Hlankela Jehofa ka go Thaba ga Pelo

“Dithoxô tšé ka moka di tlo Xo wêla . . . Molato e tlo ba xe O sa ka wa dirêla Morêna Modimo wa xaxo ka thabô le ka [go thaba ga pelo, NW].”—DOITERONOMIO 28:45-47.

1. Go na le bohlatse bofe bja gore ba ba hlankelago Jehofa ba thabile kae le kae mo ba mo hlankelago ba le gona?

BAHLANKA ba Jehofa ke ba thabilego go sa šetšwe ge e ba ba dira thato ya gagwe legodimong goba lefaseng. “’Naledi tša mesô” tšeo e lego barongwa di ile tša goeletša ka lethabo go theweng ga lefase, gomme ga go na pelaelo ya gore barongwa ba dikete-kete ba legodimong ‘ba theetša lentšu la Modimo’ ka lethabo. (Jobo 38:4-7; Psalme 103:20) Morwa wa Jehofa yo a tswetšwego a nnoši e be e le “mošomi yo a nago le bokgoni” yo a thabilego legodimong gomme o ile a thabela go dira thato ya Modimo e le motho Jesu Kriste lefaseng. Go oketša moo, “[o kgotleletše kota ya tlhokofatšo, NW], le xe se se bexo se mo loketše e le lethabô, a dumêla xo xobošwa, a kxôna xo y’o dula ka letsoxong le letona la sedulô sa boxoši sa Modimo.”—Diema 8:30, 31; Ba-Hebere 10:5-10; 12:2.

2. Ke eng se se bego se laola go hwetša ga ba-Isiraele ditšhegofatšo goba dithogako?

² Ba-Isiraele ba be ba e-ba le lethabo ge ba be ba kgahliša Modimo. Eupša go thwe’ng ge e ba ba be ba sa mo kwe? Ba ile ba lemošwa gore: “[Dithogo] di tl’o xo kxomarêla le bana ba xaxo è le leswaô le matete ka xo sa felexo. Molato e tlo ba xe O sa ka wa dirêla Morêna Modimo wa xaxo ka thabô le ka [go thaba ga pelo, NW] mola Ò sa atetšwe ke tše botse. Manaba a xaxo, a Morêna a tl’o xo a roma, O tlo a dirêla ka tlala le ka lenyôra le ka thšexo, Ò šikere joko ya thsipi molaleng wa xaxo, a ba a Xo fediša.” (Doiteronomio 28:45-48) Ditšhegofatšo le dithogako di ile tša bontšha gabotse bao e bego e le bahlanka ba Jehofa le bao e bego e se bona. Dithogako tše bjalo di ile tša ba tša kgonthišetša gore melao ya Modimo ya motheo le merero ya gagwe e ka swarwa ka go hloka tlhompho, goba gore e ka nyatšwa. Ka ge ba-Isiraele ba ile ba gana go kwa ditemošo tša Jehofa tša go fedišwa le go išwa bothopša, Jerusalema e ile ya ba “leroxa mo dithšabeng tša lefase.” (Jeremia 26:6) Ka gona anke re kweng Modimo gomme re thabele go amogelwa ke yena. Lethabo ke e nngwe ya ditšhegofatšo tše dintši tša Modimo tše di hwetšwago ke ba ba mmoifago.

Kamoo go ka Hlankelwago ka “go Thaba ga Pelo”

