E-bang le Sebete!

“E-ba le sebete gomme o re; ‘Jehofa ke mothuši wa-ka.’”—BA-HEBERE 13:6, NW.

1. Ke sebete sefe seo se ilego sa bontšhwa ke bao ba ilego ba ithuta therešo ya Modimo lekgolong la pele la nywaga C.E.?

EBE e le lekgolong la pele la nywaga la Mehla e Tlwaetšwego ya rena. Mesia yo e bego e le kgale a letetšwe o be a šetše a tlile. O be a rutile barutiwa ba gagwe gabotse gomme a thomile modiro wa bohlokwa wa boboledi. E be e le nako ya gore batho ba kwe ditaba tše di lokilego tša Mmušo wa Modimo. Ka baka leo, banna le basadi ba ba bego ba ithutile therešo ba ile ba tsebatša molaetša woo o makatšago ka sebete.—Mateo 28:19, 20.

2. Ke ka baka la’ng Dihlatse tša Jehofa di nyaka sebete lehono?

² Mmušo o be o se wa hlongwa mehleng yeo. Eupja Kgoši e Kgethilwego, Jesu Kriste, o be a ile a porofeta ka go ba gona gagwe mo go sa bonagalego ga nakong e tlago a le matleng a Mmušo. Go be go tla swaiwa ke dilo tše bjalo ka dintwa tše di sa kago tša ba le tša go swana le tšona, tlala, malwetši a šoro, ditšhišinyego tša lefase le boboledi bja ditaba tše di lokilego. (Mateo 24:3-14; Luka 21:10, 11) Bjalo ka Dihlatse tša Jehofa, re nyaka sebete gore re lebeletšane le maemo a le tlaišego ye e re welago. Ka baka leo e tla ba mo go holago go hlahloba dipego tša Beibele mabapi le bagoeledi ba Mmušo ba nago le sebete lekgolong la pele la nywaga C.E.

Sebete sa go Ekiša Kriste

3. Ke mang yo a neago mohlala o mobotse kudu wa sebete, gomme go itšwe’ng mabapi le yena go Ba-Hebere 12:1-3?

³ Jesu Kriste o nea mohlala o mobotse kudu wa sebete. Ka morago ga go bolela ka ‘leru le legolo’ la dihlatse tša Jehofa tša sebete tša mehleng ya pele ga Bokriste, moapostola Paulo o ile a lebiša tlhokomelo go Jesu ka gore: “Xe re na le leru le lekaakao la dihlatse tše di re ukametšexo, a re apoleng tše di re imêlaxo tšohle, le sebe se se re rarêlaxo, ’me re kxôtlêlêlê tlhabanong ye re lexo mo xo yôna. Re išê mahlô xo Mo-êta-pele le Mophethi wa tumêlô, Yêna Jesu, e a kxôtlêlêtšexo sefapanô, le xe se se bexo se mo loketše e le lethabô, a dumêla xo xobošwa, a kxôna xo y’o dula ka letsoxong le letona la sedulô sa boxoši bya Modimo. Le fêlê Le tseba Yêna e a sa kaxo a fêla pelo xe ba-dira-dibe ba mo xanetša xa-kaakaa, xore Le se lapê dipelo la lesetša.”—Ba-Hebere 12:1-3.

4. Jesu o ile a bontšha bjang sebete ge a be a lekwa ke Sathane?

⁴ Ka morago ga kolobetšo ya gagwe le matšatši a 40 a go naganišiša, thapelo le go ikona dijo lešokeng, Jesu o ile a ganetša Sathane ka sebete. Ge a lekwa ke Diabolo gore a fetole mafsika bogobe, Jesu o ile gana ka gobane e be e le phošo go dira mehlolo bakeng sa go kgotsofatša kganyogo ya motho ka noši. Jesu o itše: “Xo ngwadilwe xore motho xa a phele ka boxôbê fêla; ó phela ka mantšu ohle a a tšwaxo molomong wa Modimo.” Ge Sathane a mo hlohla gore a ikwiše godimo ga tempele, Jesu o ile a gana ka gobane e be e tla ba sebe go leka Modimo gore a mo šireletše go seo e bego e ka ba go ipolaya. Kriste o itše: “Le xôna xo ngwadilwe xwa thwe; Morêna Modimo wa xaxo O se kê wa Mo leka.” Sathane o ile a ithapela go mo nea mebušo ka moka ya lefase bakeng sa ‘tiro e tee feela ya borapedi,’ (NW) eupja Jesu o be a ka se hlanoge gomme a thekga tlhohlo ya Diabolo ya gore batho ba be ka se tšwele pele ba botegela Modimo ka tlase ga teko. Ka gona Jesu o ile a re: “Ntloxêlê, Sathane, xobane xo ngwadilwe xwa thwe; O khunamêlê Morêna Modimo wa xaxo, O dirêlê Yêna à nnoši.” Ge a rialo, Moleki ‘o ile a mo gomela, gwa fela lebaka a mo lesitše.’—Mateo 4:1-11; Luka 4:13.

