Lapa la Jehofa le Thabela Botee bjo Bohlokwa

“A botse le thatêxô! xe bana ba motho bà dula ba kwana!”—PSALME 133:1.

1. Boemo bja malapa a mantši ke bofe lehono?

LAPA le bothateng lehono. Malapeng a mantši, ditlemo tša lenyalo di boemong bjo bo hlobaetšago. Tlhalo e fetoga e tlwaelegilego ka mo go oketšegago, gomme bana ba bantši ba banyalani ba hlalanego ba manyaming a magolo. Malapa a dimilione ke ao a sa thabago le ao a se nago botee. Lega go le bjalo, go na le lapa le tee leo le nago le lethabo la kgonthe le botee bja kgonthe. Ke lapa la legohle la Jehofa Modimo. Go lona, dimiriate tša barongwa ba sa bonagalego di phetha mediro ya tšona yeo di e abetšwego ka go dumelelana le thato ya Modimo. (Psalme 103:20, 21) Eupša na go na le lapa leo le thabelago botee bjo bjalo lefaseng?

2, 3. (a) Mo nakong ye ke bomang bao e lego karolo ya lapa la Modimo la legohle, gomme re ka swantšha Dihlatse tša Jehofa le eng lehono? (b) Ke dipotšišo dife tšeo re tlago go di ahla-ahla?

² Moapostola Paulo o ngwadile gore: “Ke khunamela Tate, yo lapa le lengwe le le lengwe legodimong le lefaseng le bitšwago ka yena.” (Ba-Efeso 3:14, 15, NW) Lešika la lapa le lengwe le le lengwe lefaseng le bitšwa ka Modimo ka gobane ke Mmopi. Gaešita le ge go se na malapa a batho legodimong, fela ge re bolela ka tsela ya seswantšhetšo, Modimo o nyetše mokgatlo wa gagwe wa legodimong gomme Jesu o tla ba le monyadiwa wa moya yo a tlago go ba boteeng le yena magodimong. (Jesaya 54:5; Luka 20:34, 35; 1 Ba-Korinthe 15:50; 2 Ba-Korinthe 11:2) Batlotšwa ba botegago ba lefaseng ga bjale ke karolo ya lapa la Modimo la legohle, gomme “dinku tše dingwê” tša Jesu tšeo di nago le kholofelo ya lefaseng, ke ditho tša lona tša nakong e tlago. (Johane 10:16; Ba-Roma 8:14-17; Morokami wa January 15, 1996, letlakala 31) Lega go le bjalo, Dihlatse ka moka tša Jehofa lehono di ka swantšhwa le lapa la lefase ka bophara leo le nago le botee.

³ Na o karolo ya lapa le le kgahlišago la ditšhaba-tšhaba la bahlanka ba Modimo? Ge e ba o le yona, o thabela e nngwe ya ditšhegofatšo tše dikgolo tšeo motho le ge e le ofe a ka bago le tšona. Ba dimilione ba tla hlatsela gore lapa la Jehofa la lefase ka bophara—e lego mokgatlo wa gagwe o bonagalago—ke lefelo le nonnego la khutšo le botee leganateng la lefase la diphapano le karogano. Botee bja lapa la Jehofa la lefase ka bophara bo ka hlaloswa bjang? Gona ke mabaka afe ao a godišago botee bjo bjalo?

A Botse le Thatego!

4. Ka mantšu a gago, o be o ka hlalosa bjang seo Psalme 133 e se bolelago ka botee bja borwarre?

⁴ Mopsalme Dafida o ile a leboga botee bja borwarre kudu. O ile a ba a budulelwa go opela ka bjona! Akanya ka yena le harepa ya gagwe ge a dutše a opela ka gore: “A botse le thatêxô! xe bana ba motho bà dula ba kwana! Xo byalo ka makhura a mabotse mo hloxong, xe a êlêla maledung, maledung a Arone, xe a êlêla morumong wa kobô y’axwe. Xo byalo ka phoka ya thaba ya Herimone, xe e êlêla dithabeng tša Tsione; xobane xôna-mó Morêna ó laetše thšexofatšô, bophelô neng le neng.”—Psalme 133:1-3.

5. Motheong wa Psalme 133:1, 2, ke papišo efe e ka dirwago magareng ga ba-Isiraele le bahlanka ba Modimo ba mehleng yeno?

