Lapa la Bokriste le Etiša Dilo tša Moya Pele

“Bang ba kxopolô e tee ka moka xa lena, Le kwêlanê bohloko, Le ratanê le bana ba bô-lêna, Le bê ba bonôlô, le ba botho.”—1 PETRO 3:8.

1. Ke kgetho efe yeo rena ka moka re nago le yona, gomme kgetho ya rena e ka kgoma bjang bokamoso bja rena?

TEMANA ye e lego ka mo godimo e hlalosa gabotse gakaakang thulaganyo ya kgale-kgale ya batho—e lego lapa! Le gona, go bohlokwa gakaakang gore batswadi ba bontšhe go etelela pele ditabeng tše! Dika tša bona tše dibotse le tše mpe gantši di tla bonala baneng ba bona. Lega go le bjalo, setho se sengwe le se sengwe sa lapa se na le sebaka sa go kgetha. Bjalo ka Bakriste, re ka kgetha go ba batho bao ba sekametšego dilong tša moya goba batho ba sekametšego go tša nama. Re ka kgetha go kgahla Modimo goba go mo nyamiša. Kgetho yeo mo gongwe e ka feleletša ka tšhegofatšo, e lego bophelo bjo bo sa felego le khutšo—goba ka thogako, e lego lehu la go hwela ruri.—Genesi 4:1, 2; Ba-Roma 8:5-8; Ba-Galatia 5:19-23.

2. (a) Petro o bontšhitše bjang go kgomega ga gagwe ka lapa? (b) Boemo bja moya ke’ng? (Bona mongwalo wa ka tlase.)

² Mantšu a moapostola go 1 Petro kgaolo 3, temana 8, a latetše kapejana ka morago ga keletšo e botse yeo a e neilego basadi le banna ba lego lenyalong. Petro o be a kgomega e le ka kgonthe ka boiketlo bja malapa a Bakriste. O be a tseba gore boemo bjo tiilego bja moya ke selo sa bohlokwa bakeng sa lapa leo le kopanego le leo le hlokomelanago. Ka gona, go 1Pet 3 temana 7 o be a bontšha gore ge e ba keletšo ya gagwe go banna e be e ka hlokomologwa, gona mafelelo e be e tla ba lepheko la moya magareng ga monna le Jehofa.a Dithapelo tša monna di be di tla šitišwa ge e ba a be a ka hlokomologa dinyakwa tša mosadi wa gagwe goba a mo kweša bohloko ka go hloka botho.

Kriste—Mohlala o Phethagetšego wa Boemo bja Moya

3. Paulo o gateletše bjang mohlala wa Kriste bakeng sa banna bao ba nyetšego?

³ Boemo bja moya bja lapa bo ithekgile ka mohlala o mobotse. Ge monna e le Mokriste wa kgonthe, o bea mohlala tabeng ya go bontšha dika tša moya. Ge e ba go se na monna yo e lego modumedi, gona mma gantši o leka go rwala boikarabelo bjoo. Boemong lege e le bofe, Jesu Kriste o nea mohlala o phethagetšego woo o swanetšego go latelwa. Boitshwaro bja gagwe, mantšu a gagwe le tsela ya gagwe ya go nagana ka mehla e be e le tše di agago le tše di lapološago. Moapostola Paulo o lebiša mmadi leboelela mohlaleng o lerato wa Kriste. Ka mohlala, o re: “Monna ké hlôxô ya mosadi, byalo ka xe Kriste è le Yêna hlôxô ya phuthêxô, è le Yêna Mophološi wa mmele wa xaxwe. Lena banna, ratang basadi ba lena, byalo ka xe Kriste a ratile phuthêxô, a ikxafa ka ’baka la yôna.”—Ba-Efeso 5:23, 25, 29; Mateo 11:28-30; Ba-Kolose 3:19.

