Lebone la Tšona ga se la ka la Tima

MEHLENG ya Beibele go be go e-na le dihlatse tše botegago tša Jehofa tše ilego tša lebeletšana le go palelwa le mathata. Di ile tša lebeletšana le kganetšo le seo se bego se bonala e le go palelwa. Lega go le bjalo, ga se tša ka tša ineela ka baka la go nyama. Ge e le gabotse, lebone la tšona ga se la ka la tima.

Ka mohlala, moporofeta Jeremia o ile a newa thomo ya go ba moporofeta wa Modimo setšhabeng se hlanogilego sa Juda. O ile a kwatša temošo mabapi le tshenyego e tlago ya Jerusalema. (Jeremia 1:11-19) Ka baka leo, Jeremia o ile a thulana gantši le baagi-gotee le yena ba naga ba bego ba mo lebelela e le mogoeledi wa manyami.

Moperisita Pašuri yo e bego e le mohlokomedi yo mogolo ka ngwakong wa Modimo o kile a betha Jeremia ka baka la seo a bego a se porofetile, a ba a mo tsenya ka setokising. Ka baka la se seo se bonalago e le go palelwa, Jeremia o itše: “Ka ba mo-hlwa-kè-sêxwa, ka moka ba nkwêra. Xe nka re ke a bua, e ba mokxoši wa khulô le mašêxêrêpê. Nna Lentšu la Morêna le nthlôlêla dithoxô le dikwêrô tša ka mehla.” Moporofeta o be a nyamile moo a ilego a re: “Nka se ke ka hlwa ke mo [Jehofa] gopola, nka se ke ka hlwa ke bolela leina la gagwe.”—Jeremia 20:1, 2, 7-9, bapiša le PK.

Lega go le bjalo, Jeremia ga se a ka a ineela go nyameng. Ge a be a bolela ka “Lentšu la Morêna” o itše: “Ke kwa mo pelong [le] mphiša bo-ka mollô o tukaxo, ó ntsene mašapong. Ka ipolaiša kxôtlêlêlô ka palêlwa.” (Jeremia 20:8, 9) A tutueditšwe ka matla go bolela dipolelo tša Modimo, Jeremia o ile a thekgwa ke moya o mokgethwa gomme a phetha thomo ya gagwe.

Moapostola Paulo le yena o be a e-na le mabaka a mantši a go nyama ge nkabe a ile a ineela go ona. O ile a kgotlelela dikotsi tša tlhago, go robegelwa ke sekepe, tlaišo le go bethwa. Go oketša moo, ‘o be a sa khutše go imelwa a phakgametše diphuthego ka moka.’ (2 Ba-Korinthe 11:23-28) Ee, letšatši le letšatši Paulo o ile a swanelwa ke go lebeletšana le mathata a tshwenyega ka diphuthego tše difsa tšeo a bego a thušitše go di hloma. Go oketša moo, o be a sa phethagala gomme a swanelwa ke go lwantšhana le “phatša nameng,” mohlomongwe e le go se bone gabotse. (2 Ba-Korinthe 12:7; Ba-Roma 7:15; Ba-Galatia 4:15) Ba bangwe ba ile ba ba ba bolela Paulo gampe ka go mo seba gomme se se ile sa fihla ditsebeng tša gagwe.—2 Ba-Korinthe 10:10.

Lega go le bjalo, Paulo ga se a ka a dumelela go nyama gore go mo fenye. E be e se motho yo a nago le matla a phagamego le gatee. (2 Ba-Korinthe 11:29, 30) Ke eng se se ilego sa boloka ‘mollo [wa gagwe] wa ka teng’ o tuka? Sa pele, o be a e-na le bagwera ba neago thekgo, ba bangwe ba bile ba mo felegetša Roma moo a ilego a golegwa a le ka ngwakong. (Ditiro 28:14-16) Sa bobedi, moapostola o ile a lebelela boemo bja gagwe ka tsela e leka-lekanego. Batlaiši le baganetši ba gagwe ba be ba fošitše, e sego Paulo. Go ya bofelong bja bophelo bja gagwe bja lefaseng, o ile a ela bohlokwa bja bodiredi bja gagwe ka tsela e nepagetšego gomme a re: “Mphapahlôxô wa xo re ke lokile o šetše o beilwe pele xa-ka; ké wo ke tl’o xo o newa ke Morêna Moahlodi wa xo loka.”—2 Timotheo 4:8.

Go feta tšohle, Paulo o be a e-ya go Jehofa Modimo ka mehla ka thapelo gomme ‘Morena a ema le yena a mo nea matla.’ (2 Timotheo 4:17) Paulo o itše: “Ke kxôna tšohle ka Eo a mphaxo matla.” (Ba-Filipi 4:13) Go boledišana le Modimo le Bakriste-gotee le yena, gotee le go ela bohlokwa bja bodiredi bja gagwe ka mo go nepagetšego di thušitše Paulo gore a tšwele pele tirelong ya Jehofa.

Modimo o ile a budulela Paulo gore a ngwale gore: “A re se kê ra lapa xo dira botse; xobane xe re sa lesetše, re tlo buna ka lebaka la xôna.” (Ba-Galatia 6:7-9) Re tla buna eng? Bophelo bjo bo sa felego. Ka gona-ge, e-ba bjalo ka Jeremia, Paulo le dihlatse tše dingwe tše dintši tše botegago tša Jehofa tše boletšwego Mangwalong. Ee, e-ba bjalo ka tšona gomme o se ke wa ineela go nyameng. O se ke wa tlogela lebone la gago le tima.—Bapiša le Mateo 5:14-16.

[Pictures on page 25]

Paulo le Jeremia ga se ba tlogela lebone la bona le tima