Re Swanetše go Dira’ng Gore re Phološwe?

MONNA o kile a botšiša Jesu gore: “Morêna, a ké ba bakae fêla ba ba tl’o xo phološwa?” Jesu o arabile bjang? Na o itše: ‘E-fo nkamogela ke le Morena le Mophološi wa gago gomme o tla phološwa’? Aowa! Jesu o itše: “Katanang xore Le tsênê ka mojakô o pitlaxanexo; xobane ke a Le botša, ba bantši ba tlo leka xo tsêna ba šitwa.”—Luka 13:23, 24.

Na Jesu o paletšwe ke go araba potšišo ya monna yo? Aowa, monna o be a sa botšiša kamoo go bego go tla ba thata ka gona go phološwa; o botšišitše ge e ba palo e be e tla ba e nyenyane. Ka gona Jesu o bontšhitše feela gore batho ba sego kae kudu go feta kamoo motho a ka letelago ka gona ba be ba tla katanela go amogela tšhegofatšo ye e kgahlišago.

Babadi ba bangwe ba ka ganetša ka gore, ‘Seo ga se se ke se boditšwego.’ Ba ka tsopola Johane 3:16 e bolelago gore: “Xobane Modimo ó ratile lefase xakaakaa, a bá a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.” Lega go le bjalo, re araba ka gore: “Bjale re swanetše go dumela’ng? Gore Jesu o phetše e le ka kgonthe? Ee. Gore ke Morwa wa Modimo? Ka kgonthe go bjalo! Le gona ka ge Beibele e bitša Jesu “Moruti” le “Morêna,” na ga se ra swanela go dumela le seo a se rutilego, go mo kwa le go mo latela?’—Johane 13:13; Mateo 16:16.

Go Latela Jesu

Bjale, bothata bo a rotoga! Batho ba bantši ba boditšwego gore ba “phološitšwe” ba bonala ba se na maikemišetšo a go latela Jesu goba go mo kwa. Ge e le gabotse, moruti wa Moprotestanta o ngwadile gore: “Ee, tumelo ya rena go Kriste e swanetše go tšwela pele. Eupša polelo ya gore e gapeletšega ka mo go feletšego goba go nyakega gore e be bjalo ga e thekgwe le gatee ka Beibeleng.”

Ka mo go fapanego, Beibele e lokeletša mekgwa e gobogilego ya boitshwaro e atilego gare ga batho ba bangwe ba naganago gore ba “phološitšwe.” Mabapi le yo mongwe yo a ilego a tšwela pele ditseleng tše bjalo, e ile ya laela Bakriste gore: “Tlošang motho-mobe mo xare xa lena.” Ka kgonthe Modimo o be a ka se ke a nyaka gore batho ba kgopo ba šilafatše phuthego ya gagwe ya Bokriste!—1 Ba-Korinthe 5:11-13.

Ka gona, go bolela’ng go latela Jesu, gona re ka dira bjang seo? Jesu o dirile’ng? Na o be a gobogile boitshwarong? e le seotswa? e le setagwa? e le moaketši? Na o be a sa botege kgwebong? Ruri ga go bjalo! Mo gongwe o ka botšiša gore, ‘Eupša na ke swanelwa ke go tloša dilo tšeo ka moka bophelong bja-ka?’ Bakeng sa karabo, ela hloko Ba-Efeso 4:17 go ya go 5:5. Ga e bolele gore Modimo o tla re amogela go sa šetšwe seo re se dirago. Go e na le moo, e re laela gore re be ba fapanego le ditšhaba tša lefase tšeo di “[retetšego] . . . gomme lena ga la ka la ithuta go tseba Kriste bjalo; . . . apolang [semelo sa kgale se se dumelelanago le tsela ya lena ya pele ya boitshwaro, NW] . . . E a utswitšego a se ke a hlwa a utswa, . . . gomme bootswa, le makgapha ka moka, le megabaru, le go bolelwa di se ke tša bolelwa gare ga lena, ka mo go lebanego bakgethwa; . . . gobane le a tseba ruri gobane ga go seotswa se sengwe, goba wa makgapha, goba wa megabaru, e lego modiredi wa medimo ya diswantšho, yo a ka bago le kabelo mmušong wa Kriste le wa Modimo.”—PK.