5. Ke’ng seo se ka re thušago go kgotlelela moleko?

⁵ Jesu o be ikokobeletša Jehofa gomme a ganetša Sathane. Ge e ba le rena ka mo go swanago re ‘bušwa ke Modimo, gomme re e-lwa le Sathane, o tla re tšhaba.’ (Jakobo 4:7) Go swana le Jesu, re ka lebana le moleko ka sebete ge e ba re diriša Mangwalo, mohlomongwe gaešita le go a tsopola nakong yeo re lekwago gore re dire selo se sengwe se sebe. Na go ka direga gore re ineele molekong wa bohodu ge e ba nakong yeo re bolela molao wa Modimo o rego: “O se kê wa utswa” leboelela? Na go ka direga gore Bakriste ba babedi ba ineele boitshwarong bjo bo gobogilego bja kopano ya botona le botshadi gaešita lege o mongwe wa bona ka sebete a tsopola mantšu a rego: “O se kê wa otswa”?—Ba-Roma 13:8-10; Ekisodo 20:14, 15.

6. Ke bjang Jesu a bilego mohlala wa mofenyi wa lefase yo a nago le sebete?

⁶ Ka ge re le Bakriste bao ba hloilwego ke lefase le, re ka phema moya wa lona le boitshwaro bjo bobe. Jesu o boditše balatedi ba gagwe gore: “Mono lefaseng Le tlo ba tlalelong. Fêla, betang dipelo, xobane lefase le fentšwe ke Nna.” (Johane 16:33) O fentše lefase ka go se swane le lona. Mohlala wa gagwe e le mofenyi le mafelelo a tsela ya gagwe ya go kgomarela potego di ka re tlatša ka sebete sa go mo ekiša ka go dula re ikarotše lefaseng le gomme re sa šilafatšwe ke lona.—Johane 17:16.

Sebete sa go Tšwela Pele ka Boboledi

7, 8. Re tla thušwa ke’ng go tšwela pele ka boboledi go sa šetšwe tlaišo?

⁷ Jesu le barutiwa ba gagwe ba ile ba ithekga ka Modimo bakeng sa sebete sa go tšwela pele ka boboledi go sa šetšwe tlaišo. Kriste ka sebete o ile a phetha bodiredi bja gagwe go sa šetšwe tlaišo, gomme ka morago ga Pentekoste ya 33 C.E., balatedi ba gagwe bao ba bego ba tlaišwa ba ile ba tšwela pele ba tsebatša ditaba tše di lokilego gaešita lege baetapele ba bodumedi ba ba-Juda ba ile ba leka go ba dira gore ba kgaotše. (Ditiro 4:18-20; 5:29) Barutiwa ba gagwe ba ile ba rapela ka gore: “Jehofa, ela hloko ditšhošetšo tša bona, gomme o dire gore bahlanka ba gago ba tšwele pele ba bolela lentšu la gago ka sebete ka moka.” (NW) Go ile gwa direga’ng? Pego e re: “Ya re xe ba feditše xo rapêla, felô mo ba bexo ba phuthexetše xôna xwa šišinyêxa; ka moka ba tlala Môya o mokxêthwa, ba bolêla Lentšu la Modimo ka mafolofolo [“ka sebete,” NW].”—Ditiro 4:24-31.

