Diphuthelwana tša Dijo di Nea Bohlatse

MATŠATŠING ao a latetšego tšhišinyego ya lefase kua Kobe, Japane ka January e fetilego, batho ba lefelong leo le wetšwego ke kotsi ba ile ba ba le bothata bja go hwetša dijo. Lega go le bjalo, Dihlatse tša Jehofa di be di sa hloke dijo ka thušo e botho ya bagwera ba tšona. Matšatšing a pele a mabedi goba a mararo ka morago ga tšhišinyego, diphuthego tša kgaufsi di ile tša lokišetša dikgokolwana tša reisi. Go se go ye kae bagwera ba kgomegago ba ile ba lokišetša diphuthelwana tša dijo. Ba bantši ba ile ba kgomaretša diphuthelwaneng tša dijo mangwalwana ao a bontšhago go kgomega ga bona ka ba wetšwego ke kotsi. Bao ba ilego ba amogela dijo ba boletše gore dijo tše dingwe le tše dingwe di be di “nokilwe ka letswai” ka ge ba be ba sa kgone go thibela megokgo ya bona ge ba bala mangwalwana.

Dihlatse tša Jehofa di ile tša abelana le ba bangwe bao ba bego ba hloka. Hlatse e nngwe e ile ya ikhwetša e e-ja dijo tša yona tša mosegare ge e be e sepela ka koloi le mošomi-gotee yo e sego Hlatse, yo e šomago le yena khamphaning e tee. Ka go rialo e ile ya abelana le yena se sengwe sa diphuthelwana tša dijo tšeo e bego e di amogetše.

Mošomi-gotee le yona o ile a botšiša gore: “O rekile kae sephuthelwana se sa dijo tša mosegare?” Ngwanabo rena o ile a hlalosa mošomo wa tlhakodišo wa Dihlatse tša Jehofa. Monna o ile a bolela ka tebogo gore: “Ke na le matšatši ke sa je merogo. Ke tla šadiša e mengwe gomme ka ya le yona gae bakeng sa lapa la-ka.”

Ge se se be se direga ka lekga la boraro, mošomi-gotee o ile a nea Hlatse di-yen tše 3 000 (R125) gomme a re: “Ke tlwaetše mediro ya lena, ka gona hle ntumelele gore ke neele bakeng sa modiro wa lena. Ke leboga go abelana ga gago le nna dijo tša gago tša mosegare. Ruri, bagwera ba gago ka moka ke batho ba rategago kudu.”