Nywaga e Fetago 50 ya ‘go Tshela’

KA GE GO ANEGA EMMANUEL PATERAKIS

Nywaga-kgolong e 19 e fetilego moapostola Paulo o ile a amogela taletšo e sa tlwaelegago e rego: “Selêla Matsedonia O re hlakodišê!” Paulo o ile a amogela ka go rata sebaka se se sefsa sa go “tsebatša ditaba tše di lokilego.” (Ditiro 16:9, 10, bapiša le NW.) Le ge taletšo yeo ke e amogetšego e se ya kgale gakaalo, fela e bile nywageng e fetago 50 e fetilego moo ke ilego ka dumela go “selêla” mašemong a mafsa ka moya wa Jesaya 6:8 e rego: “Ké nna é, nthomê!” Maeto a-ka a mantši a ile a ntira gore ke hwetše leina la dikwero la Perpetual Tourist (Mosepedi yo a sa Kgaotšego wa go Boga Naga), eupša mediro ya-ka e be e sa swane le go etela bakeng sa go boga naga. Ka makga a mantši ge ke be ke fihla phapošing ya-ka ya hoteleng ke be ke kwatama gomme ka leboga Jehofa bakeng sa tšhireletšo ya gagwe.

KE BELEGWE ka January 16, 1916 kua Hierápetra, Kereta ka lapeng le le nweletšego kudu bodumeding bja Orthodox. Go tloga nakong ya ge ke sa le lesea mma o be a e-ya le nna le dikgaetšedi tša-ka tše tharo kerekeng ka Sontaga. Ge e le tate yena o be a kgetha go dula gae gomme a bale Beibele. Ke be ke hlompha tate—monna yo a botegago, wa go loka le yo a lebalelago—gomme lehu la gagwe le ile la nkgoma kudu ge ke be ke e-na le nywaga e senyane.

Ke gopola gore ge ke be ke e-na le nywaga e mehlano ke ile ka bala temana sekolong yeo e bego e re: “Selo se sengwe le se sengwe seo se re dikologilego se tsebatša go ba gona ga Modimo.” Ge ke dutše ke gola ke ile ka kgodišega ka se ka mo go feletšego. Ka go rialo, ge ke e-na le nywaga e 11 ke ile ka kgetha go ngwala taodišo ka Psalme 104:24 e le sehlogo sa yona: “Morêna, medirô ya xaxo xa se ka boati! O e dirile xohle ka bohlale; lefase le tletše dibopiwa tša xaxo.” Ke be ke tlabilwe ke dimakatšo tša tlhago gaešita le ke dilo tše bonolo tše bjalo ka dipeu tše di hlamilwego ka maphego a manyenyane e le gore di tšewe ke phefo moriting wa sehlare seo di tšwago go tšona. Beke ka morago ke ile ka iša taodišo ya-ka, morutiši wa-ka a e balela klase ka moka ka go hlaboša gomme ka morago a e balela sekolo ka moka. Ka nako yeo barutiši ba be ba lwantšha dikgopolo tša Bokomanisi gomme ba ile ba thabela go kwa ke lwela go ba gona ga Modimo. Ge e le nna ke be ke upša ke thabetše go bontšha go dumela ga-ka go Mmopi.

Dikarabo tša Dipotšišo Tša-ka

Ke sa dutše ke gopola gabotse go kopana ga-ka la mathomo le Dihlatse tša Jehofa mathomong a nywaga ya bo-1930. Emmanuel Lionoudakis o be a dutše a bolela ditoropong ka moka le metsaneng ya Kereta. Ke ile ka amogela dipukwana tše mmalwa go yena, eupša yeo e ilego ya tanya mahlo a-ka e bile e rego Where Are the Dead? Ke be ke e-na le poifo e nyamišago kudu ya go boifa lehu moo ke bego nka se ke ka tsena ka phapošing yeo tate a hlokofaletšego go yona. Ge ke be ke dutše ke bala pukwana ye leboelela gomme ke ithuta seo Beibele e se rutago ka boemo bja bahu, ke ile ka kwa poifo ya-ka ya tumela-khwele e nyamelela.

