Bonang Babotegi ba sa Kwanantšhego!

“E ka ba mang yo a sa go boifego, Morena, a sa tumiše leina la gago? Gobane o [botega ka go se kwanantšhe, NW] o nnoši.”—KUTOLLO 15:4, PK.

1. Ke bohlatse bofe bjoo J. F. Rutherford a bo neilego mabapi le potego e sa kwanantšhego ya ketapele ya gagwe, e lego C. T. Russell?

JOSEPH F. RUTHERFORD yo a hlatlamego C. T. Russell e le mopresidente wa Mokgatlo wa Watch Tower ka 1917 o ile a thoma ditlhaloso tša gagwe tirelong ya poloko ya Russell ka gore: “Charles Taze Russell o be a botegela Modimo ka go se kwanantšhe, a botegela Kriste Jesu ka go se kwanantšhe, a botegela mothopo wa mmušo wa Mesia ka go se kwanantšhe. O be a botega ka go se kwanantšhe ka mo go feletšego—ee, a botega ka go se kwanantšhe gaešita le go fihla lehung.” Yeo ruri e be e le tlhompho e botse e bego e ka dirwa go mohlanka yo a botegago wa Jehofa Modimo. Ga go na tlhompho e kgolo yeo re bego re ka e nea motho le ge e le ofe go feta go bolela gore o fentše tlhohlo ya potego e sa kwanantšhego, gore o be a botega ka go se kwanantšhe—a botega ka go se kwanantšhe ka mo go feletšego.

2, 3. (a) Ke ka baka la’ng potego e sa kwanantšhego e rotoša tlhohlo? (b) Ke bomang gape bao ba itokišeditšego go lwantšha Bakriste ba therešo maitekong a bona a go botega ka go se kwanantšhe?

² Potego e sa kwanantšhego e tšweletša tlhohlo. Ka baka la’ng? Ka baka la gore potego e sa kwanantšhego e ganetšana le go tshwenyega ga motho ka yena ka noši. Ba bagolo gare ga bao ba sa botegelego Modimo ke baruti ba Bojakane. Ka morago, le ka mohla ga se gwa ka gwa ba le go se botege mo go apareditšego gakaalo go swana le ditswalanong tša lenyalo lehono. Bootswa bo tlwaelegile. Go se botege go apareditše le lefaseng la kgwebo. Mabapi le se, re botšwa gore: “Balaodi ba bantši le bašomi ba tlwaeditšwego ba mediro . . . ba dumela gore ke feela mašilo le bao ba hlalefetšegago gabonolo ba botegelago dikhamphani tša bona ka go se kwanantšhe lehono.” Batho bao ba “botegago kudu ka go se kwanantšhe” ba tšeelwa fase. “Ke wena motho wa pele le wa mafelelo yo o swanetšego go mmotegela ka go se kwanantšhe,” ke tsela yeo mopresidente wa feme e eletšago ka tša taolo le phethišo a beilego taba ka gona. Go bolela ka go ba yo a ipotegelago ka go se kwanantšhe ke go senya tlhaloso ya lentšu leo. Se se re gopotša seo se boletšwego go Mika 7:2: “Mmotegi yo a sa kwanantšhego ga a sa le gona lefaseng.”—NW.

³ Sathane le batemona ba gagwe ba itokišeditše go re lwantšha ka tekanyo e kgolo ka go fetišiša, ba ikemišeditše go re dira gore re se ke ra botegela Modimo. Ke ka baka leo Bakriste ba botšwago go Ba-Efeso 6:12 gore: “Xobane thlabanô ya rena xa se ya xo lwa le madi le nama; re lwa le mebušô le ba matla le balaola-mafase ba lefsifsi; re lwa le meôya ya bobe e lexo sebakeng sa xodimo.” Ee, re swanetše go kwa temošo e rego: “Le phafoxê le phakxamê, xobane Diabolo lenaba la lena ó Le dikoloxa bo-ka tau e bôpaxo; ó nyaka yo a kaxo mo metša.”—1 Petro 5:8.