⁵ Mantšu ao a be a šoma boteeng bja borwarre bjo bo bego bo thabelwa ke batho ba bogologolo ba Modimo, e lego ba-Isiraele. Ge ba be ba le Jerusalema bakeng sa menyanya ya bona e meraro ya ngwaga le ngwaga, ba ile ba dula ka botee e le ka kgonthe. Le ge ba be ba e-tšwa melokong e fapa-fapanego, e be e le lapa le tee. Go ba gotee go bile le mafelelo a mabotse go bona, go swana le makhura a go tlotša a nago le monkgo o bose. Ge makhura a bjalo a be a tšhelwa hlogong ya Arone, a be a elela maledung a gagwe gomme a theogela molaleng wa seaparo sa gagwe. Go ba-Isiraele, go ba gotee go bile le tutuetšo e botse yeo e ilego ya tsenelela bathong ba bego ba bokane ka moka ga bona. Go se kwešišane go ile gwa lokišwa gomme botee bja godišwa. Botee bjo bo swanago bo gona lapeng la Jehofa la lefase ka bophara lehono. Go kopana ka mehla go na le mafelelo a mabotse a moya dithong tša lona. Go se kwešišane le ge e le gofe goba mathata le ge e le afe a a tlošwa ge keletšo ya Lentšu la Modimo e dirišwa. (Mateo 5:23, 24; 18:15-17) Batho ba Jehofa ba leboga kudu kgothatšano e tšwago boteeng bja bona bja borwarre.

6, 7. Botee bja Isiraele bo be bo swana bjang le phoka ya Thaba ya Herimone, gona ke kae moo tšhegofatšo ya Modimo e ka hwetšwago gona lehono?

⁶ Go dula ga ba-Isiraele gotee ka kwano go be go swana bjang le phoka ya Thaba ya Herimone? Ee, bjale ka ge tlhora ya thaba ye e le ka godimo ga dimithara tše 2 800 ka godimo ga tekanyo ya lewatle, e apešwa ke kapoko mo e nyakilego go ba ngwaga ka moka. Tlhora ya Herimone e nago le kapoko e baka go kgahla ga mouwane wa bošego gomme ka go rialo ya tšweletša phoka e ntši yeo e šireletšago dibjalo nakong ya sehla se setelele sa go se be le pula. Diphefo tša go tonya tše di fokago go tšwa dithabeng tša Herimone di ka rwala mouwane o bjalo go o iša kgole ka borwa go etša tikologong ya Jerusalema moo o kgahlago e le phoka. Ka go rialo mopsalme o ile a bolela ka mo go nepagetšego ka ‘phoka ya Herimone ge e elela Thabeng ya Tsione.’ A kgopotšo e botse gakaakang ya tutuetšo e lapološago yeo e godišago botee bja lapa la Jehofa la barapedi!

⁷ Pele phuthego ya Bokriste e thewa, Tsione goba Jerusalema e be e le lefelo la borapedi bja therešo. Ka gona, e bile gona moo mo Modimo a laetšego gore tšhegofatšo e be e tla ba gona. Ka ge Mothopo wa ditšhegofatšo ka moka o be o dula ka tsela ya seswantšhetšo sekgethweng kua Jerusalema, ditšhegofatšo di be di tla tšwa moo. Ka gona, ka ge borapedi bja therešo bo se sa hlwa bo ithekgile ka lefelo le ge e le lefe le tee, tšhegofatšo, lerato le botee tša bahlanka ba Modimo di ka hwetšwa lefaseng ka moka lehono. (Johane 13:34, 35) Mabaka a mangwe ao a godišago botee bjo ke afe?

