“Yoko Ya-ka xa e Robe, Morwalô Wa-ka ké o Bohwêfê”
“Tšeelang joko ya-ka godimo ga lena, gomme le ithute go nna.”—MATEO 11:29, PK.
1, 2. (a) O diragaletšwe ke eng bophelong seo se go tlišetšago tapologo? (b) Motho o swanetše go dira’ng gore a hwetše tapologo yeo Jesu a e holofeditšego?
GO HLAPA ka meetse a tonyago ka morago ga letšatši le le fišago le le le nago le monola, goba go robala gabotse bošego ka morago ga leeto le letelele le le le lapišago—ruri ke mo go lapološago gakaakang! Go bjalo ge morwalo o boima o tlošwa goba ge dibe le dikarogo di lebalelwa. (Diema 25:25; Ditiro 3:19) Tapološo yeo e tlišwago ke diphihlelo tše bjalo tše di thabišago e a re tsošološa gomme re newa mafolofolo a go tšwela pele.
2 Bohle ba ba ikwago ba imetšwe e bile ba lapile ba ka tla go Jesu, ka gobane o ba holofeditše sona seo—e lego tapologo. Lega go le bjalo, gore motho a hwetše tapologo yeo e kganyogegago gakaakaa go na le selo seo a swanetšego go ikemišetša go se dira. Jesu o itše: “Tšeelang joko ya-ka godimo ga lena, gomme le ithute go nna, . . . gomme le tla bonela meoya ya lena [tapologo, NW].” (Mateo 11:29, PK) Joko ye ke eng? E tliša bjang tapologo?
Joko e sa Robego
3. (a) Ke dijoko tša mohuta mang tšeo di bego di dirišwa mehleng ya Beibele? (b) Ke tlhaloso efe ya seswantšhetšo yeo e sepedišanago le joko?
3 Ka ge ba be ba phela setšhabeng se se lemago, Jesu le batheetši ba gagwe ba be ba tlwaelane kudu le joko. Ge e le gabotse, joko ke kota e telele e nago le mafelo a mabedi a epilwego ka tlase bakeng sa go tsenya melala ya diphoofolo tše pedi tše di gogago, gantši e ba dikgomo bakeng sa go di tlema gotee gore di goge mogoma, karikana goba morwalo o mongwe. (1 Samuele 6:7) Dijoko di be di dirišwa le bakeng sa batho. Tše e be e fo ba dikota goba dipala tše di rwalwago go putlaganya magetla, di tlemeletšwe morwalo ntlheng e nngwe le e nngwe. Bašomi ba be ba kgona go rwala merwalo e boima ka tšona. (Jeremia 27:2; 28:10, 13) Ka baka la go sepedišana ga yona le merwalo le modiro o thata, gantši joko e dirišwa ka tsela ya seswantšhetšo ka Beibeleng go swantšhetša pušo le taolo.—Doiteronomio 28:48; 1 Dikxoši 12:4; Ditiro 15:10.
4. Ke eng se se emelwago ke joko yeo Jesu a e neago ba ba tlago go yena?
4 Ka gona, joko yeo Jesu a laletšago ba ba tlago go yena bakeng sa go hwetša tapologo gore ba e tšeele godimo ga bona ke eng? Gopola gore o itše: “Tšeelang joko ya-ka godimo ga lena, gomme le ithute go nna.” (Mateo 11:29, PK) Morutwana ke morutiwa. Ka gona, go rwala joko ya Jesu go bolela feela go ba morutiwa wa gagwe. (Ba-Filipi 4:3) Lega go le bjalo, se se nyaka se se fetišago go fo tseba dithuto tša gagwe. Se nyaka ditiro tše di dumelelanago le tšona—go dira modiro wo a o dirilego le go phela ka tsela yeo a phetšego ka yona. (1 Ba-Korinthe 11:1; 1 Petro 2:21) Se nyaka go ikokobeletša taolo ya gagwe ka go rata, gotee le go ikokobeletša bao a ba neago taolo. (Ba-Efeso 5:21; Ba-Hebere 13:17) Se bolela go ba Mokriste yo a ineetšego le go kolobetšwa, go amogela ditokelo ka moka le boikarabelo bjo bo tlišwago ke boineelo bjo bo bjalo. Yeo ke joko yeo Jesu a e neago bohle ba ba tlago go yena bakeng sa khomotšo le tapologo. Na o ikemišeditše go e amogela?—Johane 8:31, 32.