4. Ke ditshekamelo dife tše di dirago gore go ba yo a botegago ka go se kwanantšhe go be thata gakaakaa?

⁴ Tše dingwe tšeo di dirago gore go botega ka go se kwanantšhe go be thata ke ditshekamelo tša boithati tšeo re di abetšego go batswadi ba rena bjalo ka ge go boletšwe go Genesi 8:21 gore: “Diakanyô tša pelo ya motho [ke] tše mpe”—le tša boithati—“xo tloxa byaneng bya xaxwe.” Ka moka ga rena re na le bothata bjo moapostola Paulo a ipoletšego gore o na le bjona ka gore: “Xa ke dire botse byo ke bo rataxo; ke dira bobe byo ke sa bo ratexo.”—Ba-Roma 7:19.

Potego e sa Kwanantšhego ke Selo se se Kgethegilego

5, 6. Go ka bolelwa’ng ge e le ka seo potego e sa kwanantšhego e lego sona, gomme e hlalositšwe bjang?

⁵ “Potego e sa kwanantšhego” ke polelwana e kgethegilego kudu. Ka go rialo Insight on the Scriptures e re: “Go bonala go se na mantšu a Seisemane ao a bolelago tlwaa tlhaloso e feletšego ya lentšu la Sehebere le la Segerika, eupša ‘potego e sa kwanantšhego’ go etša ge e akaretša kgopolo ya boineelo le go botega, ge e dirišwa mabapi le Modimo le tirelo ya gagwe e thuša go nea tlhaloso ya kgaufsi.”a Mabapi le “potego e sa kwanantšhego” Morokami o kile wa bolela ka: “Potego, boikarabelo, lerato, tlemo le boineelo. Ke eng seo mantšu a a swanago ka sona? Ke dibopego tše di fapanego tša potego [e sa kwanantšhego].” Ee, go na le dika tše dintši kudu tšeo e lego dibopego tše di fapanego tša potego e sa kwanantšhego. Ke mo go lemogegago e le ka kgonthe kamoo potego e sa kwanantšhego le go loka di tswalanago gantši ka gona ka Mangwalong.

⁶ Ditlhaloso tše di latelago le tšona di a thuša: ‘Potego e sa kwanantšhego e ka šupa go botega le go kgomarela mo go tšwelago pele, mo go ka botwago le mo go šireletšegilego malebana le go tekema goba teko.’ ‘Potego e sa kwanantšhego e bolela go botegela kholofetšo ya motho goba go kgomarela ka mo go tšwelago pele mokgwa goba melao ya motheo yeo motho a ikwago a tlemilwe go yona; lentšu ga le bolele feela go kgomarela eupša le bolela le go gana go goketšwa le go fekeeletšwa go tlogela go kgomarela moo.’ Ka gona, batho ba tšwelago pele ba botega go sa šetšwe diteko, kganetšo le tlaišo ba swanelwa ke go bitšwa “babotegi ba sa kwanantšhego.”

7. Ke phapano efe e ka bontšhwago magareng ga potego e sa kwanantšhego le potego?

⁷ Lega go le bjalo, mabapi le taba ye e ka ba mo go botse go bontšha phapano yeo e ka dirwago magareng ga potego e sa kwanantšhego le potego. Ka bodikela bja United States go na le mothopo wa meetse a go fiša o thuthupago mo e ka bago ka iri e nngwe le e nngwe. O dira bjalo ka mehla moo o ilego wa ba wa bitšwa Mmotegi wa Kgale. Beibele e bolela ka dilo tše sa phelego tše bjalo ka kgwedi e le e botegago ka gobane ke yeo go ka ithekgwago ka yona. Psalme 89:37 e bolela ka kgwedi e le “hlatse-thereši-marung.” Mantšu a Modimo a bolelwa e le a botegago. Kutollo 21:5 e re: “E a dutšexo sedulong sa boxoši a re: Šidio; dilô tšohle ke di dira tše mphsa.—Nna a ntaêla a re: Ngwala, xobane ’taba tšé ké tša xo rereša le xo bôtêxa.” Tše ka moka di a botega gomme go ka ithekgwa ka tšona, eupša ga di kgone go ba le tswalano le ge e le efe goba dika tša boitshwaro tše bjalo ka potego e sa kwanantšhego.

