Na Batlaišegi Ba Tla Ka Ba Ba Le Khutšo?

NA O tla rata go bona tlaišego e fela bakeng sa batho ka moka, eupša e sego bakeng sa gago feela? Nagana ka mehlala ye:

Sonia o tlaišegile ka go fetišiša.a Sa pele, o ile a lemoga gore monna wa gagwe o be a dutše a e-na le nyatsi ka nywaga e lesome. Ka morago morwa wa gagwe yo monyenyane o ile a fetelwa ke HIV gomme a bolawa ke AIDS. Nywaga e mebedi ka morago morwa wa gagwe yo mongwe o ile a babja gomme le yena a hwa go se go ye kae ka baka la AIDS. Sonia o gopola gore: “Karolo ya mafelelo ya bolwetši bja gagwe e tšere nako e telele kudu. O be a gateletšegile kudu maikwelong, a hlobega meriri e bile a sa kgone go bona gabotse. E be e le mo go nyamišago kudu.”

Fabiana yo e lego morutwana wa yunibesithi kua Brazil o be a tshwenyegile ka go hloka toka ga tša leago ga lefase. Ka gona bophelo bja gagwe ka noši bo ile bja welwa ke masetla-pelo. Kgaetšedi ya gagwe yeo e bego e nyamile maikwelong e ile ya ipolaya. Ge Fabiana a be a lahlegelwa ke modiro, mogwera o ile a šišinya gore a tsome pai-de-santo (ngaka ya ditaola), a bolela gore Fabiana o swanetše go ba a loilwe ke motho yo mongwe gore a welwe ke madi-mabe gakaakaa! Eupša pai-de-santo ga se ya ka ya tliša kimologo. Go e na le moo, Fabiana o ile a ikwa a tlaišwa a sa kgone go robala ka baka la mathata a gagwe.

Tlaišego ya Ana e thomile e sa le ka pela kudu bophelong. O anega gore: “Ge ke be ke e-na le ngwaga o tee mma o ile a ntlogela, ka gona ke ile ka hlokomelwa ke makgolo.” Ka morago ge Ana a be a e-na le nywaga e meraro feela, makgolo wa gagwe o ile a hwa. Ana o ile a išwa lefelong la ditšhiwana kua Rio de Janeiro moo a ilego a dula gona go fihlela ge a e-na le nywaga e 13. O re: “Re be re swarwa gampe kudu moo gomme ka ba lerabele. Ge ke be ke dutše ke gola, ke be ke lwantšha mo e nyakilego go ba selo se sengwe le se sengwe.”

Go bonala tlaišego e kgoma bophelo bja motho yo mongwe le yo mongwe ka tsela e itšego. Ruri, re hwetša dikanegelo tša masetla-pelo a batho letšatši le letšatši—nako le nako ge re bogela, re bala goba re theetša ditaba. Dr. Mary Sykes Wylie o ngwala gore: “E bile . . . mehleng ya rena ya mekgwa e mentši ya poledišano moo go ilego gwa tloga go sa kgonege go phema go tšhollelwa ditaba tše mpe ka go se kgaotše. Dintwa, dikotsi tša tlhago, masetla-pelo a tša diintaseteri, polao ya mebileng e megolo, bosenyi, botšhošetši, go goboša ka tša botona le botshadi, go kata le bošoro bja ka gae—ka moka di dira gore phihlelo e sehlogo e be taba e tšwelelago leboelela e boifišago le ya letšatši le letšatši lekgolong la bo-20 la nywaga.” Moapostola wa Mokriste Paulo o hlalositše ka boripana ka tsela ya kgonthe phihlelo ya motho ka gore: “Dibopya ka moka le tšôna di sa fêxêlwa, le tšôna di sa šôkwa.”—Ba-Roma 8:22.

Go thwe’ng ka wena? Na o a tlaišega? O ka letela kimollo ya mohuta mang? Na o tla ka wa hwetša khutšo ya kgonthe? Sonia, Fabiana le Ana ba hweditše khomotšo ya kgonthe le tekanyo e kgolo ya khutšo! O ka bala ka yona sehlogong se se latelago.

[Mengwalo ya tlase]