Mabaka ao a Godišago Botee

8. Re ithuta’ng ka botee go Johane 17:20, 21?

⁸ Botee bja barapedi ba Jehofa bo ithekgile ka go dira ka go dumelelana le Lentšu la Modimo leo le kwešišwago ka mo go nepagetšego, go akaretša le dithuto tša Jesu Kriste. Ka go romela ga Jehofa Morwa wa gagwe lefaseng bakeng sa go hlatsela therešo le go hwa lehu la sehlabelo, tsela e ile ya bulwa bakeng sa go thewa ga phuthego ya Bokriste e nago le botee. (Johane 3:16; 18:37) Gore go be go tla ba le botee bja kgonthe magareng ga ditho tša yona go ile gwa ba molaleng ge Jesu a be a rapela ka gore: “Xa ke kxopêlêle bôná fêla; ke kxopêlêla le bao ba xo tlo dumêla ka Lentšu la bôná. Xore bohle e bê batee, byalo ka xe Wene Tate Ò le xo Nna, le Nna kè le xo Wene. E bê batee ka rena xore lefase le tlê le dumêlê xore ké Wene O nthomilexo.” (Johane 17:20, 21) Balatedi ba Jesu ba ile ba fihlelela botee bjo bo swanago le bjo bo bego bo le gona magareng ga Modimo le Morwa wa gagwe. Se se diregile ka ge ba be ba dumelelana le Lentšu la Modimo le dithuto tša Jesu. Boemo bjo bo swanago bja kgopolo ke lebaka le legolo boteeng bja lapa la Jehofa la lefase ka bophara lehono.

9. Ke tema efe yeo moya o mokgethwa o e kgathago boteeng bja batho ba Jehofa?

⁹ Lebaka le lengwe leo le kopanyago batho ba Jehofa ke gore re na le moya o mokgethwa wa Modimo goba matla a šomago. O re dira gore re kgone go kwešiša therešo e utolotšwego ya Lentšu la Jehofa gomme ka go rialo re mo hlankele ka botee. (Johane 16:12, 13) Moya o re thuša go phema mediro ya nama e aroganyago e bjalo ka ditshele, lehufa, pefelo le diphapano. Go e na le moo, moya wa Modimo o dira gore re kgone go tšweletša dienywa tše di kopanyago tša lerato, lethabo, khutšo, go se fele pelo, botho, go loka, tumelo, bonolo le boitshwaro.—Ba-Galatia 5:19-23.

10. (a) Ke go swana gofe mo go ka dirwago magareng ga lerato le le lego gona lapeng le kopanego la motho gotee le lerato le le bonagalago magareng ga bao ba ineetšego go Jehofa? (b) Setho se sengwe sa Sehlopha se Bušago se ile sa bontšha maikwelo a sona bjang mabapi le go kopana le banababo sona ba moya?

¹⁰ Ditho tša lapa le nago le botee di a ratana gomme di thabela go ba gotee. Ka mo go swanago, bao ba lego lapeng le le kopanego la barapedi ba Jehofa ba a mo rata, ba rata Morwa wa gagwe le badumedi-gotee le bona. (Mareka 12:30; Johane 21:15-17; 1 Johane 4:21) Go etša ge lapa la tlhago leo le nago le lerato le thabela go ja dijo gotee, bao ba ineetšego go Modimo ba thabela go ba gona dibokeng tša Bokriste, dikopanong tše dinyenyane le tše dikgolo bakeng sa go holwa ke bogwera bjo bobotse le dijo tše dibotse kudu tša moya. (Mateo 24:45-47; Ba-Hebere 10:24, 25) Setho sa Sehlopha se Bušago sa Dihlatse tša Jehofa se kile sa bea ditaba ka tsela ye: “Go nna go kopana le banabešo ke le lengwe la lethabo le legolo kudu le mothopo wa kgothatšo. Ke rata go ba Holong ya Mmušo gare ga bao ba fihlago pele, gomme ke tloge gare ga bao ba tlogago mafelelong ge go kgonega. Ke ikwa ke na le lethabo la ka gare ge ke bolela le batho ba Modimo. Ge ke le gare ga bona ke ikwa ke le gae gotee le lapa lešo.” Na ke kamoo o ikwago ka gona?—Psalme 27:4.

11. Ke modirong ofe moo Dihlatse tša Jehofa di hwetšago lethabo ka mo go kgethegilego, gomme mafelelo e ba afe ge re dira tirelo ya Modimo selo sa bohlokwa maphelong a rena?

¹¹ Lapa le le nago le botee le hwetša lethabo ka go dira dilo le le gotee. Ka mo go swanago, bao ba lego lapeng la barapedi ba Jehofa ba hwetša lethabo ka go dira modiro wa bona wa go bolela ka Mmušo le wa go dira barutiwa ba le batee. (Mateo 24:14; 28:19, 20) Go tšea karolo ka mehla go ona go re batametša kgaufsi kudu le Dihlatse tše dingwe tša Jehofa. Go dira tirelo ya Modimo selo sa bohlokwa maphelong a rena le go thekga mediro ka moka ya batho ba gagwe le gona go godiša moya wa lapa magareng ga rena.