3. Pelo ya seswantšhetšo ke eng?

³ Ba-Isiraele ba be ba swanetše go hlankela Jehofa “ka thabô le ka [go thaba ga pelo].” Bahlanka ba Modimo ba mehleng yeno le bona ba swanetše go dira bjalo. Go thaba ke “go hlalala; go tlala lethabo.” Gaešita le ge pelo ya kgonthe e bolelwa ka Mangwalong, ga e nagane goba go akanya e le ka kgonthe. (Ekisodo 28:30) Modiro wa yona o mogolo ke go pompa madi ao a fepago disele tša mmele. Lega go le bjalo, mabakeng a mantši kudu Beibele e bolela ka pelo ya seswantšhetšo yeo e lego se se fetišago mothopo wa maikwelo a borutho, tutuetšo le bohlale. Go thwe e emela “karolo ya motheo ka kakaretšo, bokagare, gomme e emela motho wa ka gare bjalo ka ge a iponagatša ka mediro ya gagwe ka moka e fapa-fapanego, dikganyogo tša gagwe, lerato la gagwe, maikwelo a gagwe, diphišegelo tša gagwe, merero ya gagwe, dikgopolo tša gagwe, menagano ya gagwe, dikakanyo tša gagwe, bohlale bja gagwe, tsebo ya gagwe, bokgoni bja gagwe le ditumelo gotee le tlhaologanyo, mogopolo wa gagwe le go phakgama ga gagwe.” (Journal of the Society of Biblical Literature and Exegesis, 1882, letlakala 67) Pelo ya rena ya seswantšhetšo e akaretša maikwelo a rena gotee le lethabo.—Johane 16:22.

4. Ke eng se se ka re thušago go hlankela Jehofa Modimo ka go thaba ga pelo?

⁴ Ke eng se se ka re thušago go hlankela Jehofa ka go thaba ga pelo? Pono e nepagetšego le ya tebogo bakeng sa ditšhegofatšo le ditokelo tše di tšwago go Modimo e a thuša. Ka mohlala, re ka nagana ka lethabo ka tokelo ya rena ya go neela “tirelo e kgethwa” go Modimo wa therešo. (Luka 1:74, NW) Go na le tokelo e sepedišanago le ya go bitšwa ka leina la Jehofa re le Dihlatse tša gagwe. (Jesaya 43:10-12) Re ka tlaleletša go se lethabo la go tseba gore ka go latela Lentšu la Modimo re a mo kgahliša. Ke lethabo le legolo gakaakang go bonagatša seetša sa moya, ka go rialo ra thuša ba bantši go tšwa lefsifsing!—Mateo 5:14-16; bapiša le 1 Petro 2:9.

5. Mothopo wa lethabo la go boifa Modimo ke eng?

⁵ Lega go le bjalo, go hlankela Jehofa ka go thaba ga pelo ga se feela taba ya go nagana ka tsela e nepagetšego. Ke mo go holago go ba le pono e nepagetšego. Eupša lethabo la go boifa Modimo ga se selo seo re ka se tšweletšago ka go aga semelo. Ke seenywa sa moya wa Jehofa. (Ba-Galatia 5:22, 23) Ge e ba re se na lethabo le le bjalo, gona re ka swanelwa ke go dira dipeakanyo e le gore re pheme go nagana goba go dira dilo ka tsela yeo e sego ya Mangwalo yeo e ka nyamišago moya wa Modimo. (Ba-Efeso 4:30) Lega go le bjalo, ka ge re le ba ba ineetšego go Jehofa, anke re se ke ra boifa gore go hlaela ga lethabo le le tšwago pelong ka dinako tše dingwe ke pontšho ya go se amogelwe ke Modimo. Ga se ra phethagala gomme re welwa ke bohloko, manyami gaešita le go gateletšega maikwelong ka dinako tše dingwe, eupša Jehofa o a re kwešiša. (Psalme 103:10-14) Ka gona, anke re rapeleleng moya wa gagwe o mokgethwa re gopola gore seenywa sa wona sa lethabo se tšwa go Modimo. Tatago rena yo lerato wa legodimong o tla araba dithapelo tše bjalo gomme o tla re dira gore re kgone go mo hlankela ka go thaba ga pelo.—Luka 11:13.

