O be a se a Tšofala Kudu go ka Hlankela Jehofa

BATŠOFADI ba bantši ba nagana gore nywaga ya bona yeo e šetšego, e swere kholofelo e nyenyane ya lethabo. Sebapadi se se tšofetšego sa mosadi seo se tsebegago kudu se itše: “Ke sentše bophelo bja-ka, gomme ga go sa na nako ya go bo fetola . . . Ge ke dutše ke sepela ke nnoši, ke gopola morago bophelong bja-ka, gomme ga ke thabele tsela yeo ke phetšego ka yona . . . Kae le kae ga ke khutše gomme ga ke kgone le go dula fase.”

Mokgekolo yo a phetšego mo e ka bago nywaga e 2 000 e fetilego o be a se na bothata bja mohuta woo. E be e le mohlologadi wa nywaga e 84 eupja o be a le mafolofolo, a thabile gomme a ratwa ke Modimo ka mo go makatšago. Leina la gagwe e be e le Anna, gomme o be a e-na le lebaka le le kgethegilego la go thaba. E be e le lefe?

“A sa Tloxe Ntlong-kxêthwa”

Mongwadi wa Ebangedi Luka o re tlwaelanya le Anna. O re Isiraeleng, “le moporofeta wa mosadi ó be a le xôna moo, Anna morwedi wa Fanuele wa moloko wa Asere.” Bjalo ka moporofeta wa mosadi, o be a e-na le mpho ya moya o mokgethwa wa Modimo goba matla a šomago ka kgopolo e kgethegilego. Le gona Anna o ile a ba le sebaka se se kgahlišago sa go porofeta kudu-kudu tiragalong e nngwe ya bohlokwa.

Luka o re botša gore: “E be e le wa kxalê; à sa le kxarebe a tšewa a fetša nywaxa e šupilexo à na le monna wa xaxwe; Byale e be e le mohlôlôxadi wa nywaxa e masome a seswai a metšô e menê.” (Luka 2:36, 37) Go bonala, Anna a bile mohlologadi ge e be e sa le yo mofsa kudu. Basadi ba Bakriste ba e lego bahlologadi ba nywaga lege e le efe ba tseba kamoo go nyamišago ka gona go lahlegelwa ke monna yo a rategago lehung. Lega go le bjalo, ka go swana le basadi ba bantši ba ba boifago Modimo ba mehleng ya rena, Anna ga se a ka a dumelela phihlelo ye ye e nyamišago e thibela tirelo ya gagwe go Modimo.

Luka o re botša gore Anna ‘o be a sa tloge Ntlong-kgethwa’ kua Jerusalema. (Luka 2:37) O ile a thabela ka phišego tšhegofatšo yeo e tlišwago ke tirelo ye e dirwago ngwakong wa Modimo. Mediro ya gagwe e ile ya utolla gore yena go swana le kgoši ya Isiraele ye e lego mopsalme Dafida, o be a e-na le selo se tee feela seo a bego a ka se kgopela go Jehofa. Sona e be e le eng? Dafida o ile a opela ka gore: “Se ke se kxopêlaxo xo Morêna ké se tee; se ke se nyakaxo ké xore ke dulê Ngwakong wa Morêna mehla yohle kè sa phela, ke boxê mabothakxa a Morêna, ke fahloxêlê Ntlo-kxêthwa ya xaxwe.” (Psalme 27:4) Tabeng ye le gona, Anna o swana le basadi ba Bakriste lehono bao ba hwetšago lethabo ka go ba gona ka mehla lefelong la Jehofa la borapedi.

Anna o ile a neela tirelo e kgethwa go Jehofa bošego le mosegare. O ile a dira se “ka xo ikôna le ka xo rapêla,” e lego go bontšha go nyama le tlhologelo ya kgonthe. (Luka 2:37) Go ba ga ba-Juda ka tlase ga mebušo ya Ba-ntle ka nywaga e makgolo-kgolo, mo go bego go sepedišana le maemo a senyegago a bodumedi ao a ilego a fihla gaešita le tempeleng le boperisiteng bja yona, ruri ke tšeo di ka bago di baketše Anna go ikona le go lopa Jehofa Modimo. Eupja gape o be a e-na le lebaka la go thaba kudu-kudu ka baka la selo se sengwe se se kgethegilego seo se ilego sa direga letšatšing la bohlokwa ngwageng wa 2 B.C.E.