Dihlatse di be di etela toropo ya gabo rena gatee ka ngwaga selemo gomme di ntlišetša dipuku tše dingwe gore ke bale. Kwešišo ya-ka ya Mangwalo e ile ya oketšega ganyenyane-ganyenyane, eupša ke ile ka tšwela pele ke tsena Kereke ya Orthodox. Lega go le bjalo, puku ya Deliverance e ile ya tliša diphetogo. E ile ya bontšha gabotse phapano magareng ga mokgatlo wa Jehofa le wa Sathane. Go tloga mo nakong ye ke ile ka thoma go ithuta Beibele ka mehla gotee le dipuku le ge e le dife tša Mokgatlo wa Watch Tower tšeo ke bego ke kgona go di hwetša. Ka ge Dihlatse tša Jehofa di be di thibetšwe Gerika, ke be ke ithuta ka sephiring bošego. Lega go le bjalo, ke be ke fišegela kudu seo ke bego ke ithuta sona moo ke bego ke sa kgone go ithibela go bolela ka sona le yo mongwe le yo mongwe. Ga se gwa tšea nako pele maphodisa a thoma go nkgahlegela, a nketela ka mehla ka diiri ka moka tša letšatši le bošego bakeng sa go tsoma dipuku.

Ka 1936 ke ile ka ya sebokeng ka lekga la mathomo bokgole bja dikhilomithara tše 120 kua Iráklion. Ke be ke thabetše kudu go kopana le Dihlatse. Bontši bja tšona e be e le batho ba ikokobeditšego, bontši e le balemi eupša ba ile ba thuša go nkgodiša gore se ke therešo. Ke ile ka ineela go Jehofa ka yona nako yeo.

Go kolobetšwa ga-ka ke tiragalo yeo nka se kego ka e lebala le ka mohla. Bošegong bjo bongwe ka 1938, nna le ba babedi ba barutwana ba-ka ba Beibele re ile ra išwa ke Ngwanabo rena Lionoudakis lebopong ka lefsifsing le leso-leso. Ka morago ga ge a rapetše, o ile a re ina ka meetseng.

Ge ke Swerwe

Lekga la mathomo leo ke ilego ka ya boboleding ka lona e bile la ditiragalo kudu ge ke bolela ka boripana. Ke ile ka kopana le mogwera wa kgale wa sekolong yo e bego e le moperisita gomme ra ba le poledišano e botse kudu gotee. Eupša ka morago ga moo o ile a hlalosa gore ka go dumelelana le thulaganyo ya mopišopo, o be a swanetše go ntshwariša. Ge re dutše re letile ka ofising ya ramotse gore maphodisa a fihle go tšwa motsaneng wa kgaufsi, lešaba le ile la bokana ka ntle. Ka gona ke ile ka tšea Testamente e Mpsha ya Segerika yeo e bego e le ka ofising gomme ka thoma go le nea polelo yeo e theilwego go Mateo kgaolo 24. Mathomong batho ba be ba sa nyake go theetša, eupša moperisita o ile a tsena ditaba gare. O ile a re: “Mo tlogeleng a bolele, ke Beibele ya rena.” Ke ile ka kgona go bolela ka iri le seripa. Ka go rialo, letšatši la-ka la pele bodireding e be e bile e le sebaka sa polelo ya-ka ya pele ya phatlalatša. Ka ge maphodisa a be a sešo a tla ge ke fetša, ramotse le moperisita ba ile ba dira phetho ya gore sehlopha sa banna se ntšhetše ka ntle ga toropo. Mothinyeng wa pele wa tsela ke ile ka thoma go kitima ka lebelo ka mo ke bego nka kgona go phema mafsika ao ba bego ba a foša.

Letšatšing le le latetšego maphodisa a mabedi ao a bego a sepela le mopišopo a ile a ntshwara mošomong. Kua seteišeneng sa maphodisa ke ile ka kgona go ba nea bohlatse bjo bo tšwago Beibeleng, eupša ka ge dipuku tša-ka tša Beibele di be di se na setempe sa mopišopo seo se bego se nyakwa ke molao, ke ile ka bewa molato wa bosokolli le go aba dipuku tšeo di sa dumelelwago. Ke ile ka lokollwa tsheko e fegilwe.