⁸ Ka ge bontši bja batho lehono bo sa amogele ditaba tše di lokilego, gantši go tšwela pele ga bona ka boboledi go nyaka gore ba be le sebete. Bahlanka ba Jehofa ba nyaka sebete se se newago ke Modimo kudu-kudu ge ba tlaišwa e le gore ba nee bohlatse ka mo go tletšego. (Ditiro 2:40; 20:24) Ka gona, mogoeledi yo wa sebete wa Mmušo, Paulo, o boditše modirišani wa gagwe yo a bego a bonala a ipelaela gore: “Modimo xa a ka a re nea Môya wa boi; ó re file Môya wa matla, le wa leratô, le wa tlhaloxanyô. Ké xôna O se bê le maseme xe O hlatsêla Mong wa rena, xe O hlatsêla le nna moxôlêxwa wa xaxwe; mo Ebangedi e hloiwaxo o êmê le yôna ka matla a Modimo.” (2 Timotheo 1:7, 8) Ge e ba re rapelela sebete, re tla kgona go tšwela pele ka boboledi, gomme gaešita le tlaišo e ka se re amoge lethabo la rena bjalo ka bagoeledi ba Mmušo.—Mateo 5:10-12.

Sebete sa go Ema le Jehofa

9, 10. (a) Ba-Juda ba lekgolong la pele la nywaga le Ba-ntle ba ile ba dira’ng gore ba fetoge balatedi ba kolobeditšwego ba Kriste? (b) Ke ka baka la’ng sebete se be se nyakega bakeng sa go fetoga Bakriste?

⁹ Ba-Juda ba bantši ba lekgolong la pele la nywaga le Ba-ntle ka sebete ba ile ba tlogela meetlo ye e sego ya Mangwalo gore e be balatedi ba kolobeditšwego ba Kriste. Kapejana ka morago ga Pentekoste ya 33 C.E., ‘palo ya barutiwa e ile ya ba e kgolo-kgolo motseng wa Jerusalema. Le lešaba le lentši la baperisita la bušwa ke tumelo.’ (Ditiro 6:7) Ba-Juda ba ile ba ba le sebete sa go kgaola ditlemo tša bodumedi gomme ba amogela Jesu e le Mesia.

¹⁰ Go thoma ka 36 C.E., ba bantši ba Ba-ntle ba ile ba fetoga badumedi. Ge Koronelio, ditho tša lapa la gagwe le ba bangwe ba Ba-ntle ba kwele ditaba tše di lokilego, ba ile ba di amogela ka bjako, ba hwetša moya o mokgethwa gomme ba ile ‘ba kolobetšwa ka leina la Jesu Kriste.’ (Ditiro 10:1-48, bapiša le NW.) Kua Filipi mohlapetši wa kgolego wa Ba-ntle le ba ntlo ya gagwe ba ile ba amogela Bokriste ka pela, gomme “a kolobetšwa le bohle ba lapeng la xabô é sa le lebaka leo.” (Ditiro 16:25-34) Sebete se be se nyakega bakeng sa go gata megato e bjalo ka gobane Bakriste e be e le sehlotswana se se tlaišwago, seo se sa ratwego. Ba sa dutše ba swarwa ka tsela yeo. Eupja ge e ba o se wa ineela go Modimo le go kolobetšwa bjalo ka o mongwe wa Dihlatse tša Jehofa, na ye ga se nako ya gore o gate megato ye yeo e nyakago sebete?

Sebete Malapeng ao a Aroganego

11. Oinike le Timotheo ba neile mehlala efe e mebotse ya sebete?

¹¹ Oinike le morwa’gwe Timotheo ba ile ba bea mehlala e mebotse ya tumelo yeo e nago le sebete ka lapeng leo le aroganego ka bodumedi. Gaešita lege Oinike a be a e-na le monna wa moheitene, o ile a ruta morwa’ge “Mangwalô a makxêthwa” go tloga bjaneng bja gagwe. (2 Timotheo 3:14-17) Ka morago ga go ba Mokriste, Oinike o ile a bontšha ‘tumelo e se nago boikaketši.’ (2 Timotheo 1:5) Le gona o ile a ba le sebete sa go fetišetša thuto ya Bokriste go Timotheo mola a be a dutše a bontšha go hlompha bohlogo bja monna wa gagwe yo a sa dumelego. Ka kgonthe, tumelo ya gagwe le sebete di ile tša putswa ge morwa wa gagwe yo a rutegilego a be a kgethelwa go felegetša Paulo maetong a boromiwa. Se se ka ba se kgothatša gakaakang go batswadi ba Bakriste bao ba ikhwetšago ba le maemong a swanago!

