Go Phelela Keno ya Gago ya Lenyalo!

LETŠATŠI la monyanya wa lenyalo ke letšatši la lethabo. Gape ke tiragalo e bohlokwa kudu. Monyadiwa le monyadi ba dira kholofetšo e bohlokwa e tlago go kgoma maphelo a bona ka moka. Ba lego gona monyanyeng wa lenyalo e le baeng ke dihlatse tša kholofetšo ye e bohlokwa, eupša Jehofa Modimo ke Hlatse e kgolo.

Beibele ga e nyake ditshepedišo tše kgethegilego goba mohuta o kgethegilego wa tirelo ya lenyalo. Lega go le bjalo, ka go lemoga go thongwa ga lona ke Modimo, ka tlwaelo lenyalo le tiišwa ka go dirišwa ga dikeno tša lenyalo nakong ya tirelo ya tša bodumedi. Ka nywaga e mentši Dihlatse tša Jehofa di be di dutše di diriša keno e latelago ya lenyalo: “Nna—— ke tšea wena—— gore o be (mosadi/monna) wa-ka yo ke nyalanego le yena, gore ke go rate le go go hlokomela (Monyadiwa: gomme ke go hlomphe ka mo go tseneletšego) ka go dumelelana le molao wa Modimo bjalo ka ge o hlalositšwe ka Mangwalong a Makgethwa bakeng sa (basadi/banna) ba Bakriste, ge feela bobedi bja rena re sa dutše re phela gotee lefaseng go ya ka thulaganyo ya Modimo ya lenyalo.”a

Selo Seo go ka Naganwago ka Sona

Ge e ba o akanya go tsena lenyalong, go be go tla ba bohlokwa kudu gore o nagane ka bogolo le bohlokwa bja keno ye pele ga letšatši la monyanya. Salomo o itše: “O se kê wa re, Ò le pele xa Modimo, wa hlaxanêla xo bolêla, pelo ya xaxo ya akxofa ya nthša lentšu.” (Mmoledi 5:1) Go thwe’ng ge e ba o šetše o tsene lenyalong? Gona o tla holwa ke go naganišiša ka bohlokwa bja kholofetšo e kgolo yeo o e dirilego pele ga Jehofa. Na o a e phelela? Bakriste ba lebelela dikholofetšo tša bona e le tša bohlokwa. Salomo o tšwela pele ka gore: “Phêtha se O se ennexo. Xo êna, wa lesa xo phêtha, xo kaone xe O sa ene. Se lesê molomo w’axo wa diriša mmele w’axo sebe; O se tlo bolêla le motseta wa re: Ke fošitše!”—Mmoledi 5:3-5.

Ga go pelaelo gore go seka-seka keno ya lenyalo lefoko ka lefoko go tla humiša kwešišo ya gago ya kholofetšo ye e kgolo.

“Nna—— ke tšea wena”: A ke mantšu a mathomo a keno. A gatelela gore o amogela boikarabelo bja phetho yeo o e dirilego ya go tsena lenyalong.

Ka tlase ga thulaganyo ya Bokriste, ga go na kgapeletšo ya Mangwalo ya go tsena lenyalong. Jesu Kriste ka boyena o ile a dula a sa nyala gomme a kgothaletša go se be lenyalong go bao ba “kxônaxo.” (Mateo 19:10-12) Ka lehlakoreng le lengwe, bontši bja baapostola ba Jesu e be e le banna ba nyetšego. (Luka 4:38; 1 Ba-Korinthe 9:5) Go molaleng gore phetho ya go tsena lenyalong ke ya motho ka noši. Ga go na motho yo a nago le tshwanelo ya Mangwalo ya go gapeletša yo mongwe go tsena lenyalong.

Ka gona, o ikarabela ka go kgetha go tsena lenyalong. Mo gongwe o kgethile motho yo o nyalanago le yena. Ge o dira keno ya lenyalo o re, ‘Ke tšea wena——,’ o tšea goba o amogela motho yoo ka dika tša gagwe tše botse—eupša gape le ka diphošo tša gagwe.