5. Ke ka baka la’ng e be e ka se be phihlelo e sehlogo go rwala joko ya Jesu?
5 Go hwetša tapologo ka go rwala joko—na seo ga se go ikganetša? Ruri ga go bjalo, ka ge Jesu a itše joko ya gagwe “xa e robe.” Lentšu le le na le tlhaloso ya boleta, thabišago le amogelegago. (Mateo 11:30; Luka 5:39; Ba-Roma 2:4; 1 Petro 2:3) Ka ge e be e le mmetli yo a tlwaeditšwego, go bonala Jesu a be a kile a dira megoma le dijoko gomme o be a tla tseba tsela ya go betla joko gore e be e loketšego e le gore modiro o mogolo o phethwe ka boiketlo ka mo go kgonegago. O be a ka bea lešela goba letlalo ka tlase ga dijoko. Tše dintši di dirwa ka tsela yeo e le gore di se ke tša kgobola goba tša gohla molala ka mo go feteletšego. Ka tsela e swanago, joko ya seswantšhetšo yeo Jesu a re neago yona “xa e robe.” Gaešita le ge go ba morutiwa wa gagwe go akaretša boikarabelo bjo itšego, ga se phihlelo e sehlogo goba e gateletšago eupša ke e lapološago. Melao ya Tatagwe wa Legodimong Jehofa ga e boima.—Doiteronomio 30:11; 1 Johane 5:3.
6. Jesu a ka ba a be a bolela’ng ge a be a re: “Tšeelang joko ya-ka godimo ga lena”?
6 Go na le selo se sengwe gape se se dirago gore joko ya Jesu e be ‘e sa robego’ goba yeo go lego bonolo go e rwala. Ge a be a re: “Tšeelang joko ya-ka godimo ga lena,” a ka ba a be a bolela e nngwe ya dilo tše tše pedi. Ge e ba a be a nagana ka joko ya go pana tše pedi, ke gore ya mohuta o kopanyago diphoofolo tše pedi tše di gogago gore di goge morwalo, gona o be a re laleletša go tsena ka tlase ga joko e tee le yena. Seo e be e tla ba tšhegofatšo e kgolo gakaakang—go ba le Jesu ka lehlakoreng la rena a goga morwalo wa rena le rena! Ka lehlakoreng le lengwe, ge e ba Jesu o be a naganne ka joko ya kota yeo e bego e dirišwa ke batho ba ba tlwaelegilego ba ba šomago ka thata, gona o be a re nea tsela yeo ka yona re ka dirago gore morwalo le ge e le ofe wo re swanelwago ke go o rwala e be o bonolo kudu le o rwalegago kudu. Ka tsela le ge e le efe, joko ya gagwe ke mothopo wa tapologo ya kgonthe ka gobane o re kgonthišetša gore: “Xobane ke yo boló le wa pelo e kokobetšexo.”
7, 8. Ba bangwe ba dira phošo efe ge ba ikwa ba gateletšegile?
7 Ka gona, re swanetše go dira’ng ge e ba re nagana gore morwalo wa mathata a bophelo wo re o rwelego e ba o robago le gore re imelwa go fihla moo re ka se sa kgonago? Ba bangwe ba ka ba ba nagana ka mo go fošagetšego gore joko ya go ba morutiwa wa Jesu Kriste ke e thata kudu goba e nyaka mo gontši kudu, gaešita le ge e ba ba imelwa ke dipelaelo tša bophelo bja letšatši le letšatši. Batho ba bangwe ba ba lego boemong bjoo ba kgaotša go ya dibokeng tša Bokriste goba ba phema go tšea karolo bodireding, mohlomongwe ba nagana gore ba tla hwetša kimologo e itšego. Lega go le bjalo, yeo ke phošo e kgolo.