Ke ile ka sekišwa kgwedi ka morago. E le go itšhireletša, ke ile ka hlalosa gore ke be ke fo ba ke e-kwa taelo ya Kriste ya go bolela. (Mateo 28:19, 20) Moahlodi o ile a araba ka go kodutla ka gore: “Ngwana-ka, Yo a neilego taelo yeo o bapotšwe. Ka manyami, ga ke na matla a go go otla ka kotlo e swanago.” Lega go le bjalo, ramolao yo mofsa yo ke bego ke sa mo tsebe o ile a nkemelela a bolela gore ka ge go e-na le Bokomanisi le boila-Modimo bjo bokaakaa tikologong, kgoro e swanetše go ikgodiša ka gore go na le masogana ao a ikemišeditšego go lwela Lentšu la Modimo. Ka gona o ile a tla gomme a ntebogiša ka borutho ka bohlatse bja-ka bjo bo ngwadilwego bjo bo bego bo le ka faeleng ya-ka. A kgahlišitšwe ke ge ke sa le yo monyenyane gakaalo, o ile a ithapela go nkemelela ka ntle le tefo. Go e na le go ahlolelwa bonyenyane dikgwedi tše tharo, ke ile ka ahlolelwa matšatši a lesome feela kgolegong le tefišo ya di-drachma tše 300. Kganetšo e bjalo e ile ya fo matlafatša boikemišetšo bja-ka bja go hlankela Jehofa le go lwela therešo.

Lebakeng le lengwe ge ke be ke swerwe, moahlodi o ile a lemoga bolokologi bjo ke bego ke tsopola Beibele ka bjona. O ile a kgopela mopišopo gore a tšwe ka ofising ya gagwe ka gore: “O dirile mošomo wa gago. Ke tla bonana le yena.” Ka gona o ile a ntšha Beibele ya gagwe gomme ra bolela ka Mmušo wa Modimo thapama ka moka. Ditiragalo tše bjalo di ile tša nkgothaletša go tšwela pele go sa šetšwe mathata.

Kahlolo ya Lehu

Ka 1940 ke ile ka biletšwa tirelong ya tša bohlabani gomme ka ngwala lengwalo go hlalosa lebaka leo ka lona ke bego nka se dumele go ingwadiša. Matšatši a mabedi ka morago ke ile ka golegwa gomme ka bethwa o šoro ke maphodisa. Ka morago ke ile ka tsenywa ntweng Albania moo ke ilego ka sekišwa ke balaodi ba tša bohlabani ka baka la ge ke ganne go lwa. Balaodi ba tša bohlabani ba ile ba mpotša gore ba be ba sa nyake go tseba ge e ba ke be ke nepile goba ke fošitše, ge e se mafelelo ao mohlala wa-ka o ka bago le ona go mašole. Ke ile ka ahlolelwa lehu, eupša ka baka la phošo ya tša molao ke ile ka imologa kudu ge kahlolo ye e be e fetolelwa go nywaga e lesome ya go šoma ka thata. Ke ile ka fetša dikgwedi tše sego kae tše di latetšego tša bophelo bja-ka kgolegong ya tša bohlabani Gerika ka tlase ga maemo a thata kudu ao ke sa dutšego ke e-na le mafelelo a ona mmeleng.

Lega go le bjalo, kgolego ga se ya ka ya nthibela go bolela. Le gatee! Go be go le bonolo go thoma dipoledišano ka ge ba bantši ba be ba ipotšiša lebaka leo ka lona moagi yo e sego mohlabani a bego a le kgolegong ya tša bohlabani. E nngwe ya dipoledišano tše le lesogana le le botegago e ile ya lebiša thutong ya Beibele ka lapeng la kgolego. Nywageng e 38 ka morago ke ile ka kopana le monna yo gape kopanong. O be a amogetše therešo gomme a hlankela e le molebeledi wa phuthego sehlakahlakeng sa Lefkás.

