Kgaufsinyane, ga go Motho yo a Tlago go Diila!

“SE BOIFENG! Bônang, ke Le botša taba e botse ya thabò e kxolo, e tl’o xo ba ya sethšaba ka moka.” (Luka 2:10) Mantšu a a tutuetšago a ile a kwewa ke badiši ba tlabegilego kgaufsi le Betlehema bošegong bjoo Jesu a belegwego ka bjona. Ka go dumelelana le tsebišo ye, Jesu o ile a gatelela kudu “ditaba tše di lokilego” (NW) nakong ya bodiredi bja gagwe bja lefaseng. Lehono e lego nako yeo re ithekgilego kudu ka tšhelete bakeng sa go hlokomela dinyakwa tša rena, ditaba tše di lokilego tša mabapi le Jesu di ka re hola bjang?

Jesu Kriste o ile a tsebiša “babôtlana ’taba tše di botse.” (Luka 4:18) Go ya ka Mateo 9:35, “Jesu [o ile] a hlomaxanya metse ka moka le metsana, a fêla a ruta diphuthêxong tša xôna, a xoêlêla Ebangedi ya mmušô wa maxodimo.” Molaetša wa gagwe e be e le o kgothatšago kudu go bao ba bego ba wetšwe ke bodiidi. “Xe a bôna mašaba a batho a ba šôkêlwa; ka xobane ba be ba lapile, bà lahlexile wa dinku tše di se naxo modiši.” (Mateo 9:36) Ke therešo gore Jesu o itše, “badiitšana Le na nabô’ ka mehla,” eupša ga se ra swanela go phetha go tšwa mantšung a gore ga go na kholofelo bakeng sa badiidi. (Johane 12:8) Ge fela tshepedišo ye e kgopo e sa dutše e le gona, go tla dula go e-na le batho ba diilago go sa šetšwe seo se ka bago se baka tlalelo ya bona. Lentšu la Modimo ga le hlokomologe therešo ya go ba gona ga bodiidi, eupša ga le kgomarele ditaba tše di sa kgothatšego. Go e na le moo, le nea badiidi thušo ya go lebeletšana le dipelaelo tša bophelo.

Thušo Bakeng sa Badiidi

Ka tsela e lego molaleng go ile gwa bolelwa gore: “Ga go na morwalo o mogolo wo o ka rwalwago ke motho go feta go tseba gore ga go yo a nago le taba le yena goba yo a mo kwešišago.” Lega go le bjalo, go sa šetšwe go hlokega ga kwelobohloko go ba bantši, go sa dutše go e-na le ditaba tše di lokilego bakeng sa badiidi—bobedi bakeng sa gona bjale le nakong e tlago.

Ka mo go nyamišago, ba bantši ga ba na kgahlego ya go thuša badiidi. Go ya ka The World Book Encyclopedia, ba bangwe ba dumela gore “batho lekokong ba phenkgišana bakeng sa go tšwela pele ba phela gomme . . . batho ba maemo a godimo e ba ba matla kudu le ba humilego.” Bao ba dumelago kgopolo ye yeo e bitšwago sehlopha sa tša leago sa Darwin, ba ka lebelela badiidi bjalo ka batho ba dibodu goba ba ba sa seketšego. Lega go le bjalo, bašomi ba magaeng, bašomi bao e lego bafaladi le ba bangwe, gantši ba šoma ka thata go fepa malapa a bona go sa šetšwe meputso ya tlase yeo ba e amogelago.

