Dipotšišo tše Tšwago go Babadi

Ka gobane Beibele gantši e bolela ka “mošemane yo a se nago tate,” (NW) na se se bontšha go kgomega go se nene ka banenyana?

Le gatee-tee.

New World Translation of the Holy Scriptures e diriša polelwana “mošemane yo a se nago tate” ditemaneng tše dintši tšeo di laetšago go kgomega ga Modimo ka bana bao ba se nago motswadi. Modimo o ile a dira gore go kgomega mo go be molaleng melaong yeo a e neilego Isiraele.

Ka mohlala, Modimo o itše: “O se kê wa hlakiša mohloloxadi le sešuana [“mošemane yo a se nago tate,” NW]. Xe O ka bá wa ba hlakiša, ’me ba ntelêla, ke tlo kwa sellô sa bôná; ’me boxale bya-ka bo tlo tuka, ka Le bolaiša lerumô, basadi ba lena ba šala e le bahloloxadi, bana ba lena ba šala e le dišuana [“bašemane ba se nago bo-tate,” NW].” (Ekisodo 22:21-23) “Xobane Morêna Modimo wa lena ké Yêna Modimo wa medimo, ke Yêna Morêna wa marêna ohle, Yêna Modimo e moxolo, yo matla, e a thšabêxaxo, e a sa bebexo sefahloxô, e a sa amoxelexo seatla se kobong, Moloki kahlolong, Mo-rata-thšuwana [“mošemane yo a se nago tate,” NW] le mohloloxadi.”—Doiteronomio 10:17, 18; 14:29; 24:17; 27:19.

Diphetolelo tše dintši tša Beibele ditemaneng tše di balega ka gore “ngwana yo a hlokago tatagwe” goba “thšuwana,” ka go rialo di akaretša bašemane le banenyana. Lega go le bjalo, diphetolelo tše bjalo di hlokomologa mohlodi o hwetšwago lentšung la motheo la Sehebere (ya·thohmʹ), yeo e fetoletšwego ka bongtona. Go e na le moo, New World Translation of the Holy Scriptures e diriša phetolelo e nepagetšego ya “(ba)mošemane yo a se nago tate,” go etša go Psalme 68:5, yeo e balegago ka gore: “Tatago bašemane ba se nago botate le moahlodi wa bahlologadi ke Modimo bodulong bja gagwe bjo bokgethwa.” Se se theilwe go eleng hloko mo go swanago go Sehebere sa motheo, bongtshadi bja lediri leo le lego go Psalme 68:11 (NW) bo šišinya phetolelo ye: “Basadi ba ba bolelago ditaba tše di lokilego ke lešaba le legolo.”a

Gaešita le ge “mošemane yo a se nago tate” e le phetolelo ya motheo ya ya·thohmʹ, se ga se sa swanela go tšewa e le se se bontšhago go se kgomege ka banenyana ba hlokago motswadi. Ditemana tše di tsopotšwego le tše dingwe di bontšha gore batho ba Modimo ba be ba kgothaletšwa go hlokomela batho ba basadi, go hlokomela bahlologadi. (Psalme 146:9; Jesaya 1:17; Jeremia 22:3; Sakaria 7:9, 10; Maleaki 3:5) Ka Molaong, Modimo gape o akareditše pego ka phetho ya boahlodi yeo e bego e kgonthišetša bohwa bakeng sa barwedi ba se nago tate ba Tselofagadi. Taelo ye e ile ya ba molao bakeng sa go swarwa ga maemo a swanago, ka tsela yeo go thekgwa ditshwanelo tša banenyana ba se nago bo-tate.—Numeri 27:1-8.

Jesu ga se a ka a hlaola ka bong ge a bontšha botho go bana. Go e na le moo, re bala gore: “Xomme ba tliša bana xo Jesu, xore a ba swarê; ’me barutiwa ba kxalemêla ba ba ba tlišaxo. Jesu xe a bôna, tša mmefêla; a bolêla le bôná a re: Lesang bana ba tlê xo Nna; Le se kê la ba thibêla, xobane mmušô wa Modimo ké wa ba byalo. Ruri, ke a Le botša, motho e a sa amoxelexo mmušo wa Modimo byalo ka ngwana, a ka se kê a bá a tsêna xo wôna. ’Me a ba xokara, a ba bea diatla a ba šexofatša.”—Mareka 10:13-16.

Lentšu la Segerika le fetoletšwego mo e le “bana ba banyenyane” le ka sebopego seo se sa bontšhego bong. Pukuntšu e tumilego ya Segerika e bolela gore lentšu le le “dirišetšwa go bašemane le banenyana.” Jesu o be a bonagatša kgahlego e swanago le yeo e bontšhwago ke Jehofa baneng ka moka, bašemane le banenyana. (Ba-Hebere 1:3; bapiša le Doiteronomio 16:14; Mareka 5:35, 38-42.) Ka gona go swanetše go lemogwa gore keletšo e lego ka Mangwalong a Sehebere mabapi le go hlokomela “bašemane ba se nago bo-tate” e swana le keletšo ya kamoo re swanetšego go kgomega ka bana ka moka ba hlokago motswadi goba batswadi.

[Mongwalo wa tlase]