Moputso wa Jobo—Mothopo wa Kholofelo
“Morêna . . . a šexofatša Jobo ka tše di tlilexo byale; tša fetiša tša mola pele.”—JOBO 42:12.
1. Ke’ng seo Jehofa a se direlago batho ba gagwe, gaešita lege diteko di ba fokodiša kudu?
JEHOFA “ba ba Mo nyakaxo ó a ba putsa.” (Ba-Hebere 11:6) Gape o tutuetša batho ba gagwe bao ba ineetšego gore ba nee bohlatse ka sebete, gaešita lege diteko di ba dirile gore ba fokole bjalo ka bahu. (Jobo 26:5; Kutollo 11:3, 7, 11) Se se ipontšhitše e le sa therešo boemong bja Jobo yo a bego a tlaišega. Gaešita lege a be a senywa leina ke bahomotši ba bararo ba maaka, ga se a tswalelwa molomo ke go boifa batho. Go e na le moo o ile a nea bohlatse ka sebete.
2. Gaešita lege di ile tša welwa ke tlaišo le mathata, Dihlatse tša Jehofa di tšwele bjang ditekong tšeo di di wetšego?
2 Dihlatse tše dintši tša Jehofa tša mehleng yeno di ile tša welwa ke tlaišo e bjalo e kgolo le mathata mo e lego gore di ile tša ba kgaufsi le go hwa. (2 Ba-Korinthe 11:23) Lega go le bjalo, ka go swana le Jobo di bontšhitše lerato la go rata Modimo le go diriša toko. (Hesekiele 14:14, 20) Gape di tšwele ditekong tše di di wetšego di ikemišeditše go kgahliša Jehofa, di matlafaleditšwe go nea bohlatse ka sebete gomme di tletše kholofelo ya kgonthe.
Jobo o Nea Bohlatse bjo Sebete
3. Jobo o neile bohlatse bja mohuta ofe polelong ya gagwe ya mafelelo?
3 Polelong ya gagwe ya mafelelo, Jobo o ile a nea bohlatse bjo bogolo kudu go feta bjo a bego a bo neile pele. O ile a tswalela bahomotši ba gagwe melomo ka mo go feletšego. Ka kodutlo e hlabago o ile a re: “Mo-hlôka-matla O mo thušitše ka’ng?” (Jobo 26:2) Jobo o tumišitše Jehofa yoo matla a gagwe a fegago kgokolo yeo e lego lefase la rena godimo ga lefeela sebakeng gomme a fega maru ao a tletšego meetse ka godimo ga lefase. (Jobo 26:7-9) Lega go le bjalo, Jobo o boletše gore dimakatšo tše bjalo ‘ke merumo feela ya ditsela tša Jehofa.’—Jobo 26:14.
4. Ke’ng seo Jobo a se boletšego ka potego, gomme ke ka baka la’ng a be a ka ipolela ka tsela yeo?
4 A kgodišegile ka go hloka molato ga gagwe, Jobo o ile a re: “Ke tlo hwa kè sešo ka re: Ke molato.” (Jobo 27:5) Ka go fapana le ditatofatšo tša maaka tšeo di ilego tša lebišwa go yena, o be a se a dira selo lege e le sefe seo se bego se swanela seo se mo wetšego. Jobo o be a tseba gore Jehofa ga a theetše dithapelo tša bahlanogi, eupja o tla putsa babotegi. Se mo gongwe se ka re gopotša gore go se go ye kae ledimo la Haramagedone le tla tloša ba kgopo boemong bja bona bja matla, gomme ba ka se phonyokge seatla sa Modimo seo se sa babalelego. Go ba go fihla nakong yeo, batho ba Jehofa ba sepela ka potego ya bona.—Jobo 27:11-23.
5. Jobo o hlalositše bjang bohlale bja therešo?
5 Nagana ka bagwera ba bararo bao ba hlalefilego ka tsela ya lefase ba theeditše ge Jobo a dutše a bontšha gore motho o dirišitše bokgoni bja gagwe go hwetša gauta, silifera le mahumo a mangwe lefaseng le lewatleng. O itše: “Thêkô ya bohlale e feta pheta ya lewatlê.” (Jobo 28:18) Bahomotši ba maaka ba Jobo ba be ba ka se kgone go reka bohlale bja therešo. Mothopo wa bjona ke Mmopi wa phefo, pula, legadima le modumo wa lona. Ka kgonthe, ‘go boifa Mong wa bohle mo go nago le tlhompho ke bjona bohlale; go tlogela bobe ke tlhaologanyo.’—Jobo 28:28.