8 Re leboga gore joko yeo Jesu a e neago “xa e robe.” Ge e ba re se ra e atha gabotse, e ka ba e gohlago. Boemong bjoo re swanetše go hlahloba joko yeo e lego magetleng a rena. Ge e ba joko e robegile goba e sa athege gabotse ka mabaka a itšego, ga se feela gore go e diriša go tla nyaka gore re dire boiteko bjo bo oketšegilego eupša go bile go tla re kweša bohloko. Ka mantšu a mangwe, ge e ba mediro ya pušo ya Modimo e thoma go bonala e le morwalo go rena, re swanetše go hlahloba gore re bone ge e ba re e phetha ka tsela e nepagetšego. Maikemišetšo a rena a go dira seo re se dirago ke afe? Na re itokišeditše ka mo go lekanego ge re e-ya dibokeng? Na re itokišeditše mmeleng le monaganong ge re tšea karolo bodireding bja tšhemo? Na re thabela tswalano ya kgaufsi le e agago le ba bangwe ka phuthegong? Go feta tšohle, tswalano ya rena ka noši le Jehofa Modimo gotee le Morwa wa gagwe Jesu Kriste ke efe?
9. Ke ka baka la’ng joko ya Bokriste e sa swanela go ba morwalo o robago le ka mohla?
9 Ge re amogela ka pelo ka moka joko yeo Jesu a e neago gomme re ithuta go e atha ka tsela e swanetšego, ga go na lebaka la gore e bonale le ka mohla e le morwalo o robago. Ge e le gabotse, ge e ba re kgona go bona boemo ka leihlo la monagano—Jesu a le ka tlase ga joko e tee le rena—ga go thata gore re bone yoo ge e le gabotse a rwelego karolo e kgolo ya morwalo. Ga go swane le ngwana yo a ithutago go sepela yo a ikokotletšego ka mokgoko wa phorema ya gagwe a nagana gore o e kgoromeletša pele, eupša ge e le gabotse e le motswadi yo a e kgorometšago. Ka ge e le Tate yo lerato, Jehofa Modimo o lemoga gabotse mafokodi a rena le diphošo gomme o nea dinyakwa tša rena ka Jesu Kriste. Paulo o itše: “Modimo wa-ka ó tlo tlatša mo lena Le kaxo hlôka, ka xe e le Yêna Mohumi wa letaxô ka Kriste Jesu.”—Ba-Filipi 4:19; bapiša le Jesaya 65:24.
10. Phihlelo ya motho yo a lebelelago go ba morutiwa e le gabohlokwa e be e dutše e le efe?
10 Bakriste ba bantši ba ba ineetšego ba ile ba thoma go lemoga se ka phihlelo ya bona ka noši. Ka mohlala, go na le Jenny yo a hwetšago gore go hlankela kgweding e nngwe le e nngwe e le mmulamadibogo wa go thuša le go šoma ka nako e tletšego modirong o gateletšago kudu wa boiphedišo go mmakela kgateletšego e kgolo kudu. Lega go le bjalo, o nagana gore modiro wa go bula madibogo ge e le gabotse o mo thuša go boloka teka-tekano. Go thuša batho go ithuta therešo ya Beibele le go ba bona ba fetoša maphelo a bona gore ba amogelwe ke Modimo—se ke sona se mo tlišetšago lethabo le legolo kudu bophelong bja gagwe bja leema-ema. O dumelelana ka pelo ka moka le mantšu a seema se se rego: “Tšhegofatšo ya Jehofa e a humiša, gomme ga e ekeletšwe ka bohloko.”—Diema 10:22, PK.