4. Ke mohlala ofe wa boemo bja moya woo Jesu a o beilego?

⁴ Jesu e bile mohlala o mogolo wa boemo bja moya le bohlogo tšeo di bontšhitšwego ka lerato, botho le kwelobohloko. O be a e-na le boikgafo, e se wa boithati. Ka mehla o be a tumiša Tatagwe le go hlompha bohlogo bja gagwe. O be a latela tlhahlo ya Tatagwe, moo e lego gore o be a ka re: “Xa xo se ke kxônaxo xo se dira ka la-ka; ke ahlola ka mo ke kwilexo; ’me kahlolô ya-ka ké ya tokô, xobane xa ke nyake se Nna ke se rataxo; Ke nyaka se se ratwaxo ke E a nthomilexo.” ‘Ga ke dire selo ka la-ka; ke bolela ka mo Tate a nthutilego.’—Johane 5:30; 8:28; 1 Ba-Korinthe 11:3.

5. Tabeng ya go hlokomela balatedi ba gagwe, Jesu o beetše banna bao ba nyetšego mohlala ofe?

⁵ Se se bolela’ng go banna? Se bolela gore mohlala woo ba swanetšego go o latela dilong ka moka ke Kriste, yoo ka mehla a bego a ikokobeletša Tatagwe. Ka mohlala, bjalo ka ge Jehofa a neile dijo bakeng sa diphedi ka moka tša lefaseng, ka mo go swanago Jesu o neile balatedi ba gagwe dijo. Ga se a hlokomologa dinyakwa tša bona tša motheo tša dilo tše di bonagalago. Mehlolo ya gagwe ya go fepa batho ba 5 000 le ba le 4 000 ke bohlatse bja tlhokomelo ya gagwe le go ikwa ga gagwe a e-na le boikarabelo. (Mareka 6:35-44; 8:1-9) Ka mo go swanago lehono, dihlogo tša malapa tšeo di nago le boikarabelo di hlokomela dinyakwa tša nama tša malapa a tšona. Eupja na boikarabelo bja bona bo felela fao?—1 Timotheo 5:8.

6. (a) Ke dinyakwa dife tša bohlokwa tša lapa tšeo di swanetšego go hlokomelwa? (b) Banna bao ba nyetšego le bo-tate ba ka bontšha bjang kwešišo?

⁶ Malapa gape a na le dinyakwa tše dingwe tšeo e lego tša bohlokwa kudu, go etša ge Jesu a bontšhitše. Ba na le dinyakwa tša moya le tša maikwelo. (Doiteronomio 8:3; Mateo 4:4) Re ba tirišano le bangwe, bobedi ka lapeng le ka phuthegong. Re nyaka tlhahlo e botse gore e re hlohleletše go ba ba agago. Tabeng ye banna le bo-tate ba na le tema e kgolo yeo ba swanetšego go e kgatha—go bjalo kudu-kudu ge e ba e le bagolo goba bahlanka ba bodiredi. Batswadi bao ba se nago balekane ba nyaka dika tše di swanago ge ba thuša bana ba bona. Batswadi ga se ba swanela go kwešiša feela seo se bolelwago ke ditho tša lapa, eupja le seo se tlogelwago se se sa bolelwa. Seo se nyaka temogo, nako le go se fele pelo. Ke lebaka le lengwe leo ka lona Petro a bego a ka bolela gore banna ba swanetše go ba bao ba naganelago le ba phedišanago le basadi ba bona ka tsebo.—1 Timotheo 3:4, 5, 12; 1 Petro 3:7.

Dikotsi Tšeo di Swanetšego go Phengwa

7, 8. (a) Go nyakega’ng ge e ba lapa le tla phema go senyegelwa ke boemo bja moya? (b) Ke’ng se sengwe gape seo se nyakegago ka ntle le mathomo a mabotse tseleng ya Bokriste? (Mateo 24:13)

