Tsela e Tshesane e Išago Tokologong

KE BATHO ba sego kae ba nago le tlhaologanyo bao ba phegago kgang mabapi le gore legohle le bušwa ke melao ya tlhago. Melao ye e laola selo se sengwe le se sengwe go tloga go diathomo tše dinyenyane go ya go melalatladi e megolo kudu ya dinaledi yeo e nago le dinaledi tše dikete tše dimilione. Ge nkabe go be go se bjalo, go be go ka se be le thulaganyo le kwešišo; bophelo ka bobjona bo be bo ka se be gona. Ka go kwešiša melao ya tlhago le go šomišana le yona, motho o ile a kgona go phetha mediro e makatšago e swanago le go sepela kgweding le go bontšha diswantšho tša mebala mo thelebišeneng ka magaeng a rena go tšwa lefelong le ge e le lefe mo lefaseng goba gaešita le ka kua ga lefaufau la lefase.

Eupša go thwe’ng ka melao ya boitshwaro? Na go e kgomarela ke mo go putsago le mo go humišago? Ba bantši go bonala ba ikwa gore ga go na melao ya boitshwaro gomme ba kgetha filosofi ya go dumelela tšohle goba bodumedi bjo bo swanelago dikganyogo tša bona.

Lega go le bjalo, go na le ba bangwe bao ba kgethago tsela e nngwe, ‘tsela e tshesane yeo e lebišago bophelong’ bjalo ka ge e boletšwe ka Beibeleng. Ga se ra swanela go makatšwa ke gore ye ke yeo e kgethwago feela ke ba sego kae, ka gobane Jesu o boletše ka tsela e nyenyane ka gore: “’Me ba ba e bônaxo xa ba nene.” (Mateo 7:14) Ke ka baka la’ng e le feela ba sego kae?

Ke ka gobane tsela e tshesane e sepelwa feela ka gare ga mellwane ya melao le melao ya motheo ya Modimo. E tla ipiletša feela go motho yoo ka potego a kganyogago go dumelelanya bophelo bja gagwe le ditekanyetšo tša Modimo. Ka mo go fapanego kudu le tsela e phatlaletšego yeo e neago le sebopego se forago sa tokologo eupša ge e le gabotse e le yeo e dirago motho mohlanka, tsela e tshesane yeo e bonalago eka e a thibela e lokolla motho tabeng e nngwe le e nngwe ya bohlokwa. Mellwane ya yona e theilwe ka “se se lexo molaong o tletšexo wa khunoloxô.”—Jakobo 1:25.

Kamoo Tsela e Tshesane e Hunollago ka Gona

Ke therešo gore ga se ka mehla go lego bonolo go dula o le tseleng e tshesane. Motho yo mongwe le yo mongwe yo a phelago ga se a phethagala gomme o na le tshekamelo ya leabela ya go dira se se fošagetšego. Ka gona motho a ka ba le tshekamelo ya go tšwa tseleng go se nene. Lega go bjalo, mehola ya go kgomarela ‘tsela e tshesane’ e swanelwa ke boitayo le ge e le bofe bjo bo nyakegago goba ditokišo, ka gobane Modimo ‘o re ruta tše di re holago.’—Jesaya 48:17; Ba-Roma 3:23.

Ka mohlala: Batswadi ba bohlale ba rulaganya ‘tsela e tshesane’ ya mokgwa wa go ja bakeng sa bana ba bona. Se ka dinako tše dingwe se bolela go ba yo a tiilego dinakong tša dijo. Eupša ge bana ba gola, ba tla leboga tayo e lerato ya batswadi ba bona. Bjalo ka batho ba bagolo, ba tla be ba godišitše kganyogo ya dijo tše di nago le bophelo. Le gona mehuta e fapa-fapanego ya dijo tše di nago le phepo tše di hwetšagalago di tla dira gore le ka mohla ba se ikwe ba thibetšwe.

Ka tsela ya moya, Modimo o dira se swanago ka bao ba lego tseleng e tshesane e išago bophelong. O hlagolela dikganyogo tše dibotse ka go batho ba boleta tše di lebišago lethabong le tokologong ya kgonthe. Se o se dira ka go nea Lentšu la gagwe, Beibele. Go oketša moo, o re laleletša go rapelela moya wa gagwe o mokgethwa gore o re thuše, gomme o re laela gore re gwerane le Bakriste-gotee le rena bao ba ka re kgothaletšago go tšwela pele re le tseleng e tshesane. (Ba-Hebere 10:24, 25) Ee, Modimo ke yena lerato, gomme seka se se segolo se thekga merero ya gagwe le mekgwa ya gagwe ka moka.—1 Johane 4:8.

