Na o Tloga o Swanelwa ke go Kgopela Tshwarelo?

GEORGE BERNARD SHAW o ngwadile gore: ‘Ga nke ke kgopela tshwarelo le ka mohla.’ Ba bangwe ba ka re: ‘Se se diregilego se diregile.’

Mohlomongwe rena ka borena re dika-dika go amogela phošo ka baka la go tšhaba go lahlegelwa ke boitlhompho. Mo gongwe re itokafatša ka gore bothata bo na le motho yo mongwe. Goba re ka ikemišetša go kgopela tshwarelo, eupša ra diega go fihlela re nagana gore taba e hlokomologilwe mafelelong.

Ka gona-ge, na go kgopela tshwarelo go a nyakega? Na ruri go ka phetha selo le ge e le sefe?

Lerato le re Gapeletša go Kgopela Tshwarelo

Lerato la borwarre ke leswao leo le hlaolago balatedi ba therešo ba Jesu Kriste. O itše: “Seo bohle ba tl’o xo tseba ka sôna xe Le le barutiwa ba-ka, ké xe Le na le leratanô.” (Johane 13:35) Mangwalo a kgothaletša Bakriste gore ba ‘tiiše go ratana ka pelo-tshekegi.’ (1 Petro 1:22) Lerato le le tiilego le re gapeletša go kgopela tshwarelo. Ka baka la’ng? Ka baka la gore ka mo go sa phemegego, go se phethagale ga batho go baka maikwelo ao a kwelego bohloko ao a thibelago lerato ge e ba a sa alafše.

Ka mohlala, ka baka la diphapano tša motho ka noši le yo mongwe ka phuthegong ya Bokriste re ka kgetha go se mmolediše. Ge e ba re bakile kgopišo, tswalano e lerato e ka tsošološwa bjang? Ka makga a mantši, ke ka go kgopela tshwarelo gomme ra boledišana ka mokgwa o borutho. Re kolota badumedi-gotee le rena lerato gomme ge re bolela gore re manyami ka ge re bakile kgopišo, re lefa se sengwe sekolotong seo.—Ba-Roma 13:8.

Ka mohlala: Mari Carmen le Paqui ke basadi ba babedi ba Bakriste bao ba bilego le segwera sa nako e telele. Lega go le bjalo, ka baka la ge Mari Carmen a ile a dumela lesebo le le gobatšago, segwera sa gagwe le Paqui se ile sa fola. Ka ntle le tlhaloso, o ile a široga Paqui ka mo go feletšego. Mo e nyakilego go ba ngwaga ka morago, Mari Carmen o ile a lemoga gore lesebo leo e be e se therešo. O ile a arabela bjang? Lerato le ile la mo tutueletša gore a ye go Paqui gomme ka boikokobetšo a hlalose go itshola ga gagwe ka ge a ile a itshwara ka tsela e mpe gakaalo. Bobedi bja bona ba ile ba tšholla megokgo, gomme ga e sa le go tloga moo e bile bagwera ba pelo-bohloko.

Gaešita le ge re ka ikwa eka ga go selo le ge e le sefe se se fošagetšego seo re se dirilego, go kgopela tshwarelo go ka lokiša go se kwešišane. Manuel o gopola gore: “Nywageng e mentši e fetilego nna le mosadi wa-ka re ile ra dula legaeng la yo mongwe wa dikgaetšedi tša rena tša moya ge a be a le sepetlele. Re ile ra dira sohle seo re bego re ka se kgona go thuša yena le bana ba gagwe nakong ya bolwetši bja gagwe. Eupša ka morago ga ge a boile gae, o ile a ngongorega go mogwera ka gore ga se ra hlokomela ditshenyagalelo tša lapa ka tshwanelo.

“Re ile ra etela gomme ra hlalosa gore mohlomongwe ka baka la bofsa bja rena le go hloka phihlelo, ga se ra hlokomela dilo ka tsela yeo yena a bego a tla dira ka yona. Gatee-tee o ile a araba ka gore ke yena yo a bego a e-na le molato go rena le gore o be a tloga a leboga tšohle tšeo re bego re mo diretše tšona. Bothata bo be bo rarolotšwe. Phihlelo yeo e ile ya nthuta bohlokwa bja go kgopela tshwarelo ka boikokobetšo ge go se kwešišane go e-ba gona.”