Jehofa, Mmotegi yo a sa Kwanantšhego yo a Fetago Bohle

8. Ke bohlatse bofe bja Mangwalo bjo bo bontšhago mohlala o mobotse kudu wa potego e sa kwanantšhego?

⁸ Ka ntle le pelaelo le e nyenyane, Jehofa Modimo ke mohlala o mobotse kudu wa potego e sa kwanantšhego. Jehofa o botegetše moloko wa batho ka go se kwanantšhe a ba a neela ka Morwa wa gagwe e le gore batho ba ka hwetša bophelo bjo bo sa felego. (Johane 3:16) Go Jeremia 3:12 re bala gore: “Boa, wene Isiraele moaroxi. Ó r’yalo Morêna. Ó re: Nka se Xo xerule, xobane ke yo botho [“ke botega ka go se kwanantšhe,” NW].” Mantšu a hlatselago potego e sa kwanantšhego ya Jehofa ka mo go oketšegilego ke a ngwadilwego go Kutollo 16:5 a rego: “O lokile, yo o lego gona, yo o bego o le gona, [Mmotegi yo a sa kwanantšhego, NW].” Gape go Psalme 145:17 re botšwa gore: “Morêna mo tseleng tša xaxwe tšohle ó a loka, ké yo [a botegago ka go se kwanantšhe, NW] mo ’tirong tša xaxwe tšohle.” Ge e le gabotse, Jehofa ke yo a botegago ka go fetišiša kudu ka go se kwanantšhe moo Kutollo 15:4 e bolelago gore: “E ka ba mang yo a sa go boifego, Morena, a sa tumiše leina la gago? Gobane o [botega ka go se kwanantšhe, NW] o nnoši.” (PK) Jehofa Modimo o botega ka go se kwanantšhe ka tekanyo e phagamego.

9, 10. Ke pego efe ya potego e sa kwanantšhego yeo Jehofa a e dirilego ditirišanong tša gagwe le setšhaba sa Isiraele?

⁹ Histori ya setšhaba sa Isiraele ka mo go kgethegilego e tletše ka bohlatse bjo bontši bja potego e sa kwanantšhego ya Jehofa go batho ba gagwe. Mehleng ya Baahlodi, Isiraele e be e aroga borapeding bja therešo leboelela, eupša Jehofa o ile a itshola leboelela gomme a e phološa. (Baahlodi 2:15-22) Nywaga-kgolong ka moka e mehlano yeo Isiraele e bilego le dikgoši ka yona, Jehofa o ile a bontšha setšhaba seo potego ya gagwe e sa kwanantšhego.

¹⁰ Potego ya Jehofa e sa kwanantšhego e mo dirile gore a se ke a felela setšhaba sa gagwe pelo bjalo ka ge go bontšhitšwe go 2 Koronika 36:15, 16 gore: “Xomme Morêna Modimo wa bô-tat’abô a fêla a iša Lentšu xo bôná ka batseta ba xaxwe, a fêla a boeletša, ka xobane à kwêla sethšaba sa xaxwe bohloko, à rata moaxô wa xaxwe. Bôná xomme, ba dira bahlanka ba Modimo sekwêrô, ba nyatša se ba se boletšexo, ba fôtla baporofeta ba xaxwe; kxalefô ya Morêna ya ba ya xolêla sethšaba sa xaxwe, xwa hlôkwa moreku.”

11. Ke kgonthišetšo goba khomotšo efe yeo potego ya Jehofa e sa kwanantšhego e re neago yona?

¹¹ Ka ge Jehofa a botega kudu ka go se kwanantšhe, moapostola Paulo o be a ka ngwala bjalo ka ge go begilwe go Ba-Roma 8:38, 39 gore: “Nna ke kxodilwe ruri: Xa xo se se kxônaxo xo re aroxanya le leratô la Modimo, e ka ba lehu xoba bophelô, e ka ba barongwa xoba maxoši, le xe e ka ba tša mehleng ya byale, xoba tše di sa tl’o xo tla, le xe e le matla-mang. Le xe e ka ba tša kwa xodimong, xoba tša kwa tlase, le sebopya-mang, xa xo se se kxônaxo xo re aroxanya le leratô la Modimo le lexo mo xo Jesu Kriste Mong ’a rena.” Ee, Jehofa o re kgonthišetša gore: “Nka se kê ka Xo lahla; nka se kê ka Xo tloxêla.” (Ba-Hebere 13:5) Go kgothatša e le ka kgonthe go tseba gore Jehofa Modimo o botega ka mehla ka go se kwanantšhe!