Dinageng tše dintši bodiidi bo tlwaetšwe kudu. Ka gona, badiidi—bao e lego ba bantši—ga ba dirwe gore ba ikwe gore ke bao ba hlobogilwego. Lega go le bjalo, dinageng tše bjalo go na le batho bao ba dulago matsakeng a magolo ka gare ga bodiidi. Magae a manobo-nobo, a theko e phagamego a agilwe go bapa le mekutwana e kgobokanego ye e sa hlwekago. Banna bao ba lefiwago meputso ya godimo ba otlela dikoloi tša bona tša theko ya godimo ditarateng tšeo di tletšego ka batho ba diilago le ba hlokago mešomo. Dinageng tše bjalo badiidi ba lemoga tlalelo ya bona ka mo go kwešago bohloko. The World Book Encyclopedia e bolela gore ruri, “badiidi ga ba tlaišwe feela ke phepo-mpe, madulo a sa lokago le tlhokomelo e sa lekanago ya tša kalafo, eupša ba bile ba tlaišwa ke pelaelo e sa kgaotšego mabapi le boemo bja bona. Ka ge ba sa kgone go hwetša mešomo e mebotse le go swarelela go yona, ba lahlegelwa ke go ikwa ba e-na le seriti le boitlhompho.” Ka gona, ba bangwe ba diilago kudu ba lebeletšane bjang ka katlego le maemo a bona? Ke eng seo ditaba tše di lokilego tše di lego mabapi le Jesu di tswalanago ka sona le go lebeletšana ka katlego le boemo?

Sa pele, gopola gore bodiidi bo ka gakatšwa ke mekgwa ye e sego bohlale. Ela hloko mehlala ye. Valdecir o dumela gore gaešita le ge mosadi wa gagwe le bana ba banyenyane ba be ba e-na le dijo tše sego nene, o ile a senya tšhelete ka go kgomarela mokgwa wa go phela o gobogilego. O re: “Gaešita le ge ke be ke šoma, ke be ke se na tšhelete eupša ka mehla ke be ke dula ke e-na le dithekethe tše di fapa-fapanego tša matengwa ka potleng ya-ka.” Milton o ile a lahlegelwa ke kgwebo ya bašomedi ba 23 ka baka la go nwa le go kgoga kudu. O re: “Ke be ke fetša mašego mo setarateng, ke sa kgone go ya gae gomme lapa la-ka la tlaišega kudu ka baka la-ka.”

João le yena o be a senya tšhelete ya gagwe ka boitshwaro bjo bo gobogilego. O re: “Ke be ke robala malalatle. Tšhelete yohle yeo ke bego ke e hwetša e be e se e lekanego bakeng sa boitshwaro bja-ka bjo bo gobogilego le ditabeng tša-ka tša marato. Boemo bo ile bja thoma go se sa kgotlelelega gomme mosadi wa-ka a nyaka karogano.” Go oketša go mathata a gagwe a tša ditšhelete le a lenyalo, go be go e-na le a mangwe gape. O re: “Ke ile ka baka mathata le ba meloko le baagišani ba-ka gomme ke ile ka ba le mathata kudu kua mošomong. Ka baka la seo, ke be ke dula ke sa šome.” Júlio o be a lemaletše dihlare-tagi. Lega go le bjalo, o a hlalosa: “Ka ge moputso wa-ka e be e sa ke e e-ba o lekanego go ka tšwetša pele mokgwa wa-ka wa dihlare-tagi, ke ile ka thoma go šoma bjalo ka morekiši wa diokobatši e le gore ke se ke ka swanelwa ke go reka dihlare-tagi.”

Ka ge a godišitšwe ka lapeng le le diilago la bana ba seswai, José o ile a nyaka go ikhweletša se sengwe. Ka go nagana gore bjale o kwele go lekane, o ile a thoma go hlakola batho a e-na le bafsa ba bangwe. Ka baka la go itlhoboga, mofsa yo mongwe o ile a ba setho sa sehlopha sa disenyi se se bitšwago Headbangers. O a hlalosa: “Ka ge bontši bja rena re be re diila kudu, re ile ra hwetša kgotsofalo e itšego ka go pšhatla dilo le go hlasela batho.”