6. Ke ka baka la’ng Jobo a ile a bolela ka bophelo bja gagwe bja pele?
6 Go sa šetšwe ditlaišego tšeo di mo wetšego, Jobo ga se a ka a kgaotša go hlankela Jehofa. Go e na le gore a furalele Yo Godimo-dimo, monna yo wa potego o ile a hlologela mehla ya gagwe ya pele ya “xo kwana le Modimo.” (Jobo 29:4) Jobo o be a sa ikgantšhe ge a be a laodiša kamoo a bego a ‘lokolla mosenyegi, a apara toko, gomme e le tatago bahloki.’ (Jobo 29:12-16) Go e na le moo, o be a tsopola ditherešo tša bophelo bja gagwe bjalo ka mohlanka yo a botegago wa Jehofa. Na o ikagetše pego e bjalo e botse? Ee, Jobo gape o be a pepentšha maaka a ditatofatšo tšeo di bego di dirwa ke baradia ba bararo ba baikaketši.
7. Jobo e be e bile motho wa mohuta ofe?
7 Jobo o ile a tshegwa ke masogana ‘ao bo-tatago ona a bego a sa rate ge ba dula le dimpja tša mehlape ya gagwe.’ O be a šišingwa a bile a tshwelwa ka mare. Gaešita lege a be a tlaišega o šoro, Jobo ga se a ka a bontšhwa kwelobohloko. (Jobo 30:1, 10, 30) Lega go le bjalo, ka gobane a be a ineetše ka mo go feletšego go Jehofa, o be a e-na le letswalo le le hlwekilego gomme o be a ka re: “A nke ke êlwê ke kêlô ya xo loka, Modimo [“a tsebe potego ya-ka,” NW] a mpônê xo hlôka bosodi.” (Jobo 31:6) Jobo e be e se sehlotlolo goba mologi wa maano-mabe, le gona ga se a palelwa ke go thuša bahloki. Gaešita lege e be e le mohumi, le ka mohla ga se a ka a bota lehumo la dilo tše di bonagalago. Go feta moo, Jobo ga se a ka a kopanela borapeding bja medimo ya diswantšho ka go nea boineelo dilong tše di sa phelego tša go swana le kgwedi. (Jobo 31:26-28) Ka ge a be a bota Modimo, o beile mohlala o mobotse bjalo ka mmotegi. Go sa šetšwe ditlaišego tša gagwe ka moka le go ba gona ga bahomotši ba maaka, Jobo o ile a dira boiphemelo bjo bohlale gomme a nea bohlatse bjo bobotse kudu. Ge a feletšwe ke mantšu, o ile a lebelela go Modimo bjalo ka Moahlodi wa gagwe le Moputsi.—Jobo 31:35-40.
Elihu o a Bolela
8. Elihu e be e le mang, gomme o bontšhitše bjang tlhompho gotee le sebete?
8 Kgaufsi go be go e-na le lesogana Elihu, setlogolo sa Busi morwa wa Nahoro gomme ka go rialo e le motswalo wa kgojana wa Aborahama mogwera wa Jehofa. (Jesaya 41:8) Elihu o ile a bontšha tlhompho go banna ba bagolo ka go theetša mahlakore ka bobedi a ngangišano. Lega go le bjalo, o ile a bolela ka sebete ka ditaba tšeo ba bego ba fošitše go tšona. Ka mohlala, bogale bja gagwe bo ile bja tukela Jobo “ge a be a bolela moya wa gagwe ka noši e le o lokilego go e na le Modimo.” (NW) Bogale bja Elihu kudu-kudu bo be bo le malebana le bahomotši ba maaka. Dipolelo tša bona di be di bonagala eka di phagamiša Modimo eupja ge e le gabotse, di be di mo goboša ka go ema ka lehlakoreng la Sathane la ngangišano. ‘Ka ge a be a hoše ditaba’ (PK) gomme a tutuetšwa ke moya o mokgethwa, Elihu e be e le hlatse ye e sa bebego sefahlego ya Jehofa.—Jobo 32:2, 18, 21.