Jesu Kriste, Morwa yo a Botegago ka go se Kwanantšhe

12, 13. Re na le bohlatse bofe bja potego e sa kwanantšhego ya Morwa wa Modimo?

¹² Yo a ekišago Jehofa ka mo go phethagetšego tabeng ya go fenya tlhohlo e sa kwanantšhego ya potego e be e le Jesu Kriste e bile e sa le yena. Moapostola Petro o be a ka tsopola Psalme 16:10 ka tshwanelo gomme a e diriša go Jesu Kriste go Ditiro 2:27 e rego: “Xobane môya wa-ka O ka se kê wa o tloxêla ò le kwa bo-dula-bahu. O ka se kê wa lesa Mokxêthwa [mmotegi yo a sa kwanantšhego,” NW] wa xaxo à bôna xo bôla.” Jesu Kriste o bitšwa ka tshwanelo e le “mmotegi yo a sa kwanantšhego.” (NW) O botegela Tatagwe le Mmušo o holofeditšwego wa Modimo ka go se kwanantšhe ka ditsela tšohle. Sathane mathomong o ile a leka go senya potego ya Jesu ka go diriša meleko le ditutuetšo tša boithati. Diabolo ge a paletšwe go seo, o ile a retologela tlaišong, gomme mafelelong a baka lehu la Jesu koteng ya polao. Le ka mohla Jesu ga se a ka a fapoga potegong ya gagwe e sa kwanantšhego go Tatagwe wa legodimong, Jehofa Modimo.—Mateo 4:1-11.

¹³ Jesu Kriste o botegetše balatedi ba gagwe ka go se kwanantšhe ka go dumelelana le kholofetšo e ngwadilwego go Mateo 28:20 e rego: “Xomme tsebang, ke na le lena ka mehla xo fihla bofelong bya lefase.” Ka go phethagatša kholofetšo yeo, o be a dutše a diriša boetapele ka potego e sa kwanantšhego godimo ga phuthego ya gagwe go tloga ka Pentekoste ya 33 C.E. go ba go fihla mehleng yeno.

Batho ba sa Phethagalago Bao ba Bego ba Botega ka go se Kwanantšhe

14. Jobo o beile mohlala ofe wa potego e sa kwanantšhego?

¹⁴ Bjale go thwe’ng ka batho ba sa phethagalago? Na ba ka botegela Modimo ka go se kwanantšhe? Re na le mohlala o mobotse kudu wa Jobo. Sathane o ile a dira gore kgang e kwešišege gabotse tabeng ya gagwe. Na Jobo o be a botegela Jehofa Modimo ka go se kwanantšhe goba na o be a mo hlankela feela ka baka la boithati? Sathane o ile a ikgantšha ka gore o be a ka dira gore Jobo a furalele Jehofa ka go bakela Jobo mathata. Ge Jobo a be a lahlegetšwe ke dithoto tša gagwe ka moka, bana ba gagwe ka moka gaešita le bophelo bja gagwe bjo bobotse bja mmele, mosadi wa gagwe o ile a mo tutuetša ka gore: “Roga Modimo, gomme o ikhwele!” Eupša Jobo o be a botega ka go se kwanantšhe ka gobane o ile a re go yena: “Wêna O bolêla byalo ka lešilô xe le bolêla le mašilô. A re ka re xo amoxêla mola Modimo a re fa tše botse, ra tla ra xana xo amoxêla, xe a re fa tše mpe?—Xomme Jobo xe dilô tšeo di mo wetše tšohle, xa a ka a senya ka molomo wa xaxwe.” (Jobo 2:9, 10, bapiša le PK.) Ge e le gabotse, Jobo o itše go bao e bego e tla ba bahomotši ba gagwe: “Le ge a [Modimo] mpolaya, ke tla dula ke mo holofetše.” (Jobo 13:15, New International Version) Ga go makatše ge Jobo a ile a amogelwa ke Jehofa! Ka gona, Jehofa o ile a botša Elifase mo-Thema gore: “Boxale bya-ka bo tuketše wêna le baxwêra ba xaxo ba babedi bao, ka xobane xa L’a ka la etša Jobo mohlanka wa-ka la mpolêla ka mo xo swanetšexo.”—Jobo 42:7, 10-16; Jakobo 5:11.