Ge go se na Lethabo

6. Re swanetše go dira’ng ge e ba go se na lethabo tirelong ya rena go Modimo?

⁶ Ge e ba go se na lethabo tirelong ya rena, mo gongwe re ka fokola go hlankeleng ga rena Jehofa mafelelong goba gaešita le go ipontšha re le ba ba sa mmotegelego. Ka gona, e tla ba bohlale go hlahloba maikemišetšo a rena ka boikokobetšo le ka thapelo gomme re dire dipeakanyo tše di nyakegago. Gore re be le lethabo le le tšwago go Modimo, re swanetše go hlankela Jehofa ka lerato le ka pelo, moya le monagano wa rena ka moka. (Mateo 22:37) Ga se ra swanela go hlankela ka kgopolo ya phadišano ka gobane Paulo o ngwadile gore: “Xe re phela ka Môya, xôna a re swareng tsela rè išwa ke wôna Môya. Re se kê ra ba ba xo kxanthša lefêla, le ba xo rumolana [“ra tsoša phadišano,” NW], le ba xo tsebafêlana.” (Ba-Galatia 5:25, 26) Re ka se ke ra ba le lethabo la kgonthe ge e ba re hlankela ka gobane re nyaka go phala ba bangwe goba re nyaka go retwa.

7. Re ka tsošološa bjang go thaba ga rena ga pelo?

⁷ Ke mo go thabišago go phelela boineelo bja rena go Jehofa. Ge re be re sa tšwa go ineela go Modimo, re ile ra kgomarela tsela ya Bokriste ya go phela ka phišego. Re be re ithuta Mangwalo le go tšea karolo ka mehla dibokeng. (Ba-Hebere 10:24, 25) Re be re thabela go tšea karolo bodireding. Eupša go thwe’ng ge e ba lethabo la rena le fokotšegile? Thuto ya Beibele, go ba gona dibokeng, go tšea karolo bodireding—ee, go akaretšwa ka mo go tletšego sebopegong se sengwe le se sengwe sa Bokriste—go swanetše go nea maphelo a rena go tsepama ga moya le go tsošološa bobedi lerato leo re bego re e-na le lona mathomong le go thaba ga rena ga pelo ga nakong e fetilego. (Kutollo 2:4) Ka gona re ka se ke ra swana le ba bangwe ba ba se nago lethabo e bile gantši ba nyaka thušo ya moya. Bagolo ba thabela go thuša, eupša rena re le batho ka o tee ka o tee re swanetše go phelela boineelo bja rena go Modimo. Ga go na motho yo mongwe yo a ka re direlago se. Ka go rialo anke re ipeeleng pakane ya go latela mokgwa wa ka mehla wa Bokriste e le gore re phelele boineelo bja rena go Jehofa gomme re be le lethabo la kgonthe.

8. Ke ka baka la’ng letswalo le le sekilego e le la bohlokwa ge e ba re nyaka go ba ba ba thabilego?

⁸ Ge e ba re tla ba le lethabo leo e lego seenywa sa moya wa Modimo, re swanetše go ba le letswalo le le sekilego. Ge Kgoši Dafida wa Isiraele a be a leka go uta sebe sa gagwe, o be a nyamile o šoro. Ge e le gabotse, monola wa bophelo bja gagwe o ile wa bonala eka o a fela gomme a ka ba a ile a babja mmeleng. O ile a imologa gakaakang ge a be a itshola gomme a ipobola! (Psalme 32:1-5) Re ka se ke ra thaba ge e ba re uta sebe se itšego se segolo. Seo ruri se ka re bakela go phela bophelo bja matshwenyego. Ee, yeo ga se tsela ya go hwetša lethabo. Eupša go ipobola le go itshola di tliša kimologo le go tsošološwa ga moya wa lethabo.—Diema 28:13.

Go Letela ka Lethabo

9, 10. (a) Aborahama o ile a amogela kholofetšo efe, eupša tumelo ya gagwe le lethabo di ka ba di ile tša lekwa bjang? (b) Re ka holwa bjang ke mehlala ya Aborahama, Isaka le Jakobo?

⁹ Go ba le lethabo ge re be re ithuta la mathomo ka morero wa Modimo ke taba e nngwe, eupša go dula re thabile ge nywaga e dutše e e-ya ke e nngwe e fapanego. Se se ka swantšhetšwa tabeng ya Aborahama yo a botegago. Ka morago ga ge a lekile go dira sehlabelo ka morwa wa gagwe Isaka a laetšwe ke Modimo, morongwa o ile a tliša molaetša wo: “Morêna ó re: ke enne ka Nna, ka xe ke bone se O se dirilexo, Ò sa ka wa ntima morwa wa xaxo e lexo o tee. Ke re: Ke tlo Xo šexofatša xaxolo; bana ba xaxo ke tlo ba atiša xaxolo byalo ka dinaledi tša lexodimong, le byalo ka lešabašaba la lebotong la lewatlê; ’me bana ba xaxo e tlo ba beng ba dikxôrô tša manaba a bôná. Xomme dithšaba ka moka tša lefase di tlo šexofala ka peu ya xaxo, ka ’baka la xobane O kwele lentšu la-ka.” (Genesi 22:15-18) Ga go pelaelo gore Aborahama o be a thabetše kholofetšo ye kudu.

