya rena; xobane Lè le baratiwa ba rena.” (1 Ba-Thesalonika 2:7, 8) Ka go dumelelana le mohlala wa Paulo wa go ba tate, bagolo ba botegago ba kgomega kudu ka bohle ba lego ka phuthegong.

11. Bagolo ba ba kgethilwego ba ka bontšha bjang phišego?

¹¹ Boleta gotee le phišego di swanetše go hlaola bolebeledi bjo lerato bjo badiši ba rena ba botegago ba Bakriste ba bo bontšhago. Mokgwa wa bona o bolela mo gogolo. Petro o eletša bagolo gore ba diše mohlape wa Modimo e sego “ka xo xapeletšwa” goba “ka xo ipabalêla.” (1 Petro 5:2) Ntlheng ye, morutegi William Barclay o boletše taba e lemošago ka go ngwala gore: “Go na le tsela ya go amogela boemo bja taolo le ya go nea tirelo bjalo ka ge eka ke modiro o thata le wo o sa thabišego, bjalo ka ge eka ke o lapišago le bjalo ka ge eka ke morwalo o swanetšego go hloiwa. Go tloga go kgonega gore motho a kgopelwe go dira selo se sengwe, le gore a se dire, eupja a se dira ka tsela e sa rategego mo e lego gore modiro ka moka o a senyega. . . . Eupja [Petro] o re Mokriste o mongwe le o mongwe o swanetše go fišegela e le ka kgonthe go nea tirelo yeo kamoo a ka kgonago ka gona, gaešita lege a lemoga ka mo go tletšego kamoo a sa swanelegego ka gona gore a ka e dira.”

Badiši ba Ratago

12. Bagolo ba Bakriste ba ka bontšha bjang go rata?

¹² Le gona Petro o kgothatša ka gore, “Dišang mohlape wa Modimo wo le naxo nawô; . . . ka xo ithapa.” Molebeledi wa Mokriste yo a hlokomelago dinku o dira bjalo ka go rata, ka go ikgethela ga gagwe a hlahlwa ke Modiši yo Bolo, Jesu Kriste. Go dira ka go rata le gona go bolela gore modiši wa Mokriste o ikokobeletša taolo ya Jehofa, ‘modiši le mohlapetši wa meoya ya rena.’ (1 Petro 2:25) Modiši wa ka tlase wa Mokriste o hlompha thulaganyo ya pušo ya Modimo ka go rata. O dira bjalo ge a hlahla bao ba tsomago keletšo ya Lentšu la Modimo, Beibele. Gaešita lege phihlelo e tla thuša mogolo gore a itlhame ka keletšo e theilwego Beibeleng, se ga se bolele gore o tla dula a e-na le tharollo ya Mangwalo bothateng bjo bongwe le bjo bongwe. Gaešita lege a tseba karabo ya potšišo, fela o tla hwetša e le bohlale gore yena le mmotšiši ba phetle Watch Tower Publications Index goba ditlhatlamano tše dingwe tše di swanago. Ka gona o ruta ka ditsela tše pedi: O bontšha kamoo go ka hwetšwago tsebišo e holago ka gona le go bontšha tlhompho ka boikokobetšo go Jehofa ka go lebiša tlhokomelo go seo phuthego ya Modimo e se gatišitšego.

13. Ke megato efe yeo e ka gatwago go thuša bagolo go nea keletšo e kwagalago?

¹³ Mogolo a ka dira’ng ge e ba go se na seo se gatišitšwego ka dipukung tša Mokgatlo seo se bolelago ka bothata bjo ba swaraganego le bjona? Ka ntle le pelaelo, o tla rapelela bohlale gomme a nyakišiša melao e mengwe ya motheo ya Beibele yeo e šomago tabeng yeo. Mo gongwe a ka hwetša e le mo go holago go šišinya gore motho yo a tsomago thušo a ele hloko mohlala wa Jesu. Mogolo mo gongwe a ka botšiša: “Ge e ba Jesu, Morutiši o Mogolo a be a le boemong bja gago, o nagana gore o be a tla dira’ng?” (1 Ba-Korinthe 2:16) Kakanyo e bjalo e ka thuša mmotšiši gore a dire phetho e bohlale. Eupja e tla ba bošilo gakaakang go mogolo go nea fela kgopolo ya gagwe e le bjalo ka ge eka ke keletšo e kwagalago ya Mangwalo! Go e na le moo, bagolo ba ka boledišana ka mathata a boima. Ba ka ba ba tšweletša ditaba tša bohlokwa gore go boledišanwe ka tšona sebokeng sa sehlopha sa bagolo. (Diema 11:14) Diphetho tše di fihlelelwago di tla dira gore ka moka ga bona ba bolele ka go dumelelana.—1 Ba-Korinthe 1:10.