Na re latela Jesu ge e ba re sa leke bonyenyane go phela ka go dumelelana le mohlala wa gagwe? Na ga se ra swanela go katanela go dira gore maphelo a rena a swane kudu le bja Kriste? Potšišo yeo e bohlokwa e naganwa ka sewelo, ge e ba ba nagana ka yona, ke batho ba bolelago bjalo ka pampišana e nngwe ya bodumedi gore: “E-tla go Kriste gona bjale—kamoo o lego ka gona.”

Yo mongwe wa barutiwa ba Jesu o lemošitše gore banna ba sa boifego Modimo e be e le ba “fetolago kgaugelo ya Modimo wa rena e be bohlotlolo [“seširo bakeng sa boitshwaro bjo bo hlephilego,” NW] gomme ba latola Modimo le Jesu Kriste, yo e lego mmuši a nnoši le Morena wa rena.” (Juda 4, PK) Ge e le gabotse, re ka fetola bjang kgaugelo ya Modimo “seširo bakeng sa boitshwaro bjo bo hlephilego”? Re ka dira bjalo ka go nagana gore sehlabelo sa Kriste se bipa dibe tša ka boomo tšeo re ikemišetšago go tšwela pele re di dira go e na le dibe tša go se phethagale ga motho tšeo re lekago go di furalela. Ka kgonthe re be re ka se rate go dumelelana le yo mongwe wa baebangedi ba tumilego kudu ba Amerika, yo a boletšego gore ga o swanelwe ke go “hlwekiša, go tlogela goba go furalela.”—Bapiša le Ditiro 17:30; Ba-Roma 3:25; Jakobo 5:19, 20.

Tumelo e Tutuetša Mogato

Batho ba bantši ba boditšwe gore “go dumela go Jesu” ke tiro e nnoši le gore tumelo ya rena ga se ya swanela go tia ka mo go lekanego go ka tutuetša go kwa. Eupša Beibele ga e dumele. Jesu ga se a bolela gore batho ba thomago tsela ya Bokriste ba phološitšwe. Go e na le moo o itše: “Xomme e a tl’o xo kxôtlêlêla xo iša bofelong, ké yêna a tl’o xo phološwa.” (Mateo 10:22) Beibele e swantšha tsela ya rena ya Bokriste le lebelo, phologo e le moputso o lego mafelelong a lona. Le gona e kgothaletša gore: “Kitimang ka mokxwa woo, xore Le tlê Le o tšeê.”—1 Ba-Korinthe 9:24.

Ka gona, “go amogela Kriste” go akaretša mo gontši kudu go feta go fo amogela ditšhegofatšo tšeo sehlabelo se se phagamego kudu sa Jesu se di neago. Go nyakega go kwa. Moapostola Petro o bolela gore kahlolo e thoma “ka Ngwakô wa Modimo,” gomme o oketša ka gore: “Byalo xe e thôma ka rena, pheletšô ya ba ba xanaxo xo kwa Ebangedi ya Modimo e tlo ba eng?” (1 Petro 4:17, mongwalo o sekamego ke wa rena.) Ka gona re swanetše go dira mo gontši go feta go fo kwa le go dumela. Beibele e bolela gore re swanetše go ba “badiri ba Lentšu, e sexo bakwi fêla ba ba iphoraforetšaxo.”—Jakobo 1:22.

Molaetša wa Jesu ka Noši

Puku ya Beibele ya Kutollo e na le melaetša e tšwago go Jesu, e fetišeditšwego ka Johane go diphuthego tše šupago tša Bokriste tša pele. (Kutollo 1:1, 4) Na Jesu o boletše gore ka ge batho ba lego ka diphuthegong tše ba be ba šetše ba mo “amogetše,” seo se be se lekane? Aowa. O ile a reta ditiro tša bona, boitapišo bja bona le kgotlelelo ya bona gomme a bolela ka lerato la bona, tumelo le bodiredi. Eupša o boletše gore Diabolo o be a tla ba leka le gore ba be ba tla putswa “mang le mang [ka] se se lebanexo medirô ya [bona].”—Kutollo 2:2, 10, 19, 23.