⁷ Ke ka baka la’ng go hlokomela boemo bja moya bja lapa e le gabohlokwa gakaakaa? Go nea mohlala, mo gongwe re ka botšiša, Ke ka baka la’ng e le gabohlokwa gore mootledi wa sekepe a tloge a ela hloko mebapa ya gagwe ge a hlahla sekepe moo go sa išego? Ka August 1992 sekepe sa go fo itšeela maeto sa Queen Elizabeth 2 (QE2) se ile sa tsenywa lefelong le kotsi la meboto le mafsika mo go thwego diphošo tša go sepetša sekepe di feela di direga gona. Modudi o mongwe wa lefelong leo o itše: “Baotledi ba bantši ba dikepe ba ile ba loba mediro ya bona ka baka la go dira diphošo tšeo di bakilego dikotsi.” QE2 e ile ya thula ntotoma ya ka tlase ga meetse. Se se ile sa feleletša e le phošo e bakilego ditshenyagalelo tše kgolo. Karolo ya boraro ya mmele wa sekepe e ile ya senyega gomme sekepe sa tlogedišwa mošomo dibeke tše mmalwa e le gore se lokišwe.

⁸ Ka mo go swanago, ge e ba “mootledi wa sekepe” wa lapa a sa hlahlobe ka kelohloko mmapa wa gagwe, e lego lona Lentšu la Modimo, lapa la gagwe le ka gobala gabonolo moyeng. Go mogolo goba mohlanka wa bodiredi, mafelelo e ka ba go lahlegelwa ke ditokelo ka phuthegong gomme mohlomongwe le go baka kgobalo e šoro dithong tše dingwe tša lapa. Ka baka leo, Mokriste o mongwe le o mongwe o swanetše go hlokomela gore a se ke a tanywa ke go ikwa a kgotsofetše moyeng, a bota feela mekgwa e mebotse ya go ithuta ya nakong e fetilego le phišego. Tseleng ya rena ya Bokriste, ga se gwa lekana go fo ba yo a thomilego gabotse; leeto le swanetše go phethwa ka katlego.—1 Ba-Korinthe 9:24-27; 1 Timotheo 1:19.

9. (a) Thuto ya motho ka noši e bohlokwa gakaaka’ng? (b) Ke dipotšišo dife tšeo di swanetšego tše re ka ipotšišago tšona?

⁹ E le gore re široge ditotoma, mafsika le mebotwana ya mohlaba tša moya, re swanetše dula re sepedišana le “mebapa” ya rena ka go ithuta Lentšu la Modimo ka mehla. Re ka se ke ra ithekga feela ka thuto ya motheo yeo e re tlišitšego ka therešong. Matla a rena a moya a ithekgile ka lenaneo la ka mehla le le leka-lekanego la thuto le tirelo. Ka mohlala, ge re e-ba gona Thutong ya Morokami ya phuthego ka tokollo yona ye, re ka ipotšiša, ‘Na nna, goba rena bjalo ka lapa, re tloga re ithutile sehlogo se, ra lelebela mangwalo gomme ra naganišiša ka tsela yeo a šomago ka yona? Goba re ile ra fo thalela dikarabo feela? Na mohlomongwe re ile ra hlokomologa gaešita le go bala sehlogo pele re e ba gona sebokeng?’ Go araba dipotšišo tše ka go botega go ka dira gore re naganišiše ka taba ye kudu gomme gwa tsoša kganyogo ya go kaonefatša—ge e ba seo se nyakega.—Ba-Hebere 5:12-14.

10. Ke ka baka la’ng go itlhahloba e le gabohlokwa?

¹⁰ Ke ka baka la’ng go itlhahloba mo go bjalo e le gabohlokwa? Ka gobane re phela lefaseng leo le laolwago ke moya wa Sathane, e lego lefase leo ka ditsela tše dintši tše di sa bonagalego, le lekago go senya tumelo ya rena go Modimo le dikholofetšong tša gagwe. Ke lefase leo le nyakago go re boloka re swaregile moo re hlokago le nako ya go hlokomela dinyakwa tša rena tša moya. Ka baka leo mo gongwe re ka ipotšiša, ‘Na lapa la-ka le tiile moyeng? Na nna bjalo ka motswadi ke tiile ka tsela yeo ke swanetšego go ba ka yona? Na rena bjalo ka lapa re hlagolela matla a moya ao a tutuetšago menagano ya rena go re thuša go dira diphetho tše di theilwego tokong le potegong?’—Ba-Efeso 4:23, 24.