9. Elihu o ile a umaka bjang go tsošološwa ga Jobo?
9 Jobo o be a thomile go kgomega kudu ka go itokafatša go e na le go lokafatša Modimo. Ge e le gabotse, o ile a phenkgišana le Modimo. Lega go le bjalo, ge moya wa Jobo o be o le kgaufsi le go hwa, go be go e-na le sešupo sa tsošološo. Bjang? Ee, Elihu o ile a tutueletšega go bolela gore Jehofa o gaugetše Jobo ka molaetša wo: “A se foloxêlê moleteng, ke bone sa xo mo hunolla! Ya ba xôna nama y’axwe è tl’o xo boêla, ya mphsafala, a tlo etša mola à sa le yo mofsa.”—Jobo 33:24, 25.
10. Jobo o be a swanetše go lekwa go iša tekanyong efe, eupja ke’ng seo re ka kgodišegago ka sona go ya ka 1 Ba-Korinthe 10:13?
10 Elihu o ile a phošolla Jobo bakeng sa go bolela gore ga go hole selo go thabela Modimo ka go kgomarela potego. Elihu o itše: “Modimo ó kxolê le bokxôpô; Yo-matla-ohle ó kxolê le xo foša. Ó bušetša motho ka mo xo lebanexo ’tirô tš’axwe.” Jobo o ile a dira ka bošilo ge a gatelela go loka ga gagwe ka noši, eupja o dirile bjalo a se na tsebo e lekanego le temogo. Elihu o okeditše ka gore: “A Jobo a lekwê xo ya xo ile, ka xe a fetola bo-ka batho-babe.” (Jobo 34:10, 11, 35, 36) Ka mo go swanago, tumelo ya rena le potego di ka hlatselwa ka mo go feletšego ge feela re lekwa ‘go ya go ile’ ka tsela e itšego. Lega go le bjalo, Tatago rena yo lerato wa legodimong a ka se re lese re lekwa go feta kamoo re ka kgonago go kgotlelela.—1 Ba-Korinthe 10:13.
11. Ge re lekwa o šoro, ke’ng seo re swanetšego go se gopola?
11 Ge Elihu a dutše a tšwela pele, o ile a bontšha gore Jobo o be a gatelela kudu go loka ga gagwe. Tlhokomelo e swanetše go lebišwa go Modiri wa rena yo Mogolo. (Jobo 35:2, 6, 10) Elihu o itše Modimo “xa a phediše yo mobe; ó nea babotlana tše di ba swanetšexo.” (Jobo 36:6) Ga go na motho yo a ka solago tsela ya Modimo gomme a bolela gore e bile yo a sa lokago. Ke yo a phagamego go feta kamoo re tsebago ka gona, gomme nywaga ya gagwe ke e sa felego ka mo go sa latišegego. (Jobo 36:22-26) Ge o lekwa o šoro, gopola gore Modimo wa rena yo a phelago go ya go ile ke yo a lokilego le gore o tla re putsa ka baka la mediro ya rena ya potego ya go mo tumiša.
12. Dipolelo tša go phetha tša Elihu di bontšha’ng mabapi le go diragatša ga Modimo kahlolo go ba kgopo?
12 Ge Elihu a be a dutše a bolela, ledimo le be le ipopa. Ge le be le dutše le batamela, pelo ya gagwe e ile ya thoma go fofa-fofa le go thothomela. O ile a bolela ka dilo tše dikgolo tšeo di dirilwego ke Jehofa gomme a re: “Wene Jobo, theetša ’taba tšé, O lemoxê matete a Modimo.” Ka go swana le Jobo, re swanetše go ela hloko mediro e makatšago ya Modimo le seriti sa gagwe se se boifišago. Elihu o itše: ‘Re ka se ke ra fihlela Yo matla ka moka; o phagamile matleng le kahlolong le bontšing bja go loka; ga a go kgopamiše. Ke ka baka leo batho ba swanetšego go mmoifa.’ (Jobo 37:1, 14, 23, 24, bapiša le PK.) Dipolelo tša go phetha tša Elihu di re gopotša gore ge Modimo kgaufsinyane a phetha kahlolo godimo ga ba kgopo, a ka se ke a kgopamiša toka le toko gomme o tla phološa bao ba mmoifago bjalo ka barapedi ba gagwe bao ba mo hlomphago. Ke tokelo e kgolo gakaakang go ba gare ga babotegi ba bjalo bao ba amogelago Jehofa bjalo ka Mmuši wa Legohle! Kgotlelela go etša ge Jobo a dirile, gomme le ka mohla o se ke wa dumelela Diabolo a go tloša boemong bja gago bjo bo šegofaditšwego gare ga mašaba a a thabilego.