Thulaganyo ya Pušo ya Modimo e Bohlokwa

12. Dika tša lapa le thabilego le le le kopanego ke dife, gona ke dithulaganyo dife tšeo di ilego tša godiša botee diphuthegong tša Bokriste tša lekgolong la pele la nywaga?

¹² Lapa leo le nago le boetapele bjo tiilego eupša e le bjo lerato le bjo bo rulagantšwego go bonala e tla ba leo le kopanego le le le thabilego. (Ba-Efeso 5:22, 33; 6:1) Jehofa ke Modimo wa thulaganyo ya khutšo, gomme bohle bao ba lego ka lapeng la gagwe ba mo lebelela e le “Yo-xodimo-dimo.” (Daniele 7:18, 22, 25, 27; 1 Ba-Korinthe 14:33) Gape ba lemoga gore o kgethile Morwa wa gagwe Jesu Kriste go ba moja-bohwa wa dilo ka moka le gore o mo gafetše matla ka moka legodimong le lefaseng. (Mateo 28:18; Ba-Hebere 1:1, 2) Phuthego ya Bokriste ke mokgatlo o rulagantšwego le o kopanego woo Kriste e lego Hlogo ya wona. (Ba-Efeso 5:23) Go be go e-na le sehlopha se bušago se se dirilwego ke baapostola le “ba baxolo” ba godilego moyeng bakeng sa go okamela mediro ya diphuthego tša lekgolong la pele la nywaga. Phuthego e nngwe le e nngwe e be e e-na le balebeledi ba kgethilwego, goba bagolo le bahlanka ba bodiredi. (Ditiro 15:6; Ba-Filipi 1:1) Go kwa bao ba etelelago pele go ile gwa godiša botee.—Ba-Hebere 13:17.

13. Jehofa o gogela batho bjang go yena, gomme se se feleletša ka eng?

¹³ Eupša na thulaganyo ye ka moka e bolela gore botee bja barapedi ba Jehofa bo ka bolelwa e le bjo bo tšweleditšwego ke boetapele bjo thata le bjo bo se nago maikwelo? Ga go bjalo le gatee! Ga go na selo seo se bontšhago go hloka lerato ka Modimo goba ka mokgatlo wa gagwe. Jehofa o goga batho ka go bontšha lerato, gomme ngwaga o mongwe le o mongwe ba makgolo a dikete ka go ithatela le ka lethabo ba fetoga karolo ya mokgatlo wa Jehofa ka go kolobetšwa e le pontšho ya boineelo bja bona bja pelo ka moka go Modimo. Moya wa bona o swana le wa Jošua yo a ilego a kgothatša ba-Isiraele-gotee le yena ka gore: “Ikxetheleng lehono yo Le rataxo xo mo hlankêla . . . Xe e le nna le ba lapa la-ka, rena re dirêla Morêna.”—Jošua 24:15.

14. Ke ka baka la’ng re ka bolela gore mokgatlo wa Jehofa ke wa pušo ya Modimo?

¹⁴ Re le karolo ya lapa la Jehofa, ga se ra thaba feela eupša gape re šireletšegile. Se se bjalo ka gobane mokgatlo wa gagwe ke wa pušo ya Modimo. Mmušo wa Modimo ke theocracy (go tšwa Segerikeng the·osʹ, modimo le kraʹtos, pušo). Ke pušo ka Modimo, yeo e hlomilwego le go thewa ke yena. “Sethšaba se sekxêthwa” se se tloditšwego sa Jehofa se ikokobeletša pušo ya gagwe, gomme ka go rialo le sona ke sa pušo ya Modimo. (1 Petro 2:9) Re na le lebaka le lengwe le le lengwe la go ikwa re šireletšegile ka ge re e-na le Mmuši yo Mogolo wa Pušo ya Modimo Jehofa, e le Moahlodi, Monei wa Molao le Kgoši ya rena. (Jesaya 33:22) Lega go le bjalo, go thwe’ng ge e ba diphapano tše itšego di be di ka tšwelela gomme tša bea lethabo, polokego gotee le botee bja rena kotsing?

Sehlopha se Bušago se Gata Mogato

15, 16. Ke ngangišano efe yeo e ilego ya tšwelela lekgolong la pele la nywaga, gomme ka baka la’ng?