Tšhegofatšo ye e sa Letelwago

Letšatšing le la bohlokwa kudu, lesea Jesu le ile la tlišwa tempeleng ya Jerusalema ke mmago lona, Maria le tatago lona wa mogodiši, Josefa. Simeone yo a tšofetšego o ile a bona lesea gomme a bolela mantšu a boporofeta lebakeng leo. (Luka 2:25-35) Anna o be a le tempeleng bjalo ka mehleng. Luka o bega gore, “Le yêna a batamêla ka lôna lebaka leo.” (Luka 2:38) Anna o swanetše go ba a ile a hlalala gakaakang moo ge mahlo a gagwe a botšofadi a be a bona yo e bego e tla ba Mesia!

Matšatši a 40 pele ga moo, morongwa wa Modimo o be a ile a tlaba badiši kgaufsi le Betlehema ka mantšu a: “Bônang, ke Le botša taba e botse ya thabô e kxolo, e tl’o xo ba ya sethšaba ka moka. Xobane lehono Le tswáletšwe Mophološi, e lexo Kriste Morêna, mo motseng wa Dafida.” Lešaba la dira tša legodimo le ile la tumiša Jehofa gomme la oketša ka gore: “Tumišô a e yê xo Modimo maxodimong-dimong; lefaseng xo bê le khutšô, kxahlišô bathong.” (Luka 2:8-14) Ka mo go swanago, Anna o ile a tutuetšega go nea bohlatse ka Yo e bego e tla ba Mesia!

Ge a bona lesea Jesu, Anna “a rêta Morêna, a bolêla yêna ngwana eo xo bohle ba Jerusalêma ba bexo ba letetše khunoloxô.” (Luka 2:38) Go swana le Simeone yo a tšofetšego, le yena o ile a ba le tokelo ya go bona lesea Jesu kua tempeleng gomme ka ntle le pelaelo o be a hlologetše, a rapela e bile a letile Mophološi yo a holofeditšwego. Ditaba tše di botse tša gore Jesu e be le Yena yoo di be di mo kgahlišitše kudu mo a bego a sa kgone go di boloka e le sephiri.

Gaešita lege Anna mo gongwe a ka ba a be a se a letela gore o tla ba a sa phela ge Jesu a gotše, fela o ile a dira’ng? O ile a nea bohlatse ka lethabo go ba bangwe mabapi le khunologo yeo e bego e tla tla ka Mesia yo yo a tlago.

Mohlala o Mobotse wa Anna

Ke batho ba ba kae ba bodumedi ba lefase bao ba ka neago bohlatse bjo bo bjalo goba ba ba sa dutšego ba nea borapedi bošego le mosegare ba e-na le nywaga e 84? Ga go pelaelo gore, ba ka ba ba ile ba kgopela phenšene nywaga pele ga moo. Anna le Simeone e be e le ba ba fapanego. Ba beile mehlala e mebotse bakeng sa bahlanka ka moka ba ba tšofetšego ba Jehofa. Ka kgonthe, ba be ba rata ngwako wa Jehofa wa borapedi gomme ba mo tumiša ka pelo ya bona ka moka.

Go Anna re na le mohlala wo o kgahlišago kudu wa mohlologadi yo a boifago Modimo. Ge e le gabotse, tlhaloso ya Luka ya mosadi yo yo a ikokobeditšego wa motšofadi e bapelana gabotse le ditshwanelego tša mohlologadi yo a swanelegago yo a bolelwago go 1 Timotheo 5:3-16 (PK). Moo moapostola Paulo o bolela gore mohlologadi yo bjalo “o tiela ditopong le dithapelong bošego le mosegare,” ke “mosadi wa monna o tee” gomme o ‘šetše modiro o mongwe le o mongwe o botse morago.’ Anna e be e le mosadi wa mohuta woo.

Lehono, re hwetša bahlologadi ba ba botegago ba batšofadi ba nea Modimo tirelo e kgethwa bošego le mosegare diphuthegong tše dikete tša Dihlatse tša Jehofa lefaseng ka moka. Re thabela gakaakang go ba le “bo-Anna” ba ba mehleng yeno magareng ga rena!

Gaešita le botšofading, banna le basadi ba ka ineela go Modimo gomme ba bontšha se ka kolobetšo ya meetseng. Batšofadi ga se ba tšofala kudu go ka hlankela Jehofa le go nea bohlatse ka Mmušo wa Mesia wo gona bjale o hlomilwego magodimong gomme kgaufsinyane o tla tlišetšago batho ba ba kwago ditšhegofatšo tše di humilego. Batšofadi bao gona bjale ba neago Modimo tirelo e kgethwa ba ka hlatsela ditšhegofatšo tša Jehofa tšeo di ba tlelago, bjalo ka ge Anna a ile a šegofatšwa ka mo go kgethegilego nywaga-kgolo e fetilego. O be a se a tšofala kudu go ka hlankela Jehofa le go tumiša leina la gagwe le le kgethwa—gomme le bona ga se ba tšofala kudu.