Boleta bo a Nyakega

14, 15. Ke’ng seo se nyakegago go bagolo ge ba lokiša Mokriste yo a ‘gatago mogato o fošagetšego pele ga ge a ka o lemoga’?

¹⁴ Mogolo wa Mokriste o swanetše go bontšha boleta ge a ruta ba bangwe, kudu-kudu ge a ba eletša. Paulo o eletša ka gore, “Bana bešo, gaešita lege motho a ka gata mogato o fošagetšego pele ga ge a ka o lemoga, lena bao le nago le ditshwanelego tša moya le leke go lokiša motho yo bjalo ka moya wa boleta.” (Ba-Galatia 6:1, NW) Ka mo go kgahlišago, lentšu la Segerika le le fetoletšwego mo e le “go lokiša” le tswalana le lentšu la tša go bua leo le dirišwago bakeng go hlalosa go lokišwa ga lerapo, e le gore go phengwe bogole bja go ya go ile. Mongwadi wa pukuntšu W. E. Vine o bapiša lentšu le le go tsošološa mo go dirwago “ke bao e lego ba moya go motho yo a wetšego phošong, motho yoo ke setho se se thinyegilego sa mmele wa moya.” Tsela e nngwe ya go le fetolelwa ke “go bušetša boemong bjo bo swanetšego; go rulaganya ka tshwanelo.”

¹⁵ Go lokiša tsela ya motho ka noši ya go nagana ga go bonolo, gomme go ka ba thata go bušetša dikgopolo tša motho yo a fošago boemong bjo bo swanetšego. Eupja thušo yeo e newago ka moya wa boleta e ka amogelwa ka tebogo. Ka gona bagolo ba Bakriste ba swanetše go kwa keletšo ya Paulo ye e rego: “Aparang kxauxêlô le botho le boikokobetšo le bolêta le xo se fele pelo.” (Ba-Kolose 3:12) Bagolo ba swanetše go dira’ng ge motho yo a nyakago go lokišwa a e-na le maikwelo a fošagetšego? Ba swanetše go “phêxêlêla . . . bonôlô.”—1 Timotheo 6:11.

Go Diša ka Temogo

16, 17. Bagolo ba swanetše go ba šedi dikotsing dife ge ba eletša ba bangwe?

¹⁶ Go na le mo gontši keletšong ya Paulo go Ba-Galatia 6:1. (NW) O kgothatša banna ba ba swanelegago moyeng gore: ‘Lekang go lokiša motho yo a fošitšego ka moya wa boleta, ge le lena ka noši le dutše le itotile ka go boifa gore le lena mo gongwe le ka lekwa.’ A mafelelo a bohloko gakaakang ao a ka bago gona ge e ba keletšo e bjalo e sa sekegelwe tsebe! The Times ya London ka go hlohleletšwa ke dipego tša ge moruti wa Anglican a bonwe molato ka baka la go dira bootswa le batsena-kereke ba babedi, e boletše gore bjo ke “boemo bja ka mehla: moeletši yo e bego e le tate goba ngwanabo rena o wetše sebeng ka baka la go botwa ke motho yo a mo eletšago.” Ka gona mongwadi wa kuranta o tsopola Dr. Peter Rutter a bolela gore “ditaba tša go dirišwa gampe magareng ga bao ba amogelago thušo le baeletši ba bona ba banna—dingaka, bo-ramolao, baperisita le bathwadi—mo lekokong la rena le le gobogilego kudu go tša kopano ya botona le botshadi di fetogile leuba le le sa ratwego, le senyago le leo le hlomphollago.”