Ka go rialo, Jesu o hlalositše boikarabelo bjo bogolo kudu go feta kamoo batho ba bantši ba bego ba kwešiša ka gona ge ba be ba botšwa gore phologo ya bona e be e le “modiro o phethilwego” gatee-tee ge ba be ba mo “amogela” sebokeng sa bodumedi. Jesu o itše: “Xe motho a rata xo nthšala moraxo, a ikxafê, a rwalê [kota ya gagwe ya tlhokofatšo, NW], ’me a ntatêlê. E a rataxo xo phološa bophelô bya xaxwe, ó tlo bo lahla; ’me e a lahlaxo bophelô bya xaxwe ka ’baka la-ka, ó tlo bo hwetša.”—Mateo 16:24, 25.

Re itatole? Re latele Jesu ka go se kgaotše? Seo se be se tla nyaka boiteko. Se be se tla fetola maphelo a rena. Lega go le bjalo, na ka kgonthe Jesu o boletše gore ba bangwe ba rena re be re tla be ra swanelwa ke go ‘lahla maphelo a rena’—go hwa ka baka la gagwe? Ee, tumelo ya mohuta woo e tlišwa feela ke tsebo ya dilo tše di tlabago tšeo o ka di tsebago ka go ithuta Lentšu la Modimo. E bonagetše letšatšing leo Stefano a thumilwego ka mafsika ka lona ke bafišegela-thoko ba bodumedi bao ba ilego “ba šitwa xo fenya bohlale bya xaxwe le Môya wo a bexo a bolêla ka wôna.” (Ditiro 6:8-12; 7:57-60) Le gona tumelo e bjalo e bontšhitšwe mehleng ya rena ke Dihlatse tše makgolo tša Jehofa tše hwetšego dikampeng tša tshwenyo tša Nazi, go e na le go gatakela matswalo a tšona a tlwaeditšwego ka Beibele.a

Phišego ya Bokriste

Re swanetše go kgomarela tumelo ya rena ya Bokriste ka go tia ka gobane Beibele e bolela gore re ka wa, go fapana le seo o ka se kwago go tše dingwe tša dikereke goba mananeong a thelebišene a bodumedi. E bolela ka Bakriste ba ilego ba lahla “tsela ya xo loka.” (2 Petro 2:1, 15) Ka gona, re swanetše go ‘phegelela phologo ya rena ka poifo le ka tšhogo.’—Ba-Filipi 2:12; 2 Petro 2:20.

Na yeo ke tsela yeo Bakriste ba lekgolong la pele la nywaga ba ilego ba kwešiša taba ka yona, e lego batho bao ba kwelego Jesu le baapostola ba gagwe ba ruta e le ka kgonthe? Ee. Ba be ba tseba gore ba be ba swanelwa ke go dira se sengwe. Jesu o itše: “Ké xôna yang Le dirê dithšaba ka moka barutiwa . . . ka xo ba ruta xo boloka tšohle tše ke Le laetšexo tšôna.”—Mateo 28:19, 20.

Dibeke tše mmalwa ka morago ga ge Jesu a boletše seo, batho ba 3 000 ba ile ba kolobetšwa ka letšatši le tee feela. Palo ya badumedi e ile ya gola ka bjako go fihla go 5 000. Ba dumetšego ba ile ba ruta ba bangwe. Ge tlaišo e be e ba phatlalatša, e ile ya fo thuša go gaša molaetša wa bona. Beibele e bolela gore ga se baetapele ba sego kae feela eupša “ba ba xašantšwexo ba na ba sepela le naxa, ba bolêla Lentšu la Ebangedi.” Ka gona nywaga e 30 ka morago, moapostola Paulo o be a ka ngwala gore ditaba tše di lokilego di be di “anêxêlwa babopya bohle ba tlase xa lexodimo.”—Ditiro 2:41; 4:4; 8:4; Ba-Kolose 1:23.