12. Timotheo o ile a ba motho wa mohuta mang, gomme ke bomang bao ba ipontšhago e le bao ba swanago le yena?

¹² Gaešita lege Timotheo a be a phela ka lapeng leo le aroganego ka bodumedi, ka sebete o ile a amogela Bokriste gomme a ba motho wa moya yoo Paulo a bego a ka bolela mabapi le yena gore: “Ka xo tseba Morêna Jesu ke holofêla xore ke tlo tloxa kè roma Timotheo a tla xo lena [ba-Filipi], xore le nna ke wê pelo xe ke e-kwa ka mo xo dutšexo le lena ka xôna. Xobane xa ke na yo mongwê yo pelo ya xaxwe e kwanaxo le ya-ka, e a kaxo etša yêna Timotheo ka xo hlôkômêla ditaba tša lena ka pelo. . . . xe e le yêna Timotheo ke mo tseba xo bôtêxa, xobane mola rè le modirong wa Ebangedi, ó be a etša ngwana xe a dirišana le tat’axwe.” (Ba-Filipi 2:19-22) Lehono, bašemane ba bantši le banenyana bao ba lego ka malapeng a aroganego ka bodumedi ba amogela Bokriste bja therešo ka sebete. Go swana le Timotheo, ba a itlhatsela bona ka noši, gomme re thaba gakaakang ge ba le karolo ya mokgatlo wa Jehofa!

Sebete sa go ‘Bea Maphelo a Rena Kotsing’

13. Akwila le Perisila ba ile ba bontšha sebete ka tsela efe?

¹³ Akwila le mosadi wa gagwe, Perisila (Perisika), ba beile mohlala ka ‘go bea maphelo a bona kotsing’ bakeng sa modumedi-gotee le bona. Ba ile ba amogela Paulo ka legaeng la bona, ba šoma le yena go direng dintente, gomme ba mo thuša go aga phuthego e mpsha kua Korinthe. (Ditiro 18:1-4) Bogwereng bja bona bja nywaga e 15, ba ile ba ba ba bea maphelo a bona kotsing ka tsela e sa kago ya utollwa. Ba be ba dula Roma ge a be a botša Bakriste ba moo gore: “Dumedišang Perisika le Akwila badirišani ba-ka ka Jesu Kriste. Ké bôná ba kilexo ba neêla dihlôxô tša bôná [“ba bea maphelo a bona kotsing,” NW] è le xo namolêla nna; xa se ba xo leboxwa ke nna fêla; ba leboxwa ke diphuthêxô tšohle tša ba-ntlê.”—Ba-Roma 16:3, 4.

14. Ka go bea maphelo a bona kotsing bakeng sa Paulo, Akwila le Perisika ba be ba dira ka go dumelelana le molao ofe o mofsa?

¹⁴ Ka go bea maphelo a bona kotsing bakeng sa go namolela Paulo, Akwila le Perisika ba dirile ka go dumelelana le mantšu a Jesu a rego: “Ké Le nea molaô o mofsa, wa xo re Le ratanê, wa xo re Le ratanê byalo ka Nna xe kè le ratile.” (Johane 13:34) Molao wo e be e le “o mofsa” ka gore o be o nyaka go gontši go feta se se bego se nyakwa ke Molao wa Moše wa gore motho a rate wa gabo bjalo ka ge a ithata. (Lefitiko 19:18) O be o nyaka lerato la go hloka boithati leo le bego le fihla bokgoleng bja gore motho a gafele ba bangwe bophelo bja gagwe, go etša ge Jesu a dirile. Mongwadi Tertullian wa lekgolong la bobedi le la boraro la nywaga C.E. o tsopotše mantšu a batho ba lefase mabapi le Bakriste ge a ngwala gore: “Ba re, ‘Bonang kamoo ba ratanago ka gona . . . le kamoo ba itokišeditšego go hwelana ka gona.’” (Apology, kgaolo XXXIX, 7) Kudu-kudu ke gare ga tlaišo moo re tlamegilego go bontšha lerato la borwarre ka go bea maphelo a rena kotsing ka sebete e le gore re pheme go lebantšha badumedi-gotee le rena le go swarwa ka sehlogo goba ba hwa lehu diatleng tša manaba.—1 Johane 3:16.

Sebete se Tliša Lethabo

15, 16. Bjalo ka ge go bontšhwa go Ditiro kgaolo 16, sebete le lethabo di ka kgokaganywa bjang?