¹⁰ Aborahama a ka ba a be a letetše gore Isaka e be e tla ba “peu” yeo ditšhegofatšo tše di holofeditšwego di bego di tla tla ka yona. Eupša ge nywaga e dutše e e-ya go sa phethege selo se se kgahlišago ka Isaka, go ka ba go ile gwa leka tumelo le lethabo la Aborahama le lapa la gagwe. Go kgonthišetša ga Modimo kholofetšo go Isaka le go morwa wa gagwe Jakobo ka morago, go ile gwa ba kgodiša gore go tla ga Peu go be go sa letetšwe gomme se se ile sa ba thuša go kgomarela tumelo ya bona le lethabo. Lega go le bjalo, Aborahama, Isaka le Jakobo ba hwile ba se ba bona go phethagala ga dikholofetšo tša Modimo go bona, eupša e be e se bahlanka ba ba sa thabago ba Jehofa. (Ba-Hebere 11:13) Le rena re ka tšwela pele re hlankela Jehofa ka tumelo le lethabo ge re dutše re letetše go phethagala ga dikholofetšo tša gagwe.

Lethabo go sa Šetšwe Tlaišo

11. Ke ka baka la’ng re ka thaba go sa šetšwe tlaišo?

¹¹ Ka ge re le bahlanka ba Jehofa, re ka hlankela Jehofa ka go thaba ga pelo gaešita le ge re tlaišwa. Jesu o boletše ba ba tlaišwago ka baka la gagwe e le ba lehlogonolo, gomme moapostola Petro o itše: “Sa lena a e bê xo thaba xe le lena Lè e-ba batee le Kriste ka xo tlaišwa, xore mohla letaxô la xaxwe le bônalaxo, Le tlê Le thabê Le hlalalê. Xe Le xobošwa ka ’baka la Leina la Kriste, xôna Le ba lehlôxônôlô, xobane ké xôna Lè okametšwe ke Môya wa letaxô le matla, Môya wa Modimo.” (1 Petro 4:13, 14; Mateo 5:11, 12) Ge e ba le kgotlelela tlaišo le tlaišego ka baka la go loka, le na le moya wa Jehofa e bile o a le amogela gomme seo ruri se godiša lethabo.

12. (a) Ke ka baka la’ng re ka fenya diteko tša tumelo ka lethabo? (b) Ke thuto efe ya motheo yeo e ka ithutwago tabeng ya mo-Lefi yo mongwe yo a bego a le bothopša?

¹² Re ka fenya diteko tša tumelo ka lethabo ka gobane Modimo ke Setšhabelo sa rena. Se se bontšhitšwe gabotse go Dipsalme 42 le 43. Mo-Lefi yo mongwe o be a le bothopša ka lebaka le itšego. O ile a hlologela kudu go rapela tempeleng ya Modimo moo a ilego a ikwa bjalo ka tshepe ya tshadi e nyorilwego yeo e kganyogago meetse lefelong le le omilego le le sa melego selo. O be a “nyoretšwe” goba a hlologetše Jehofa le tokelo ya go rapela Modimo sekgethweng sa Gagwe. (Psalme 42:1, 2) Phihlelo ya lethopša le e swanetše go re tutueletša go bontšha tebogo bakeng sa bogwera bjo re bo thabelago le batho ba Jehofa. Ge e ba boemo bjo bo swanago le go tswalelelwa ka baka la tlaišo bo re thibela ka nakwana go ba le bona, gona anke re naganeng ka lethabo la nakong e fetilego re le gotee tirelong e kgethwa gomme re rapelele kgotlelelo ge re dutše re ‘letetše Modimo’ gore a re bušetše modirong wa ka mehla gotee le barapedi ba gagwe.—Psalme 42:4, 5, 11, NW; 43:3-5.

