Go ba le Kabelo Khomotšong Yeo Jehofa a e Neago

“Mo xo rena xo tiile kholofêlô ya xo tseba lena, xe Le le batee le rena ka mahloko le ka khomotšô.”—2 BA-KORINTHE 1:7.

1, 2. Phihlelo ya ba bantši bao e bilego Bakriste lehono e bile efe?

BABADI ba bantši ba gona bjale ba Morokami ba gotše ba se na tsebo ya therešo ya Modimo. Mohlomongwe go bjalo ka wena. Ge e ba go le bjalo, gopola kamoo o ilego wa ikwa ka gona ge mahlo a gago a kwešišo a be a thoma go bulega. Ka mohlala, ge o be o kwešiša la mathomo gore bahu ga ba tlaišege eupša ga ba kwe selo, na ga se wa ka wa imologa? Ge o be o ithuta ka kholofelo ya bahu ya gore ba dimilione tše dikete ba tla tsošetšwa bophelong lefaseng le lefsa la Modimo, na ga se wa homotšega?—Mmoledi 9:5, 10; Johane 5:28, 29.

² Go thwe’ng ka kholofetšo ya Modimo ya go fediša bokgopo le go fetola lefase le gore e be paradeise? Ge o be o ithuta ka se, na ga se sa go homotša le go go tlatša tebelelo ya phišego? O ile wa ikwa bjang ge o be o ithuta la mathomo ka kgonagalo ya go se hwe le ka mohla eupša wa phologela Paradeiseng yeo e tlago ya lefaseng? Ga go na pelaelo gore o be o thabile. Ee, o bile moamogedi wa molaetša o homotšago wa Modimo wo o bolelwago mo nakong ye lefaseng ka bophara ke Dihlatse tša Jehofa.—Psalme 37:9-11, 29; Johane 11:26; Kutollo 21:3-5.

3. Ke ka baka la’ng bao ba abelanago le ba bangwe molaetša o homotšago wa Modimo le bona ba tlaišwa?

³ Lega go le bjalo, ge o be o leka go abelana le ba bangwe molaetša wa Beibele, le wena o ile wa lemoga gore “tumêlô xa se ya bohle.” (2 Ba-Thesalonika 3:2) Mohlomongwe ba bangwe ba bao e bego e le bagwera ba gago ba ile ba go kwera ka baka la go bontšha tumelo dikholofetšong tša Beibele. O ka ba o bile o ile wa tlaišwa ka baka la go tšwela pele go ithuta Beibele gotee le Dihlatse tša Jehofa. Kganetšo e ka ba e ile ya phegelela ge o be o thoma go dira diphetogo gore o dumelelanye bophelo bja gago le melao ya motheo ya Beibele. O ile wa thoma go welwa ke tlaišego yeo Sathane le lefase la gagwe ba e tlišetšago bohle bao ba amogelago khomotšo ya Modimo.

4. Bao ba sa tšwago go thabela ba ka arabela tlaišo ka ditsela dife tše di fapanego?

⁴ Go etša ge Jesu a boletše e sa le pele, ke mo go nyamišago gore tlaišego e dira ba bangwe gore ba kgopše gomme ba tlogele go kopanela le phuthego ya Bokriste. (Mateo 13:5, 6, 20, 21) Ba bangwe ba kgotlelela tlaišo ka go dula ba tsepamišitše menagano ya bona dikholofetšong tše di homotšago tšeo ba ithutago ka tšona. Mafelelong ba neela maphelo a bona go Jehofa gomme ba kolobetšwa e le barutiwa ba Morwa wa gagwe Jesu Kriste. (Mateo 28:19, 20; Mareka 8:34) Ee, tlaišego ga e kgaotše ge feela Mokriste a kolobetšwa. Ka mohlala, go ipoloka o hlwekile e ka ba ntwa e thata go motho yo a kilego a ba le tshekamelo ya boitshwaro bjo bo gobogilego. Ba bangwe ba swanelwa ke go lwantšhana le kganetšo e sa kgaotšego e tšwago go ditho tša lapa tše di sa dumelego. Go sa šetšwe tlaišego le ge e le efe, bohle bao ba phegelelago ka potego bophelo bja boineelo go Modimo ba ka kgonthišega ka selo se tee. Ba tla hwetša khomotšo le thušo tša Modimo e le batho ka o tee ka o tee.