Jehofa o Araba Jobo
13, 14. (a) Jehofa o ile a thoma go botšiša Jobo mabapi le eng? (b) Ke dintlha dife tšeo di ka hwetšwago go tše dingwe tša dipotšišo tšeo Modimo a di botšišitšego Jobo?
13 Jobo o swanetše go ba a be a maketše gakaakang ge Jehofa a be a bolela le yena go tšwa ledimong! Ledimo leo e be e le tiro ya Modimo, ka go se swane le phefo e kgolo yeo Sathane a e dirišitšego go wiša ntlo gomme a bolaya bana ba Jobo. Jobo o be a hloka mantšu ge Modimo a be a botšiša gore: “O be o le kae mola kè thêa lefase? . . . Mo-thêa-mathêkxa-dikhutlô tša lôna ké mang? Ké tša mola xò hlalala ’naledi tša mesô tšohle, xò xobêla bana bohle ba Modimo.” (Jobo 38:4, 6, 7) Jehofa o ile a kgobelela Jobo ka dipotšišo tše di latelanago mabapi le lewatle, kobo ya lona yeo e lego maru, mahube, dikgoro tša lehu, seetša le lefsifsi le dihlopha tša dinaledi. Jobo o be sa kgone go bolela selo ge a be a botšišwa gore: “A O tseba melaô e beetšwexo maxodimo?”—Jobo 38:33.
14 Dipotšišo tše dingwe di bontšhitše gore pele ga ge motho a ka bopja gomme a newa matla a go buša dihlapi, dinonyana, diphoofolo le digagabi, Modimo o be a di fepa—ka ntle le thušo lege e le efe ya motho goba keletšo. Dipotšišo tše dingwe tša Jehofa di boletše ka dibopiwa tša go swana le nare, mpšhe le pitsi. Jobo o ile a botšišwa gore: “Xe lenong lè akalala, a le romilwe ke wene? Xe le axa sehlaxa sa lôna makalakaleng?” (Jobo 39:27) Ruri ga se yena! Akanya kamoo Jobo a ilego a arabela ka gona ge Modimo a be a mmotšiša gore: “Mo-tšea-kxang le Yo-matla-ohle a ó sa re ruta?” Ga go makatše ge Jobo a ile a re: “Xe e le nna, xa ke motho wa selô. Nka fetola ka’ng? Ke swara molomo ka seatla.” (Jobo 40:2, 4) Ka ge Jehofa e le yo a nepilego ka mehla, ge e ba re ka lekega gore re belaele malebana le yena, gona re swanetše go ‘swara molomo wa rena ka seatla.’ Dipotšišo tša Modimo gape di ile tša godiša bogolo bja gagwe, seriti le matla bjalo ka ge di bonagatšwa tlholong.
Behemothe le Leviathane
15. Behemothe ka tlwaelo e tšewa e le phoofolo efe, gomme tše dingwe tša dika tša yona ke dife?
15 Jehofa ka mo go latelago o bolela ka Behemothe, yeo ka tlwaelo e tšewago e le kubu. (Jobo 40:15-24) Ke e makatšago ka baka la bogolo bja yona, boima bja yona bjo bogolo, letlalo la yona le thata, phoofolo ye yeo e jago dimela ‘e fula bjang.’ Methopo ya matla a yona e dinokeng tša yona le ditšhikeng tša mpa ya yona. Marapo a maoto a yona a tiile bjalo ka “dikôta tša mphiri.” Behemothe ga e tšhoge mafuleng a meetse, eupja e thala ka bonolo e lebile moo mafula a tšwago gona.
16. (a) Tlhaloso ya Leviathane e swanela sebopiwa sefe, gomme ditherešo tše dingwe ka yona ke dife? (b) Matla a Behemothe le a Leviathane a ka bolela’ng mabapi le go phetha dikabelo tirelong ya Jehofa?