11. Ke ka baka la’ng diboka tša Bokriste e le tšeo di holago moyeng? Nea mohlala.

¹¹ Boemo bja rena bja moya bo swanetše go matlafatšwa ke seboka se sengwe le se sengwe seo re bago go sona. Diiri tšeo tša bohlokwa Holong ya Mmušo goba Thutong ya Puku ya Phuthego di thuša go re lapološa ka morago ga diiri tše telele tšeo re di fetšago re leka go iphediša lefaseng la bonaba la Sathane. Ka mohlala, e bile mo go lapološago gakaakang go ithuta puku ya Motho yo a Phagamego Kudu yo a Kilego a Phela! Ye e re thušitše go hwetša kwešišo e kaone ka Jesu, bophelo bja gagwe le bodiredi bja gagwe. Re badile ka kelohloko mangwalo a bontšhitšwego, ra dira dinyakišišo tša motho ka noši, gomme ka go rialo ra ithuta go gontši mohlaleng wo Jesu a o beilego.—Ba-Hebere 12:1-3; 1 Petro 2:21.

12. Bodiredi bja tšhemo bo leka bjang boemo bja rena bja moya?

¹² Teko e botse ya boemo bja rena bja moya ke bodiredi bja Bokriste. E le gore re kgotlelele go neeng ga rena bohlatse bjo bo rulaganyeditšwego le bjo bo sa rulaganyetšwago, gantši ge re lebane le batho ba se nago kgahlego goba bao ba ganetšago, re nyaka tutuetšo e botse, lerato la go rata Modimo le lerato la go rata moagišani. Ke therešo gore ga go na motho ya a thabelago go tšeišwa phefo, gomme seo se ka direga bodireding bja rena bja tšhemo. Eupja re swanetše go gopola gore ke ditaba tše di lokilego tšeo di ganwago, e sego rena bjalo ka batho. Jesu o itše: “Xe lefase lè le hlôya, Le tsebê xore le thomile xo hlôya Nna. Xe le ka be Le le ba lefase, lefase le ka ba le rata ba e lexo ba xalô; xomme le Le hloile ka xe Le se ba xalô, ka xe ke Le hlaotše lefaseng. . . . Xomme tšé ka moka ba tlo Le dira ka ’baka la Leina la-ka, E a nthomilexo bà sa mo tsebe.”—Johane 15:18-21.

Ditiro di Hlalosa Kudu go Feta Mantšu

13. Motho o tee a ka senya bjang boemo bja moya bja lapa?

¹³ Go direga’ng ge e ba bohle ka lapeng ka ntle le setho se tee sa lapa ba hlompha bohlweki le bothakga bja ntlo? Letšatšing la pula bohle, ka ntle le o tee yo a itebalelago, ba hlokomela gore ba se ke ba tlogela mehlala ya leraga ka ntlong. Mehlala ya leraga yeo e lego gohle e bontšha bošaedi bja motho yoo, ya okeletša bangwe mošomo. Go bjalo le ka boemo bja moya. Motho o tee feela yo a nago le boithati goba yo a sa šetšego a ka senya botumo bja lapa. Bohle ka lapeng, e sego batswadi feela, ba swanetše go bontšha kgopolo ya Kriste. Go lapološa gakaakang ge bohle ba šoma ba le gotee ba e-na le tebelelo ya bophelo bjo bo sa felego! Tshekamelo ya menagano ya lapa leo ke ya moya (eupja e sego go itokafatša). Ke ka sewelo go bago le mehlalanyana ya go hlokomologa boemo bja moya lapeng le le bjalo.—Mmoledi 7:16; 1 Petro 4:1, 2.