¹⁵ Paulo le Silase ba nea bohlatse bja gore go bontšha sebete gare ga meleko go ka tliša lethabo. Ka taelo ya bo-magisetarata ba setšhaba motseng wa Filipi, ba ile ba bethwa pele ga batho ka kgati gomme ba tlengwa ka dikota ka kgolegong. Lega go le bjalo, ga se ba ineela poifong ka baka la go nyema moko. Go sa šetšwe maemo a thata ao ba bego ba le go ona, ba be ba sa dutše ba e-na le sebete seo se newago ke Modimo le lethabo leo se se le tlišetšago Bakriste ba botegago.

¹⁶ Mo e ka bago bošego-gare, Paulo le Silase ba be ba rapela ba bile ba tumiša Modimo ka kopelo. Ka bjako, tšhišinyego ya lefase e ile a šišinya kgolego, ya lokolla ditlemo tša bona, gomme ya bula mamati. Mohlapetši yo a tšhogilego wa kgolego le lapa la gagwe ba ile ba newa bohlatse ka sebete bjoo bo ilego bja feleletša ka gore ba kolobetšwe bjalo ka bahlanka ba Jehofa. Yena ka noši, ‘o ile a hlalala ka gobane a dumetše Modimo le bohle ba lapeng la gabo.’ (Ditiro 16:16-34) Se se swanetše go ba se ile sa tlišetša Paulo le Silase lethabo gakaakang! Ka ge re ahla-ahlile mohlala wo le e mengwe ya Mangwalo ya sebete, ke bjang re ka dulago re e-na le sebete re le bahlanka ba Jehofa?

Tšwelang Pele le Bontšha Sebete

17. Bjalo ka ge go bontšhwa go Psalme 27, go holofela Jehofa go tswalana bjang le sebete?

¹⁷ Go holofela Jehofa go tla re thuša gore re dule re e-na le sebete. Dafida o opetše, a re: “Holofela Jehofa; e-ba le sebete gomme o dire gore pelo ya gago e tie. Ee, holofela Jehofa.” (Psalme 27:14, NW) Psalme 27 e bontšha gore Dafida o ile a ithekga ka Jehofa e le “sebô” sa bophelo bja gagwe. (Ps 27 Temana 1) Ka ge a be a bone kamoo Modimo a ilego a šomana le manaba a Dafida ka gona nakong e fetilego se se ile sa mo nea sebete. (Ps 27 Ditemana 2, 3) Go leboga lefelo la Jehofa la borapedi ke lebaka le lengwe. (Ps 27 Temana 4) Go bota thušo ya Jehofa, tšhireletšo ya gagwe le phološo le gona go ile gwa aga sebete sa Dafida. (Ps 27 Ditemana 5-10) Se sengwe gape se se holago e bile go ithuta melao ya motheo e lokilego ya Jehofa ka mo go tšwelago pele. (Ps 27 Temana 11) Thapelo e nago le kgodišego bakeng sa go phološwa manabeng a gagwe, e sepedišana le tumelo le kholofelo, di ile tša thuša Dafida gore a be le sebete. (Ps 27 Ditemana 12-14) Re ka aga sebete sa rena ka ditsela tše di swanago, ka go rialo ra bontšha gore ruri re “holofela Jehofa.”

18. (a) Ke’ng seo se bontšhago gore go ba gotee ka mehla le barapedi-gotee le rena ba Jehofa go ka re thuša go dula re e-na le sebete? (b) Diboka tša Bokriste di kgatha tema efe e bohlokwa tabeng ya go aga sebete?

¹⁸ Go kopana ka mehla le barapedi-gotee le rena ba Jehofa go ka re thuša go dula re e-na le sebete. Ge Paulo a be a dira boipiletšo go Kesara gomme a e-ya Roma, badumedi-gotee le yena ba ile ba mo gahlanetša Lefelong la Borekelo la Apiforo le Teretaberene. Pego e re: “Paulo xe a ba bôna, a leboxa Modimo, a tia kholofêlô.” (Ditiro 28:15) Ge re dutše re e-ba gona dibokeng tša Bokriste ka mehla, re kwa keletšo ya Paulo e rego: “A re hlôkômêlaneng seng sa rena, re išanê leratong le medirong e botse. Re se ngalê phuthêxô ya xešo ka mokxwa wa ba bangwê; sa rena a e bê xo eletšana [“go kgothatšana,” NW], xa-xolo ka xe letšatši le le kxaufsi; le lena Le a di bôna.” (Ba-Hebere 10:24, 25) Go kgothatšana go bolela’ng? Go kgothatša ke “go tsenya motho sebete, moya goba kholofelo.” (Webster’s Ninth New Collegiate Dictionary) Re ka dira mo gontši go tsenya Bakriste ba bangwe sebete, gomme kgothatšo ya bona le yona ka mo go swanago e ka aga seka se ka go rena.