16 Modimo gape o botšišitše Jobo gore: “Kwena [“Leviathane,” NW] a O ka e xoxa ka kxwêxa? A O ka e tlêma mohlaxare ka lenti?” Tlhaloso ya Leviathane e swanela kwena. (Jobo 40:25–41:26 Jb 41:1-34, NW) E ka se ke ya dira kgwerano ya khutšo le motho lege e le ofe, gomme ga go na motho yo bohlale yo a nago le sebete kudu gore a ka tsoša segagabi se. Mesebe ga e e dire gore e tšhabe, gomme “e thsêxa thšoša xe e mênaxana.” Leviathane e galefilego e biloša madiba bjalo ka pitša ye e belago ya setlolo. Therešo ya gore Leviathane le Behemothe e be e le tše matla kudu go feta Jobo e ile ya thuša go mo kokobetša. Le rena re swanetše go dumela ka boikokobetšo gore ga re matla rena ka borena. Re nyaka bohlale bjo bo newago ke Modimo le matla gore re efoge meno a Sathane, Noga le gore re phethagatše dikabelo tša rena tirelong ya Jehofa.—Ba-Filipi 4:13; Kutollo 12:9.
17. (a) Jobo o ile a “bôna Modimo” bjang? (b) Ke’ng seo se ilego sa bontšhwa ke dipotšišo tšeo Jobo a bego a sa kgone go di araba, gomme se se ka re thuša bjang?
17 Ka ge a be a kokobeditšwe ka mo go feletšego, Jobo o ile a lemoga pono ya gagwe e fošagetšego gomme a dumela gore o boletše ka go hloka tsebo. Lega go le bjalo, o bontšhitše tumelo ya gore o be a tla “bôna Modimo.” (Jobo 19:25-27) Seo se be se tla direga bjang, ka ge go se na motho yo a ka bonago Jehofa gomme a tšwela pele a phela? (Ekisodo 33:20) Ge e le gabotse, Jobo o bone pontšho ya matla a Modimo, o kwele lentšu la Modimo gomme a bulwa mahlo a gagwe a kwešišo gore a bone therešo ka Jehofa. Jobo ka go rialo ‘o ile a inyatša gomme a itshola leroleng le moloreng.’ (Jobo 42:1-6) Dipotšišo tše dintši tšeo a sa kago a kgona go di araba di hlatsetše go phagama ga Modimo gomme di bontšhitše gore motho ke yo monyenyane, gaešita le motho yo a ineetšego go Jehofa go etša kamoo Jobo a bego a le ka gona. Se se re thuša go bona gore dikgahlego tša rena ga se tša swanela go bewa ka godimo ga go kgethagatšwa ga leina la Jehofa le go lwelwa ga bogoši bja gagwe. (Mateo 6:9, 10) Selo sa pele seo re kgomegago ka sona e swanetše go ba go kgomarela potego go Jehofa le go godiša leina la gagwe.
18. Ke’ng seo bahomotši ba maaka ba Jobo ba ilego ba swanelwa ke go se dira?
18 Lega go le bjalo, go thwe’ng ka bahomotši ba maaka bao ba bego ba ipona ba lokile? Jehofa a ka be a ile a bolaya ka tshwanelo Elifase, Bilidada le Tsofara ka baka la go se bolele ga bona therešo ka yena, go etša ge Jobo a boletše. Modimo o itše: “Byale yang Le tšeê dipôwana tše di šupaxo, le diphôkwana tše di šupaxo, Le tlê xo Jobo mohlanka wa-ka, Le hlabê sehlabêlô sa lena. Xomme Jobo mohlanka wa-ka a Le rapêlêlê.” Bagwera ba ba bararo ba ile ba swanelwa ke gore ba ikokobetše gore ba dumelelane le seo. Jobo wa mmotegi o be a swanetše go ba rapelela, gomme Jehofa o ile a hwetša thapelo ya gagwe e amogelega. (Jobo 42:7-9) Eupja go thwe’ng ka mosadi wa Jobo, yo a ilego a mo kgothaletša gore a roge Modimo gomme a hwe? Go bonala a ile a boelanywa le Jobo ka kgaugelo ya Modimo.
Meputso e Holofeditšwego e re Nea Kholofelo
19. Mabapi le Jobo, Jehofa o bontšhitše bjang go phagamela ga Gagwe Diabolo?
19 Gatee-tee ge Jobo a kgaoditše go belaela ka ditlaišego tša gagwe gomme a tsošološeditšwe tirelong ya Modimo, Jehofa o ile a fetoša ditaba bakeng sa gagwe. Ka morago ga ge Jobo a rapeletše bagwera ba ba bararo, Modimo ‘o ile a hunolla ditlemo tša gagwe’ gomme a mo nea ‘lehumo la etša lela la pele ge le balwa gabedi.’ Jehofa o ile a bontšha go phagamela ga Gagwe Diabolo ka go gomiša seatla sa Sathane seo se bakago bolwetši gomme a fodiša Jobo ka mohlolo. Modimo gape o ile a gomišetša madira a batemona morago boemong bja go se bake tšhitišo ka go buša a agela Jobo legora ka tšhireletšo ya barongwa ba Gagwe.—Jobo 42:10; Psalme 34:7.