Morwalo o Bohwefo
11, 12. Jesu o be a bolela’ng ge a be a re: “Morwalô wa-ka ké o bohwêfê”?
11 Go tlaleletša go re holofetšeng joko ‘e sa robego,’ Jesu o re kgonthišetša gore: “Morwalô wa-ka ké o bohwêfê.” Joko ‘e sa robego’ e šetše e dira gore modiro o be bonolo kudu; ge e ba morwalo le wona o le bohwefo gona modiro ke o thabišago e le ka kgonthe. Ka gona, Jesu o be a naganne ka eng ge a be a bolela seo?
12 Ela hloko seo molemi a bego a tla se dira ge a be a nyaka go fetoša mediro ya diphoofolo tša gagwe, mohlomongwe go tloga go lemeng tšhemo go ya go gogeng karikana. O be a tla thoma ka go tloša mogoma gomme a kgokelele karikana. E be e tla ba go hloka tlhaologanyo ge a be a ka kgokelela mogoma le karikana ka bobedi diphoofolong. Ka mo go swanago, Jesu o be a sa botše batho gore ba rwale morwalo wa gagwe godimo ga wo ba bego ba šetše ba o rwele. O itše go barutiwa ba gagwe: “Xa xo mohlanka e a kaxo kxôna xo dirêla marêna a mabedi.” (Luka 16:13) Ka gona, Jesu o be a nea batho kgetho. Na ba be ba tla upša ba tšwela pele go rwala morwalo o boima wo ba bego ba e-na le wona, goba na ba be ba tla o bea fase gomme ba amogela seo a bego a ba nea sona? Jesu o ile a ba nea tutuetšo e lerato: “Morwalô wa-ka ké o bohwêfê.”
13. Batho ba mehleng ya Jesu ba be ba rwele morwalo ofe, gona ka mafelelo afe?
13 Mehleng ya Jesu, batho ba be ba katana ka tlase ga morwalo o boima wo ba o rwešitšwego ke babuši ba ba gatelelago ba Roma gotee le baetapele ba ba latelago mekgwa e rulagantšwego ba baikaketši ba bodumedi. (Mateo 23:23) E le boiteko bja go lahla morwalo wa Roma, batho ba bangwe ba ile ba leka go itšeela molao matsogong. Ba ile ba tsenela dithulano tša tša dipolitiki, moo ba ilego ba welwa ke mafelelo a nyamišago. (Ditiro 5:36, 37) Ba bangwe ba be ba katanela go kaonefatša boemo bja bona ka go tsena ka hlogo maitekong a go hwetša dilo tše di bonagalago. (Mateo 19:21, 22; Luka 14:18-20) Ge Jesu a be a ba nea tsela e išago kimologong ka go ba laletša gore e be barutiwa ba gagwe, ga se bohle ba ba bego ba ikemišeditše go e amogela. Ba be ba dika-dika go bea morwalo wo ba bego ba o rwele fase le ge o be o le boima gomme ba rwale wa gagwe. (Luka 9:59-62) A phošo e nyamišago gakaakang!
14. Dipelaelo tša bophelo le dikganyogo tša dilo tše di bonagalago di ka re imela bjang?
14 Ge e ba re sa hlokomele, re ka dira phošo e swanago lehono. Go ba barutiwa ba Jesu go re lokolla go kataneleng dipakane le mahumo a swanago le ao batho ba lefase ba a katanelago. Gaešita le ge re sa dutše re swanelwa ke go šoma ka thata gore re hwetše dinyakwa tša letšatši le letšatši, ga re dire dilo tše motheo wa bophelo bja rena. Lega go le bjalo, dipelaelo tša bophelo le kgogedi ya boiketlo bja dilo tše di bonagalago di ka re laola ka matla. Ge e ba re di dumelela, dikganyogo tše bjalo di ka ba tša khupetša therešo yeo re e amogetšego ka mafolofolo. (Mateo 13:22) Re ka swarega kudu ka go kgotsofatša dikganyogo tše bjalo moo boikarabelo bja rena bja Bokriste e bago mediro e lapišago yeo re nyakago go e phetha gomme e tloge tseleng ka pela. Ka kgonthe, re ka se ke ra letela tapologo le ge e le efe gore e tlišwe ke tirelo ya rena go Modimo ge e ba e dirwa ka moya woo.