“Modimo wa Khomotšô Yohle”

5. Ke’ng seo se ilego sa diragalela Paulo gotee le diteko tše dintši tšeo di mo wetšego?

⁵ Yo mongwe yo a ilego a leboga ka mo go tseneletšego khomotšo yeo Modimo a e neago e bile moapostola Paulo. Ka morago ga nako e lekago ka mo go kgethegilego kua Asia le Matsedonia, o ile a imologa kudu ge a e-kwa gore phuthego ya Korinthe e be e arabetše gabotse lengwalong la gagwe la kgalemelo. Se se ile sa mo tutueletša gore a ba ngwalele lengwalo la bobedi le le nago le polelo e latelago ya theto: “A xo rêtwê Modimo, Yêna Tata xo Mong wa rena Jesu Kriste, Yêna Radikxauxêlô, Modimo wa khomotšô yohle. E a re homotšaxo mahlokong a rena ohle.”—2 Ba-Korinthe 1:3, 4.

6. Re ithuta’ng mantšung a Paulo ao a hwetšwago go 2 Ba-Korinthe 1:3, 4?

⁶ Mantšu a a buduletšwego a nea tsebišo e ntši. Anke re a seka-sekeng. Ge Paulo a bolela theto goba ditebogo go Modimo goba a mo kgopela ka lengwalong la gagwe, gantši re hwetša gore o akaretša le tebogo e tseneletšego ya go leboga Jesu, e lego Hlogo ya phuthego ya Bokriste. (Ba-Roma 1:8; 7:25; Ba-Efeso 1:3; Ba-Hebere 13:20, 21) Ka gona, Paulo o bolela polelo ye ya theto go “Modimo, Yêna Tata xo Mong wa rena Jesu Kriste.” (Mongwalo o sekamego ke wa rena.) Ka gona, ka lekga la mathomo mengwalong ya gagwe o diriša leina la Segerika le le fetoletšwego e le “dikgaugelo tše lerato.” (NW) Leina le le tšwa lentšung le le dirišetšwago go bontšha manyami ka baka la tlaišo ya yo mongwe. Ka go rialo, Paulo o hlalosa maikwelo a lerato a Modimo bakeng sa le ge e le ofe wa bahlanka ba Gagwe ba botegago bao ba tlaišegago—e lego maikwelo a lerato ao a tutuetšago Modimo go gata mogato ka kgaugelo bakeng sa bona. Sa mafelelo, Paulo o ile a lebelela go Jehofa e le mothopo wa seka se se se kganyogegago ka go mmitša “Tate wa dikgaugelo tše lerato.”

7. Ke ka baka la’ng go ka bolelwa gore Jehofa ke “Modimo wa khomotšô yohle”?

⁷ “Dikgaugelo [tša Modimo] tše lerato” di feleletša ka kimollo go yo a tlaišegago. Ka gona, Paulo o tšwela pele go hlalosa Jehofa e le “Modimo wa khomotšô yohle.” Ka go rialo, khomotšo le ge e le efe yeo re ka e hwetšago ka botho bja badumedi-gotee le rena, re ka lebelela Jehofa e le mothopo wa yona. Ga go na khomotšo ya kgonthe ya ka mo go sa felego yeo e sa tšwego go Modimo. Go feta moo, ke yena a bopilego motho ka seswantšho sa gagwe, ka go rialo a re dira gore re kgone go ba bahomotši. Le gona ke moya o mokgethwa wa Modimo wo o tutuetšago bahlanka ba gagwe go bontšha kgaugelo e lerato go bao ba nyakago khomotšo.