Jehofa o ile a šegofatša banyalani ba bakeng sa go bontšha lerato le go ‘latela tše di loketšego khutšo.’ (Ba-Roma 14:19, PK) Lerato gape le akaretša go lemoga maikwelo a ba bangwe. Petro o re eletša gore re bontšhe go ‘kwelana bohloko.’ (1 Petro 3:8) Ge e ba re kwelana bohloko, go bonala re tla lemoga bohloko bjo re bo bakilego ka polelo goba tiro ya go se nagane gomme re tla gapeletšega go kgopela tshwarelo.

“Le Iphuthe ka Boikokobetšo”

Gaešita le bagolo ba botegago ba Bakriste ba ka fela ba fetolana ka bogale. (Bapiša le Ditiro 15:37-39.) Tše ke dinako tšeo go kgopela tshwarelo go ka bago le mohola kudu. Eupša ke eng seo se tla thušago mogolo goba Mokriste le ge e le ofe yo mongwe yo a hwetšago go kgopela tshwarelo go le thata?

Boikokobetšo ke senotlelo. Moapostola Petro o eleditše ka gore: “’Me seng sa lena Le [iphuthe ka, PK] boikokobetšô.” (1 Petro 5:5) Ešita le ge e le therešo gore diphapanong tše dintši batho ka bobedi ba na le molato, Mokriste yo a nago le boikokobetšo o tshwenyega ka mafokodi a gagwe ka noši gomme o ikemišetša go a dumela.—Diema 6:1-5.

Yo a kgopelwago tshwarelo o swanetše go amogela seo ka mokgwa wa boikokobetšo. E le go swantšha, a re re banna ba babedi bao ba nyakago go boledišana ba eme ditlhoreng tša dithaba tše pedi tše fapanego. Go boledišana ba arogantšwe ke moedi go bonala go sa kgonege. Lega go le bjalo, ge yo mongwe wa bona a ka theogela moeding wo o lego tlase gomme yo mongwe a latela mohlala wa gagwe, ba ka boledišana gabonolo. Ka mo go swanago, ge Bakriste ba babedi ba nyaka go rarolla phapano magareng ga bona, anke yo mongwe le yo mongwe a gahlane le yo mongwe moeding ge re bolela ka go swantšhetša, gomme a kgopele tshwarelo e swanetšego.—1 Petro 5:6.

Go Kgopela Tshwarelo go Bolela mo Gontši Lenyalong

Ka mo go sa phemegego, lenyalo la batho ba babedi bao ba sa phethagalago le nea dibaka tša go kgopela tshwarelo. Ka gona ge e ba monna le mosadi ka bobedi ba kwelana bohloko, go tla ba gapeletša go kgopela tshwarelo ge go ka direga gore ba bolele goba ba itshware ka go se naganele. Diema 12:18 e hlalosa gore: “Xo na le babolabodi [“yo a bolelago ka go se nagane,” NW] ba ma-hlaba-wa-lerumô; xe e le leleme la mohlale ké moreku.” ‘Mehlabo ya go se nagane’ e ka se dirollwe, eupša e ka fodišwa ka go kgopela tshwarelo ka go tšwa pelong. Ee, se se nyaka temogo e tšwelago pele le maiteko.

Ge a bolela ka lenyalo la gagwe, Susana o re: “Nna le Jack* re na le nywaga e 24 re nyalane, eupša re sa ithuta dilo tše difsa ka yo mongwe le yo mongwe wa rena. Ka manyami, nakong e nngwe e fetilego re ile ra arogana gomme ra phela re arogane dibeke tše sego kae. Lega go le bjalo, re ile ra kwa keletšo ya Mangwalo e tšwago go bagolo gomme ra boelana gape. Bjale re lemoga gore ka ge re e-na le dimelo tše fapanego kudu, dithulano di ka ba gona. Ge se se direga, re kgopela tshwarelo kapejana gomme ra leka ka matla e le ruri go kwešiša pono ya motho yo mongwe. Ke thabela go bolela gore lenyalo la rena le kaonefetše kudu.” Jack o oketša ka gore: “Re ithutile le go lemoga dinako tšeo ka tšona re bago ba sekametšego go kgopišegeng. Dinakong tše bjalo re dirišana ka tlhokomelo e fetišago.”—Diema 16:23.