15. Jesu o ile a nea temošo efe mabapi le go kganyoga dilo tše di bonagalago?
15 Jesu o hlalositše gore bophelo bjo bo nago le kgotsofalo ga bo tlišwe ke go katanela go kgotsofatša tšeo re di nyakago ka moka, eupša bo tlišwa ke go kgonthišetša dilo ka moka tše bohlokwa bophelong. O eleditše ka gore: “Le se kê la belaêlêla bophelô bya lena la re: Re tlo ja’ng? Re tlo nwa’ng? Le mmele Le se kê la o belaêlêla la re: Re tlo apara’ng? Afa bophelô xa bo fete dijô ka boxolo? Le mmele, afa xa o fetiše seaparô?” Ka gona o ile a lebiša tlhokomelo go dinonyana tša legodimo gomme a re: “Xa di byale, xa di bune, xa di kxobelele dišexong; ’me Tata-weno ó a di otla [“fepa,” NW].” Ge a be a bolela ka matšoba a naga o itše: “Ga a dire, ga a ohle. Eupša ke a le botša gobane le Salomo letagong la gagwe ka moka ga a ešo a apara bjalo ka le lengwe la ona.”—Mateo 6:25-29, bapiša le PK.
16. Phihlelo e bontšhitše’ng ge e le ka mafelelo a go phegelela dilo tše di bonagalago?
16 Na re ka ithuta se sengwe mehlaleng ye e bonolo e šomago? Ke selo se se tlwaelegilego gore ge motho a katana ka thata go kaonefatša boemo bja gagwe bophelong ka dilo tše di bonagalago, ke gona mo a tanywago dikgahlegong tša lefase gomme morwalo ya ba o boima kudu magetleng a gagwe. Lefase le tletše bagwebi ba ba lefeletšego katlego ya bona ya dilo tše di bonagalago ka malapa a thubegilego, manyalo a senyegilego, bophelo bjo bo sentšwego bja mmele le tše dingwe tše dintši. (Luka 9:25; 1 Timotheo 6:9, 10) Mothopa-sefoka sa Nobel Albert Einstein o kile a re: “Dithoto, katlego ya ka ntle, botumo, matsaka—go nna ka mehla tše di be di dutše di nyatšega. Ke dumela gore mokgwa o bonolo le o kokobetšego wa go phela ke o loketšego yo mongwe le yo mongwe.” Se se upša se boeletša keletšo e bonolo ya moapostola Paulo e rego: “Borapedi [“boineelo go Modimo,” NW] ké leruô le lexolo xe bo na le xo kxôlwa ke tše O naxô le tšôna.”—1 Timotheo 6:6.
17. Ke mokgwa ofe wa go phela wo Beibele e o kgothaletšago?
17 Go na le karolo e bohlokwa yeo re sa swanelago go e tshediša mahlo. Gaešita le ge “mokgwa o bonolo le o kokobetšego wa go phela” o e-na le mehola e mentši, ka bowona ga o tliše kgotsofalo. Go na le ba bantši bao mokgwa wa bona wa go phela o lego bonolo ka go gapeletšwa ke maemo, eupša ga se ba kgotsofala goba go thaba ka tsela le ge e le efe. Beibele ga e re kgothaletše go gana lethabo la dilo tše di bonagalago le go phela bophelo bja modula-noši. Go gatelelwa boineelo go Modimo, e sego go ikgotsofatša. Ke feela ge re kopanya dilo tše tše pedi moo re ka bago le “leruô le lexolo.” Ke leruo lefe? Ge a tšwela pele lengwalong lona leo, Paulo o hlalosa gore ba ba ‘sa holofelego lehumo le le tlogago, ba holofela Modimo’ ba tla be “ba ithuêla, xo thêa mothêô wa mehla e tl’o xo tla xore ba fihlêlê byo e lexo bophelô bya ruri.”—1 Timotheo 6:17-19.