Ge madira a Hitler a be a šwahlela Yugoslavia ka 1941, re ile ra fetišetšwa ka borwa kgolegong ya Preveza. Ge re le leetong, molokeloke wa rena wa dilori o ile wa hlaselwa ke bafoši ba dipomo ba Majeremane gomme rena bagolegwa ra tingwa dijo. Ge borothwana bjo ke bego ke e-na le bjona bo fedile, ke ile ka rapela Modimo ka gore: “Ge e ba e le thato ya gago gore ke bolawe ke tlala ka morago ga ge o mphološitše kahlolong ya lehu, gona thato ya gago a e dirwe.”

Letšatšing le le latetšego mohlankedi o ile a mpiletša ka thoko nakong ya go balwa ga maina gomme ka morago ga ge a kwele moo ke tšwago gona, gore batswadi ba-ka ke bomang le lebaka leo ke bego ke golegilwe ka lona, o ile a mpotša gore ke mo šale morago. O ile a nkiša lefelong la go jela la bahlankedi ka toropong gomme a mpontšha tafola yeo e nago le borotho, tšhese le nama e gadikilwego ya nku gomme a mpotša gore ke je. Eupša ke ile ka hlalosa gore ka ge bagolegwa ba bangwe ba 60 ba be ba se na sa go ja, letswalo la-ka le be le sa ntumelele go ja. Mohlankedi o ile a araba ka gore: “Nka se kgone go fepa yo mongwe le yo mongwe! Tatago e be e le yo a fago kudu go tate. Ke na le tlemo ya boikarabelo go wena, eupša e sego go ba bangwe.” Ke ile ka araba ka gore: “Ge go le bjalo ke tla fo boela morago.” O ile a nagana ka motsotswana ke moka a nnea mokotla o mogolo gore ke tsenye dijo tše dintši kamoo ke bego nka kgona ka gona.

Ge ke boela kgolegong ke ile ka bea mokotla fase gomme ka re: “Banna, ke tša lena.” Ka mo go sa letelwago mantšiboeng a pele ga moo ke be ke beilwe molato wa go ba yo a ikarabelago ka boemo bja bagolegwa ba bangwe ka baka la ge ke sa ba tlatša go rapeleng ga bona Maria Kgarebe. Lega go le bjalo, Mokomanisi o be a ile a nkemelela. Bjale ge a bona dijo o ile a botša ba bangwe gore: “O kae ‘Maria Kgarebe’ wa lena? Le itše re tla hwa ka baka la monna yo, eupša ke yena a re tlišetšago dijo.” Ka morago o ile a retologela go nna gomme a re: “Emmanuel! E-tla o rapele.”

Go se go ye kae ka morago ga moo, go batamela ga madira a Majeremane go ile gwa dira gore bahlapetši ba kgolego ba tšhabe, ba bula mejako ya bothopša. Ke ile ka leba Patras e le gore ke hwetše Dihlatse tše dingwe pele ke fetela Athene mafelelong a May 1941. Ke ile ka kgona go hwetša diaparo le dieta moo gotee le go hlapa ka lekga la pele lebakeng le le fetago ngwaga. Go fihla bofelong bja pušo ya bahlabani, Majeremane a be a nkemiša ka mehla ge ke be ke le boboleding, eupša ga se a ka a ntshwara. Yo mongwe wa ona o itše: “Kua Jeremane re thuntšha Dihlatse tša Jehofa. Eupša mo re duma ge nkabe manaba a rena ka moka e le Dihlatse!”

Mediro ya ka Morago ga Ntwa

Bjalo ka ge eka Gerika e be e se ya lwa ka mo go lekanego, e ile ya hlagatšwa ka mo go tšwelago pele ke ntwa ya selegae go tloga ka 1946 go ya go 1949, ya baka mahu a dikete-kete. Banababo rena ba be ba nyaka kgothatšo e kgolo gore ba dule ba tiile nakong ya ge go fo ya dibokeng go be go ka lebiša go swarweng. Banababo rena ba mmalwa ba ile ba ahlolelwa lehu ka baka la boemo bja bona bja go se tšee lehlakore. Eupša go sa šetšwe se, batho ba bantši ba ile ba arabela molaetšeng wa Mmušo gomme beke e nngwe le e nngwe re e-ba le kolobetšo e tee goba tše pedi. Ka 1947 ke ile ka thoma go šoma diofising tša Mokgatlo tša Athene mosegare gomme bošego ke etela diphuthego ke le molebeledi wa mosepedi.