¹⁵ Go šireletša botee bja lapa, ka dinako tše dingwe phapano e ka swanelwa ke go rarollwa. Ka gona, a re re bothata bja moya bo be bo swanetše go rarollwa bakeng sa go šireletša botee bja lapa la Modimo la barapedi lekgolong la pele la nywaga C.E. Go be go swanetše go dirwa’ng? Sehlopha se bušago se ile sa gata mogato, sa dira diphetho ditabeng tša moya. Re na le pego ya Mangwalo ya mogato o bjalo.

¹⁶ Mo e ka bago ka 49 C.E. sehlopha se bušago se ile sa kopana Jerusalema bakeng sa go rarolla bothata bjo bogolo, gomme ka go rialo sa šireletša botee bja “lapa la Modimo.” (Ba-Efeso 2:19, NW) Mo e ka bago nywageng e 13 pejana, moapostola Petro o be a boletše go Koronelio, gomme Ba-ntle goba batho ba ditšhaba ba mathomo e ile ya ba badumedi ba kolobeditšwego. (Ditiro, kgaolo 10) Leetong la Paulo la pele la boromiwa, Ba-ntle ba bantši ba ile ba amogela Bokriste. (Ditiro 13:1–14:28) Ge e le gabotse, phuthego ya Bakriste ba Ba-ntle e ile ya hlongwa kua Antiokia, Siria. Bakriste ba bangwe ba ba-Juda ba ile ba nagana gore basokologi ba Ba-ntle ba be ba swanetše go bolotšwa le go šireletša Molao wa Moše, eupša ba bangwe ba ile ba se dumele. (Ditiro 15:1-5) Ngangišano ye e be e ka lebiša karoganong e feletšego, gaešita le go bopšeng ga diphuthego tše di aroganego tša ba-Juda le tša Ba-ntle. Ka gona sehlopha se bušago se ile sa gata mogato wa go akgofa bakeng sa go šireletša botee bja Bokriste.

17. Ke tshepedišo efe ya pušo ya Modimo yeo e dumelelanago e hlalositšwego go Ditiro kgaolo 15?

¹⁷ Go ya ka Ditiro 15:6-22, “baapostola le ba baxolo ba phuthêxa xore ba bônê taba yé ka mo e lexo ka xôna.” Gape go be go e-na le ba bangwe, ba ba akaretšago baemedi ba ba tšwago Antiokia. Petro o ile a hlalosa pele gore ‘ka molomo wa gagwe ba-ntle ba kwele Ebangedi ba dumela.’ Ke moka “pitšô ka moka” e ile ya theetša ge Baranaba le Paulo “bà ba anêxêla ka mo Modimo a dirilexo mehlôlô le diká tše ntši tša bohlatse kwa xare xa ba-ntlê ka bôná.” Se se latelago Jakobo o ile a šišinya kamoo kgang e bego e ka rarollwa ka gona. Ka morago ga gore sehlopha se bušago se dire phetho, re botšwa gore: “Baapostola le ba baxolo, le pitšô ka moka, ba tlêma la xo re: Xo hlaolwê banna mo xo bôná, ba rongwê ba yê Antiokia le Paulo le Baranaba.” ‘Banna bao ba hlaotšwego’—e lego Juda le Silase—ba ile ba iša lengwalo le kgothatšago go badumedi-gotee le bona.

18. Sehlopha se bušago se dirile phetho efe e akaretšago Molao wa Moše, gomme se se ile sa kgoma bjang Bakriste ba ba-Juda le ba Ba-ntle?