“Hlankêlang Morêna Lè Thabile”

13. Psalme 100:1, 2 e bontšha bjang gore lethabo e swanetše go ba karolo ya tirelo ya rena go Modimo?

¹³ Lethabo e swanetše go ba karolo ya tirelo ya rena go Modimo. Se se bontšhitšwe kopelong ya ditebogo yeo go yona mopsalme a opetšego ka gore: “Xobêla Morêna mexobô, wêna lefase lohle. Hlankêlang Morêna Lè thabile; Le fihlê pele xa xaxwe ka xo hlalala.” (Psalme 100:1, 2) Jehofa ke “Modimo yo a thabilego” gomme o nyaka gore bahlanka ba gagwe ba thabele go phelela boineelo bja bona go yena. (1 Timotheo 1:11, NW) Batho ba ditšhaba ka moka ba swanetše go hlalala go Jehofa, gomme dipolelo tša rena tša theto e swanetše go ba tše matla go swana le ‘legoa la phenyo’ la madira a fentšego. Ka ge go hlankela Modimo e le mo go lapološago, go swanetše go sepedišana le go thaba. Ka gona, mopsalme o kgothaleditše batho gore ba tle pele ga Modimo “ka xo hlalala.”

14, 15. Psalme 100:3-5 e šoma bjang go batho ba Jehofa ba ba thabilego lehono?

¹⁴ Mopsalme o okeditše ka gore: “Tsebang [lemogang] gobane Jehofa ke Modimo; ke Yena a re dirilego, ga ra itira, re setšhaba sa gagwe, re dinku tša mafulo a gagwe.” (Psalme 100:3, PK) Ka ge Jehofa e le Mmopi wa rena, ke mong wa rena go etša ge modiši e le mong wa dinku. Modimo o re hlokomela gabotse kudu moo re mo retago ka lethabo. (Psalme 23) Mopsalme o bile o opetše mabapi le Jehofa ka gore: “Tsênang ’kxorong tša xaxwe ka xo leboxa, Le tlê malapeng a xaxwe ka xo rêta. Mo leboxeng, Le xodišeng leina l’axwe. Xobane Morêna ké yo boló, ’me botho bya xaxwe ké bya neng le neng; therešô ya xaxwe e tlo ba xôna ka xo sa felexo.”—Psalme 100:4, 5.

¹⁵ Lehono, batho ba ba thabilego ba ditšhaba ka moka ba tsena malapeng a tempele ya Jehofa go ya go neela ditebogo le theto. Re godiša leina la Modimo ka lethabo ka go bolela ka Jehofa gabotse ka mehla, gomme dika tša gagwe tše dibotse di re tutueletša go mo reta. O lokile ka mo go feletšego gomme go ka ithekgwa ka mehla ka botho bja gagwe bjo lerato goba kwelobohloko ya gagwe bakeng sa bahlanka ba gagwe, gobane ke ya ka mo go sa felego. Go iša “ka xo sa felexo,” Jehofa o botegela go bontšha lerato go ba ba dirago thato ya gagwe. (Ba-Roma 8:38, 39) Ka gona, re tloga re e-na le lebaka le le kwalago la go ‘hlankela Jehofa re thabile.’

Thabang Kholofelong ya Lena

16. Bakriste ba ka thaba dikholofelong le ditebelelong dife?

¹⁶ Paulo o ngwadile gore: “Thabang kholofelong.” (Ba-Roma 12:12) Balatedi ba Jesu Kriste ba ba tloditšwego ba thaba kholofelong ya bona ya letago ya bophelo bjo bo se nago lehu bja legodimong bjoo Modimo a ba neilego bjona ka Morwa wa gagwe. (Ba-Roma 8:16, 17; Ba-Filipi 3:20, 21) Bakriste ba ba nago le kholofelo ya bophelo bjo bo sa felego Paradeiseng lefaseng le bona ba na le mabaka a go thaba. (Luka 23:43) Bahlanka ka moka ba ba botegago ba Jehofa ba na le lebaka la go thaba kholofelong ya Mmušo, ka gobane ba tla ba karolo ya mmušo woo wa legodimo goba ba phela tikologong ya wona ya lefaseng. Ke tšhegofatšo e thabišago gakaakang!—Mateo 6:9, 10; Ba-Roma 8:18-21.