Ka 1948 ke ile ka thabela go laleletšwa go ya Sekolong sa Beibele sa Watchtower sa Gilead kua United States. Eupša go be go e-na le bothata. Ka baka la go bewa ga-ka melato nakong e fetilego, ke ile ka palelwa ke go hwetša paseporoto. Lega go le bjalo, yo mongwe wa barutwana ba-ka ba Beibele e be e le mogwera wa molaodi. Ka thušo ya morutwana yo, ke ile ka hwetša paseporoto ya-ka dibeke tše sego kae feela. Eupša ke be ke tshwenyegile ge nakwana pele ga ge ke swanetše go tloga ke ile ka swarelwa go aba Morokami. Lephodisa le ile la nkiša go molaodi wa State Security Police wa Athene. Ke ile ka makala kudu ge e le yo mongwe wa baagišani ba-ka! Lephodisa le ile la hlalosa lebaka leo ke bego ke swerwe ka lona gomme la mo nea sephutha sa dimakasine. Moagišani wa-ka o ile a ntšha mokgobo wa dimakasine tša Morokami ka tesekeng ya gagwe gomme a re go nna: “Ga ke na tokollo ya morago-rago. Na nka tšea kopi?” Ke ile ka imologa gakaakang ge ke bona thušo ya Jehofa ditabeng tše bjalo!

Sehlopha sa bo-16 sa Gilead sa 1950 e bile phihlelo e humišago. Ge se fetša, ke ile ka abelwa go ya Cyprus moo ke ilego ka lemoga go se go ye kae gore kganetšo ya baruti e be e le e bogale go etša Gerika. Gantši re be re swanelwa ke go lebeletšana le mašaba a bafišegela-thoko ba bodumedi bao kgalefo ya bona e hlohleleditšwego ke baperisita ba Orthodox. Ka 1953 visa ya-ka ya Cyprus e be e sa mpshafatšwa, gomme ke ile ka abelwa gape go ya Istanbul, Turkey. Mo le gona ke ile ka dula lebaka le le kopana. Lehloyo la tša dipolitiki magareng ga Turkey le Gerika le be le bolela gore go sa šetšwe mafelelo a mabotse modirong wa boboledi, ke gapeletšega go ya kabelong e nngwe—e lego Egipita.

Ge ke be ke le kgolegong ke be ke tlelwa ke Psalme 55:6, 7 kgopolong. Dafida moo o be a hlalosa go hlologelwa go tšhabela lešokeng. Le ka mohla ga se ka ka ka akanya gore ka letšatši le lengwe ke be ke tla ba gona moo. Ka 1954 ka morago ga leeto le le lapišago la matšatši a mmalwa ka setimela le sekepe sa nokeng ya Nile, ke ile ka fihla moo ke bego ke e-ya gona mafelelong—e lego Khartoum, Sudan. Seo ke bego ke nyaka go se dira e be e le go hlapa gomme ke robale. Eupša ke be ke lebetše gore e be e le mosegare wa sekgalela. Meetse ao a bego a bolokilwe ka tankeng yeo e lego tlhakeng a ile a mpabola, a nkgapeletša gore ke apare kefa ya bofefo ka dikgwedi tše mmalwa go fihlela letlalo la hlogo ya-ka le fola.