¹⁷ Ga se ra swanela go nagana gore batho ba Jehofa ga ba kgongwe ke meleko e bjalo. Mogolo o mongwe yo a hlomphegago yo a dirilego ka go botega ka nywaga e mentši o ile a wela bootsweng ka gobane a ile a dira maeto a bodiši go kgaitšedi yo a nyetšwego nakong ya ge kgaetšedi a be a nnoši. Gaešita lege a ile a itshola, fela ngwana yo wabo rena o lahlegetšwe ke ditokelo tša gagwe ka moka tša tirelo. (1 Ba-Korinthe 10:12) Ka gona, bagolo ba ba kgethilwego ba ka dira bjang maeto a bodiši ka tsela yeo ba ka se kego ba wela molekong? Ba ka rulaganyetša bjang taba ya gore ba be sephiring, ba rapele le go ba le sebaka sa go diriša Lentšu la Modimo le dipuku tša Bokriste?

18. (a) Go diriša molao wa motheo wa bohlogo go ka thuša bjang bagolo go phema maemo a ka bakago go solega? (b) Ke dithulaganyo dife tše di ka dirwago ge go dirwa leeto la bodiši go kgaitšedi?

¹⁸ Taba e nngwe yeo bagolo ba swanetšego go e ela hloko ke molao wa motheo wa bohlogo. (1 Ba-Korinthe 11:3) Ge e ba mofsa a nyaka keletšo, gona leka go akaretša batswadi ba gagwe poledišanong ge go swanetše. Ge kgaitšedi yo a nyetšwego a kgopela thušo ya moya, na o ka rulaganyetša gore monna wa gagwe a be gona nakong ya ketelo? Go ka thwe’ng ge e ba se se sa kgonege goba monna wa gagwe e le yo a sa dumelego yo a bego a mo goboša ka tsela e itšego? Dira dithulaganyo tše di swanago le tšeo o bego o tla di dira ge o dira leeto la bodiši go kgaitšedi yo a sa nyalwago. E tla ba selo se bohlale gore banababo rena ba babedi ba swanelegago moyeng ba etele kgaitšedi gotee. Ge e ba se se sa kgonege, gona mo gongwe go ka kgethwa nako e swanetšego ya gore banababo rena ba babedi ba boledišane le yena Holong ya Mmušo, go kgethwa gore e be ka phapošing ye ba tlago go ba go yona ba nnoši. Ge banababo rena ba bangwe le dikgaitšedi ba ka ba gona ka holong, fela ba se ke ba kgona go bona le go kwa poledišano, gona go tla širogwa eng le eng yeo e ka bakago kgopišo.—Ba-Filipi 1:9, 10.

19. Go diša dinku tša Modimo ka go rata go tliša mafelelo afe a mabotse, gomme re leboga mang bakeng sa badiši ba ratago?

¹⁹ Go diša dinku tša Modimo ka go rata go tliša mafelelo a mabotse—mohlape o tiilego moyeng le o hlahlwago ka tshwanelo. Bagolo ba Bakriste ba mehleng yeno ka go swana le moapostola Paulo, ba kgongwa kudu ke badumedi-gotee le bona. (2 Ba-Korinthe 11:28) Boikarabelo bja go diša batho ba Modimo mabakeng a a mathata ke bjo boima kudu-kudu. Ka gona re leboga e le ka kgonthe modiro o mobotse o dirwago ke banababo rena bao ba dirago e le bagolo. (1 Timotheo 5:17) Re tumiša Monei wa “’neô tšohle tše botse, le ’mphô tšohle di tletšexo,” e lego Modiši wa rena yo lerato wa legodimo, Jehofa bakeng sa go re šegofatša ka “dimpho tšeo e lego banna” bao ba dišago ka go rata.—Ba-Efeso 4:8; Jakobo 1:17.

O ka Araba Bjang?

◻ Monna a ka okamela bjang lapa la gagwe ka mokgwa o mobotse?

◻ Ke ditshwanelego dife tše di swanetšego go hlaola tlhokomelo e bontšhwago ke bagolo ba Bakriste?

◻ Bagolo ba ka bontšha bjang boikokobetšo le boleta ge ba nea keletšo?

◻ Ke’ng seo se thušago go dira gore go lokiša ga moya go atlege?

◻ Bagolo ba ka phema bjang maemo a bakago go solega ge ba diša mohlape?

[Seswantšho go letlakala 18]

Mogolo wa Mokriste o swanetše go okamela lapa la gagwe ka mokgwa o mobotse

[Seswantšho go letlakala 21]

Bodiši bja Bokriste bo swanetše go dirwa ka boleta le ka kahlolo ya go loka