Lega go le bjalo, lehono banna ba le malapa a bona ga ba sa tlaišwa ke bodiidi goba maikwelo a go šulafalelwa le go kgopišega. Ga e sa le ba hlokago mohola goba kholofelo. Ka baka la’ng? Ka gobane ba ithutile ditaba tše di lokilego tšeo Jesu a di boletšego. Ba dirišitše keletšo ya Beibele gomme ba kopanela le batho ba dikgopolo tše di swanago le tša bona ka diphuthegong tša Dihlatse tša Jehofa. Le gona ba ithutile dilo tše bohlokwa kudu ka ga lehumo le bodiidi.

Thušo Bakeng sa go Lebeletšana le Bodiidi

Sa pele, ba ithutile gore ge e ba melao ya motheo ya Beibele e dirišwa, gona mafelelo a mabe a bodiidi a ka fokotšega. Beibele e nyatša boitshwaro bjo bo gobogilego, botagwa, go petšha le go diriša dihlare-tagi gampe. (1 Ba-Korinthe 6:9, 10) Dilo tše bjalo di bitša tšhelete e ntši kudu. Di ka dira gore mohumi a diile gomme modiidi tša mo dira gore a diilele pele. Go lahla bogoboga bjo le dilo tše dingwe tša go swana le bjona go dira mo gogolo go kaonefatša boemo bja tša boiphedišo bja lapa.

Sa bobedi, ba hwetša gore go na le dilo tše bohlokwa kudu bophelong go feta lehumo. Pono e leka-lekanego e bontšhitšwe mantšung a a buduletšwego: “Moriting wa bohlale ké moriting wa lehumô; se sexolo mo tsebong ké xe bohlale bo phediša mong wa byôna.” (Mmoledi 7:12) Ee, tšhelete e a nyakega. Eupša bohlale bjo bo theilwego Beibeleng le tsebong ya merero ya Modimo di bohlokwa kudu. Ruri, go yo a hlokago bohlale, go ba le tšhelete e ntši e ka ba morwalo o mogolo go fo swana le go ba le e nyenyane. Mongwadi wa Beibele o ile a rapela ka bohlale ka gore: “Se nneê bodiidi, se nneê lehumô. Mphêpê ka boxôbê byo bo ntekanexo. E se re xe ke khoše ka hlanoxa, ka re: Morêna ké mang? xoba kè hlôka, ka utswa, ka senya ’ina la Modimo wa-ka.”—Diema 30:8, 9.

Sa boraro, ba hweditše gore ge e ba motho a phela ka go dumelelana le ditaba tše di lokilego tšeo Jesu a di boletšego, le ka mohla ga se a swanela go ikwa a lahlilwe. Ditaba tše di lokilego di akaretša Mmušo wa Modimo. Molaetša wo o bitšwa “ditaba tše di lokilego tša mmušo,” gomme mehleng ya rena di bolelwa lefaseng ka moka leo go agilwego go lona. (Mateo 24:14, NW) Jesu o re boditše gore re tla thekgwa ge e ba re bea kholofelo ya rena Mmušong woo. O itše: “Sa pele Le tsomê mmušô wa Modimo le tokô ya [Gagwe]; ké mo Le tl’o xo ekeletšwa ka tšeo ka moka.” (Mateo 6:33) Modimo ga a re holofetše dikoloi tša mabai-bai goba dintlo tša matsaka. Jesu o be a bolela ka dinyakwa tša bophelo, dilo tše di swanago le dijo le diaparo. (Mateo 6:31) Eupša ba dimilione lehono ba ka hlatsela gore kholofetšo ya Jesu e a botega. Motho, gaešita le yo a diilago kudu, ga se a lahlwa ka mo go feletšego ge e ba a etiša Mmušo pele.