Gantši ke be ke ikwa ke le lekatana moo, ke nnoši bogareng bja Sahara e lego bokgoleng bja dikhilomithara tše sekete le makgolo a tshelelago go tloga phuthegong ya kgaufsi eupša Jehofa o ile a nthekga gomme a nnea matla a go tšwela pele. Ka dinako tše dingwe kgothatšo e be e e-tšwa methopong e tlogago e sa letelwa. Ka letšatši le lengwe ke ile ka kopana le molaodi wa Musiamo wa Khartoum. O be a e-na le kgopolo e bulegilego, gomme re ile ra ba le poledišano e botse. Ge a lemoga gore ke wa setlogo sa Gerika, o ile a botšiša ge e ba nka mo thuša ka go ya musiamong go ya go fetolela mengwalo e itšego ya ditlhaloso dilong tša bokgabo tšeo di hweditšwego ka kerekeng ya lekgolong la botshelela la nywaga. Ka morago ga diiri tše hlano karolong ya ka tlase ya moago e nago le sekhutamoya, ke ile ka hwetša piring yeo e nago le leina la Jehofa, e lego Tetragrammaton. Akanya ka lethabo la-ka! Ga se ga sewelo Yuropa go hwetša leina la Modimo ka dikerekeng, eupša ke ga sewelo kudu go le hwetša bogareng bja Sahara!

Ka morago ga kopano ya ditšhaba ka moka ka 1958, ke ile ka abelwa go ba molebeledi wa mafelo bakeng sa go etela banabešo dinageng tše 26 le ditikologong tša Bogare le Bohlabela bja Kgaufsi gotee le tikologong ya Mediterranean. Gantši ke be ke sa tsebe kamoo nka tšwago ka gona boemong bjo thata, eupša ka mehla Jehofa o be a mpulela tsela ya go tšwa.

Ke be ke dula ke kgahlišwa ke tlhokomelo yeo mokgatlo wa Jehofa o e bontšhago Dihlatse tšeo di lego lekatana dinageng tše dingwe. Lebakeng le lengwe ke ile ka kopana le ngwanabo rena wa mo-India yo a šomago lefelong la go dira oli. Go bonala e be e le Hlatse a nnoši ka nageng. Ka lokhareng ya gagwe o be a e-na le dipuku ka maleme a 18 a sa swanego, tšeo a bego a di nea bašomi-gotee le yena. Gaešita le mo moo madumedi ka moka ao a sa tlwaelegago a bego a thibetšwe, ngwanabo rena ga se a ka a lebala boikarabelo bja gagwe bja go bolela ditaba tše di lokilego. Bašomi-gotee le yena ba be ba tlabilwe ke go bona gore moemedi wa bodumedi bja gagwe o be a rometšwe gore a mo etele.

Ka ngwaga wa 1959 ke ile ka etela Sepania le Portugal. Bobedi bja tšona di be di le tlase ga pušo ya bonkgwete ya bahlabani ka nako yeo, modiro wa Dihlatse tša Jehofa o thibetšwe ka go tia. Ke ile ka kgona go swara diboka tše fetago lekgolo ka kgwedi, ke kgothaletša banabešo gore ba se ke ba tlogela go sa šetšwe mathata.

Ga ke sa le Noši

Ke be ke dutše ke hlankela Jehofa tirelong ya nako e tletšego ke le monna yo a sa nyalago ka nywaga e fetago 20, eupša gatee-tee ke ile ka ikwa ke lapišitšwe ke maeto a-ka a sa kgaotšego ka ntle le legae le le tsepamego. E bile mo e ka bago ka nako ye moo ke ilego ka gahlana le Annie Bianucci, e lego mmulamadibogo yo a kgethegilego wa Tunisia. Re ile ka nyalana ka 1963. Go rata ga gagwe Jehofa le therešo, go ineela ga gagwe bodireding gotee le bokgoni bja gagwe bja go ruta le go tseba ga gagwe maleme go itlhatsetše e le tšhegofatšo ya kgonthe modirong wa rena wa boromiwa le wa tikologo ka leboa le ka bodikela bja Afrika le Italy.

Ka August 1965 nna le mosadi wa-ka re ile ra abelwa go ya Dakar, Senegal, moo ke bilego le tokelo ya go rulaganya ofisi ya lekala ya lefelong leo. Senegal e be e le naga e tumilego ka go kgotlelela ga yona bodumedi, ga go pelaelo gore ka baka la mopresidente wa yona Leopold Senghor yo e lego yo mongwe wa baetapele ba sego kae ba Afrika ba Mmušo bao ba ilego ba ngwalela Mopresidente Banda wa Malawi ba thekga Dihlatse tša Jehofa nakong ya tlaišo e šoro yeo e diragetšego Malawi nywageng ya bo-1970.