19. Mangwalo le dipuku tša Bokriste di tswalana bjang le go dula ga rena re e-na le sebete?

¹⁹ Gore re tšwele pele re le ba nago le sebete, re swanetše go ithuta Lentšu la Modimo ka mehla le go diriša keletšo ya lona maphelong a rena. (Doiteronomio 31:9-12; Jošua 1:8) Thuto ya rena ya ka mehla e swanetše go akaretša dipuku tša Bokriste tšeo di theilwego Mangwalong, bakeng sa keletšo yeo e kwalago yeo e lokišeditšwego ka tsela yeo gore e tle e re thuše go lebana le diteko tša tumelo ka sebete seo se newago ke Modimo. Go tšwa dipegong tša Beibele, re bone kamoo bahlanka ba Jehofa ba ilego ba ba le sebete ka gona maemong a fapa-fapanego. Gona bjale, re ka ba re sa tsebe kamoo tsebišo e bjalo e ka re thušago ka gona, eupja Lentšu la Modimo le na le matla, gomme seo re ithutago sona go lona se ka re hola ka mehla. (Ba-Hebere 4:12) Ka mohlala, ge e ba go boifa motho go ka thoma go kgoma bodiredi bja rena, re ka gopola kamoo Henoge a bilego le sebete sa go fetišetša molaetša wa Modimo go bao ba bego ba sa mmoife.—Juda 14, 15.

20. Ke ka baka la’ng go ka thwe thapelo e bohlokwa ge e ba re tla dula re e-na le sebete bjalo ka bahlanka ba Jehofa?

²⁰ Gore re dule re e-na le sebete bjalo ka bahlanka ba Jehofa, re swanetše go phegelela thapelong. (Ba-Roma 12:12) Jesu o ile a kgotlelela diteko tša gagwe ka sebete ka gobane ‘a ile a tliša didimo tša dithapelo le ditopo le dillo tše thata le ka megokgo, a di fihliša go Yoo a kgonnego go mo phološa lehung; gomme a kwewa a hlakodišwa poifong.’ (Ba-Hebere 5:7) Ka go dula re le kgaufsi le Modimo ka thapelo, re ka se ke ra swana le mafšega a lefase ao sa bona e lego “lehu la bobedi” leo go lona go se nago tsogo. (Kutollo 21:8) Tšhireletšo ya Modimo le bophelo lefaseng le lefsa la Modimo ke tša bahlanka ba gagwe ba sebete.

21. Ke ka baka la’ng Dihlatse tše di botegago tša Jehofa di swanetše go ba le sebete?

²¹ Bjalo ka Dihlatse tše botegago tša Jehofa, ga se ra swanela go boifa manaba ao e lego batemona le a manaba ao e lego batho, ka gobane re na le thekgo ya Modimo le mohlala wa go ba le sebete wa Jesu e le mofenyi wa lefase. Go ba gotee mo go agago moyeng le batho ba Jehofa le gona ka mo go swanago go re thuša go ba le sebete. Sebete sa rena se bile se agwa ka tlhahlo le keletšo tša Mangwalo le dipuku tša Bokriste. Dipego tša Beibele tša bahlanka ba Modimo ba nako e fetilego di re thuša go sepela ditseleng tša gagwe ka sebete. Ka gona, mehleng ye e thata ya bofelo, anke re tšweleng pele ka sebete tirelong e kgethwa. Ee, anke batho ka moka ba Jehofa ba be le sebete!

O be o tla Araba Bjang?

◻ Mohlala wa Jesu o ka re tlatša bjang ka sebete?

◻ Ke’ng seo se ilego sa nea Jesu le barutiwa ba gagwe sebete sa go tšwela pele boboleding?

◻ Ke ka baka la’ng ba-Juda le Ba-ntle ba ile ba nyaka sebete sa gore ba eme ka lehlakoreng la Jehofa?

◻ Ke mehlala efe ya go bontšha sebete yeo e ilego ya newa ke Oinike le Timotheo?

◻ Go na le bohlatse bofe bja gore sebete se tliša lethabo gare ga tlaišo?

[Seswantšho go letlakala 18]

Go swana le Jesu, re ka emelana le moleko ge e ba re diriša Mangwalo le go a tsopola