15. Re na le bohlatse bofe bja Mangwalo bja potego e sa kwanantšhego ya bahlanka ba bantši ba Jehofa Modimo?

¹⁵ Banna ka moka le basadi ba tumelo ba hlalositšwego go Ba-Hebere kgaolo 11 go ka bolelwa ka bona e le babotegi ba sa kwanantšhego. Ga se feela gore ba be ba botega, eupša gape ba be ba botega ka go se kwanantšhe ge ba lebeletšane le dikgateletšo. Ka gona, re bala ka bao “ka tumêlô ba . . . [ilego] ba thiba melomo ya ditau. Ba tima matla a mollô, ba efoxa maxale a marumô . . . Ba bangwê ba kxôtlêlêla kxobošô le dikôtlô, le ditlêmô, le kxôlêxô. Ba thumilwe ka mafsika, ba hlokofatšwa, ba sêxakanywa, ba bolawa ka dithšoša, ba nênêra bà apere dikobô tša dinku le dipudi, è le badiidi le bahlaki le bahlokofatšwa.”—Ba-Hebere 11:33-37.

16. Moapostola Paulo o beile mohlala ofe wa potego e sa kwanantšhego?

¹⁶ Mangwalo a Bakriste a Segerika le ona a nea mohlala o kgahlišago kudu wa moapostola Paulo. O be a ka botša Bakriste ba Thesalonika ka tshwanelo mabapi le bodiredi bja gagwe gore: “Dihlatse ké bô-lena, le Modimo ké hlatse, ya xe lena badumedi rè Le dirile ka mokxwa o [botegago ka go se kwanantšhe, NW] wa tokô, wo o sa sôlexexo.” (1 Ba-Thesalonika 2:10) Re na le bohlatse bjo bo oketšegilego bja potego e sa kwanantšhego ya Paulo mantšung a gagwe a ngwadilwego go 2 Ba-Korinthe 6:4, 5 moo re balago gore: “Dilong ka moka re re re bônalê rè le bahlanka ba Modimo: ka kxôtlêlêlô e kxolo, rè le ditlalelong, le bothateng, le pitlaxanong, le dikotlong, le dikxolexong, le meferefereng, rè hlôka borôkô, rè swerwe ke tlala.” Tše ka moka di hlatsela go ba ga moapostola Paulo le boitlhompho ka gobane o be a botega ka go se kwanantšhe.

Babotegi ba sa Kwanantšhego Mehleng Yeno

17. Ke mantšu afe a J. F. Rutherford ao a bontšhago boikemišetšo bja gagwe bja go botega ka go se kwanantšhe?

¹⁷ Ge go tliwa mehleng yeno, re na le mohlala o mobotse o šetšego o ahla-ahlilwe matsenong a rena. Ela hloko seo se boletšwego ka pukung ya Polokego ya Lefase ka Bophara Tlase ga ‘Kgoši ya Khutšo,’ go letlakala 146 ka tlase ga sehlogwana se se rego “Go Botega Nakong ya Kgolego.” Go bolelwa moo gore: “Go bontšha go botegela phuthego ya Jehofa nakong ya go golegwa ga gagwe, ruri mookamedi wa Mokgatlo wa Watch Tower, Joseph F. Rutherford, ka December 25, 1918 o ile a ngwala se se latelago: ‘Ka baka la ge ke ganne go dumelelana le Babele gomme ke lekile go direla Morena wa-ka ka go botega, ke golegilwe e lego seo ke se lebogago kudu. . . . Ke tla rata gore ke amogelwe ke Yena le go mo kgahliša gotee le go ba kgolegong, go e na le gore ke dumelelane le Sebata goba ke ineela go sona, e le gore ke tle ke hunologe gomme ke retwe ke lefase ka moka.’”b

18, 19. Ke mehlala efe e kgahlišago ya potego e sa kwanantšhego ye re nago le yona mehleng yeno?