14. Ke meleko efe ya dilo tše di bonagalago yeo Sathane a e beago tseleng ya rena?

¹⁴ Ka moka ga rena re na le dinyakwa tša motheo tša dilo tše di bonagalago tšeo di swanetšego go kgotsofatšwa bakeng sa go thekga bophelo bja rena bja letšatši le letšatši. (Mateo 6:11, 30-32) Eupja gantši dinyakwa tša kgonthe di khupetšwa ke dilo feela tšeo re ratago go ba le tšona. Ka mohlala, tshepedišo ya Sathane e re nea mehuta ka moka ya didirišwa tše difsa. Ge e ba ka mehla re phegelela go ba le selo se sefsa kudu dilong tšohle, le ka mohla re ka se ke ra kgotsofala, ka ge selo se sefsa kapejana e e-ba se se fetilwego ke nako, gomme gwa tšwelela setšweletšwa se se lego boemong bja bofsa. Lefase la kgwebo le hlomile modikologo woo le ka mohla o sa kgaotšego. Le re gokeletša gore re tsome tšhelete e oketšegile kudu e le gore re tšwele pele re kgotsofatša dilo tše kganyogwago tše oketšegilego. Se se ka feleletša ka “dikxanyoxô tše ntši tša bošilo tše di xobošaxo motho tša mo senya” goba “dipakane tša bošilo le tše kotsi.” Se se ka feleletša ka bophelo bjo bo sa tsepamago bjo bo nago le nako e nyenyane kudu ya mediro ya moya.—1 Timotheo 6:9, 10; The Jerusalem Bible.

15. Ke ka tsela efe mohlala wa hlogo ya lapa e lego wa bohlokwa?

¹⁵ Mo le gona, mohlala wo o bewago ke hlogo ya lapa la Bokriste o bohlokwa kudu. Kgopolo ya gagwe e leka-lekanego ka boikarabelo bja dilo tša boiphedišo le tša moya e swanetše go tutuetša ditho tše dingwe tša lapa. Ruri e be e tla ba mo go gobatšago ge e ba tate a be a ka nea thuto e botse kudu ka molomo eupja bjale a palelwa ke go phela ka go dumelelana le mantšu a gagwe. Bana go se go ye kae ba ka lemoga mokgwa wa bophelo wa gore, dira bjalo ka ge ke bolela, e sego bjalo ka ge ke dira. Ka mo go swanago, mogolo goba mohlanka wa bodiredi yo a kgothaletšago ba bangwe bodiredi bja ntlo le ntlo mola yena e le ka sewelo a bago le lapa la gagwe modirong woo, go se go ye kae o lahlegelwa ke go ka botwa ka lapeng le ka phuthegong.—1 Ba-Korinthe 15:58; bapiša le Mateo 23:3.

16. Ke dipotšišo dife tšeo re ka ipotšišago tšona?

¹⁶ Ka baka leo re ka hlahloba maphelo a rena ka mo go putsago. Na re swaregile kudu ka go fihlelela katlego mošomong wa boiphedišo moo re hlokomologago go dira tšwelopele ya moya? Na re tšwela pele lefaseng, mola re boela morago ka phuthegong? Gopola keletšo ya Paulo: “Taba yé e tiile; Xe motho a nyaka bolebeledi, ó duma modirô o botse.” (1 Timotheo 3:1) Go ikwa o ikarabelela ka phuthegong ke mo go bontšhago kudu boemo bja rena bja moya go feta go hlatlošetšwa maemong a godimo mošomong. Teka-tekanyo ya kelohloko e swanetše go kgomarelwa e le gore bathwadi ba rena ba se ke ba dumelelwa go re laola bjalo ka ge eka re ineetše go bona, e sego go Jehofa.—Mateo 6:24.