Ba Tlwaeleditšwe go ba Bahomotši

8. Gaešita le ge Modimo e se mothopo wa diteko tša rena, ke mafelelo afe a holago ao go kgotlelela ga rena tlaišo go ka bago le ona go rena?

⁸ Le ge Jehofa Modimo a dumelela diteko tše di fapa-fapanego tšeo di tlelago bahlanka ba gagwe ba botegago, le ka mohla ga se yena mothopo wa diteko tše bjalo. (Jakobo 1:13) Lega go le bjalo, khomotšo yeo a e neago ge re kgotlelela tlaišego e ka re tlwaeletša go ba ba lemogago kudu dinyakwa tša ba bangwe. Ka mafelelo afe? “Xore ba ba lexo mahlokong bohle re kxônê xo ba homotša ka yôna khomotšô ye rena re homotšwaxo ka yôna ké Yêna Modimo.” (2 Ba-Korinthe 1:4) Ka go rialo, Jehofa o re tlwaeletša go ba ba abelanago khomotšo ya gagwe le badumedi-gotee le rena gotee le bao re gahlanago le bona bodireding bja rena bja tšhemo ge re dutše re ekiša Kriste gomme re ‘homotša bohle ba ba nyamilego.’—Jesaya 61:2; Mateo 5:4.

9. (a) Ke’ng seo se tlago go re thuša go kgotlelela tlaišego? (b) Ba bangwe ba homotšwa bjang ke go kgotlelela ga rena tlaišo ka potego?

⁹ Paulo o bontšha gore o ile a kgotlelela ditlaišego tša gagwe tše dintši ka baka la khomotšo e kgolo yeo a e amogetšego go Modimo ka Kriste. (2 Ba-Korinthe 1:5) Le rena re ka hwetša khomotšo e kgolo ka go naganišiša ka dikholofetšo tše bohlokwa kudu tša Modimo, ka go rapelela thekgo ya moya wa gagwe o mokgethwa le ka go amogela dikarabo tša Modimo dithapelong tša rena. Ka go rialo re tla matlafaletšwa go tšwela pele go thekga bogoši bja Jehofa le go hlatsela Diabolo e le moaketši. (Jobo 2:4; Diema 27:11) Ge re kgotleletše sebopego le ge e le sefe sa tlaišego ka potego, re swanetše go iša tumišo ka moka go Jehofa yoo khomotšo ya gagwe e dirago gore Bakriste ba kgone go dula ba botega ka tlase ga teko go swana le Paulo. Kgotlelelo ya Bakriste ba botegago e na le mafelelo a homotšago borwarreng, ya dira ba bangwe gore ba ikemišetše go “kgotlelela ditlaišego tše di swanago.”—2 Ba-Korinthe 1:6, NW.

10, 11. (a) Dilo tše dingwe tšeo di ilego tša baka tlaišego ka phuthegong ya Korinthe ya bogologolo ke dife? (b) Paulo o ile a homotša bjang phuthego ya Korinthe, gomme o ile a bontšha kholofelo efe?

¹⁰ Ba-Korinthe ba bile le kabelo ya bona ditlaišegong tšeo di welago Bakriste ka moka ba therešo. Go oketša moo, ba be ba nyaka keletšo ya go kgaola seotswa se se sa itsholego. (1 Ba-Korinthe 5:1, 2, 11, 13) Go palelwa ke go gata mogato wo le go fediša ntwa le dikarogano go ile gwa goboša phuthego. Eupša mafelelong ba ile ba diriša keletšo ya Paulo gomme ba bontšha go itshola ga kgonthe. Ka gona, o ile a ba reta ka borutho gomme a bolela gore karabelo ya bona e botse lengwalong la gagwe e mo homoditše. (2 Ba-Korinthe 7:8, 10, 11, 13) Mohlomongwe yo a kgaotšwego le yena o ile a itshola. Ka gona Paulo o ile a ba eletša gore ba ‘mo lebalele le go mo homotša, e le gore motho yo bjalo a se ke a metšwa ke go ba ga gagwe yo a nyamilego kudu.’—2 Ba-Korinthe 2:7.