¹⁸ Re na le mehlala e mebotse kudu ya potego e sa kwanantšhego ya Bakriste ba bangwe ba bantši bao ba ilego ba kgotlelela tlaišo. Gare ga batho ba bjalo ba botegago ka go se kwanantšhe go na le Dihlatse tša Jehofa tša Majeremane nakong ya pušo ya Nazi bjalo ka ge go hlalositšwe bidiong ya Purple Triangles, yeo e abilwego gohle ka leleme la Seisemane. Tše dingwe tše di lemogegago ke Dihlatse tša Jehofa tše dintši tše di botegago ka go se kwanantšhe tša Afrika tše bjalo ka tša kua Malawi. Moo mohlapetši yo mongwe wa kgolego o ile a hlatsela potego e sa kwanantšhego ya Dihlatse ka gore: “Le ka mohla di ka se ke tša kwanantšha. Di fo oketšega.”

¹⁹ Motho a ka se bale di-Yearbook of Jehovah’s Witnesses tša morago bjale ka ntle le go kgahlišwa ke potego e sa kwanantšhego e bontšhitšwego ke Bakriste ba therešo ba bjalo ka ba lego Gerika, Mozambique le Poland. Bontši bja bona ba ile ba tlaišwa gabohloko; ba bangwe ba ile ba bolawa. Letlakala 177 la 1992 Yearbook le tšweletša diswantšho tša banna ba senyane ba Bakriste kua Ethiopia, bao ba ilego ba fenya tlhohlo ya potego e sa kwanantšhego go fihla ntlheng ya go bolawa. Re le Dihlatse tša Jehofa, na ga re thabišwe ke go ba le mehlala e mentši gakaakaa e mebotse ya go re tutueletša go fenya tlhohlo ya potego e sa kwanantšhego?

20. Ke eng seo se latelago ge e ba re dula re botega ka go se kwanantšhe?

²⁰ Re aga boitlhompho bja rena ka go ganetša meleko le dikgateletšo ka potego e sa kwanantšhego. Ka gona-ge, re nyaka go hwetšwa re le ka lehlakoreng la mang la kgang ya potego e sa kwanantšhego? Ka go fenya tlhohlo ya potego e sa kwanantšhego, re ema ka lehlakoreng la Jehofa Modimo la kgang gomme ra hlatsela Sathane Diabolo gore ke moaketši yo mobe le yo a lego molaleng yo a lego yena! Ka go rialo re amogelwa ke Mmopi wa rena Jehofa Modimo le go hwetša moputso wa bophelo bjo bo sa felego re thabile. (Psalme 37:29; 144:15b) Seo se nyakegago gore go fenywe tlhohlo ya potego e sa kwanantšhego se tla ahla-ahlwa nakong e tlago.

[Mengwalo ya tlase]

O be o tla Araba Bjang?

◻ Ke ka baka la’ng go botega ka go se kwanantšhe go rotoša tlhohlo?

◻ Ke ka baka la’ng go ka bolelwa gore “potego e sa kwanantšhego” ke polelwana e kgethegilego kudu?

◻ Re na le mehlala efe ya Mangwalo ya batho ba sa phethagalago bao ba bego ba botega ka go se kwanantšhe?

◻ Re na le mehlala efe e mebotse ya mehleng yeno ya potego e sa kwanantšhego?

[Seswantšho go letlakala 11]

Charles Taze Russell

[Seswantšho go letlakala 12]

Ka kgonthe Jesu e be e le “mmotegi yo a sa kwanantšhego” wa Jehofa

[Seswantšho go letlakala 13]

Jobo le ge a be a sa phethagala o ile a botegela Modimo a sa kwanantšhe

[Seswantšho go letlakala 14]

Paulo o beile mohlala o mobotse wa go botegela Jehofa ka go se kwanantšhe