17, 18. (a) Ke eng se se ilego sa bolelwa e sa le pele go Jesaya 25:6-8? (b) Boporofeta bjo bja Jesaya bo phethagatšwa bjang mo nakong ye, gomme go thwe’ng ka go phethagala ga bjona ga nakong e tlago?

¹⁷ Jesaya le yena o boletše e sa le pele ka bokamoso bjo bo thabišago bakeng sa batho ba ba kwago. O ngwadile gore: “Morêna wa mašaba ó dirêla dithšaba ka moka monyanya thabeng yé, monyanya wa makhura, wa dinwewa tše monate, wa dinwewa tše di hlotlilwexo. Xomme thabeng yé Morêna ó tlo tloša ’šira le le širilexo ’thšaba tšohle, ’šêla le le bipilexo ba-ntlê bohle. Lehu ó tlo le tloša ka xo sa felexo; Mong ’a bohle Morêna ó tlo phomola mexôkxô mahlong ohle; ’me kxoboxô ya sethšaba s’axwe ó tlo e široša dinaxeng ka moka; xobane Morêna ó r’yalo.”—Jesaya 25:6-8.

¹⁸ Monyanya wa moya wo re o thabelago lehono re le barapedi ba Jehofa ke monyanya wa lethabo e le ka kgonthe. Ge e le gabotse, lethabo la rena le oketšega kudu ge re dutše re hlankela Modimo ka mafolofolo re fagahletše monyanya wa kgonthe wa dilo tše dibotse wo a o holofeditšego bakeng sa lefase le lefsa. (2 Petro 3:13) Motheong wa sehlabelo sa Jesu, Jehofa o tla tloša ‘lešira’ le le širilego batho ka baka la sebe sa Adama. E tla ba lethabo le legolo gakaakang go bona sebe le lehu di tlošitšwe! Ke mo go thabišago gakaakang go amogela baratiwa ba ba tsošitšwego, go lemoga gore megokgo e fedile le go phela lefaseng la paradeise moo batho ba Jehofa ba ka se kego ba gobošwa, eupša ba tla bego ba neile Modimo karabo go monyatši yo mogolo Sathane Diabolo!—Diema 27:11.

19. Re swanetše go arabela bjang ditebelelong tšeo Jehofa a di beilego pele ga rena re le Dihlatse tša gagwe?

¹⁹ Na go tseba seo Jehofa a tlago go se direla bahlanka ba gagwe ga go go tlatše lethabo le tebogo? Ee, ditebelelo tše bjalo tše dibotse di tlaleletša lethabong la rena! Go oketša moo, kholofelo ya rena e thabišago e re dira gore re lebelele go Modimo wa rena yo a thabilego, yo lerato le yo a fago kudu ka maikwelo a swanago le a: “Bônang, Modimo wa rena šó, yo re mmotilexo ’me a re phološa; ké Yêna Morêna yo re mmotilexo; a re hlalaleng re thabêlê phološô ya xaxwe.” (Jesaya 25:9) Ge re dutše re nagana kudu ka kholofelo ya rena e thabišago, anke re direng boiteko bjohle bja go hlankela Jehofa ka go thaba ga pelo.

O be o tla Araba Bjang?

◻ Re ka hlankela Jehofa bjang ka “go thaba ga pelo”?

◻ Re ka dira’ng ge e ba go se na lethabo tirelong ya rena go Modimo?

◻ Ke ka baka la’ng batho ba Jehofa ba ka thaba go sa šetšwe tlaišo?

◻ Re na le mabaka afe a go thaba kholofelong ya rena?

[Pictures on page 17]

Go tšea karolo dibopegong ka moka tša bophelo bja Bokriste go tla oketša lethabo la rena