Na o swanetše go kgopela tshwarelo ge e ba o nagana gore ga o na phošo? Ge maikwelo a tseneletšego a akaretšwa, go thata go se bebe sefahlego mabapi le moo molato o lego gona. Eupša selo sa bohlokwa ke khutšo lenyalong. Nagana ka Abigaile mosadi wa mo-Isiraele yo monna wa gagwe a ilego a swara Dafida gampe. Gaešita le ge a be a ka se bewe molato bakeng sa bošilo bja monna wa gagwe, o ile a kgopela tshwarelo. O ile a kgopela ka gore: “A k’O ntebalêlê bošaedi, nna molata wa xaxo.” Dafida o ile a arabela ka go mo swara ka tsela ya go naganela, a dumela ka boikokobetšo gore ge e be e se ka yena a ka be a tšholotše madi a se nago molato.—1 Samuele 25:24-28, 32-35.

Ka mo go swanago, mosadi wa Mokriste yo a bitšwago June yo a nago le nywaga e 45 a nyetšwe o nagana gore lenyalo le le atlegago le nyaka go ikemišetša go ba wa mathomo wa go kgopela tshwarelo. O re: “Ke ipotša gore lenyalo la rena ke la bohlokwa kudu go feta maikwelo a-ka ka noši. Ka gona ge ke kgopela tshwarelo, ke ikwa ke tlaleletša lenyalong.” Mokgalabje yo a bitšwago Jim o re: “Ke kgopela mosadi wa-ka tshwarelo gaešita le ka dilo tša lefeela. Ga e sa le a dirwa mogato o mogolo wa go buiwa, o kgopišega gabonolo. Ka gona ka mehla ke a mo gokarela gomme ka re, ‘Tshwarelo, Moratiwa. Ke be ke se ka ikemišetša go go kgopiša.’ Go swana le semela seo se nošeditšwego, o phakgama gatee-tee.”

Ge e ba re kgopišitše motho yo re mo ratago kudu, go kgopela tshwarelo ka pela go tloga go šoma. Milagros o dumela ka go tšwa pelong ka gore: “Ke na le bothata bja go se ikholofele gomme lentšu le le hlabago le le tšwago go monna wa-ka le a nkgopiša. Eupša ge a kgopela tshwarelo, ke ikwa ke le kaone le semeetseng.” Ka mo go loketšego, Mangwalo a re botša gore: “Polêlô tše di ratêxaxo ké todi ya dinose; di natefêla pelo, le mmele di a tsoša.”—Diema 16:24.

Itlwaetše Bokgoni bja go Kgopela Tshwarelo

Ge e ba re itlwaetša go kgopela tshwarelo ge go nyakega, go bonala re tla hwetša gore batho ba arabela gabotse. Le gona mohlomongwe ba ka ba ba kgopela tshwarelo ka bobona. Ge e ba re gononwa gore re kgopišitše yo mongwe, ke ka baka la’ng re sa dire go kgopela tshwarelo mokgwa go e na le go leka ka matla go phema go amogela phošo le ge e le efe? Lefase le ka nagana gore go kgopela tshwarelo ke pontšho ya bofokodi, eupša ruri go nea bohlatse bja kgolo ya Bokriste. Ee, re ka se nyake go swana le bao ba dumelago phošo e itšego fela ba nyenyefatša boikarabelo bja bona. Ka mohlala, na re ke re kgopele tshwarelo e se ka go tšwa pelong? Ge e ba re fihla ka morago ga nako gomme re kgopela tshwarelo leboelela, na re ikemišetša go kaonefatša go boloka ga rena nako?

Ka gona-ge, na re tloga re swanelwa ke go kgopela tshwarelo? Ee, re swanetše. Re gapeletšega ka baka la rena le ba bangwe gore re dire bjalo. Go kgopela tshwarelo go ka thuša go kokobetša bohloko bjo bo bakilwego ke go se phethagale gomme go ka lokiša ditswalano tše senyegilego. Go kgopela tshwarelo mo gongwe le mo gongwe mo re go dirago ke thuto ya boikokobetšo gomme go re tlwaetša gore re be ba kgomegago kudu ka maikwelo a ba bangwe. Ka baka leo, badumedi-gotee, balekane ba lenyalo le ba bangwe ba tla re lebelela re le bao ba swanelwago ke lerato la bona le go botwa. Re tla ba le khutšo ya monagano gomme Jehofa Modimo o tla re šegofatša.

[Mongwalo wa tlase]

[Pictures on page 23]

Go kgopela tshwarelo ka go tšwa pelong go godiša lerato la Bokriste