¹⁸ Lengwalo le le bego le tsebiša ka phetho ya sehlopha se bušago le ile la thoma ka mantšu a rego: “Rena baapostola le ba baxolo, le bana ba bô-rena, re re: Thabang! Lena bana ba bô-rena ba Antiokia le ba Siria le ba Tsilitsia, ba Le tšwaxo xo ba-ntlê.” Ba bangwe ba bile gona sebokeng se sa bohlokwa kudu, eupša go bonala sehlopha se bušago se be se bopša ke “baapostola le ba baxolo.” Moya wa Modimo o ile wa ba hlahla, ka ge lengwalo le re: “Môya-mokxêthwa, ò na le rena, ó tlemile la xo re: Xo swanetše xe re sa Le beleše boima byo bongwê xapê. Se se swanetšexo sé-sé: Xo ilwê didimo tša medimo ya diswanthšô, le madi, le tše di tlimilwexo, le bootswa.” (Ditiro 15:23-29, mongwalo o sekamego ke wa rena.) Bakriste go be go sa nyakege gore ba bolotšwe le gore ba boloke Molao wa Moše. Phetho ye e ile ya thuša Bakriste ba ba-Juda le ba Ba-ntle gore ba dire le go bolela ka go kwana. Diphuthego di ile tša thaba gomme botee bjo bohlokwa bo ile bja tšwela pele, go etša ge go le bjalo lapeng la Modimo la lefase ka bophara lehono ka tlase ga tlhahlo ya moya ya Sehlopha se Bušago sa Dihlatse tša Jehofa.—Ditiro 15:30-35.

Hlankela Boteeng bja Pušo ya Modimo

19. Ke ka baka la’ng botee bo atile ka malapeng a barapedi ba Jehofa?

¹⁹ Botee bo ata ge ditho tša lapa di dirišana. Se se swanago ke sa therešo ka lapa la barapedi ba Jehofa. Ka go ba ba pušo ya Modimo, bagolo le ba bangwe ka phuthegong ya lekgolong la pele la nywaga ba ile ba hlankela Modimo ka go dirišana ka mo go feletšego le sehlopha se bušago gomme ba amogela diphetho tša sona. Ka thušo ya sehlopha se bušago, bagolo ba ile ba ‘bolela lentšu’ gomme ditho tša diphuthego ka kakaretšo tša ‘bolela ka kwano.’ (2 Timotheo 4:1, 2; 1 Ba-Korinthe 1:10) Ka gona ditherešo tše di swanago tša Mangwalo di ile tša bolelwa bodireding le dibokeng tša Bokriste, e ka ba Jerusalema, Antiokia, Roma, Korinthe goba le ge e le kae. Botee bjo bjalo bja pušo ya Modimo bo gona lehono.

20. Re swanetše go dira’ng gore re šireletše botee bja rena bja Bokriste?

²⁰ Gore re šireletše botee bja rena, ka moka ga rena bao re lego karolo ya lapa la Jehofa la lefase ka bophara re swanetše go lwela go bontšha lerato la pušo ya Modimo. (1 Johane 4:16) Re swanetše go ikokobeletša thato ya Modimo le go bontšha tlhompho e tseneletšego ka “molaki e a bôtêxaxo” le Sehlopha se Bušago. Go swana le boineelo bja rena go Modimo, go kwa ga rena ge e le gabotse ke ga boithapo le ga lethabo. (1 Johane 5:3) Mopsalme o ile a tswalanya ka mo go swanetšego gakaakang lethabo le go kwa! O opetše ka gore: “Haleluya! Monna wa lehlôxônôlô [“yo a thabilego,” NW] ké e a boifaxo Morêna, a kxahlwa xaxolo ke ’tayô tša xaxwe.”—Psalme 112:1.

21. Re ka itlhatsela bjang gore re ba pušo ya Modimo?

²¹ Jesu, e lego Hlogo ya phuthego, ke wa pušo ya Modimo ka mo go feletšego gomme ka mehla o dira thato ya Tatagwe. (Johane 5:30) Ka gona, anke re lateleng Mohlala wa rena ka go dira thato ya Jehofa ka tsela ya pušo ya Modimo le ka botee ka go dirišana ka botlalo le mokgatlo wa Gagwe. Ka gona re ka boeletša kopelo ya mopsalme ka lethabo le le tšwago pelong le ka tebogo ka gore: “A botse le thatêxô! xe bana ba motho bà dula bà kwana!”

O be o tla Araba Bjang?

◻ Botee bja rena bja Bokriste bo ka tswalanywa bjang le Psalme 133?

◻ Ke mabaka afe a mangwe ao a godišago botee?

◻ Ke ka baka la’ng thulaganyo ya pušo ya Modimo e le bohlokwa boteeng bja batho ba Modimo?

◻ Sehlopha se bušago sa lekgolong la pele la nywaga se ile sa gata mogato bjang gore se šireletše botee?

◻ Go hlankela ka botee bja pušo ya Modimo go bolela’ng go wena?

[Seswantšho go letlakala 13]

Sehlopha se bušago se ile sa gata mogato bakeng sa go šireletša botee