Tšhegofatšo ya Jehofa e Humilego

Ka 1951 ge ke be ke tloga Gilead ke e-ya Cyprus, ke ile ka sepela le disutukheisi tše šupago. Ge ke be ke leba Turkey di ile tša fokotšega go ya go tše hlano. Eupša ka ge ke be ke sepela gakaakaa, ke ile ka swanelwa ke go tlwaela morwalo wa tekanyo ya dikhilograma tše 20 wo o bego o akaretša difaele tša-ka le motšhene wa-ka “o monyenyane” wa go tlanya. Ka letšatši le lengwe ke ile ka botša Ngwanešo Knorr yo e bego e le mopresidente wa Mokgatlo wa Watch Tower ka nako yeo gore: “O ntšhireletša go rateng dilo tše di bonagalago. O dira gore ke phele ka dikhilograma tše 20 gomme ke kgotsofetše.” Ga se ka ka ka ikwa ke amogilwe se sengwe ka baka la go se be le dilo tše dintši.

Bothata bja-ka bjo bogolo maetong a-ka e be e le go tsena le go tšwa dinageng. Ka letšatši le lengwe nageng yeo modiro o bego o thibetšwe go yona, molefiši wa makgetho o ile a thoma go phuruphutša ka difaeleng tša-ka. Se se ile sa bea Dihlatse tša nageng yeo kotsing, ka gona ke ile ka ntšha lengwalo le le tšwago go mosadi wa-ka ka baking ya-ka gomme ka re go molefiši wa makgetho: “Ke lemoga gore o rata go bala mangwalo. Na o ka rata go bala le lengwalo le le le tšwago go mosadi wa-ka le le sego ka difaeleng?” A jewa ke dihlong, o ile a kgopela tshwarelo gomme a ntumelela gore ke fete.

Ga e sa le go tloga ka 1982 nna le mosadi wa-ka re be re dutše re hlankela re le baromiwa kua Nice ka borwa bja Fora. Ka baka la boemo bjo bo fokolago bja tša maphelo, ga ke sa kgona go dira mo gontši go etša ge ke be ke dira. Eupša seo ga se bolele gore lethabo la rena le fokotšegile. Re bone gore ‘boitapišo bja rena ga se bja lefeela.’ (1 Ba-Korinthe 15:58) Ke thabela go bona batho ba bantši bao ke bilego le tokelo ya go ithuta le bona ka nywaga e mentši gotee le ditho tše di fetago 40 tša lapa lešo ba hlankela Jehofa ka potego.

Ga ke itshole le ganyenyane ka boikgafo bjoo bophelo bja-ka bja ‘go tshela’ bo bo akareditšego. Go ba gona, ga go na boikgafo le ge e le bofe bjo re bo dirago bjo bo ka bapišwago le seo Jehofa le Morwa wa gagwe Kriste Jesu ba re diretšego sona. Ge ke gopola morago nywageng e fetago 60 e fetilego yeo ke tsebilego therešo ka yona, nka bolela gore Jehofa o ntšhegofaditše ka tše dintši. Go etša ge Diema 10:22 (PK) e bolela, “tšhegofatšo ya Jehofa e a humiša.”

Ka ntle le pelaelo, “botho bya [Jehofa] bo phala bophelô ka botse.” (Psalme 63:3) Ge mathata a botšofadi a dutše a oketšega, mantšu a mopsalme yo a buduletšwego a tšwelela gantši dithapelong tša-ka: “Morêna, ké holofetše Wêna; a nke ke se lewê ke dihlong le xa-tee. Xobane ke Xo hloloxetšwe, Morêna Mong’a-ka; ke Xo botile xo tloxa byaneng. Modimo, O nthutile xo tloxa byaneng, xomme le byale ke sa fêla ke kwadiša mehlôlô ya xaxo. ’Me byale xe ke tšofala, kè le wa hlôxô-pududu, O se ntloxêlê.”—Psalme 71:1, 5, 17, 18.

[Seswantšho go letlakala 25]

Ke e-na le mosadi wa-ka Annie lehono