Poledišano e Nago le Morero e Godiša Boemo bja Moya

17. Ke eng seo se tlaleletšago go hlagoleleng lerato la kgonthe ka lapeng?

¹⁷ Magae a dimilione lehono a fetogile mo e nyakilego go ba dintlo tša go robala feela. Bjang? Ditho tša malapa di tlela feela go robala le go ja, ke moka di tloge ka bjako. Ke ka sewelo di dulago tafoleng bakeng sa go thabela dijo gotee. Ga go na maikwelo a borutho a lapa. Mafelelo ke afe? Go ba le go hlokega ga poledišano, gomme ga go tšewe mehlamu ka tsela e nago le morero. Le gona se se ka feleletša ka go se be le kgahlego ka ditho tše dingwe, mohlomongwe le go se kgomege e le ka kgonthe. Ge re ratana, re bula sebaka sa go boledišana le go theetša. Re a kgothatša le go thuša. Karolo ye ya boemo bja moya e akaretša poledišano e bohlokwa magareng ga banyalani le magareng ga batswadi le bana.b Go nyakega nako le bohlale ge re dutše re ntšhetšana sa mafahleng e le gore re abelane dilo tšeo di re thabišitšego, diphihlelo le mathata.—1 Ba-Korinthe 13:4-8; Jakobo 1:19.

18. (a) Ke’ng seo gantši e lego lepheko le legolo la poledišano? (b) Ditswalano tšeo di nago le morero di agwa go eng?

¹⁸ Poledišano e botse e nyaka nako le boiteko. Se se bolela go beela ka thoko nako ya go boledišana le go theetšana. Le lengwe la mapheko a magolo a se ke sedirišwa se jago nako se se hwetšago lefelong leo le hlomphegago magaeng a mantši—TV. Se se tšweletša tlhohlo—na TV e a go laola, goba na o a e laola? Go laola TV go nyaka go ikemišetša ka go tia—go akaretša boikemišetšo bjo matla bja go e tima. Eupja go dira bjalo go re bulela tsela ya gore re kwane bjalo ka ditho tša lapa le barwarre ba moya le dikgaetšedi. Tswalano e nago le morero e nyaka poledišano e botse, go kwešišana, dinyakwa tša rena le dilo tšeo di re thabišago, re botšana kamoo re lebogago dilo ka moka tše botho tšeo re di diretšwego. Ka mantšu a mangwe, poledišano e bohlokwa e bontšha gore ga re tšeele ba bangwe fase.—Diema 31:28, 29.

19, 20. Ge e ba re hlokomela lapa ka moka, re tla dira’ng?

¹⁹ Ka baka leo, ge e ba re hlokomelana ka lapeng—gomme seo se akaretša le go hlokomela ditho tša lapa tšeo di sa dumelego—re tla ba re dira go gontši tabeng ya go agana le go lotola boemo bja rena bja moya. Ka lapeng re tla ba re latela keletšo ya Petro, e rego: “Ké moka, bang ba kxopolô e tee ka moka xa lena, Le kwêlanê bohloko, Le ratanê le bana ba bô-lêna, Le bê ba bonôlô, le ba botho. Le se kê la lefetša bobe ka bobe, le lehlapa ka lehlapa; wa lena mokxwa e bê xo šexofatša, Lè tseba xore ké sôna se Le bileditšwexo sôna, xore Le tlê Le bê ba xo tlo ja bohwa bya thšexofatšô.”—1 Petro 3:8, 9.

²⁰ Re ka hwetša tšhegofatšo ya Jehofa gona bjale ge e ba re katanela go kgomarela boemo bja rena bja moya, gomme se se ka lebiša go hwetšeng tšhegofatšo ya gagwe e le bohwa nakong e tlago ge re amogela mpho ya bophelo bjo bo sa felego lefaseng la paradeise. Go na le dilo tše dingwe tšeo re ka di dirago re le lapa go thušana moyeng. Sehlogo se se latelago se tla ahla-ahla mehola ya go dira dilo re le gotee bjalo ka lapa.—Luka 23:43; Kutollo 21:1-4.

[Mengwalo ya tlase]

Na o a Gopola?

◻ Boemo bja moya ke’ng?

◻ Hlogo ya lapa e ka ekiša bjang mohlala wa Kriste?

◻ Re ka phema bjang dilo tšeo di beago boemo bja rena bja moya kotsing?

◻ Ke’ng seo se ka senyago boemo bja moya bja lapa?

◻ Ke ka baka la’ng poledišano e nago le morero e le ya bohlokwa?

[Seswantšho go letlakala 12]

Go ba gona Thutong ya Puku ya Phuthego go tiiša lapa moyeng