¹¹ Lengwalo la bobedi la Paulo le swanetše go ba le ile la homotša phuthego ya Korinthe e le ka kgonthe. Bjo e be e le bjo bongwe bja maikemišetšo a gagwe. O hlalositše gore: “Mo xo rena xo tiile kholofêlô ya xo tseba lena, xe Le le batee le rena ka mahloko le ka khomotšô.” (2 Ba-Korinthe 1:7) Phethong ya lengwalo la gagwe, Paulo o kgothaditše ka gore: “Tšwelang pele . . . le le ba homotšegago, . . . gomme Modimo wa lerato le wa khutšo o tla ba le lena.”—2 Ba-Korinthe 13:11, NW.

12. Ke’ng seo Bakriste ka moka ba se nyakago?

¹² Re ka ithuta thuto e bohlokwa gakaakang go se! Ditho ka moka tša phuthego ya Bokriste di swanetše go ‘ba le kabelo khomotšong’ (PK) yeo Modimo a e neago ka Lentšu la gagwe, moya wa gagwe o mokgethwa le mokgatlo wa gagwe wa lefaseng. Gaešita le bao ba kgaotšwego ba ka nyaka khomotšo ge e ba ba itshola gomme ba lokiša tsela ya bona e fošagetšego. Ka go rialo, “molaki e a bôtêxaxo yo bohlale” o hlomile tokišetšo ya kgaugelo bakeng sa go ba thuša. Gatee ka ngwaga bagolo ba babedi ba ka etela batho ba itšego ba kgaotšwego. Ba ba ka fo ba ba se sa bontšha boemo bja kgopolo bja borabele goba ba se sa akaretšwa sebeng se segolo gomme ba ka nyaka thušo gore ba gate megato e nyakegago ya go bušetšwa.—Mateo 24:45; Hesekiele 34:16.

Tlaišo ya Paulo kua Asia

13, 14. (a) Paulo o hlalositše bjang nako ya tlaišo e šoro yeo e mo wetšego kua Asia? (b) Ke tiragalo efe yeo Paulo a ka bago a be a nagana ka yona?

¹³ Mohuta wa tlaišego yeo phuthego ya Korinthe e bego e bile le yona go fihla ntlheng ye e be e ka se ke ya bapišwa le ditlaišo tše dintši tšeo Paulo a bego a ile a swanelwa ke go di kgotlelela. Ka go rialo, o be a ka ba gopotša gore: “Xa ke rate xe lena Bana bešo Lè ka dula Lè sa tsebe tša dihlokofalô tše di re tletšexo naxeng ya Asia, tša re imêla wa xo re rôba, ra ba ra fêlêlwa ke kholofêlô ya xo re re sa tlo phela. Mo dipelong tša rena xo be xo šetše xo tiile la xo re re tlo hwa; ya ba xore re lesê xo ipôta, re bôtê Modimo e a kxônaxo xo tsoša le bahu. Ké Yêna e a re phološitšexo lehung le lekaakao; le byale ó sa re phološa; xomme ké Yêna yo re holofetšexo xore ó sa tlo re phološa.”—2 Ba-Korinthe 1:8-10.

¹⁴ Diithuti tše dingwe tša Beibele di dumela gore Paulo o be a bolela ka mpherefere wa Efeso wo o ka bego o fedišitše bophelo bja Paulo gotee le bja badirišani ba gagwe ba babedi ba basepedi ba Matsedonia, e lego Gayo le Aristareko. Bakriste ba ba babedi ba ile ba išwa ka kgapeletšo lefelong la dipontšho leo le bego le tletše sehlopha sa bahlola-mpherefere seo ‘[se ilego sa goeletša ka diiri tše ka bago tše pedi, NW] sa re: “Diana [modimogadi] wa Ba-Efeso ké e moxolo!”’ Mafelelong, mohlankedi wa motse o ile a atlega go homotša lešaba. Kotsi ye e okametšego bophelo bja Gayo le bja Aristareko e swanetše go ba ile ya nyamiša Paulo kudu. Ge e le gabotse, o be a nyaka go tsena gore a boledišane le sehlopha se se fišegelago thoko sa bahlola-mpherefere, eupša o ile a thibelwa go bea bophelo bja gagwe kotsing ka tsela ye.—Ditiro 19:26-41.