18. (a) Motho a ka hwetša bjang tapologo ya kgonthe? (b) Re swanetše go lebelela bjang diphetogo tšeo re ka swanelwago ke go di dira?
18 Tapologo e tla re tlela ge e ba re ithuta go bea morwalo wa rena ka noši o boima fase wo re ka bago re o rwele gomme ra rwala morwalo o bohwefo wo Jesu a o neago. Ba bantši bao ba ilego ba rulaganya maphelo a bona lefsa e le gore ba ka tšea karolo ka mo go tletšego kudu tirelong ya Mmušo, ba hweditše tsela e išago bophelong bja lethabo le kgotsofalo. Ee, go nyakega tumelo le sebete gore motho a gate mogato o bjalo, le gona go ka ba le mapheko tseleng. Eupša Beibele e re gopotša gore: “Mo-kwa-phefô xa a byale; kxadia-maru xa a bune.” (Mmoledi 11:4) Ruri dilo tše dintši ga di thata ge feela re ikemišeditše go di dira. Go bonala karolo e thata ka go fetišiša e le go ikemišetša. Re ka itapiša ka go katana le kgopolo goba go e ganetša. Ge e ba re lokiša menagano ya rena gomme ra amogela tlhohlo, re ka ba ra tlabja ke go bona tšhegofatšo yeo go bago yona. Mopsalme o kgothaleditše gore: “Lekang Le bônê xobane Morêna ké yo boló.”—Psalme 34:8; 1 Petro 1:13.
“Tapologo Bakeng sa Meoya ya Lena”
19. (a) Re ka letela’ng ge maemo a lefase a tšwela pele go senyega? (b) Re kgodišegile ka eng ge re dutše re le ka tlase ga joko ya Jesu?
19 Moapostola Paulo o ile a gopotša barutiwa ba lekgolong la pele la nywaga gore: “Mmušong wa Modimo re tsêna ka ditlaišexo tše ntši.” (Ditiro 14:22) Seo e sa dutše e le sa therešo lehono. Ge maemo a lefase a dutše a tšwela pele go senyega, dikgateletšo tše di tlelago bohle ba ba ikemišeditšego go phela bophelo bja go loka le bja boineelo go Modimo e tla ba tše dikgolo le go feta. (2 Timotheo 3:12; Kutollo 13:16, 17) Lega go le bjalo, re ikwa ka tsela yeo Paulo a ilego a ikwa ka yona ge a be a re: “Re dikilwe thokô tšohle, ’me xa re pitlaxanywe. Re a phoraphora, ’me xa re xakanexe. Re a tlaišwa, ’me xa r’a lahlêxa. Re dixêlwa fase, ’me xa re senyexe.” Lebaka ke gore re ka holofela gore Jesu Kriste o tla re nea matla a fetišago a tlhago. (2 Ba-Korinthe 4:8, 9) Ka go amogela joko ya go ba morutiwa ka pelo ka moka, re tla thabela go phethagala ga kholofetšo ya Jesu e rego: “Le tla hwetša [tapologo bakeng sa meoya ya lena, NW].”—Mateo 11:29.
Na o ka Hlalosa?
◻ Joko e sa robego yeo Jesu a e neago ke eng?
◻ Re swanetše go dira’ng ge e ba re e-kwa gore joko ya rena e fetoga morwalo?
◻ Jesu o be a bolela’ng ge a be a re: “Morwalô wa-ka ké o bohwêfê”?
◻ Re ka kgonthišetša bjang gore morwalo wa rena o dula o le bohwefo?