Ge lerato, khutšo, go loka, boitshwaro gotee le dienywa tše dingwe tša moya wa Modimo di le gona, tsela e tshesane ga e bonale e le e thibelago. Go bjalo ka ge lengwalo le bolela gore, “tše byalo xa di xanwe ke Molaô.” (Ba-Galatia 5:22, 23) “Mo xo lexo Môya wa Morêna [“Jehofa,” NW], ké mo xo lexo khunoloxô.” (2 Ba-Korinthe 3:17) Gaešita le gona bjale, Bakriste ba kgonthe ba latswa mohlodi wa tokologo ye. Ba lokologile dipoifong tše dintši tšeo di tlaišago batho lehono, tše bjalo ka poifo ya bokamoso le poifo ya tumelakhwele ya lehu. Go thabiša gakaakang go naganišiša ka bokamoso ge “xo tseba Morêna xo tlo tlala ’fase lohle bo-ka meetse xe a nabile lewatleng”! (Jesaya 11:9) Ka gona, gaešita le poifo ya bosenyi e ka se hlwe e e-ba gona. Dikgonyo le ditshipi tša tšhireletšo di tla be di tlošeditšwe sa ruri. Bohle ba tla ikwa ba lokologile e bile ba šireletšegile—mosegare le bošego, ka gae le ka ntle. Yeo e tla ba tokologo e le ka kgonthe!

Re Kgonthišetšwa Thušo ya Modimo

Ke therešo gore go phela ka ditekanyetšo tša Modimo go nyaka boiteko, lega go le bjalo, “melaô ya xaxwe xa se e thata,” gaešita le go batho ba ba sa phethagalago. (1 Johane 5:3) Ge re dutše re itlwaetša tsela e tshesane gomme re e-kwa mehola ya go sepela go yona, re tšweletša lehloyo le golago la go hloya ditsela le dikgopolo tšeo di hlaolago bao ba lego tseleng e phatlaletšego. (Psalme 97:10) Go kwa molao wa Modimo go ipiletša go letswalo la rena le lebotse. Go e na le “bohloko bja pelo” le “go robega mo go feletšego ga moya” tšeo e lego dika tša ba bantši, Modimo o holofetša ka gore: “Bonang! Bahlanka ba-ka ba tla goeletša ka lethabo ka baka la boemo bjo bobotse bja pelo.” Ee, pelo e tlwaeditšwego ke Jehofa ke e thabilego le e lokologilego.—Jesaya 65:14, NW.

Jesu o ile a hwa bakeng sa go dira gore tokologo ya kgonthe e kgonege bakeng sa rena. Beibele e re: “Modimo ó ratile lefase xakaakaa, a bá a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.” (Johane 3:16) Mo nakong ye, bjalo ka Kgoši ya Mmušo wa Modimo wa legodimong, Jesu o nea mehola ya sehlabelo seo. Kapejana ka morago ga ‘masetla-pelo a magolo,’ ge tsela e phatlaletšego le bao ba lego go yona ba tla be ba fedišitšwe, o tla thoma go hlahla ka go se fele pelo batho ba kwago tseleng e šetšego e tshesane go fihla bofelong bja yona, phethegong ya batho. (Kutollo 7:14-17; Mateo 24:21, 29-31) Mafelelong re tla bona phethagalo ya kholofetšo e kgolo e rego: “Dibopya di tlo hunollwa bohlankeng bya thsenyêxô, di bê le tokoloxô ya xe bana ba Modimo bà e-ya letaxong.” Tokologo ye ye e neilwego ke Modimo e ka se phalwe. Gaešita le lehu le tla fedišwa.—Ba-Roma 8:21; Kutollo 21:3, 4.