Paulo o be a sa dire basokologi, go etša ge baebangedi ba bangwe ba TV ba dira ka go bolela gore: ‘Amogela Jesu gona bjale gomme o tla phološetšwa sa ruri.’ Le gona o be a se na kgodišego e swanago le ya moruti wa Amerika yo a ngwadilego gore: “Ge ke be ke sa le mošemanyana yo a lego mahlalagading, . . . ke be ke šetše ke phološitšwe.” Nywageng e fetago 20 ka morago ga ge Jesu ka boyena a kgethile Paulo gore a iše molaetša wa Bokriste go batho ba ditšhaba, moapostola yo yo a šomago ka thata o ile a ngwala gore: “Ke ôtlaka mmele wa-ka xore ke o thapišê; xore e se bê kè le motsenedi wa ba bangwê, nna mong ka nyatšêxa.”—1 Ba-Korinthe 9:27; Ditiro 9:5, 6, 15.

Phološo ke mpho e sa lefelelwego e tšwago go Modimo. E ka se ke ya hwetšwa ka go šomelwa. Lega go le bjalo e nyaka boiteko bja rena. Ge e ba motho a go nea mpho e bohlokwa-hlokwa gomme o sa bontšhe tebogo e lekanego go ka e tšea gore o tloge le yona, go hloka tebogo ga gago go ka tutuetša monei gore a e nee motho yo mongwe. Bjale, madi a Jesu Kriste ke a bohlokwa gakaaka’ng? Ke mpho e sa lefelelwego, eupša re swanetše go bontšha tebogo e tseneletšego ya go e leboga.

Bakriste ba therešo ba boemong bja go phološwa ka gobane ba boemong bjo bo amogelegago pele ga Modimo. E le sehlopha, phologo ya bona e kgonthišeditšwe. E le batho ka o tee ka o tee, ba swanetše go fihlelela tšeo Modimo a di nyakago. Lega go le bjalo, re ka palelwa ka gobane Jesu o itše: “Motho xe a sa dule à le mo xo Nna, ó lahletšwe ntlê byalo ka lekala xe le omeletše.”—Johane 15:6.

“Lentšu la Modimo ké le le Phelaxo”

Poledišano e boletšwego mathomong a sehlogo se se fetilego e diregile nywageng e ka bago 60 e fetilego. Johnny o sa dutše a dumela gore phologo e tla feela ka Jesu Kriste, eupša o lemoga gore re swanelwa ke go e katanela. O dula a kgodišegile gore Beibele e šupa mothopong o nnoši wa kgonthe wa kholofelo bakeng sa batho le gore re swanetše go ithuta puku yeo e kgahlišago, e re tutuetše gomme re e dumelele gore e re tutueletše go dira ditiro tša lerato, tumelo, botho, go kwa le kgotlelelo. O godišitše bana ba gagwe gore ba dumele dilo tše di swanago, gomme bjale o thabela go ba bona le bona ba godiša bana ba bona ka tsela e swanago. O kganyoga ge nkabe yo mongwe le yo mongwe a e-na le tumelo e bjalo, gomme o dira sohle seo a ka se kgonago go e bjala ka dipelong le menaganong ya ba bangwe.

Moapostola Paulo o ile a budulelwa go ngwala gore “Lentšu la Modimo ké le le phelaxo, ké le matla.” (Ba-Hebere 4:12) Le ka fetola maphelo. Le ka go tutueletša ditirong tše tšwago pelong tša lerato, tumelo le go kwa. Eupša o swanetše go dira se se fetago go fo “amogela” monaganong seo Beibele e se bolelago. Ithute yona gomme o dumelele pelo ya gago gore e tutuetšwe ke yona. Dumelela bohlale bja yona gore bo go hlahle. Dihlatse tše ka bago 5 000 000 tše di ikemišeditšego tša Jehofa dinageng tše fetago 230 di ithapela go swara dithuto tše sa lefelelwego tša magae tša Beibele. Go bona seo o ka ithutago sona thutong e bjalo, ngwalela bagatiši ba makasine wo. Tumelo yeo o e hwetšago gotee le matla a moya di tla go thabiša!

[Mongwalo wa tlase]

[Lepokisi go letlakala 7]

KE KA BAKA LA’NG RE SWANETŠE GO “HLABANÊLA TUMÊLÔ”?