Mo gongwe mafelelong o tla lemoga dikarolo tšeo o sa kago wa di naganela tša semelo sa molekane wa gago. Go tla ba le dinako tša go nyema moko. Beibele e bolela gore “ba dirile dibe bohle, ba hlaya letaxô la Modimo.” (Ba-Roma 3:23) Ka gona mo gongwe o ka swanelwa ke go dira dipeakanyo e le gore o kgotlelele molekane wa gago. Se se ka ba thata gomme ka dinako tše dingwe o ka ikwa eka o ka tlogela. Eupša gopola gore keno ya lenyalo e dirwa Jehofa a le gona. A ka go thuša gore o atlege.

“Gore o be (mosadi/monna) wa-ka yo ke nyalanego le yena”: Monyanyeng wa mathomo-thomo wa lenyalo ge Adama a be a newa Efa ka lenyalo, Jehofa Modimo o ile a bolela gore “ba tlo ba nama e tee.” (Genesi 2:24; Mateo 19:4-6) Ka go rialo tlemo ya lenyalo ke tswalano ya kgaufsi-ufsi yeo e ka bago gona magareng ga batho ba babedi. Lenyalo le go tsenya tswalanong e mpsha ya lapa. O amogela motho yo mongwe gore e be “mosadi [wa gago] yo [o mo] nyetšego” goba “monna [wa gago] yo [o] nyalanego le yena.” Ga e swane le tswalano le ge e le efe e nngwe. Ditiro tše di bakago kgobalo e nyenyane ditswalanong tše dingwe di ka baka bohloko bjo bo tseneletšego thulaganyong ya lenyalo.

Ka mohlala, ela hloko keletšo ya Mangwalo e hwetšwago go Ba-Efeso 4:26. Beibele e bolela moo gore: “Xe Le xalefa Le se kê la senya; a letšatši le se dikêlê Lè sa xalefile.” Mohlomongwe o be o sa rarolle mathata a gago le meloko le bagwera ka mehla ka go akgofa kamoo o bego o swanetše go dira ka gona. Eupša molekane wa gago o kgaufsi kudu go feta moloko goba mogwera le ge e le ofe yo mongwe. Go palelwa ke go lokiša ditaba ka go akgofa le molekane wa gago go ka bea kotsing tswalano e kgethegilego ya lapa e lego magareng ga lena.

Na o dumelela go se dumelelane mo go lego gona magareng ga gago le molekane wa gago gore go gole go ba mothopo o tšwelago pele wa tshelekego goba kgalefo? Na go se kwešišane le maemo a kgopišago di dula di sa rarollwa ka matšatši a mmalwa? Gore o phelele keno ya gago, ge mathata a rotoga o se ke wa dumelela letšatši le feta ka ntle le go dira khutšo le molekane wa gago. Se se bolela go swarela le go lebala gotee le go amogela mafokodi le diphošo tša gago ka noši.—Psalme 51:5; Luka 17:3, 4.

“Gore ke go rate”: Monna o ena gore o tla ‘rata le go hlokomela’ monyadiwa ga gagwe. Lerato le le akaretša lerato la ba bong bjo bo sa swanego leo go bonalago le ba kopantše. Eupša lerato la ba bong bjo bo sa swanego ga se la lekana. Lerato leo Mokriste a le enelago molekane wa gagwe ke le tseneletšego le le nabilego.

Ba-Efeso 5:25 e re: “Lena Banna, ratang basadi ba lena, byalo ka xe Kriste a ratile phuthêxô.” Lerato la Jesu la go rata phuthego le be le ka se ke la tsenywa legorong le tee le lerato le lego magareng ga ba bong bjo bo sa swanego. Mantšu “ratang” le “ratile” a dirišitšwego temaneng ye a tšwa go lentšu a·gaʹpe, leo le šupago lerato le laolwago ke molao wa motheo. Beibele mo e laela banna gore ba bontšhe basadi ba bona lerato le sa kgaotšego, le sa šišinyegego le la ka mo go sa felego.

Ga se mohuta feela wa maikwelo a “Ke go rata ka gobane o nthata.” Monna o etiša boiketlo bja mosadi wa gagwe gaešita le pele ga bja gagwe gomme mosadi o rata monna wa gagwe ka mokgwa o swanago. (Ba-Filipi 2:4) Go hlagolela lerato le tseneletšego la go rata molekane wa gago go tla go thuša gore o phelele keno ya gago ya lenyalo.