15. Ke boemo bofe bjo bo feteletšego bjoo bo ka bago bo hlaloswa go 1 Ba-Korinthe 15:32?

¹⁵ Lega go le bjalo, Paulo a ka ba a be a hlalosa boemo bjo bo feteletšago kudu go e na le tiragalo yeo e boletšwego pele. Lengwalong la gagwe la pele le le yago go ba-Korinthe, Paulo o botšišitše gore: “Xe kua Efeso kè lwile le dibata, xo nkhola’ng?” (1 Ba-Korinthe 15:32) Se se ka bolela gore bophelo bja Paulo bo be bo beilwe kotsing e sego feela ke batho ba bjalo ka dibata, eupša ke dibata tša kgonthe lepatlelong la Efeso. Ka dinako tše dingwe disenyi di be di otlwa ka go gapeletšwa go lwa le dibata mola mašaba ao a nyoretšwego madi a bogetše. Ge e ba Paulo a be a bolela gore o kile a lebana le dibata tša kgonthe, o swanetše go ba a phološwa ka mohlolo ka motsotso wa mafelelo lehung le sehlogo go fo etša ge Daniele a ile a phološwa molomong wa ditau tša kgonthe.—Daniele 6:23.

Mehlala ya Mehleng Yeno

16. (a) Ke ka baka la’ng bontši bja Dihlatse tša Jehofa bo kwešiša le ditlaišo tšeo di ilego tša wela Paulo? (b) Ke’ng seo re ka kgonthišegago ka sona mabapi le bao ba hwetšego tumelo ya bona? (c) Ke mafelelo afe a mabotse ao a bilego gona ge Bakriste ba phonyokga lehu ka lešobana la nalete?

¹⁶ Bakriste ba bantši ba mehleng yeno ba ka kwešiša ditlaišo tšeo di ilego tša wela Paulo. (2 Ba-Korinthe 11:23-27) Le lehono Bakriste ba bile ‘le tlalelo ya go ba imela ka gogolo go fetiša matla a bona,’ (PK) gomme ba bantši ba ile ba lebeletšana le maemo ao go wona ‘ba bego ba feletšwe ke kholofelo ya gore ba tla phela.’ (2 Ba-Korinthe 1:8) Ba bangwe ba ile ba bolawa ke babolai ba lešaba le batlaiši ba sehlogo. Re ka kgonthišega gore matla a homotšago a Modimo a ile a ba dira gore ba kgone go kgotlelela le gore ba hwile dipelo tša bona le menagano di tsepamišitšwe go phethagatšweng ga kholofelo ya bona, e ka ba ya legodimong goba ya lefaseng. (1 Ba-Korinthe 10:13; Ba-Filipi 4:13; Kutollo 2:10) Maemong a mangwe, Jehofa o ile a laola ditaba gomme banababo rena ba phološwa lehung. Ga go na pelaelo gore bao ba ilego ba phološwa ka tsela yeo ba ile ba hlagolela go bota ka mo go oketšegilego “Modimo e a kxônaxo xo tsoša le bahu.” (2 Ba-Korinthe 1:9) Ka morago ga moo, ba be ba ka ba ba bolela ka kgodišego e kgolo ge ba dutše ba abelana le ba bangwe molaetša o homotšago wa Modimo.—Mateo 24:14.

17-19. Ke diphihlelo dife tšeo di bontšhago gore banababo rena kua Rwanda e bile ba nago le kabelo khomotšong ya Modimo?