Puku ya Beibele ya Juda e lebišitšwe go “babidiwa . . . ba ba boloketšwexo Jesu Kriste.” Na e bolela gore phologo ya bona e be e kgonthišeditšwe ka ge ba ‘amogetše Jesu’? Aowa, Juda o boditše Bakriste ba bjalo gore e be ba “xo hlabanêla tumêlô.” O ba neile mabaka a mararo a go dira bjalo. La pele, Modimo o ile a “phološa sethšaba naxeng ya Egipita,” eupša bogolo bja sona bo ile bja wa ka morago. La bobedi, gaešita le barongwa ba ile ba rabela gomme ya ba batemona. La boraro, Modimo o fedišitše Sodoma le Gomora ka baka la boitshwaro bjo bo šiišago bjo bo gobogilego bja botona le botshadi bjo bo bego bo dirwa metseng yeo. Juda o hlalosa dipego tše tša Beibele “e le mohlala wa temošo.” Ee, gaešita le badumedi “ba ba boloketšwexo Jesu Kriste” ba swanelwa ke go šetša gore ba se ke ba wa tumelong ya therešo.—Juda 1-7.

[Lepokisi go letlakala 8]

KE EFE E NEPAGETŠEGO?

Beibele e re: “Motho [o] lokafala ka tumêlô, e sexo ka medirô ya Molaô.” E bolela gape gore: “Motho ó lokafala ka medirô, e sexo ka tumêlô è nnoši.” Ke efe e nepagetšego? Na re lokafatšwa ka tumelo goba ka mediro?—Ba-Roma 3:28; Jakobo 2:24.

Karabo e dumelelanago e tšwago Beibeleng ke ya gore ka bobedi bja tšona di nepagetše.

Ka nywaga-kgolo e mentši Molao wo Modimo a o neilego ka Moše o be o nyaka gore barapedi ba ba-Juda ba neele dihlabelo tše kgethegilego le dibego, ba boloke matšatši a menyanya le go itumelelanya le melao ya dijo le tše dingwe. “Medirô [e bjalo] ya Molaô” goba “medirô” e be e se sa nyakega ka morago ga ge Jesu a neetše sehlabelo se phethagetšego.—Ba-Roma 10:4.

Eupša therešo ya gore mediro ye e dirilwego ka tlase ga Molao wa Moše e ile ya tšeelwa sebaka ke sehlabelo sa Jesu se phagamego kudu e be e sa bolele gore re ka hlokomologa ditaelo tša Beibele. E re: “Madi a Kriste . . . a a ka se fetiše kxolê xo hlatswa matswalô a rena ra tšwa ’thšila tša medirô ye [ya kgale] e hwilexo, ra tla ra dirêla Modimo e a phelaxo [tirelo e kgethwa, NW]?”—Ba-Hebere 9:14.

Re “dirêla [bjang] Modimo e a phelaxo [tirelo e kgethwa]”? Gare ga dilo tše dingwe, Beibele e re laela gore re lwantšhe mediro ya nama, re gane kgobogo ya lefase ya boitshwaro gomme re pheme mereo ya lona. E re: “Hlabana thlabanô e botse ya tumêlô,” o tloše “sebe se se re rarêlaxo” gomme o “kitime ka kgotlelelo lebelong le le lego pele ga rena, ge re dutše re tsepeletše Moetapele yo Mogolo le Mophethi wa tumelo ya rena Jesu.” Le gona Beibele e re kgothaletša gore re se ke ra ‘lapa dipelo ra lesetša.’—1 Timotheo 6:12; Ba-Hebere 12:1-3, bapiša le NW; Ba-Galatia 5:19-21.

Ga re hwetše phologo ka go dira dilo tše, ka gobane ga go na motho yo a bego a ka dira se se lekanego go swanelegela tšhegofatšo e bjalo e tlabago. Ka gona, ga re swanelwe ke mpho ye e botse ge re palelwa ke go bontšha lerato la rena le go kwa ka go dira dilo tšeo Beibele e rego Modimo le Kriste ba nyaka gore re di dire. Ka ntle le mediro ya go bontšha tumelo ya rena, go bolela ga rena gore re latela Jesu go ka hlaelelwa kudu ka gobane Beibele e bolela ka mo go kwalago gore: “Le tumêlô . . . xe e se na medirô, e ikhwetše ka nnoši.”—Jakobo 2:17.

[Seswantšho go letlakala 7]

Ithute Beibele gomme e go tutuetše