Ka go bona le go kwešiša gabotse moo tsela e tshesane e lebišago gona, motho o kgona gakaone go kgetha tsela ye le go tšwela pele a sepela go yona. Bafsa ka mo go kgethegilego ba a thušwa gore ba se ke ba bonela kgaufsi le gore ba se ke ba befedišwa ke seo ba se lebelelago e le dithibelo tšeo ba di rwešwago ke ditekanyetšo tša Modimo. Ba ithuta go bona tše e le bohlatse bja lerato la Modimo le tšhireletšo kgahlanong le bobe bja tsela e phatlaletšego. (Ba-Hebere 12:5, 6) Go ba gona, go nyakega gore motho a se ke a fela pelo, a gopole gore go tšea nako go tšweletša dika le dikganyogo tša go boifa Modimo go fo swana le ge go tšea nako gore sehlare sa dienywa se tšweletše dienywa tše dibotse. Eupša sehlare se tla enywa ge e ba se hlagolelwa le go nošetšwa.

Ka gona ithute Lentšu la Modimo, kopanela le Bakriste ba bangwe gomme o ‘se kgaotše go rapelela’ moya o mokgethwa. (1 Ba-Thesalonika 5:17) Bota Modimo gore a go thuše go “Xo thulêla tsela.” (Diema 3:5, 6) Eupša na se ka moka se a kgonega? Na ruri se a šoma? Ee, se ile sa šoma go Tom gaešita le go Mary bao go boletšwego ka bona sehlogong se se fetilego.

Ba Ile ba Kgaotša go Sepela Tseleng e Phatlaletšego

Tom o ngwala gore: “Bogareng bja nywaga ya bo-1970, re ile ra kopana le Dihlatse tša Jehofa ge yo mongwe wa bona a etetše legaeng la rena. Poledišano e ile ya lebiša thutong ya Beibele. Ganyenyane-ganyenyane ke ile ka thoma go hlwekiša bophelo bja-ka. Ke ile ka kolobetšwa ka 1982 gomme gabjale ke hlankela phuthegong ya lefelong la gešo. Morwa wa rena le yena gabjale o kolobeditšwe. Ke leboga mosadi wa-ka bakeng sa go nkgotlelela nywageng yeo ka moka ya pele ga ge ke ithuta therešo. Le gona ka godimo ga tšohle ke leboga Jehofa le Morwa wa gagwe, Kriste Jesu, bakeng sa tšohle tšeo ba re neilego tšona gotee le kholofelo yeo re nago le yona gabjale ka bokamoso.”

Gomme go thwe’ng ka Mary? Ee, o ile a ikwa gore Modimo le ka mohla a ka se mo lebalele, eupša o ile a rata go ithuta ka ga yena ka baka la bana ba gagwe. Ge a be a e-kwa gore Dihlatse tša Jehofa di be di ruta moagišani wa gagwe Beibele, le yena o ile a kgopela thušo. Lega go le bjalo, mekgwa ya gagwe e mebe e tsemilego medu e ile ya dira gore go dira tšwelopele go be thata. Thuto e bile le dinako tša tšwelopele le tša poela-morago. Lega go le bjalo, morwedi wa gagwe yo monyenyane wa nywaga e šupago o ile a mo kgothatša. O be a re: “O se ke wa langwa mma. O ka kgona!” Ke moka Mary o be a leka ka matla.

Ge monna wa gagwe yo ba bego ba sa nyalana ka molao yoo gape a bego a diriša dihlare-tagi gampe a boile gae, le yena o ile a kopanela thutong. Mafelelong bobedi ba ile ba fenya mekgwa ya bona e mebe. Ke moka, ka morago ga ge ba ngwadišitše lenyalo la bona ka molao gomme ba ineetše ka kolobetšo, ba ile ba hwetša lethabo le legolo gomme ba ikwa ba le lapa la kgonthe ka lekga la pele. Ka manyami, mafelelong AIDS e ile ya tšea bophelo bja Mary, eupša o ile a hwa pelo ya gagwe e tsepamišeditšwe kholofetšong ya Beibele ya tsogo le bophelo lefaseng la paradeise leo le tlošitšwego mehlala ka moka e kotsi ya tsela e phatlaletšego.

Ee, go a kgonega go tloga tseleng e phatlaletšego le e bulegilego yeo e išago tshenyegong. Kriste Jesu o itše: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.” (Johane 17:3) Ka gona, ke ka baka la’ng o sa ikemišetše go sepela tseleng e tshesane yeo e išago bophelong? Ka go tšeela godimo le go diriša seo o ithutago sona Lentšung la Modimo, wena ka noši o ka bona kholofetšo ya Beibele e ruthetšago pelo e rego: “La tlo tseba therešô, ’me therešô ya tlo Le lokolla.”—Johane 8:32.