“Le go go hlokomela”: Go ya ka pukuntšu e nngwe, “go hlokomela” go bolela ‘go se swara e le se rategago, go ba le maikwelo goba go bontšha maikwelo a borutho bakeng sa.’ O swanetše go bontšha lerato la gago ka mantšu le ka ditiro! Mosadi ka mo go kgethegilego o nyaka go amogela dipontšho tše sa kgaotšego tša lerato la monna wa gagwe. Monna wa gagwe a ka ba a hlokomela dinyakwa tša gagwe tša nama gabotse kudu, eupša se ga se sa lekana. Go na le basadi ba nago le dijo tše lekanego le magae a boiketlo eupša e le ba sa thabago e le ka kgonthe ka baka la ge ba hlokomologwa goba ba sa šetšwe ke balekane ba bona ba lenyalo.

Ka lehlakoreng le lengwe, mosadi yo a tsebago gore o a ratwa le go swarwa e le wa bohlokwa o na le mabaka ohle a go thaba. Ee, go ka bolelwa se se swanago ka monna. Lerato la kgonthe le godišwa kudu ke dipontšho tše tšwago pelong tša lerato. Go Sefela sa Difela, moratiwa wa modiši o bolela gore: “Leratô la xaxo [“dipontšho tša gago tša lerato,” NW], wene Kxaetšedi Mmeeletšwa, xa se ka xo kxahla! Leratô la xaxo xa se ka xo tsefa, le phala morara; monkô wa ditlôlô tš’axo o phala diôrêlô tšohle.”—Sefela sa Difela 4:10.

“Gomme ke go hlomphe ka mo go tseneletšego”: Nywaga-kgolo ka moka go be go dutše go e-na le banna ba bego ba swara basadi gampe le go ba nyenyefatša. Go ya ka makasine wa World Health, gaešita le lehono “bošoro bjo bo dirwago go basadi bo direga nageng e nngwe le e nngwe le sehlopheng se sengwe le se sengwe sa tša leago le sa tša boiphedišo. Ditlogong tše dintši, go betha mosadi go lebelelwa e le tshwanelo ya monna.” Banna ba bantši ba ka ba ba se na molato wa boitshwaro bjo bjalo. Lega go le bjalo, go bonala eka banna ba bantši ba palelwa ke go bontšha kgahlego ya kgonthe ditabeng tše kgomago basadi. Ka baka leo, basadi ba bantši ba ile ba hlagolela kgopolo e fošagetšego ka banna. Basadi ba bangwe ba nyetšwego ba ile ba kwewa ba re, “Ke rata monna wa-ka, eupša ruri ga ke kgone go mo hlompha!”

Lega go le bjalo, Jehofa Modimo o godiša mosadi yo a katanelago go hlompha monna wa gagwe—gaešita le ge monna a palelwa ke go fihlelela tšeo mosadi a di letetšego ka dinako tše dingwe. Mosadi o lemoga gore monna o na le kabelo goba boemo bjo a bo neilwego ke Modimo. (1 Ba-Korinthe 11:3; Ba-Efeso 5:23) Ka gona, tlhompho e tseneletšego ya go hlompha monna wa gagwe ke karolo ya borapedi bja gagwe le go kwa ga gagwe Jehofa. Modimo ga a tshediše go kwa ga basadi ba boifago Modimo mahlo.—Ba-Efeso 5:33; 1 Petro 3:1-6; bapiša le Ba-Hebere 6:10.

Tlhompho lenyalong e swanetše go bontšhwa ka mahlakoreng ka bobedi gomme e swanetše go šomelwa go e na le go fo letelwa goba ya gapeletšwa. Ka mohlala, polelo e kodutlago goba e kgopišago ga e na sebaka thulaganyong ya lenyalo. E be e ka se be lerato goba tlhompho go bolela dipolelo tše kgopišago ka monna goba mosadi wa gago. Ga go na selo se sebotse se ka tlišwago ke go utollela ba bangwe mafokodi a molekane wa gago goba go bolela ka ona phatlalatša. Gaešita le ge e le metlae, motho a ka bontšha go hlaelelwa kudu ke tlhompho karolong ye. Mantšu a Ba-Efeso 4:29, 32 a šoma go monna le mosadi ka bobedi. Beibele e bolela moo gore: “Melomong ya lena xo se kê xwa tšwa lentšu le lebe; a xo tšwê le boló la xo iša kaxišô mo e hlaêlaxo, . . . Sa lena a e bê xo dirana ka botho le ka bonôlô, le xo xauxêlana.”