¹⁷ Morago bjale banababo rena ba ba rategago ba Rwanda ba bile le phihlelo e swanago le ya Paulo le badirišani ba gagwe. Ba bantši ba lahlegetšwe ke maphelo a bona, eupša maiteko a Sathane a paletšwe ke go fediša tumelo ya bona. Go e na le moo, banababo rena nageng ye ba hweditše khomotšo ya Modimo ka ditsela tše dintši e le batho ka o tee ka o tee. Nakong ya polao ya merafo ya ma-Tutsi le ma-Hutu ao a dulago Rwanda, ma-Hutu ke ona ao a ilego a bea maphelo a ona kotsing ka go šireletša ma-Tutsi gotee le ma-Tutsi ao a šireleditšego ma-Hutu. Ba bangwe ba ile ba bolawa ke go ba bao ba feteletšago dilo kudu ka baka la go šireletša badumedi-gotee le bona. Ka mohlala, Hlatse ya mo-Hutu yeo e bitšwago Gahizi e ile ya bolawa ka morago ga ge e ile ya uta kgaetšedi wa mo-Tutsi yo a bitšwago Chantal. Monna wa Chantal wa mo-Tutsi e lego Jean o be a utilwe lefelong le lengwe ke kgaetšedi ya mo-Hutu yo a bitšwago Charlotte. Jean le ngwanabo rena yo mongwe wa mo-Tutsi ba ile ba dula ba utilwe ka matšatši a 40 ka tšhimeleng e kgolo, ba e-tšwa feela ka dinako tše kopana bošego. Nakong ye ka moka Charlotte o be a ba nea dijo le tšhireletšo gaešita le ge a be a dula kgaufsi le kampa ya bahlabani ba ma-Hutu. Letlakaleng le, o ka bona seswantšho sa Jean le Chantal ba kopanego gape bao ba lebogago gore barapedi-gotee le bona ba ma-Hutu ba ‘beile maphelo a bona kotsing’ ka baka la go fo etša ge Perisika le Akwila ba dirile go moapostola Paulo.—Ba-Roma 16:3, 4.

¹⁸ Hlatse e nngwe ya mo-Hutu e lego Rwakabubu, e ile ya retwa ke kuranta ya Intaremara ka baka la go šireletša badumedi-gotee le yona ba ma-Tutsi.a E boletše gore: “Go bile go na le Rwakabubu yo e lego yo mongwe wa Dihlatse tša Jehofa, yo a ilego a tšwela pele a uta batho go tloga lefelong le lengwe go ya go le lengwe gare ga banababo (ke kamoo badumedi-gotee ba bitšanago ka gona). O be a tšea letšatši ka moka a ba išetša dijo le meetse a go nwa gaešita le ge a swerwe ke asthma. Eupša Modimo o ile a mo matlafatša ka go fetišiša.”

¹⁹ Gape, ela hloko banyalani ba thabelago ba ma-Hutu bao ba bitšwago Nicodeme le Athanasie. Pele go thoma ga ntwa ya morafo, banyalani ba ba be ba ithuta Beibele le Hlatse ya mo-Tutsi yeo e bitšwago Alphonse. Ka go bea maphelo a bona kotsing, ba ile ba uta Alphonse legaeng la bona. Ka morago ba ile ba lemoga gore ntlo e be e se lefelo le le šireletšegilego ka gobane baagišani ba bona ba ma-Hutu ba be ba tseba ka mogwera wa bona wa mo-Tutsi. Ka baka leo, Nicodeme le Athanasie ba ile ba uta Alphonse ka moleteng wo o lego ka jarateng ya bona. Se e be e le go huduga mo gobotse ka gobane baagišani ba ile ba thoma go tla go tsoma Alphonse mo e nyakilego go ba letšatši le lengwe le le lengwe. Ge a be a robetše ka moleteng wo ka matšatši a 28, Alphonse o ile a naganišiša ka dipego tša Beibele tše bjalo ka yeo e lego mabapi le Rahaba yo a ilego a uta ba-Isiraele ba babedi tlhakeng ya ntlo ya gagwe Jeriko. (Jošua 6:17) Lehono Alphonse o tšwetša pele tirelo ya gagwe kua Rwanda e le seboledi sa ditaba tše di lokilego, a leboga gore barutwana ba gagwe ba Beibele ba ma-Hutu ba ile ba bea maphelo a bona kotsing ka baka la gagwe. Go thwe’ng ka Nicodeme le Athanasie? Bjale ke Dihlatse tše kolobeditšwego tša Jehofa gomme ba swara dithuto tša Beibele tše fetago 20 le batho ba thabelago.