Sa bone, ba hwetša gore motho yo a etišago Mmušo wa Modimo pele ga a šulafatšwe ke mathata a tša boiphedišo. Ee, modiidi o swanelwa ke go šoma ka thata. Eupša ge e ba a hlankela Modimo, o na le tokelo ya go ba le tswalano le Mmopi wa gagwe yoo Beibele e bolelago ka yena gore: “Mohlakô wa mohlaki xa’ o nyatše, xa’ o nyênye, xa a mo utêle ’fahloxô sa xaxwe. Xe a xoeletša ó a mo kwa.” (Psalme 22:24) Go oketša mo, modiidi o na le thušo go lebeletšaneng le mathata a bophelo. O thabela bogwera bjo borutho le Bakriste-gotee le yena gomme o na le tsebo ya thato e utolotšwego ya Jehofa le kholofelo go yona. Dilo tše di swanago le tše “di kxanyoxêxa xo fetiša dixauta le bontši bya xauta ye e taxilexo.”—Psalme 19:10.

Mafelelong, ga go sa na Bodiidi!

Mafelelong, batho bao ba theetšago ditaba tše di lokilego ba ithuta gore Jehofa Modimo o rerile go rarolla bothata bja bodiidi gatee ya ba moka ka Mmušo wa gagwe. Beibele e holofetša gore: “Mmôtlana a ka se dule à lebetšwe; kholofêlô ya modiidi xa e dule è le ya lefêla.” (Psalme 9:18) Mmušo ke pušo ya kgonthe yeo e hlomilwego magodimong moo Jesu Kriste e lego Mmuši wa wona. Kgaufsinyane, Mmušo woo o tla tšeela mebušo ya batho legato go laoleng ditaba tša batho. (Daniele 2:44) Ka gona, Jesu bjalo ka Kgoši e beilwego sedulong sa bogoši “O tlo xauxêla mosenyi le mohloki; meôya ya bahumanexi ó tlo e phološa. Meôya ya bôná ó tlo e lokolla mohlakong, bošorong; ’me madi a bôná ó tlo a sema selô se bohlôkwa.”—Psalme 72:13, 14.

E lebeletše pele nakong yeo, Mika 4:3, 4 e re: “Motho ó tlo dula meriting ya morara w’axwe, le mo moriting wa moxó wa xaxwe, xò se e a ba thšošaxo; ka xobane xo boletše molomo wa Morêna wa mašaba.” Ke bomang bao go bolelwago ka bona mo? Ee, ke bohle bao ba ikokobeletšago Mmušo wa Modimo. Mmušo woo o tla rarolla mathata ka moka ao a tlaišago batho—gaešita le bothata bja bolwetši le lehu. “Lehu ó tlo le tloša ka xo sa felexo; Mong ’a bohle Morêna ó tlo phomola mexôkxô mahlong ohle.” (Jesaya 25:8; 33:24) Leo e tla ba lefase le le fapanego gakaakang! Le gona gopola, re ka dumela dikholofetšo tše ka gobane di buduletšwe ke Modimo ka noši. O re: “Sethšaba sa-ka se tlo dula maxaeng a moláô, nywakong e bôtêxaxo madulong a xo iketla.”—Jesaya 32:18.

Go ba le kholofelo Mmušong wa Modimo go fenya go hloka boitlhompho moo gantši go bakwago ke bodiidi. Mokriste yo a diilago o a tseba gore mahlong a Modimo o bohlokwa go fo swana le Mokriste yo a humilego. Modimo o ba rata bohle ka go lekana, gomme bobedi ba na le kholofelo e swanago. Bobedi bja bona ba lebeletše pele ka phišego nakong ya ge bodiidi e tla bego e le selo se se lebetšwego ka tlase ga Mmušo wa Modimo. Yeo e tla ba nako e kgahlišago gakaakang! Mafelelong, ga go e a tlago go diila!

[Seswantšho go letlakala 5]

Ke ka baka la’ng o senya tšhelete ka go petšha, go kgoga, go nwa kudu, go diriša dihlare-tagi gampe goba ka mokgwa wa bophelo o gobogilego?

[Seswantšho go letlakala 7]

Jehofa Modimo o tla rarolla mathata a batho a bodiidi ka Mmušo wa gagwe