“Ka go dumelelana le molao wa Modimo bjalo ka ge o hlalositšwe ka Mangwalong a Makgethwa”: Modimo o nyaka gore re thabele tokologo ya go dira kgetho le go gata mogato. Ga a re imetše ka lelokelelo le lapišago la melao e laolago bophelo bja lenyalo. Lega go le bjalo, o beile ditaelo tša tlhahlo bakeng sa rena.

Lehono go na le dipuku tše dintši tše fapa-fapanego tše gatišitšwego mabapi le lenyalo gomme batho ba bantši ba na le dikgopolo tša bona ka noši. Eupša ela hloko! Tabeng ya lenyalo, tsebišo e ntši e abjago e ganetšana le Beibele.

Lemoga gape gore maemo a fapana go ya ka banyalani. Ka tsela e itšego, banyalani ba bjalo ka diphaphathi tša kapoko; di ka bonala di swana ge di le kgole, eupša ge e le gabotse e nngwe le e nngwe e fapane gomme ga e swane le tše dingwe ka moka. Go kopanywa ga semelo sa gago le sa molekane wa gago ga go swane le ga banyalani le ge e le bafe ba bangwe lefaseng. Ka gona o se ke wa akgofela go amogela dikgopolo tša motho ka noši tša ba bangwe. Ga go na keletšo e hlamilwego ke batho e šomago lenyalong le lengwe le le lengwe!

Ka mo go fapanego, melao ya Beibele ka moka ke ya therešo gomme e a šoma. Moapostola Paulo o ngwadile gore: “Xobane Mangwalô ka moka ké ma-hebetšwa-ke-Modimo, le xôna a hola batho ka xo ruta, le ka xo kxodiša le xo sokolla [“lokiša dilo,” NW].” (2 Timotheo 3:16; Psalme 119:151) Ge e ba o bala Beibele gomme o amogela dithuto tša yona e le tlhahlo bophelong bja gago bja letšatši le letšatši, o tla kgona go phelela keno ya gago ya lenyalo.—Psalme 119:105.

“Ge feela bobedi bja rena re sa dutše re phela gotee lefaseng”: Se se šupa go go ba gotee ka nako e telele. Modimo o laela gore “monna ó tlo tloxêla tata’xwê le mma’xwê, a xomarêla mosadi wa xaxwe.” (Genesi 2:24) Jehofa o nyaka gore le be gotee. Hlankelang Modimo le le gotee. Ithuteng Lentšu la gagwe le le gotee. Tšeang nako le sepela le le gotee, le dutše gotee, le e-ja gotee. Thabelang bophelo le le gotee!

Banyalani ba bangwe ba dira boiteko bja go beela nako ka thoko letšatši le lengwe le le lengwe feela gore ba boledišane. Gaešita le ka morago ga ge le nyalane ka nywaga e mentši, go ba gotee moo ke gabohlokwa bakeng sa lethabo lenyalong.

“Go ya ka thulaganyo ya Modimo ya lenyalo”: Lenyalo ke mpho e tšwago go Jehofa Modimo yo a hlomilego thulaganyo ya lenyalo. (Diema 19:14) Go palelwa ke go latela thulaganyo ya gagwe go ka se ke gwa bea lethabo la lenyalo feela kotsing, eupša gape le tswalano ya lena le Mmopi. Ka lehlakoreng le lengwe, ge monna le mosadi ba hlagolela tswalano e botse le Jehofa e bontšhwago ka go latela dithulaganyo tša gagwe, ba tla ba le ditswalano tša khutšo le ba bangwe go akaretša le yo mongwe le yo mongwe wa bona.—Diema 16:7.

Le ka mohla le se ke la lebala gore Jehofa ke Hlatse e kgolo ya keno ya lena ya lenyalo. Tšwelang pele le phelela kholofetšo ye e kgolo gomme lenyalo la lena e tla ba mothopo wa theto le kgodišo go Jehofa Modimo!

[Mongwalo wa tlase]

[Seswantšho go letlakala 22]

Ka tsela e itšego, banyalani ba bjalo ka diphaphathi tša kapoko. Ka moka ga tšona di ka bonala di swana ge di le kgole, eupša ge e le gabotse banyalani ba bangwe le ba bangwe ba fapana ka mo go kgethegilego

[Credit Line]

Snow Crystals/Dover