20. Jehofa o homoditše banababo rena ba Rwanda ka tsela efe, eupša ke’ng seo ba bantši ba bona ba se nyakago ka mo go tšwelago pele?

²⁰ Nakong ya ge ntwa ya morafo e be e thoma kua Rwanda, go be go e-na le bagoeledi ba 2 500 ba ditaba tše di lokilego ka nageng. Gaešita le ge ba makgolo ba ile ba lahlegelwa ke maphelo a bona goba ba gapeletšwa go tšhaba nageng, palo ya Dihlatse e oketšegile go fihla ka godimo ga 3 000. Bjoo ke bohlatse bja gore Modimo o homoditše banababo rena e le ka kgonthe. Go thwe’ng ka ditšhiwana tše dintši le bahlologadi bao ba lego gare ga Dihlatse tša Jehofa? Ka tlwaelo, ba ba sa dutše ba tlaišega gomme ba nyaka khomotšo e tšwelago pele. (Jakobo 1:27) Megokgo ya bona e tla phumolwa ka mo go feletšego feela ge tsogo e direga lefaseng le lefsa la Modimo. Lega go le bjalo, ka baka la go hlankelwa ke banababo bona le ka gobane e le barapedi ba “Modimo wa khomotšô yohle,” ba kgona go lebeletšana le bophelo ka katlego.

21. (a) Ke kae mo gongwe moo banababo rena ba ilego ba nyaka khomotšo ya Modimo ka tlalelo, gona ke tsela efe e nngwe yeo ka moka ga rena re ka thušago ka yona? (Bona lepokisi le le rego “Khomotšo Nywageng e Mene ya Ntwa.”) (b) Go nyaka ga rena khomotšo go tla kgotsofatšwa neng ka mo go feletšego?

²¹ Mafelong a mangwe a mantši a bjalo ka Eritrea, Singapore le yeo e bego e le Yugoslavia, banababo rena ba tšwela pele go hlankela Jehofa ka potego go sa šetšwe tlaišo. Eka re ka thuša banababo rena ba bjalo ka go dira ditopo tša ka mehla gore ba hwetše khomotšo. (2 Ba-Korinthe 1:11) Le gona eka re ka kgotlelela ka potego go fihla nakong ya ge Modimo ka Jesu Kriste a “tlo phomola mexôkxô ka moka mahlong a [rena]” ka kgopolo e tletšego. Ka gona re tla hwetša khomotšo yeo Jehofa a tlago go e nea lefaseng la gagwe le lefsa la go loka ka tekanyo e feletšego.—Kutollo 7:17; 21:4; 2 Petro 3:13.

[Mongwalo wa tlase]

Na o a Tseba?

◻ Ke ka baka la’ng Jehofa a bitšwa “Modimo wa khomotšô yohle”?

◻ Re swanetše go lebelela ditlaišo bjang?

◻ Re ka abelana khomotšo le bomang?

◻ Go nyaka ga rena khomotšo go tla kgotsofatšwa bjang ka mo go feletšego?

[Seswantšho go letlakala 17]

Gaešita le ge Jean le Chantal e be e le Dihlatse tša ma-Tutsi, ba ile ba utwa mafelong a aroganego ke Dihlatse tša ma-Hutu nakong ya ntwa ya morafo kua Rwanda

[Seswantšho go letlakala 17]

Dihlatse tša Jehofa di tšwela pele go abelana le baagišani ba tšona molaetša o homotšago wa Modimo kua Rwanda