20. Jehofa o ile a putsa le go šegofatša Jobo ka ditsela dife?
20 Banababo Jobo, dikgaetšedi le bao a bego a tlwaelane le bona pele ba ile ba tšwela pele ba e-tla go ja le yena, ba mo kwela bohloko gomme ba mo homotša mabapi le tlalelo yeo Jehofa a bego a dumeletše gore e mo wele. Yo mongwe le yo mongwe wa bona o ile a nea Jobo tšhelete le palamonwana ya gauta. Jehofa o ile a šegofatša mafelelo a Jobo go feta mathomo a gagwe, mo e lego gore o ile a ba le dinku tše 14 000, dikamela tše 6 000, dipane tše 1 000 tša dikgomo gotee le dipokolo tša ditšhadi tše 1 000. Jobo gape o ile a ba le barwa ba šupago le barwedi ba bararo, e lego palo e lekanago le ya bao a bego a e-na le bona pele. Barwedi ba gagwe—Jemina, Ketsia le Kerene-Hapuka—e be le basadi ba babotse go phala bohle nageng gomme Jobo o ile a ba nea lefa gare ga dikgaetšedi tša bona. (Jobo 42:11-15) Go feta moo Jobo o ile a phela nywaga e mengwe e 140 gomme a bona meloko e mene ya bana ba gagwe. Pego e phetha ka gore: “Jobo ó hwile a tšofetše, à khoše bophelô.” (Jobo 42:16, 17) Go oketšwa ga bophelo bja gagwe e be e le modiro wa mohlolo wa Jehofa Modimo.
21. Re thušwa bjang ke pego ya Mangwalo mabapi le Jobo, gomme ke’ng seo re swanetšego go ikemišetša go se dira?
21 Pego ya Mangwalo mabapi le Jobo e re dira gore re phafogele kudu maano a Sathane, gomme e re thuša go bona kamoo bogoši bja legohle bo tswalanago le potego ya batho ka gona. Ka go swana le Jobo, bohle bao ba ratago Modimo ba tla lekwa. Eupja re ka kgotlelela bjalo ka ge Jobo a dirile. O ile a tšwa ditekong tšeo di mo wetšego a e-na le tumelo le kholofelo, gomme meputso ya gagwe e bile e mentši. Bjalo ka bahlanka ba Jehofa lehono, re na le tumelo ya kgonthe le kholofelo. A kholofelo e botse gakaakang yeo Moputsi yo Mogolo a e beilego ka pele ga yo mongwe le yo mongwe wa rena! Go dula ba nagana ka moputso wa legodimong go tla thuša batlotšwa go hlankela Modimo ka potego bophelong bja bona ka moka ge ba le mo lefaseng. Ba bantši bao ba nago le ditebelelo tša lefaseng ba tla putswa ka tsogo ya go tsogela Paradeiseng mo lefaseng gotee le Jobo ka boyena. Ba e-na le kholofelo e bjalo ya kgonthe ka pelong le monaganong, anke bohle bao ba ratago Modimo ba hlatsele Sathane e le moaketši ka go ema ba tiile ka lehlakoreng la Jehofa e le babotegi le bathekgi ba botegago ba bogoši bja gagwe bja legohle.
O be o tla Araba Bjang?
◻ Dintlha tše dingwe tšeo di boletšwego ke Jobo karabong ya gagwe ya mafelelo go bahomotši ba maaka e bile dife, gomme di bile le mafelelo afe?
◻ Elihu o ipontšhitše bjang e le hlatse ye e sa bebego sefahlego ya Jehofa?
◻ Tše dingwe tša dipotšišo tšeo Modimo a di botšišitšego Jobo ke dife, gomme di bile le mafelelo afe?
◻ O hotšwe bjang ke pego ya Mangwalo mabapi le Jobo?
[Pictures on page 18]
Dipolelo tša Jehofa ka Behemothe le Leviathane di thušitše go kokobetša Jobo